༧རྒྱལ་བ་སྨན་རིའི་ཁྲི་འཛིན་༣༣པ་མཆོག་གི་འདས་མཆོད་ཐེངས་བརྒྱད་པ་གདན་ས་ཁྲི་བརྟན་ནོར་བུའི་རྩེ་རུ་འཚོགས་པ།
༧གདན་ས་ཁྲི་བརྟན་ནོར་བུའི་རྩེ་རུ་ཞྭ་དཀར་བསྟན་པའི་གཙུག་རྒྱན་མཉམ་མེད་རྒྱལ་བ་གཉིས་པའི་རྒྱལ་ཚབ་སྨན་རིའི་ཁྲི་འཛིན་སོ་གསུམ་པ་མཆོག་སྐུ་ཞི་བར་གཤེགས་ནས་མི་ལོ་བརྒྱད་འཁོར་བའི་འདས་མཆོད་ཐེངས་བརྒྱད་པ་དེ་ཉིད་ཕྱི་ལོ་ ༢༠༢༥ ༩ ༡༥ བོད་ཤིང་སྦྲུལ་ལོའི་ཧོར་ཟླ་༠༧པའི་ཚེས་༢༤ཉིན་ཚོགས་གནང་བ་རེད། དེ་ཡང་ཕྱི་ཚེས་༡༤ཉིན་མོ་འདས་མཆོད་ཀྱི་སྟ་བོན་མཆོད་བཟོ་ལེགས་པར་བྱས་ཏེ། ཕྱི་ཚེས་༡༥ཞོགས་པ་ཆུ་ཚོད་༠༥དང་སྐར་མ་༣༠ནས་རྒྱལ་རྔ་བརྡུངས་ཏེ། ༧སྐྱབས་རྗེ་དཔོན་སློབ་རིན་པོ་ཆེ། སྐྱབས་རྗེ་སྒྲུབ་གྲྭའི་མཁན་རིན་པོ་ཆེ། བཤད་སྒྲུབ་མཁན་སློབ་རྣམ་གཉིས་བཅས་དབུ་བཞུགས་ཐོག གྲྭ་མང་རྣམས་རྒྱལ་བསྟན་གཟི་བརྗིད་འོད་འབར་གཙུག་ལག་ཁང་ནང་འཚོགས་ཏེ། ཨ་ཁྲིད་ཀྱི་སྔོན་འགྲོ་དང་གསོལ་འདེབས་གསུངས་ནས། ལུང་ལས། སྤྲོས་བྲལ་ཡང་གསང་དོན་གྱི་མཆོད་པ་འདི།། ཞེས་གསུངས་པ་ལྟར། སྤྲོས་བྲལ་དོན་དམ་གྱི་མཆོད་པ་བླ་མེད་རྫོགས་པ་ཆེན་པོའི་གནས་ལུགས་རང་བྱུང་ཡེ་ཤེས་ཀྱི་ཉམས་ལེན་བསྐྱངས་ཏེ་ཐུན་གཅིག་བཞུགས་ནས་འཚོགས་གྲོལ། དེ་ནས་ཆུ་ཚོད་༠༦་དང་སྐར་མ་༤༠་ཐོག་འཚོགས་འདོན་གསུངས་ནས་ཞོགས་ཇ་བཞེས། ཆུ་ཚོད་༠༧དང་སྐར་མ་༣༠ཐོག་སྙན་བརྒྱུད་ཀྱི་སྔོན་འགྲོ་དང་གསོལ་འདེབས་གསུངས་ནས་བླ་མེད་རྫོགས་པ་ཆེན་པོའི་ཉམས་ལེན་ངང་ལ་ཐུན་གཅིག་བཞུགས། ཆུ་ཚོད་༠༩པའི་ཐོག་མཁན་སློབ་རྣམ་པ་དབུ་བཞུགས་ཐོག་གྲྭ་མང་འཚོགས་ཏེ་མ་ཏྲི་རིན་ཆེན་སྒྲོན་མའི་གཞུང་བསྲངས། ཉིན་རྒྱབ་ཆུ་ཚོད་༠༢་ཐོག་མ་ཏྲི་རིན་ཆེན་སྒྲོན་མའི་གཞུང་མཐར་ཕྱུངས། ཆུ་ཚོད་༠༤ཐོག་རྫོགས་ཆེན་གྱི་སྔོན་འགྲོ་དང་གསོལ་འདེབས་གསུངས་ནས་བླ་མེད་རྫོགས་པ་ཆེན་པོའི་ཉམས་ལེན་ལ་ཐུན་གཅིག་གཞུགས། སླར་ཡང་ཆུ་ཆོད་༠༥པའི་ཐོག་མ་རྒྱུད་ཀྱི་དགོངས་སྤྱོད་རྣམ་གསུམ་གསུངས་ནས་བླ་མེད་རྫོགས་པ་ཆེན་པོའི་ཉམས་ལེན་ལ་ཐུན་གཅིག་བཞུགས།
དགོང་མོ་ཞིང་གཤེགས་དམ་པ་མཆོག་གི་གསོལ་འདེབས་དབྱངས་སུ་གྱེར་བ་དང་ཕྱག་སྐོར་མཆོད་འབུལ་བྱས་ཏེ་སྒོ་གསུམ་དགེ་ལ་འབད་ནས་དམ་པ་མཆོག་གི་དུས་དྲན་སྲུང་བརྩི་ཞུས་པའི་གནས་བསྡུས་སུ་
མེ་ལོང་ཡེ་ཤེས་དྲ་བའི་གཙོ་སྒྲུབ་པས་ ༢༠༢༥ ༩ ༡༥ ཉིན་སྤེལ།། །།
པར་ལེན་པ་ཁྱུང་ཐོག་རྒོད།
