རྗེ་རིན་པོ་ཆེའི་རྣམ་ཐར་མདོར་བསྡུས་ངོ་མཚར་པདྨོ་སྟོང་ལྡན་ཞེས་བྱ་བ།

 ༄༅། །རྒྱལ་ཀུན་ངོ་བོ་མཉམ་མེད་བླ་མ་ལ།། སྒོ་གསུམ་གུས་པ་ཆེན་པོས་ཕྱག་བགྱིས་ནས།། གང་དེའི་སྐྱེས་རབས་རྣམ་ཐར་རིམ་པ་ལས།། དཔེར་བཀོད་ཞལ་ཐང་མདོར་ཙམ་བྲི་ཐབས་བསྟན།། རིགས་བདག་ངོས་བཟུང་སྐྱེས་རབས་དང༌།། རྣམ་པར་ཐར་པ་གསུམ་གྱིས་བཤད།། ཐོག་མར་བོན་སྐུའི་མཁའ་དབྱིངས་ལས།། ལོངས་སྐུ་རིགས་ལྔར་མངོན་བསྟན་ཚེ།། ནུབ་ཕྱོགས་བདེ་ཆེན་ཞིང་གི་མགོན།། རྒྱལ་བ་བྱེ་བྲག་དངོས་མེད་ཅེས།། རཱ་གའི་མདོག་འཆང་ལོངས་སྤྱོད་རྫོགས།། ཕྱག་མཚན་ཆག་ཤིང་འཁོར་ལོ་བསྣམས།། ཡུམ་ནི་དམར་མོ་ལོངས་སྤྱོད་རྫོགས།། གཡས་པས་ཉི་མ་གཡོན་པ་ཡིས།། ཟངས་ཕྲེང་རྩ་བརྒྱད་ཐུགས་ཀར་འདྲེན།། གཡུ་འབྲུག་བསྣོལ་བའི་གདན་ལ་བཞུགས།། དང་པོའི་རིགས་བདག་དངོས་ཉིད་དོ།།

    གཉིས་པ་སྐྱེས་རབས་རིམ་པ་ལས།། ནང་ལྟར་སྔགས་ལུགས་སུ་བཤད་ན།། དང་པོར་ཤེས་རབ་ལྷ་མཆོག་སྟེ།། འཇམ་དཔལ་སྨྲ་བའི་སེང་གེའི་མཚན།། དམར་སེར་གཡུ་འབྲུག་གདན་ལ་བརྗིད།། རལ་གྲི་པོ་ཏི་སྒྲོན་མེ་འཛིན།། འཕྲག་གོང་ཐབས་ཤེས་ཉི་ཟླས་བརྒྱན།། གཉིས་པ་ལྷ་ཀླུ་མི་གསུམ་དུ།།གསུམ་སྣང་སྤྲུལ་པ་མཛད་ཚུལ་ནི།། རྒྱལ་མཁར་བ་ཆོད་གནས་མཆོག་ན།། རྒྱལ་གཤེན་མི་ལུས་བསམ་ལེགས་ཞེས།། རྒྱལ་པོའི་ཚུལ་འཛིན་ཕྲེང་བ་འདྲེན།། དབུ་སྐྲ་ཐོད་རྡིང་འགྱིང་ཐོད་བརྗིད།། ཕྱོགས་བཞིའི་དྲེགས་གནོན་ངོ་མཚར་རྟགས།། ཀྱེ་མ་འོད་མཚོའི་ལྷ་ཞལ་གཟིགས།། ཆུ་མིག་བརྒྱད་ཅུ་རྩ་གཉིས་དབུས།། ཤེལ་གུར་དཀར་པོའི་ནང་ཤེད་ན།། ཀླུ་བོན་ཡེ་ཤེས་སྙིང་པོ་ནི།། དཀར་གསལ་སྦྲུལ་གྱི་ཐོད་རྡིང་འཛིན༌།། ཆུ་དར་བེར་གསོལ་བུམ་པ་འཛིན།། ཀླུ་ལ་བོན་འཆད་དངོས་གྲུབ་སྤྱོད།། རི་རྒྱལ་ལྷུན་པོའི་རྩེ་མོ་ཡི།། གསས་མཁར་མཛེས་པའི་དབུས་དཀྱིལ་དུ།། ནམ་མཁའ་སྣང་བ་མདོག་ཅན་ཞེས།། མཐིང་སྔོན་གསེར་གྱི་པོ་ཏི་འཛིན།། རི་རབ་རྩེར་འཕུར་ཐོག་རྒོད་བསྒྱུར།། ཁྱུང་འབྲུག་སེང་གེར་རོལ་རྩེད་མཛད།། ཤེས་རབ་ལྷ་བདུན་མངོན་ཞལ་གཟིགས།། མུ་སྟེགས་མུན་པའི་ཁྲོད་བདག་བཏུལ།། གསུམ་པ་རྟག་གཟིགས་སྔགས་གླིང་དུ།། ལི་མུར་གཙུག་ཕུད་ཅེས་བྱ་བ།། སུམ་ལྡན་རིག་འཛིན་གྲུབ་ཐོབ་ཚུལ།། དཀར་གསལ་སྒྲ་བསྒྱུར་ཡི་གེ་འཛིན།། རླུང་ལྷ་དབང་བསྒྱུར་རིག་གནས་འཆད།། གཞའ་འོད་སྤྲིན་དཔུང་དཀྱིལ་དུ་བཞུགས།། བཞི་པ་དྭང་ར་གཡུ་བུན་དུ།། སད་ནེ་གའུ་དུང་མདངས་ལྡན།། དབུ་ལ་གཡུ་ཡི་པྲ་ཕུད་དང༌།། སྐུ་ལ་གངས་དབྱིའི་ཐུལ་པ་གསོལ།། མཚོ་སྨན་དྲོ་འདྲེན་བུམ་གཏེར་འབུལ།། སྐུ་ལ་མེ་འབར་མཁའ་ལ་འཕུར།། རྔ་ལ་ཆིབས་ནས་མཚོ་སྟེང་རྒྱུག། མཚོ་ནང་ཤེལ་གྱི་མཆོད་རྟེན་བསྐོར།། ལྔ་པ་རྒྱ་གར་རྒྱ་ནག་ཏུ།། གཉིས་སྣང་སྤྲུལ་པ་མཛད་པ་སྟེ།། རྒྱ་གར་བྱང་ཕྱོགས་བྲུ་ཤའི་ཡུལ།།རི་བོ་གྷིར་མི་ཀྲ་ཤ་རུ།། བླ་མེད་དོན་རྟོགས་མཆོག་གི་གཤེན།། གར་བ་པྲ་ཏི་རྣལ་འབྱོར་ཆས།། མཉམ་བཞག་སྒོམ་ཐག་རས་དཀར་གསོལ།། གྲུ་གཟིངས་མེད་པར་རྒྱ་མཚོ་བརྒལ།། རི་རབ་རྩེར་འཕུར་ལྷ་གནས་བསྒྲོད།། རྒྱ་ནག་གང་བུ་དམར་རུ་ཡི།། མཚལ་ཕུག་ཉི་དབང་མདངས་ལྡན་དུ།། རྒྱ་བོན་ཟིང་པ་མཐུ་ཆེན་ཞེས།། དམར་སྨུག་ཁྲོ་འཛུམ་ཐོར་ཅོག་འཁྱིལ།། ན་བཟའ་ཤིང་གོས་སྔོ་ལྗང་གསོལ།། ཟླ་བ་རྟར་ཞོན་ཉི་ཟེར་བསྣམས།། འཇའ་ཚོན་འཕྲེང་བ་བསྣོལ་ཞིང་འཐེན།། ལུང་སྐམ་ཆུ་འབེབ་རྒྱ་རྣམས་འདུལ།། དྲུག་པ་གནམ་མཚོའི་དོ་གླིང་དུ།། མཁས་མཆོག་སྟོང་རྒྱུང་མཐུ་ཆེན་ཞེས།། མཐིང་སྔོན་སྟག་གི་ཤམ་ཐབས་ཅན།། དབུ་ཞལ་ཆ་བྱད་བྲམ་ཟེའི་ཚུལ།། ཕྱག་ན་ཐུན་སྔགས་གསེར་ཙོ་འཕེན།། ལོག་འདྲེན་བགེགས་སྲིན་དངོས་སུ་སྒྲོལ།། ཐོད་ཞལ་འཛིན་པའི་རིགས་མ་བསྟེན།། ལྷ་སྲིན་སྡེ་བརྒྱད་བྲན་དུ་བཀོལ།། བདུན་པ་མཉམ་མེད་བླ་མ་སྟེ།། རྣམ་ཐར་རྒྱས་པ་འོག་ཏུ་འཆད།། ཕྱི་ལྟར་མདོ་ལུགས་སུ་བཤད་ན།། དང་པོ་སྟོན་མཆོག་གཤེན་རབ་དྲུང༌།། རྣམ་བཞིའི་མཁན་པོ་གཙུག་གཤེན་རྒྱལ།། སྡེ་སྣོད་འབྱུང་གནས་སེམས་དཔའི་གཙོ།། གསེར་མདོག་ཧོས་རུ་ལྷུང་བཟེད་འཆང༌།། གཉིས་པ་རྨ་རི་དེལ་གསུམ་དུ།། འདུལ་བསྟན་ཕྱི་དར་སྲོལ་གཏོད་པ།། སོག་སྟོན་ཁྲི་འབར་ཚུལ་ཁྲིམས་མཚན།། མུ་ཟི་བསམ་གཏན་ཏིང་འཛིན་ལས།། བཀྲོལ་ཏེ་དྲང་སྲོང་ཆིག་རྫོགས་ཞུས།། གོས་དྲུག་རྫས་ལྔས་རྣམ་པར་མཛེས།། གསུམ་པ་འདུལ་བསྟན་གསལ་བྱེད་མཆོག། ཡར་འབྲོག་སྟག་ལུང་དར་མ་རིར།། མེ་སྟོན་ཤེས་རབ་འོད་ཟེར་ཞེས།། མཛོད་སྤུ་རྒོད་ཀྱི་ཐེལ་ཕྲན་འདྲ།། སངས་རྒྱས་བསྟན་གཙོའི་མངོན་ཞལ་གཟིགས།། འཆད་རྩོད་རྩོམ་གསུམ་བོན་བསྟན་སྤེལ།། བཞི་པ་བྲུ་ཡི་རྒྱལ་ཐེབས་ཏེ།། གཡོར་མེ་གྲགས་པའི་དཔལ་ཞེས་བྱ།། དབུས་རི་ནག་པོའི་དགོན་པ་རུ།། ཡི་དམ་ཞི་ཁྲོའི་ཞལ་ཡང་གཟིགས།། ལྷ་དང་ལྷ་མོས་རོལ་མོ་འབུལ།། ལྔ་པ་གཡས་རུར་འ་ཞའི་གདུང༌།། འགྲོ་མགོན་བློ་གྲོས་རྒྱལ་མཚན་ཞེས།། སྨང་ར་ཨག་ཚོམ་བྲམ་ཟེའི་ཚུལ།། གཡས་རུ་བཀྲ་ཤིས་བདེ་སྒང་དུ།། ཁྲོ་མཆོག་འབྲུག་གསས་མངོན་ཞལ་གཟིགས།། ཁོད་སྤུངས་དྲན་པས་ཞལ་བསྟན་ཏེ།། རྩ་རླུང་འཕོ་ཁྲིད་གདམས་པ་སྩལ།། དྲུག་པ་བྲུ་སྟོན་བསོད་རྒྱལ་ཞེས།། འདུལ་ཆས་རྐེད་ཕུར་སྒོམ་ཐག་མཛེས།། ཕྱོགས་མེད་གདུལ་བྱའི་འགྲོ་དོན་མཛད།། བདུན་པ་མཁས་གྲུབ་ཉིད་ཡིན་ནོ།།

གསུམ་པ་མཁས་གྲུབ་དེ་ཉིད་ཀྱི།། རྣམ་ཐར་མདོར་བསྡུས་འགོད་པ་ལ།། ས་བཅད་རྣམ་པ་ལྔ་ཡོད་པའི།། དང་པོ་སྐྱེ་བ་བཞེས་ཚུལ་ནི།། འཁྲུངས་ཡུལ་ཤར་ཕྱོགས་རྒྱལ་མོ་རོང༌།། དམུ་རྡོ་ལྷ་གཉན་ཉེ་བའི་གནས།།གབ་ཏོག་ཤ་བ་རི་ཡི་འགྲམ།། ས་གནས་ཁྱད་འཕགས་སྟེགས་ཅོག་ཅེས།།མཎྜལ་ཐང་དུ་བཀོད་འདྲའི་དཀྱིལ།། སྔགས་བོན་བརྒྱུད་འཛིན་གྲོང་ཁྱེར་དབུས།། ཡབ་ནི་དབྲ་རིགས་ཀླུ་རྒྱལ་དང༌།། ཡུམ་ནི་རིན་ཆེན་སྨན་གཉིས་སྲས།།རབ་བྱུང་དྲུག་པའི་མེ་སྤྲེལ་ལོ།། དཔྱིད་ར་སྟག་ཟླའི་ཚེས་ལྔའི་ཉིན།། བདེ་དང་བཅས་ཏེ་སྐུ་བལྟམས་སོ།། དེ་ཚེ་ཡུལ་མི་ཀུན་མཐོང་བར།། གནམ་ལ་ཉི་ཟླ་སྐར་གསུམ་བཀྲ།། མེ་ཏོག་ཆར་བབས་འཇའ་ཚོན་འཁྲིགས།། ཁྱད་པར་གདུལ་བྱ་ལས་དག་འགས།། སྤྲིན་གསེབ་ལྷ་དང་ལྷ་མོ་ཡིས།། མཛེས་པའི་གར་སྟབས་བསྒྱུར་བ་མཐོང༌།། ཀུན་གྱིས་ངོ་མཚར་ཆེ་བ་གླེངས།།

    གཉིས་པ་ཐོས་བསམ་སྦྱོང་ཚུལ་ནི།། ཆུང་ནས་སྔོན་གྱི་ལས་སད་པས།། ཡིག་འབྲུ་སུམ་ཅུ་རང་རྡོལ་མཁྱེན།། ཡབ་ཀྱི་དྲུང་ནས་བྲི་ཀློག་དང༌།། མོ་རྩིས་གཏོ་དང་སྨན་དཔྱད་སོགས།། རྒྱུ་ཡི་བོན་ལ་སྦྱང་ཚུལ་མཛད།། ཕྱོགས་ཙམ་གསན་པས་ལེགས་པར་རྟོགས།། མཚན་ཡང་གཡུང་དྲུང་རྒྱལ་དུ་བཏགས།། ཁྱད་པར་དགུང་ལོ་བཅུ་ཡི་སྟེང༌།། མི་རྟག་ངེས་འབྱུང་དྲག་པོ་ཤར།། ཕྱྭ་བླ་གཡུང་དྲུང་རྒྱལ་མཚན་དྲུང༌།། བསྙེན་གནས་དང་ནི་དགེ་བསྙེན་དང༌།། དགེ་ཚུལ་རབ་བྱུང་སྡོམ་པ་བཞེས།། ཚུལ་མཚན་ཤེས་རབ་རྒྱལ་མཚན་གསོལ།། ཤ་ཆང་སྒོག་ཙོང་གཏན་དུ་སྤངས།། དགེ་སྤྱོད་ཆབ་གཏོར་ཆག་མེད་མཛད།།གཞན་ཡང་བླ་མ་དེ་ཉིད་དང༌།། ཕོ་རྩེ་ཡེ་ཤེས་རྒྱལ་མཚན་དང༌།། ཝལ་ཝལ་ཤེས་རབ་རྒྱལ་མཚན་དང༌།། རྟོགས་ལྡན་ཤེས་རབ་བློ་གྲོས་དང༌།། སྒོམ་ཆེན་བསོད་ནམས་རྒྱལ་མཚན་དང༌།། ཁོད་སྤོ་སྣང་ལྡན་གཙུག་ཕུད་སོགས།། སྨད་ཕྱོགས་བླ་མ་མཆོག་རྣམས་ལས།། དབང་ལུང་མན་ངག་ཟབ་དགུ་མནོས།། དེ་ནས་མ་མཆོག་སྲིད་རྒྱལ་གྱིས།། ལུང་བསྟན་བྱུང་ཞིང་གྲྭ་ས་རུ།། འབྱོན་པར་དགོངས་ཏེ་ཡབ་ཡུམ་ལ།།ལན་ཅིག་མཇལ་བར་ཞལ་བཞེས་ནས།། དགོངས་པ་ནན་གྱིས་བཀྲོལ་ཏེ་བྱོན།། མདོ་སྨད་འབྲི་ཆུ་གསེར་ལྡན་ཁར།། རྗེ་བཙུན་བློ་བཟང་གྲགས་པ་ཡིས།། ཆོས་གོས་བཀལ་ཏེ་རྟེན་འབྲེལ་བརྟག། དེ་ཚེ་རྗེ་ཉིད་དེར་བྱོན་ནས།། ཐུགས་བསྐྱེད་གཟབས་པས་ཅུང་མ་ཁེབས།། མཁའ་ནས་བོན་སྐྱོང་ཚོགས་རྣམས་ཀྱིས།། དགྱེས་ཤིང་ལེགས་པའི་གད་མོ་བཞད།། བོན་དང་ས་དགེ་རྙིང་མ་ཡི།། འདུལ་ཞིང་ཕྲན་ཙམ་ཡོད་པར་ཤར།། དེ་ཡང་རྗེ་འདིའི་བཀའ་དྲིན་ནམ།། བསྟོད་ཚིག་ཤོ་ལོ་ཀ་རེ་རེ།། ཕན་ཚུན་ཕུལ་ནས་ནམ་ཞིག་བར།། གཅིག་བསྟན་གཅིག་གྲོགས་བྱེད་པར་ཆད།། དེ་ནས་ཚ་བ་སྒང་སྟོད་དུ།། མཁས་གྲུབ་རིན་ཆེན་བློ་གྲོས་མཇལ།། རྩེ་གཅིག་མོས་པས་ཕྱག་ཕྱིར་འབྲིང༌།། ཕྱི་ནང་གསང་བ་ཡང་གསང་གི །ལག་ལེན་དབང་ལུང་ཁྲིད་ཐམས་ཅད།། བུམ་པ་གང་བྱོའི་ཚུལ་དུ་ཐོབ།། དེ་ནས་དབུས་ཀྱི་ན་ལེན་ཏྲར།། རོང་སྟོན་ཤེས་བྱ་ཀུན་རིག་མདུན།། ཕར་ཚད་འདུལ་མངོན་དབུ་སྡོམ་གྱི།། གཞུང་ལུགས་ཀུན་ལ་ཐོས་བསམ་སྦྱངས།། གསང་ཕུ་ལ་སོགས་དབུས་གཙང་གི །རྩོད་གྲྭ་ཀུན་ལ་དམ་བཅའ་མཛད།། སྒྲུབ་དང་སུན་འབྱིན་ཚར་གཅོད་ཀྱིས།། རྒོལ་བའི་ཚོགས་ལས་རྣམ་རྒྱལ་ཏེ།། རབ་འབྱམས་ཆེན་པོར་མཚན་བཏགས་མཛད།། དགུང་ལོ་སུམ་ཅུ་སོ་གཅིག་སྟེང༌།། འདུ་གནས་ཆེན་པོ་དབེན་ས་ཁར།། སྒྲིག་ཞུགས་མཛད་ནས་ཐོས་བསམ་སྦྱངས།། མཁན་ཆེན་ཚུལ་ཁྲིམས་ཡེ་ཤེས་སོགས།། དྲང་སྲོང་རྨ་མེད་བཅུ་ཕྲག་དྲུང༌།། དྲང་སྲོང་བསྙེན་རྫོགས་སྡོམ་པ་བཞེས།། ཉིས་བརྒྱ་ལྔ་བཅུའི་བསླབ་ཁྲིམས་རྣམས།། མིག་འབྲས་བཞིན་དུ་གཅེས་པར་མཛད།། འཇད་ཀྱི་ཞང་སྟོན་བསོད་རྒྱལ་ལ།། མ་རྒྱུད་བྱམས་མའི་སྐོར་རྣམས་གསན།། བསྒྲུབས་པས་གཙོ་མོའི་ལྷ་ཞལ་གཟིགས།། དེ་ཚེ་རྗེ་བཙུན་དེ་ཉིད་དང༌།། དམུ་གཤེན་ཉི་མ་རྒྱལ་མཚན་གཉིས།། རྫུ་འཕྲུལ་གྲུབ་རྟགས་འགྲན་ཚུལ་བསྟན།། གཉིས་ཀ་ནམ་མཁའི་དབྱིངས་སུ་འཕུར།། ན་བཟའ་ཉི་མའི་ཟེར་ལ་བཀལ།། རྩལ་འགྲན་དང་པོ་འདི་ཡི་དུས།། རྫུ་འཕྲུལ་དམུ་གཤེན་དཔགས་པ་ཙམ།། དོན་དུ་རིག་འཛིན་རྣམ་སྤྲུལ་ཏེ།། མཚུངས་མོད་འཁྲུངས་ཡུལ་དག་ཞན་དང༌།། གདུང་རྒྱུད་མཐོ་དམན་དོན་དུ་གསུངས།། ན་རིང་མེ་སྟོན་ཀུན་བཟང་མདུན།། དབལ་ཕུར་སྡེ་སྐོར་དོན་གསུམ་གསན།། དབང་བསྐུར་མཛད་ཚེ་མེ་སྟོན་ཉིད།། དབལ་གཤེན་སྟག་ལ་མེ་འབར་དང༌།། སྲས་རྣམས་ལྷ་དང་ལྷ་མོར་གཟིགས།། དབང་རྫས་རྣམས་ལ་མེ་སྟག་འཕྲོས།། དད་པའི་ངེས་ཤེས་དཔག་མེད་ཤར།། ཁུ་ཚ་མགར་སྟོན་ཡབ་སྲས་ཀྱི།། གཏེར་ཕུར་རྣམས་ཀྱང་དབང་རྟགས་སུ།། ཕ་ནོར་བུ་ལ་སྤྲོད་བཞིན་ཏུ།། བསྟན་འདིའི་བདག་པོ་ཡིན་གསུངས་གནང༌།། ཚུར་ལམ་བཀྲ་ཤིས་རྫོང་ཁ་རུ།། ཕྱག་ནས་ཞུས་པས་སྨོན་ལམ་མཛད།། ཕྱིས་སུ་དམག་མི་སྟོང་ཕྲག་ལྷག། རྫོང་དེར་རྒོལ་ཡང་བསྐྱད་མ་ཚུགས།། ཕྱག་ནས་ཕོག་པའི་མི་ཀུན་ལ།། གྲི་མཚོན་སོགས་ཀྱིས་ཚུགས་མ་གྱུར།། དེ་ཚེ་དམག་མི་ཐམས་ཅད་ཀྱིས།། རྗེ་ལ་གུས་འབུལ་སྐྱབས་འཇུག་ཞུས།། དེ་ལྟར་ཐུན་མོང་གྲུབ་པའི་རྟགས།། མང་ཡང་རྒྱས་པར་བརྗོད་མི་ནུས།། དེ་ནས་བཀྲ་ཤིས་ཕྱུག་མོར་བྱོན།། གསང་ཕུག་སུས་ཀྱང་མ་རྙེད་པ།། རྗེ་ཉིད་བྱོན་འཕྲལ་ལྷོ་ཤར་ནས།། ངོ་མཚར་དང་བཅས་རྙེད་དེར་བཞུགས།། རིག་འཛིན་མཁའ་འགྲོའི་སྒྲུབ་པ་མཛད།། མར་སྟོན་སྙན་རྒྱུད་ཞི་གཅོད་ཀྱིས།། གཉན་ས་ལམ་ཁྱེར་འགྲོ་དོན་སྐྱོང༌།། ཚིག་བཤད་ལག་ལེན་སོགས་ཀྱང་མཛད།། འགྲོ་མགོན་ཚེ་དབང་རིག་འཛིན་གྱི།། ཞལ་གཟིགས་བྱིན་རླབས་དབང་སྐུར་ཐོབ།། གནས་བརྒྱད་གསོལ་འདེབས་བསྟོད་ཚིག་ཕུལ།། བོད་ཡུལ་ལྷ་སྲིན་དམ་ལ་བཏགས།། གཞན་ཡང་དབུས་གཙང་གངས་ཁྲོད་ཀྱི།། དབེན་གནས་རྣམས་སུ་སྒྲུབ་པར་མཛད།། ཁྱད་པར་རྫོགས་ཆེན་བླ་མེད་ཀྱི།། ཉམས་ལེན་ཉིན་མཚན་འབྲལ་མེད་སྐྱོང༌།། འཁོར་འདས་སྣང་སེམས་དབྱེར་མེད་འདྲེས།། མཐའ་བྲལ་ཀློང་སྒོམ་ཆེན་པོར་འཁོད།། དེ་ལྟར་སྡོམ་པ་གསུམ་ལྡན་པའི།། དྲང་སྲོང་རིག་འཛིན་ཆེན་པོའོ།། གསུམ་པ་བསྟན་འགྲོའི་དོན་མཛད་ཚུལ།། ཀུན་མཁྱེན་མཉམ་མེད་བླ་མ་དེ།། མཁས་པའི་གྲགས་པ་ཆེར་གྱུར་ཚེ།། བྲུ་ཡི་གདུང་འཛིན་རྣམ་གཉིས་ཀྱིས།། དབུ་རྩེ་དཀར་དམར་གདན་ས་ཕུལ།། འཆད་རྩོད་རྩོམ་གསུམ་ལ་སོགས་པའི།།བསྟན་པའི་བྱ་བ་རྒྱ་ཆེར་མཛད།། རིང་པོར་ལོན་ནས་ཡབ་ཡུམ་དང༌།། མཇལ་བའི་ཞལ་བཞེས་ཐུགས་ལ་འཕྲེང༌།། སློབ་མ་རིན་ཆེན་རྒྱལ་མཚན་བཅས།།རྣལ་འབྱོར་ཚུལ་མཛད་མདོ་སྨད་གཤེགས།། ཆུ་ཆེན་ཡུལ་ཕྱོགས་ཕེབས་ཙམ་དུ།། ངོ་མི་ཤེས་པའི་སྤྲུལ་བསྒྱུར་གྱིས།། ཡབ་ཡུམ་དྲུང་ཕེབས་གནས་གཡར་མཛད།། ཟླ་ཤས་བཞུགས་ནས་ཡབ་ཡུམ་སོགས།། འདུས་པ་རྣམས་ལ་དབང་ལུང་དང༌།། ཞལ་གདམས་སོགས་ཀྱིས་བོན་འཁོར་བསྐོར།།ཡར་ལ་ཕེབས་ཁར་ཡབ་ཡུམ་ལ།། འཁོར་བ་གནས་མཐུན་མགྲོན་ལྟ་བུའི།། ཞལ་གདམས་གནང་སྟེ་སྨོན་ལམ་མཛད།། ཁྲི་འདི་ཞག་བདུན་མ་བཤིག་དང༌།། རྟེན་འབྲེལ་ཡོད་དོ་གསུངས་ནས་གཤེསྒེགས། ། ཞག་བདུན་ནང་པར་ཁྲི་བཀྱག་ཚེ།། དངུལ་སྲང་བརྒྱ་དང་ཞིབ་གསལ་གྱི།། ཕྱག་བྲིས་རྙེད་པས་ཡབ་ཡུམ་ཀྱང༌།། རྟོག་པ་ཚིམས་ནས་ངེས་ཤེས་འདྲངས།། དེ་ནས་རྗེ་ཉིད་དར་མདོར་ཕེབས།། མ་རུང་དུན་ཙེའི་ཕྲག་དོག་ལ།། བརྟེན་ནས་དགོན་ཆེན་དབེན་ས་ཁ།། འབྱུང་བས་འཇིག་པའི་ཉམས་རྟགས་ཤར།། ཐུགས་ཆད་སྟོད་ཕྱོགས་མི་ཕེབས་དགོངས།། ལ་མོ་རྩེར་བཞུགས་ཀེང་ཙེ་བསྒྲུབས།། བསྟན་པའི་བདག་པོར་གྱུར་པའི་རྟགས།། ཉི་ཟླ་ཁོང་དུ་མིད་པ་དང༌།། ལྷ་ཞལ་མངོན་སུམ་ཁུམས་པར་གྲུབ།། འགྲོར་ཕན་སློབ་མ་མང་དུ་བྱུང༌།། དེ་མཚམས་མ་ཅིག་སྲིད་རྒྱལ་གྱིས།། འདུ་གནས་གཡས་རུ་དབེན་ས་ཁ།། དུས་དང་ལས་ཀྱིས་བསྲུང་མ་བཏུབ།། འོན་ཀྱང་གཡུང་དྲུང་ཁམས་བརྒྱད་སོགས།། ཁྱོད་ཀྱི་རྟེན་སྐལ་སྣ་ཚོགས་ཞིག། བོན་སྐྱོང་ཚོགས་ཀྱིས་སྲུང་ནས་ཡོད།། གཙང་དུ་སོང་ལ་བསྟན་པ་ཚུགས།། བསྟན་འགྲོར་བདེ་སྐྱིད་འབྱུང་བར་འགྱུར།། དེ་སྐད་ཞལ་གཟིགས་ལུང་བསྟན་ཚེ།། དཔོན་སློབ་རྣམ་གཉིས་གཙང་དུ་ཕེབས།། ལམ་བར་རྟེན་འབྲེལ་ཕུན་སུམ་ཚོགས།། དབེན་ས་ཆགས་པའི་ཤུལ་དེ་རུ།། བསྐང་གསོལ་མཛད་ནས་གཟིགས་རྟོག་ཚེ།། བྲུ་ཡི་ཐུགས་དམ་ཁམས་ཆེན་དང༌།།གསེར་མཆོད་མཁར་ཉག་གཡང་རྟེན་སོགས།། དཀོར་ཆས་སྣ་ཚོགས་དངོས་གྲུབ་རྙེད།། དབེན་གནས་གཡས་རུ་མཁར་སྣར་བྱོན།། སྔགས་སེམས་ཟུང་འཇུག་བསྒྲུབ་པར་མཛད།། གྲུབ་རྟགས་བསྟན་པའི་དབུ་འཛུགས་ཕྱིར།། དབུ་སྐྲ་གཏོར་བས་སྐུ་