༧སྐྱབས་རྗེ་མཁན་ཆེན་ལུང་རྟོགས་བསྟན་པ་གཡུང་དྲུང་རིན་པོ་ཆེ་མཆོག་གདན་ས་༧དཔལ་གཤེན་བསྟན་སྨན་རིའི་གླིང་དུ་ཆིབས་བསྒྱུར་བསྐྱངས་པ།
ཕྱི་ལོ་ ༢༠༢༦ ཟླ་ ༠༢ ཚེས་ ༢༡ ཉིན་༧སྐྱབས་རྗེ་མཁན་ཆེན་ལུང་རྟོགས་བསྟན་པ་གཡུང་དྲུང་རིན་པོ་ཆེ་མཆོག་སྐུ་འཁོར་རྣམས་དཔལ་ལྡན་ཁྲི་བརྟན་ནོར་བུ་རྩེ་ནས་ཕེབས་ཐོན་གནང་ཏེ་གངས་ཅན་ཏི་སེ་རྒྱལ་སྤྱིའི་སློབ་གྲྭར་ཞབས་སོར་བཀོད། དེར་དགེ་སློབ་ཡོངས་ལ་མཇལ་འཕྲད་གནང་སྟེ་བཀའ་སློབ་ལམ་སྟོན་སོགས་ཀྱི་བཀའ་དྲིན་དང་བྱིན་མདུད་སོགས་བསྩལ་གནང་མཛད། ཚེས་ ༢༢ ཉིན་སྐྱབས་རྗེ་མཆོག་གི་སྐུ་འཁོར་རྣམས་རྒྱ་གར་རྒྱལ་ས་ལྡི་ལིར་འབྱོར།
སྤྱི་ཚེས་ ༢༣ ཉིན་༧སྐྱབས་རྗེ་མཁན་ཆེན་མཆོག་དང་། དཔལ་ལྡན་ཁྲི་བརྟན་ནོར་བུའི་རྩེའི་གྲྭ་ཚང་བླ་མ་དགེ་བཤེས་བློ་གྲོས་མཆོག་ལེགས། གྲྭ་ཚང་བླ་མ་དགེ་བཤེས་བསྟན་འཛིན་བློ་གྲོས། དགེ་བཤེས་སྐལ་བཟང་བློ་གསལ། དཔལ་ལྡན་ཁྲི་བརྟན་ནོར་བུའི་རྩེའི་སྤྱི་གཉེར་དགེ་བཤེས་རྨ་རོང་ཚུལ་ཁྲིམས་རྒྱ་མཚོ་བཅས་ལྡི་ལི་ནས་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་དུ་ཆིབས་བསྒྱུར་གནང་སྟེ་སོ་ལན་རྫོང་དུ་འབྱོར་བ་དང་། དེར་དཔལ་གཤེན་བསྟན་སྨན་རིའི་གླིང་གི་གཉེར་པ་དང་འཛིན་སྐྱོང་ལྷན་ཚོགས་ཀྱི་དྲུང་ཆེ། བོན་གཞིས་ཐོབ་རྒྱལ་གསར་པའི་གཞིས་འགོ་བཅས་ཕེབས་བསུར་བཅར། དེ་ནས་ཐོབ་རྒྱལ་ལ་འགོར་འབྱོར་བ་དང་བོན་གཞིས་མི་མང་རྣམས་ནས་ལྷ་བསང་དུད་པ་ནམ་མཁའ་ལ་ཁྱབ་པར་བྱས་ནས་དྲི་མེད་ཁ་བཏགས་དཀར་པོ་ལག་ཏུ་བཟུང་སྟེ་ཕེབས་བསུ་ཞུས་ཤིང་། དེ་མཚམས་གསོ་རིག་འབུམ་བཞིའི་དགེ་སློབ་རྣམས་ནས་གསོ་རིག་འབུམ་བཞི་སློབ་གྲྭའི་སྒོ་ཆེན་འགྲམ་དུ་དྲི་མེད་ཁ་བཏགས་བཟུང་ནས་ཕེབས་བསུ་ཞུས། དེ་རྗེས་༧དཔལ་གཤེན་བསྟན་སྨན་རིའི་གླིང་གི་བཤད་སྒྲུབ་མཁན་སློབ་གཙོས་པའི་འདུས་མང་གིས་སེར་ཕྲེང་བསྒྲིགས་ཏེ་ཕེབས་བསུ་ཞུས་ཤིང་གཙུག་ལག་ཁང་གི་མདུན་ཐང་དུ་སེར་སྐྱ་འདུས་མང་རྣམས་ལྷན་མཛོམས་ཐོག་གཤེན་རབ་མཆོད་ལྔ་གྲུབ་རྗེས་གཙུག་ལག་ཁང་དུ་གདན་འདྲེན་ཞུས་པ་དང་དཔལ་གཤེན་བསྟན་སྨན་རིའི་གླིང་གི་བཤད་སྒྲུབ་མཁན་པོ་དགེ་བཤེས་ཉི་མ་དོན་འགྲུབ་མཆོག་ནས་མནྜལ་འདེགས་འབུལ་ཞུས་ཐོག་འདུས་མང་ཡོངས་ནས་བླ་མ་མཆོད་པ་གསུངས་ཏེ་མཇལ་ཁ་ཞུས།
དེ་རྗེས་གཙུག་ལག་ཁང་གི་ཡང་ཐོག་གཟིམས་ཆུང་དུ་གདན་འདྲེན་ཞུས་གནང་ཞིང་། དགོང་དྲོ་ཞྭ་དཀར་བོན་གྱི་གཙུག་རྒྱན་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་སོ་བཞི་པ་ལུང་རྟོགས་ཟླ་བ་དར་རྒྱས་རིན་པོ་ཆེ་མཆོག་མཇལ་འཕྲད་གནང་།
ད་ལན་ཆེད་དུ་ཕེབས་དོན་གཙོ་བོ་༧སྐྱབས་རྗེ་བདེ་བར་གཤེགས་པ་ཡོངས་འཛིན་སྨྲ་བའི་དབང་པོ་མཆོག་གི་དགོངས་རྫོགས་མཆོད་འབུལ་ཆེད་ཡིན་སྟབས། ཕྱི་ཚེས་ ༢༠༢༦ ཟླ་ ༠༢ ཚེས་ ༢༤ ཉིན་ཞིང་གཤེགས་དམ་པ་མཆོག་གི་སྐུ་རྟེན་དུ་གསེར་སྐུ་ང་འདྲ་མ་དང་། གསུང་རྟེན་དུ་བདེ་བར་བཤེགས་པ་མཆོག་གི་གསུང་འབུམ་པོད་བཅུ་གསུམ་ཅན་དང་། ཐུགས་རྟེན་དུ་གཡུང་དྲུང་བཀོད་ལེགས་ཀྱི་མཆོད་རྟེན་བཅས་དད་བརྟེན་བསྟན་བཞག་ཏུ་དཔལ་གཤེན་བསྟན་སྨན་རི་གླིང་གི་གཙུག་ལག་ཁང་དུ་གདན་འདྲེན་ཞུས་པ་དང་། ༧སྐྱབས་རྗེ་སྨན་རིའི་ཁྲི་འཛིན་སོ་བཞི་བ་མཆོག་ཆེད་ཕེབས་གནང་ཏེ་མཇལ་དར་ཕུལ་བ་དང་། དེ་དང་འབྲེལ་གདན་ས་ཆེན་མོ་དཔལ་ལྡན་ཁྲི་བརྟན་ནོར་བུ་རྩེའི་བླ་བྲང་ནས་མང་ཇ་དང་སྐུ་འགྱེད་བཅས་ཕུལ། དེ་བཞིན་༧སྐྱབས་རྗེ་བདེ་བར་གཤེགས་པ་མཆོག་གི་བྱིན་རླབས་འདུས་མང་ཡོངས་ལ་དད་རྟེན་དུ་བསྩལ་གནང་མཛད། དེ་རྗེས་༧སྐྱབས་རྗེ་སྨན་རིའི་དཔོན་སློབ་ཡང་སྟོན་འཕྲིན་ལས་ཉི་མ་རིན་པོ་ཆེ་མཆོག་མཇལ་འཕྲད་གནང་། དེ་ནས་བོན་གཞིས་ཀྱི་མི་མང་རྣམས་ནས་མཁན་ཆེན་ལུང་རྟོགས་བསྟན་པ་གཡུང་དྲུང་རིན་པོ་ཆེ་མཆོག་མཇལ་ཁ་ཞུས་པ་དང་ལྷན་༧སྐྱབས་རྗེ་བདེ་བར་གཤེགས་པ་མཆོག་གི་དད་རྟེན་བྱིན་རླབས་རྣམས་མི་མང་ཡོངས་ལ་བསྩལ་གནང་མཛད། དེ་ནས་༧སྐྱབས་རྗེ་བདེ་བར་གཤེགས་པ་མཆོག་གི་གཟིམས་ཆུང་མཇལ་ཁ་ཞུས་པ་དང་། ཉིན་གུང་༧དཔལ་གཤེན་བསྟན་སྨན་རིའི་གླིང་གི་བླ་བྲང་དུ་གསོལ་ཚིགས་ཆེད་གདན་ཞུས་གནང་བ་ལྟར་ཕེབས། ཉིན་རྒྱབ་སྨན་རིའི་བཤད་སྒྲུབ་མཁན་པོ་མཆོག་ནས་གདན་ཞུས་ལྟར་ཉེ་ཆར་ཚེ་ལས་འདས་པ་ག་གཟི་ཚེ་རིང་དབང་རྒྱལ་གྱི་ནང་ལ་ཕེབས་ནས་ཐུགས་སྨོན་རྒྱ་ཆེན་བསྐྱངས་པ་དང་ཉེ་འཁོར་རྣམས་ལ་ཐུགས་གསོའི་བཀའ་སློབ་ཀྱང་གནང་། དེ་རྗེས་བཙུན་དགོན་རདྣ་སྨན་གླིང་དུ་ཆེད་ཕེབས་གནང་ཏེ་བཙུན་མ་རྣམས་ལ་རིན་པོ་ཆེའི་བྱིན་རྟེན་རྣམས་བསྩལ་གནང་མཛད་པ་དང་གཙུག་ལག་ཁང་མཆོད་མཇལ་གནང་། ཚེས་༢༥ ཉིན་ཞོགས་ཇ་གསོལ་གྲུབ་རྗེས་སྨན་རིའི་གླིང་གི་གསོ་རིག་འབུམ་བཞིའི་སློབ་གྲྭའི་སློབ་མ་རྣམས་ལ་མཇལ་ཁ་དང་བྱིན་མདུད་སོགས་བསྩལ་གནང་མཛད། དེ་ནས་ད་ལན་དཔལ་གཤེན་བསྟན་སྨན་རིའི་གླིང་དུ་ཆེད་ཕེབས་ཀྱི་མཛད་ཕྲིན་རྣམས་ལེགས་པར་གྲུབ་སྟེ་རྒྱ་གར་རྒྱལ་ས་ལྡི་ལིའི་ཕྱོགས་སུ་ཆིབས་བསྒྱུར་བསྐྱངས། ༢༠༢༦ ཟླ་ ༠༢ ཚེས་ ༢༦ ཉིན་ལྡི་ལི་ཕྱོགས་ཀྱི་མཛད་ཕྲིན་རྣམས་ལེགས་པར་གྲུབ་པར་གནང་ནས་ཚེས་ ༢༧ ཉིན་ནུབ་ཕྱོགས་ཡོ་རོབ་ཏུ་གནས་པའི་གདན་ས་གཤེན་བསྟན་དར་རྒྱས་གླིང་ཕྱོགས་སུ་ཆིབས་བསྒྱུར་བསྐྱངས་གནང་བ་བཅས་ཀྱི་གནས་ཚུལ་མདོར་བསྡུས་སུ།
གནས་ཚུལ་དང་པར་རིས་མཁོ་འདོན་གནང་མཁན་གྲྭ་ཚང་བླ་མ་དགེ་བཤེས་བློ་གྲོས་མཆོག་ལེགས།