ཤུག་འཁྲུངས།། རྡོ་ལ་ཕྱག་གིས་ཀ་བྲིས་ཤིང༌།། མཁར་གསིལ་རྗེས་དང་ཞབས་ཀྱིས་རྗེས།། མི་འགྱུར་བཀའ་རྟགས་གསལ་བར་བཞག། མཚན་ཉིད་སྔགས་སེམས་ལ་སོགས་པའི།། དགོངས་འགྲེལ་བཀའ་རྟེན་མང་དུ་མཛད།། ཁྱད་པར་བསྟན་འགྲོའི་དོན་ཆེད་དུ།། རི་ཁྲོད་དགོན་སྡེ་བཏབ་པར་དགོངས།། རིན་སྤུངས་རྒྱལ་རྩེའི་ཆོས་རྒྱལ་སོགས།། རྒྱལ་ཕྲན་སྦྱིན་བདག་ཚོགས་རྣམས་ཀྱིས།། ས་ཡི་མིང་སྟེར་ཕུལ་ནས་ཀྱང༌།། དགེ་སྡོང་བྱེད་པར་ཁས་བླངས་ནས།། དགོན་པ་འདེབས་པའི་ཞུ་ཕུལ་ཀྱང༌།། ཞལ་གྱིས་མ་བཞེས་མཁའ་འགྲོ་ཡིས།། ལུང་བསྟན་ཇི་བཞིན་མཛད་པར་དགོངས།། དེ་ཚེ་འགྲོ་དོན་དུས་བབས་རྟགས།། ད་ལྟ་སྨན་དགོན་ཡོད་པའི་སར།། ལོ་གསུམ་གོང་ནས་དུས་བཟང་རྣམས།། དུང་གླིང་རོལ་མོའི་སྒྲ་གྲགས་པ།། ཕྱུག་རྫི་ཡང་ཡང་ཐོས་པར་བྱུང༌།། དགུང་ལོ་ལྔ་བཅུ་ཤིང་བྱ་ལོར།། ཁྱུང་ཆེན་ཀླུ་སྟེང་བརྗིད་འདྲ་འམ།། ཡབ་དང་ཡུམ་མཚན་ལྡན་པའི་ས།།ལུང་བསྟན་ཐོབ་བཞིན་གནས་དེར་ཕེབས།། ས་དེར་གནས་པའི་རྣལ་འབྱོར་གཉིས།། འགྲོ་གྲབས་བྱེད་ཀྱིན་ཁལ་བཀལ་ཚེ།། རྗེ་ཡིས་འདིར་བཞུགས་ཇ་སྐོལ་གསུངས།། ཁོང་གཉིས་ཆུ་ཐག་རིང་ཞེས་བཟླས།། དེ་ཚེ་མཉམ་མེད་ཆེན་པོ་ཡིས།། མཁར་བསིལ་བཙུག་པས་ཆུ་མིག་བརྡོལ།། ཁོང་རྣམས་ངོ་མཚར་དཔག་མེད་སྐྱེས།། ཇ་སྐོལ་བཀྲ་ཤིས་སྨོན་ལམ་མཛད།། དེ་ནས་ས་གའི་དུས་བཟང་ཉིན།། སློབ་མ་རིན་ཆེན་རྒྱལ་མཚན་ལ།། གཟན་ཐུར་རྡོ་དཀར་གང་ཁྱེར་ལ།། མིག་བཙུམ་གོམ་པ་དགུ་རེའི་སར།། རྡེའུ་རེ་རེ་ཞོག་ཅིག་གསུངས།། འུར་སྒྲ་གནམ་སར་གྲགས་པ་ཙམ།། མང་དུ་བྱུང་ཕྱིར་སྤྱན་གྱིས་གཟིགས།། གྲྭ་ཤག་དྲུག་ཅུའི་རྟེན་འབྲེལ་གྱུར།། རྗེ་ཡི་ཞལ་ནས་འདི་སྐད་གསུངས།། དུས་འདིར་སྤྱན་བཙུམ་མ་ཡེངས་པར།། རྡོ་དཀར་ཡོངས་རྫོགས་བཀོད་ནུས་ན།། སྔར་གྱི་དབེན་སའི་དགོན་ལས་ལྷག། ཆགས་པར་ཡོད་དེ་ཅུང་མ་འགྲིག། ད་ནི་རྒྱ་ཆེར་མ་གྱུར་ཀྱང༌།། མཐར་རྒྱུན་རིང་པོར་བརྟན་ནོ་གསུངས།། རྟེན་འབྲེལ་གཟིགས་ནས་ལོ་གང་དེར།། བཀྲ་ཤིས་སྨན་རིའི་དགོན་པ་བཏབས།། བསྟན་འགྲོར་བདེ་སྐྱིད་འབྱུང་བ་ཡི།། ཐུགས་བསྐྱེད་སྨོན་ལམ་རྒྱ་ཆེན་མཛད།། བསྟན་པ་ཡུན་རིང་དར་རྒྱས་ཕྱིར།། ཡི་དམ་ཕྱི་ནང་གསང་གསུམ་དང༌།། བོན་སྐྱོང་སྲུང་མའི་ཚོགས་རྣམས་ཀྱི།། རྟེན་རྫས་སྒྲུབ་རྫས་ཀུན་བསགས་ཏེ།། བསྙེན་སྒྲུབ་ལས་སྦྱོར་རྟགས་ཐོན་མཛད།། གྲུབ་རྟགས་ཀུན་བཟང་སྒྲུབ་པའི་ཚེ།། པོམ་རའི་ཞལ་གཟིགས་ལུང་བསྟན་མཛད།།པོམ་ར་སྒྲུབ་ཚེ་ཀུན་བཟང་གི། ཞལ་གཟིགས་དབང་བསྐུར་བྱིན་རླབས་ཐོབ།། པོམ་ར་གཟིགས་ནས་ཤར་ཕྱོགས་ཀྱི།། ཕ་བོང་དཀར་པོར་ཐིམ་པར་གཟིགས།། ད་ལྟར་པོམ་ར་ཕ་ཝཾ་གྲགས།། ཡི་དམ་དབལ་ཕུར་བསྒྲུབས་པའི་ཚེ།། ཞེ་སྡང་གནས་དག་ཕུར་པའི་ལྷ།། ཁྲ་གསས་ཁྱུང་རྒོད་མངོན་ཞལ་གཟིགས།། གཞན་ཡང་གཤེན་རབ་རྣམ་རྒྱལ་དང༌།། ཁྲོ་རྒྱལ་གཙོ་མཆོག་གེ་ཁོད་སོགས།། གསང་གསུམ་ཡི་དམ་ལྷ་ཞལ་མཇལ།། རིག་འཛིན་སྟོང་རྒྱུང་མཐུ་ཆེན་དང༌།། བླ་ཆེན་དྲན་པ་ནམ་མཁའ་ཡིས།། བོན་སྒོ་ཕྱི་ནང་གསང་གསུམ་ལ།། འཆད་རྩོད་རྩོམ་དང་བྲི་བཀོད་སྤེལ།། བསྙེན་བསྒྲུབ་ལས་སྦྱོར་ལ་སོགས་པའི།། འཁྲུལ་མེད་གསལ་བྱེད་རིང་ལུགས་སྤེལ།། ཞེས་གསུངས་དབང་བསྐུར་ལུང་བསྟན་མཛད།། ཁྱད་པར་རང་གཞུང་བརྒྱ་ཕྲག་རེ།། བཏོན་དང་ཕན་ཡོན་དབྱེར་མེད་པའི།། ཁྲོ་ཕུར་བོན་སྐྱོང་གདངས་དབྱངས་རྣམས།། སྙན་དུ་བརྒྱུད་ནས་སྤེལ་ཅིག་གསུངས།། མ་མཆོག་སྲིད་པ་རྒྱལ་མོ་ཡིས།།མ་དང་བུ་བཞིན་བརྩེ་གདུང་མཛད།། དགྲ་བདུད་འབྱམས་པ་བེར་ནག་ཅན།། མི་དང་མི་བཞིན་ཡང་ཡང་གཏམ།། གཞན་ཡང་བསྟན་སྲུང་རྒྱ་མཚོའི་ཚོགས།།བྲན་གཡོག་ཅི་བཞིན་ལས་ལ་འཁོལ།། དེ་ཚེ་བསྟན་པ་སྤྱི་སྲུང་དུ།། བོན་སྐྱོང་སྡེ་དྲུག་པོམ་ར་བཅས།། ཁྱད་པར་འདུས་སྡེ་རྒྱ་མཚོའི་ཚོགས།།སྐྱོང་བར་རྒྱལ་ཆེན་ཤེལ་ཁྲབ་ཅན།། གཉེར་བཀོད་ཕྲིན་བཅོལ་དམ་བཅའ་གནང༌།། སྲོལ་འཛིན་བྲུ་ཡི་ཕྱག་ལེན་བཞིན།། གཙོར་བཏོན་མཚན་ཉིད་སྡེ་ལྔ་དང༌།། གསང་སྔགས་སེམས་ཕྱོགས་ལ་སོགས་པའི།། གསལ་བྱེད་བསྡུས་དོན་དགོངས་འགྲེལ་དང༌།། དགོངས་རིམ་ཕྱག་བཞེས་མང་དུ་མཛད།། མཉམ་མེད་སྨན་རིའི་རིང་ལུགས་ཞེས།། རྒྱུད་འཛིན་གྲྭ་སློབ་མང་པོར་བྱུང༌།།

སྐབས་འདི་རུ་ཏྲའི་བསམ་སྦྱོར་ལ།། བརྟེན་ནས་གླང་ཕུ་བདག་མོ་སོགས།། སྒེར་པ་དྲག་བཙན་འགའ་ཞིག་གིས།། ལྷ་གཡག་ལྷ་ལུག་སོགས་ཀྱང་ཕབ།། ད་རུང་བསྟན་ལ་བསྡོ་དགོས་ཟེར།། ཐུགས་ལ་ཁྲོ་བ་མི་མངའ་ཡང༌།། གསང་བ་སྔགས་ཀྱི་དམ་ཚིག་ལས།། ཞིང་བཅུར་གྱུར་པ་བསྟན་པའི་དགྲ། མ་སྒྲོལ་སྤྱད་པའི་དམ་ཚིག་ཉམས།། དེ་ཕྱིར་ལྷ་སྲུང་ལས་ལ་མངག། བསྟན་སྲུང་བཀའ་བགོའི་ཚོགས་རྣམས་མཛད།། མི་བདུད་འབྱམས་པ་ཁྲག་མགོ་ཡིས།། རལ་པ་སྤྲུགས་སམ་ཁ་འཕྲུ་འདེབས།། ཞུས་ཚེ་ཁྲག་གི་རལ་བསིགས་ན།། རྒྱལ་ཁམས་ནད་ཀྱིས་འགེངས་པའི་ཕྱིར།། དེ་ཉིད་མི་རུང་གསུངས་པར་བརྟེན།། བསྟན་སྲུང་དགྲ་བདུད་འབྱམས་པ་ཡིས།། ཡུལ་ཁམས་དེ་མཐོང་ལུང་ཕུར་ཕེབས།། ཁ་ནས་ཁྲག་གི་སེར་ཆེན་ཕབ།། བསྟན་དགྲ་ཞིང་ཡུལ་རེས་གཅིག་བརླག། ད་ལྟ་མི་བདུད་ལ་ཞེས་གྲགས།། དེ་ཚུན་ལྷ་རྟེན་ཞོལ་པོའི་རིགས༌།།ལྷོ་ཡི་འབྲས་མོ་ལྗོངས་ཚུན་ཆད།། གར་སོང་སུ་ཡིས་འཚེ་བ་མེད།། དབྱར་གསོལ་བོན་སྐྱོང་སྒྲུབ་པའི་སྐབས།། རང་བཞིན་འཁོར་ཏེ་དགོན་གསེབ་འབབ།། ཞལ་གསོལ་སྐབས་སུ་རྗེ་ཡི་མདུན།། སྤྲུག་བསིག་བྱེད་དེ་འབྲས་ལ་སོགས།། འབྲུ་སྣའི་ཚོགས་འཐོར་ངོ་མཚར་ལྡན།། གཞན་ཡང་རྫུ་འཕྲུལ་དཔག་མེད་བསྟན།། བསྟན་པའི་ཆེ་བ་འདོན་པའི་ཆེད།། དོག་ནས་དགུང་དུ་འཕུར་ཚུལ་གཤེགས།། དམུ་རྒྱལ་རྣལ་འབྱོར་ཉི་མ་དང༌།། བར་སྣང་ཁམས་སུ་རྩེད་མོར་མཛད།། ཀུན་མཁྱེན་མཉམ་མེད་བླ་མ་ཡི།། ན་བཟའ་ཉི་མའི་ཟེར་ལ་བཀལ།། སྲ་ལ་ཐང་ངེ་བྲེང་ངེར་བསྡད།། ཉི་དཀྱིལ་ཉེ་བའི་རླུང་ཆེན་གྱི།། སྤུ་གྲི་རེག་ཆོད་ཉེ་འདབས་འཕུར།། དབུ་ཞྭ་འཕངས་པས་ཉི་ཟེར་གྱིས།། འཚིགས་ཏེ་དུམ་བུ་དུམ་བུར་སོང༌།། དམུ་གཤེན་ན་བཟའ་ཉི་ཟེར་ལ།། བཀལ་ཚེ་ཅུང་ཞིག་ལྡེམ་གུག་བྱེད།། འཕུར་ཀྱང་དཔག་ཚད་གཅིག་ཙམ་གྱིས།། དམའ་སྟེ་སྔར་ལས་གོ་ལྡོག་བྱུང༌།། རྗེ་ཉིད་ཐུགས་དམ་བརྩོན་པ་དང༌།། གཅིག་ཤོས་འགྲོ་དོན་ཆེས་པ་ཡི།། དཀོར་སྒྲིབ་ཕྲན་ཙམ་བཞེས་ཚུལ་གསུངས།། དེ་ནས་རྣམ་དག་འདུལ་བ་ཡི།།བསླབ་བྱ་ཇི་བཞིན་བཅའ་སྒྲིག་དང༌།། ཟླ་རེ་བཞིན་དུ་ཡར་ངོ་ལ།། འཆད་པ་བདུད་རྩིའི་ཆར་རྒྱུན་གྱིས།། གདུལ་བྱའི་ལོ་ཏོག་སྨིན་གྲོལ་མཛད།། རྩོད་པ་གནམ་ལྕགས་ཐོག་རྒོད་ཀྱིས།། ཕས་རྒོལ་ལོག་ལྟའི་བྲག་རི་གཞོམ།། རྩམ་པ་ཉི་མའི་འོད་ཟེར་གྱིས།། བློ་གསར་སྣང་བའི་པད་ཚལ་འབྱེད།། མར་ངོ་རྣམས་ལ་གསང་སྔགས་ཀྱི།།བསྙེན་སྒྲུབ་གཞུང་སྒྲུབ་ཆག་མེད་མཛད།། གྲུབ་རྟགས་ལྷ་ཡི་སྐུ་མདོག་བཞིན།། འོད་དཔུང་འཁྲིགས་ཤིང་སྒྲུབ་ཁང་ནི།། ཕྱི་ནང་བར་གསུམ་སྤོས་དྲིས་ཁྱབ།། སྒྲུབ་གཤེན་ཀུན་གྱིས་མཐོང་བར་གསུངས།། གཞན་ཡང་ཉ་མཆོད་དགུ་གཏོར་དང༌།། གསོ་སྦྱོང་ལ་སོགས་ཆག་མེད་བཙུགས།། ཁྱད་པར་བསྟན་པ་ཡུན་གནས་དང༌།། བོད་ཁམས་བདེ་སྐྱིད་འབྱུང་བའི་ཐབས།། མཁའ་ཀློང་གསང་བའི་མདོས་ཆེན་དང༌།། རྒྱལ་མོ་དྲེལ་ནག་གསང་མདོས་དང༌།། དྲ་བ་དམར་ནག་བསྐང་མདོས་རྣམས།། འབུལ་ཚེ་དཔལ་མགོན་སྡེ་བརྒྱད་ཚོགས།། མངོན་སུམ་འདུས་ཏེ་འདི་སྐད་དོ།། ཁྱེད་ནི་རིག་འཛིན་མངོན་བྱོན་གཤེན།། ངེད་ལ་འདོད་དགུ་ཕུན་ཚོགས་པའི།། གསང་མདོས་འདི་རྣམས་ཆགས་མེད་སྦྱིན།། ངེད་ཅག་དཔལ་མགོན་དམ་ཚིག་ཅན།། ཁྱེད་ཀྱི་བསྟན་པ་རྒྱུན་དུ་སྲུང༌།། སྣང་སྲིད་ཞི་བདེ་བསྐྱེད་པར་བྱ།། ཞེས་ཞུས་ཁས་བླང་དམ་བཅའ་མཛད།། དེའི་རྟགས་གནམ་མཚོ་ཕྱུག་མོ་ཡིས།། ཞལ་ཁེབ་བཀབ་དང་ལྷ་ཆར་འབེབ།། འདི་ཉིན་འཕྱུག་མེད་ཡིན་ཞེས་གླེངས།། བཞི་པ་དབྱིངས་སུ་གཤེགས་ཚུལ་ནི།། དགུང་ལོ་དྲུག་ཅུའི་ཤིང་ལུག་ལོར།། སློབ་མ་རིན་ཆེན་རྒྱལ་མཚན་ལ།། ཁྱེད་ནི་རིག་འཛིན་བྱིན་རླབས་བུ།། ང་ཡི་ཁྲི་སྐྱོང་རྒྱལ་ཚབ་མཛོད༌།། འཆད་རྩོད་རྩོམ་གསུམ་བོན་བསྟན་སྤེལ།།  དེ་ཕྱིར་དགོན་འདིར་ཚོགས་པ་ཡིས།། མཚན་ཉིད་རབ་འབྱམས་གང་ཡིན་པ།། ལྷ་སྲུང་གསོལ་ལ་རྟགས་སྒྲིལ་གྱིས།། གང་བབ་ང་ཡི་གདན་སར་བཀོད།། ཤེས་རབ་སྨྲ་སེང་ཐུགས་རྗེ་ཡིས།། བསྟན་དང་འགྲོ་དོན་ནུས་པར་འབྱུང༌།། ཞེས་སོགས་ཕྱི་ནང་གསང་གསུམ་གྱི།། ཞལ་གདམས་ལུང་བསྟན་རྒྱས་པར་གསུངས།། དེ་མཚམས་གཏེར་གྱི་ཆུ་མིག་ཁར།། ཁྲ་ཐེར་ཕུབ་སྟེ་ཉིན་མོ་རུ།། རྒྱུད་འཛིན་གྲྭ་སློབ་ཚོགས་རྣམས་ལ།། རྫོགས་ཆེན་ཞང་ཞུང་སྙན་བརྒྱུད་ཀྱི།། ཁྲིད་གདམས་ཆ་ལག་ཚང་བར་གནང༌།། ནུབ་མོར་ལྷ་ཀླུ་གཞི་བདག་ལ།། དེ་བཞིན་བོན་བཤད་དབང་སྐུར་མཛད།། དེ་ལྟར་འཆད་ཉན་མཐར་ཕྱིན་ཙམ།། སྐུ་ལ་ཅུང་ཞིག་བསྙུང་ཚུལ་བཞེས།། བར་བར་ས་འགུལ་རི་ཡང་ངུར།། མཚན་མོར་འཇའ་ཚོན་ཡང་ཡང་ཤར།། དེ་ལྟར་ཞག་གསུམ་སོང་བའི་མཚམས།། དབྱར་ཟླ་ཐ་ཆུང་ཚེས་བརྒྱད་ཀྱི།། ཐོ་རངས་སྐྱ་རེངས་ཤར་ཙམ་ན།། པད་ཞུ་སྣམ་སྦྱར་ལ་སོགས་པའི།། ན་བཟའ་གོས་དྲུག་རྫོགས་པར་གསོལ།། སྔོན་དུས་ཡར་འབྲོག་མེ་སྟོན་ཡང༌།། བོན་འཆད་ངང་དུ་གཤེགས་པ་ལྟར།། བདག་ཀྱང་དེ་བཞིན་དགོས་སོ་གསུངས།། རྫོགས་ཆེན་ཞང་ཞུང་སྙན་བརྒྱུད་ཀྱི།། རྒྱལ་བའི་ཕྱག་ཁྲིད་འཆད་མཛད་པའི།། གཅེར་མཐོང་ལྟ་བའི་ཁྲིད་ཀྱི་སྐབས།། ནུབ་ནས་འཇའ་ཚོན་འོད་ལམ་ཞིག། གཟིམ་ཐེར་ཕུབ་པའི་རྩེ་མོར་ཟུག། མེ་ཏོག་ཆར་བབས་གཞའ་ཚོན་འཁྲིགས།། དེ་ཚེ་སྤྱན་མིག་དར་ཙམ་མཁར།། གཟིགས་ཏེ་ཕཊཿཀྱི་སྒྲ་དང་བཅས།། འདིར་སྣང་སྐུ་ཡི་བཀོད་པ་བསྡུས།། རྟག་གཟིགས་འོལ་མོ་གླིང་ཆེན་དུ།། སྟོན་པའི་རྒྱལ་ཚབ་མཛད་དུ་གཤེགས།། དེ་ནས་ཞག་གསུམ་སོང་བའི་མཚམས།། གདུང་ཡང་གདན་ལ་མ་རེག་པར།། ཁྲུ་གང་འཕགས་པའི་བར་སྣང་བཞུགས།། ཐུགས་སྲས་རྣམ་གཉིས་ལ་སོགས་པའི།། རྗེས་འཇུག་བུ་སློབ་མཆོག་རྣམས་ཀྱིས།།  བསྟན་དང་འགྲོ་བའི་དོན་ཆེད་དུ།། གདུང་རྟེན་བཞུགས་པར་གསོལ་བ་བཏབས།། རྩེ་གཅིག་དད་ཕྱག་གྲངས་མེད་བཙལ།། གསོལ་བཏབ་མོས་པ་མི་བཅག་ཕྱིར།། ཁྲུ་གང་མར་ལ་བབ་སྟེ་བཞུགས།། དེ་ནས་དགུང་ཟླ་གསུམ་གྱི་བར།། ཕྱག་བསྐོར་མཆོད་པ་གྲངས་མེད་ཕུལ།། ཧོར་ཟླ་དང་པོའི་ཚེས་ལྔ་ལ།། དབུ་རྩམས་ཚེས་པ་བརྒྱད་ཀྱི་ཉིན།། གདུང་སྲེག་ལས་བཞི་རྒྱུན་ལྔ་དང༌།། ཀློང་རྒྱས་དཀྱིལ་འཁོར་ཞལ་ཕྱེས་ཏེ།། སྐུ་གདུང་ཞུགས་ལ་བཞེན་ཙམ་ན།།མེ་ཡང་དཀར་སེར་རང་འབར་གྱུར།། བར་སྣང་ཁམས་དང་གདུང་ཁང་རྣམས།།འཇའ་ཚོན་འོད་ཀྱིས་ཁེབས་པར་གཡོགས།། ནུབ་ཕྱོགས་གཞའ་ཚོན་འོད་ལམ་ལ།། བྱ་རྒྱལ་རྒོད་གཅིག་མངོན་པར་བྱོན།། མཁའ་ལ་ལན་གསུམ་ལྡིང་བསྐོར་ནས།། དར་ཙམ་མཁའ་ལ་བཞུགས་ནས་ནི།། སླར་ཡང་ནུབ་ཏུ་ཕེབས་སོང་བ།། ཀུན་མཐོང་ངོ་མཚར་དཔག་མེད་སྐྱེས།། ཐུགས་སྲས་རྣམ་གཉིས་ལ་སོགས་པའི།། མཆོག་ཆེན་འགའ་ཡི་གཟིགས་སྣང་ལ།། ཀུན་མཁྱེན་མཉམ་མེད་བླ་མ་ཉིད།། བྱོན་ཏེ་མཁའ་ལ་བཞུགས་པར་གཟིགས།། ཁྱད་པར་རྒྱལ་ཚབ་རིན་རྒྱལ་གྱིས།། སླར་ཡང་མཇལ་བར་གསོལ་བཏབ་ཚེ།། ཆོ་འཕྲུལ་ཟླ་བའི་ཚེས་ལྔའི་ཉིན།། རིག་འཛིན་མཁའ་འགྲོའི་ཚོགས་དང་བཅས།། རྗེས་འཇུག་འགྲོ་བའི་དོན་ཆེད་དུ།། བྱ་རྒྱལ་རྒོད་དུ་སྤྲུལ་ནས་ཀྱང༌།། མངོན་སུམ་འབྱོན་པར་ཞལ་བཞེས་ནས།། ནུབ་ཕྱོགས་བདེ་ཆེན་གཤེགས་པར་མཐོང༌།། རྗེས་འཇུག་དད་རྟེན་རིང་བསྲེལ་ཀྱང༌།། རྒྱལ་བ་གཉིས་པར་འབྱོན་པའི་རྟགས།། སྐུ་རྟེན་ཀུན་ཏུ་བཟང་པོའི་སྐུ།། གསུང་རྟེན་ཤེས་རབ་སྨྲ་སེང་དང༌།། ཡིག་འབྲུ་ཨཱ་ཨཱོྃ་ཧཱུཾ་གིས་མཚོན།། ཐུགས་ཀྱི་རྟེན་དུ་ཤ་རི་རམ།། ཆེ་བ་ལྕོ་གའི་སྒོང་ཙམ་གསུམ།། འབྲིང་བ་སྲན་མ་ཙམ་བདུན་དང༌།། ཆུང་བ་ཉུངས་དཀར་འབྲུ་མ་ཙམ།། མང་དུ་ཐོན་པ་ཡིན་ལགས་ཀྱང༌།། རྒྱལ་ཚབ་ལ་སོགས་མཁས་རྣམས་ཀྱིས།། རྟེན་ཁྲུས་གྱེར་ཞིང་ཁྲུས་གསོལ་ཚེ།། རིང་བསྲེལ་ལྕོ་གའི་སྒོང་ང་ཙམ།། གཅིག་དེ་སྒྲ་འོད་ཟེར་དང་བཅས།། མཁའ་ལ་ཕུར་ཏེ་ལྷ་གནས་གཤེགས།། གཅིག་དེ་སྒྲ་འོད་ཟེར་དང་བཅས།། གཏེར་ཆུའི་ནང་ཕེབས་ཀླུ་ཡུལ་གཤེགས།། གཅིག་དེ་སྒྲ་འོད་ཟེར་དང་བཅས།། ཕྱག་གིས་བཅང་ཡང་ཡང་ཡང་འཕར།། ལན་གཅིག་རྡོ་བ་ཞིག་གི་སྟེང༌།། བབ་ཚེ་རྒྱལ་ཚབ་ཕྱག་གིས་བརྡེག། རྡོ་ལ་ཕྱག་རྗེས་བཀྲ་བའི་དཀྱིལ།། རིང་བསྲེལ་ཕྲ་བཀོད་བཞིན་དུ་འཛུལ།། ཚུར་ལ་མི་ཐོན་རྡོ་དང་བཅས།། གསེར་གདུང་རྣམ་རྒྱལ་མཆོད་རྟེན་གྱི།། ནང་དུ་བཞུགས་གསོལ་བར་མི་ཡི།། འགྲོ་བ་འདྲེན་པའི་རྟེན་སྐལ་ལོ།།  ལྔ་པ་རྗེས་འཇུག་གྲོལ་ཚུལ་ནི།། རིག་གནས་མཚན་ཉིད་སྔགས་སེམས་སོགས།། ཀུན་ལ་གྲུབ་པ་ཐོབ་པ་ཡི།། ཐུགས་སྲས་ཉི་ཟླ་ལྟ་བུ་ནི།། རྒྱལ་ཚབ་རིན་ཆེན་རྒྱལ་མཚན་དང༌།། མངའ་རིས་བསོད་ནམས་རྒྱལ་མཚན་ནོ།། གཞན་ཡང་མཁས་ཤིང་གྲུབ་པའི་དཔལ།། བསྟན་པའི་གསལ་བྱེད་ནུས་པ་ཡི།། མཆོག་ཆེན་དམ་པ་བཅུ་ཕྲག་ནི།། རང་གྲོལ་ཤེས་རབ་སེང་གེ་དང༌།། མཚུངས་མེད་ནམ་མཁའ་རྒྱལ་པོ་དང༌།། བྲུ་སྟོན་ཀུན་དགའ་དབང་ལྡན་ཏེ།། བྲུ་ཡི་མཁས་གྲུབ་རྣམ་གསུམ་དང༌།། ལྷ་བླ་གནང་པ་བསོད་རྒྱལ་དང༌།། ཁྲོ་ཚང་མུ་ལ་རཏྣ་དང༌།། མེ་ཉག་བསོད་ནམས་རྒྱལ་མཚན་དང༌།། ཁྲི་འོད་བསྟན་པ་རྒྱལ་མཚན་དང༌།། རྒྱ་འཕེལ་བསོད་ནམས་ཡེ་ཤེས་དང༌།། མཁས་གྲུབ་བློ་གྲོས་འོད་ཟེར་དང༌།། རྟོགས་ལྡན་འདུལ་བ་བློ་གྲོས་བཅུ།། ཡིན་པ་བརྒྱུད་ཚུལ་དག་ལས་བཤད།། འདུལ་བསྟན་སྔགས་སེམས་གང་རིགས་ཀྱི།།རྗེ ས་འཇུག་སྨིན་གྲོལ་ནུས་པ་ཡི།། སློབ་བུ་བརྒྱ་ཕྲག་ལྷག་ཙམ་དང༌།། འདུལ་ཁྲིམས་སྡོམ་པ་སྣ་རེ་དང༌།། དབང་ལུང་མན་ངག་ཐུན་རེ་ཙམ།། ཐོབ་པའི་སློབ་བུ་གྲངས་འདས་འཕེལ།། མདོར་ན་དེང་དུས་གངས་ཅན་འདིར།། བོན་བསྟན་སྤྱི་དང་ཁྱད་པར་དུ།། རྣམ་དག་འདུལ་བའི་བསྟན་པ་ལ།། དར་རྒྱས་ཡུན་རིང་གནས་པ་འདི།། རྒྱལ་བ་མཉམ་མེད་བླ་མ་ཡི།། ཐུགས་རྗེའི་སྟོབས་ལས་བྱུང་བའོ།།