ལེགས་བཤད་ལམ་རིམ་ལས། ” ཀྱཻ་མ་སྙིགས་དུས་འདིར་སྐྱེས་པའི། །ཁྲི་གཙུག་བསྟན་ལ་གཤེ་བ་ཚོལ། །དེས་ནི་བུ་ཚས་ཕ་ཁུ་ཡི། །རིགས་རྒྱུད་ངན་པ་བཤད་དང་མཚུངས། ། ” ཞེས་གསུངས་སོ། །

ཞང་ཞུང་གི་གྲུབ་ཐོབ་སྐྱེས་མཆོག་རྣམས་བཞུགས་པའི་ས་གནས།

   རྩོམ་པ་པོ། སློབ་དཔོན་བསྟན་འཛིན་རྣམ་དག

    ཞང་ཞུང་གི་གྲུབ་ཐོབ་རྣམས་བཞུགས་པའི་ས་གནས་ནི། གློ་ཡུལ་སྨུག་ལེ་གངས་བྲག་གི་གཡས་མདུན། ལྷ་ཀླུ་གདུག་པའི་ཡུལ། ཁ་རང་འཇིགས་པའི་ཡུལ་རོང་དུ། ཀླུ་བྲག་གཉེན་ཞེས་བྱ་བ་བླ་ཆེན་པོ་དྲན་པ་ནམ་མཁའ། མཐུ་ཆེན་མི་དགུ། ཞང་ཞུང་གི་གྲུབ་ཐོབ་ཁ་ལ་རག་ཤ རག་ཤ་གློག་འཕྲེང༌། ཁ་ཁྲི་ཤོ་ན་ཡ་སོགས་ཀྱི་སྒྲུབ་གནས་རང་བྱུང་གི་བྲག་ཕུག་དང༌། ཕྱག་ཞབས་ཀྱི་རྗེས་སོགས་དུ་མ་ཡོད། དེང་དུས་གློ་ཆུ་མིག་བརྒྱ་རྩའི་ཤར་རིའི་རྒྱུད་ཀླུ་བྲག་གི་ལུང་པའི་ཕུ་སྟོད་དུ་གསལ་བར་ཡོད་པ་ཡིན། འཇའ་ལུས་ཉེར་བཞི་པའི་བཞུགས་གནས་ཀྱི་སྐོར། བྲག་དམར་ཆད་གཤིག་ནི་དཔོན་ཆེན་ཟླ་བ་རྒྱལ་མཚན་གྱི་སྒྲུབ་གནས། སྤོ་དམར་དུ་ར་སངས་ཀླུ་རྒྱལ་བཞུགས། སྟག་ཐབས་སེང་གེའི་བྲག་ཏུ་ཏ་པི་ཧྲི་ཙ་བཞུགས། ནི་རིངས་སུ་ར་སངས་ཀུ་མ་ར་བཞུགས། བྱ་ཚང་གི་གནས་སུ་གུ་རིབ་ལྷ་སྦྱིན། དྭང་ར་གཡུ་བུན་དུ་ཞང་ཞུང་སད་ནེ་གའུ་བཞུགས། སྒྲོ་རྩ་ཅན་གྱི་བྲག་ལ་གུ་རིབ་དཔལ་བཟང་བཞུགས། འདི་རྣམས་དེང་སང་སྟོད་འབྲོག་འབྲོང་པའི་ས་ལ་ཡོད། གུ་རིབ་དཔལ་བཟང་གི་སློབ་མ་ར་སངས་ཁྲི་ནེ་ཁོད་བླ་མ་འདི་ནི་བོད་ཀྱི་རྒྱལ་པོ་སྟག་རི་གཉན་གཟིགས་ཀྱི་སྐུ་གཤེན་ཡིན་ཞིང༌། མཐུ་སྟོབས་བྱིན་རླབས་ཕུན་སུམ་ཚོགས་པར་མངའ་འོ། །མཛད་པའི་བོན་ཡང་སྣང་གཤེན་གྱི་བོན་དུ་གཏོགས་པ་སྲིད་པ་སྤྱི་མདོས་དང་བླ་མེད་རྫོགས་པ་ཆེན་པོའི་གདམས་པས་སུམ་པའི་བོན་པོ་ཨ་བ་ལྡོང་སོགས་ཀྱིས་གཙོས་འགྲོ་བ་དུ་མ་སྨིན་གྲོལ་གྱི་ལམ་ལ་བཀོད་དོ། །ཞང་ཞུང་གི་ཡུལ་ས་ཏི་ཕུག་ཏུ་ཁྱུང་པོ་བཀྲ་ཤིས་རྒྱལ་མཚན་བཞུགས། མཚོ་རིའི་དོ་ལ་ཁྱུང་པོ་ལེགས་མགོན་བཞུགས། གངས་ཏི་སེ་ལ་མ་ཧོར་སྟག་གཟིག་བཞུགས། ཡུལ་མ་མིག་གི་ནུབ་ཕྱོགས་བྲག་རོང་དཀར་པོའི་གསེབ་ཏུ་ཚེ་སྤུངས་ཟླ་བ་རྒྱལ་མཚན་བཞུགས། ཡུལ་དྭ་རོག་མཚོ་གླིང་གི་དོ་བྲག་ཤ་བ་ཅན་ལ་སྣང་བཞེར་ལོད་པོ་བཞུགས།

    གཞན་ཡང་བྱང་གནམ་མཚོའི་ནུབ་ཕྱོགས་སུ་ཡུལ་སྒོ་མང་རུ་བའི་སར་ཤ་བ་བྲག་ཟེར་བས་རྩེར་ཁང་ཞིག་ཡོད་པའི་ངོས་སུ་བྲག་ཏུ་སྒོམ་པ་ལ་བཞུགས་པའི་གནས་ཀྱང་ཡོད་པ་འདིར་ཡང་གྱེར་སྤུངས་ཀྱི་བཞུགས་གནས་ངེས་ཏེ། ཡུལ་འདི་དང་གཤེན་གྱེར་གྱི་ཡུལ་སྡེ་རྣམས་ཀྱི་ཁོངས་སུ་གུ་རིབ་ཀྱི་རུས་མིང་ཅན་གྱི་གྲོང་པ་དུ་མ་ད་ལྟའི་བར་དུ་ཡོད། བླ་མ་འདི་དགུང་ལོ་ལྔ་བརྒྱ་དང་བདུན་ཅུ་རྩ་གསུམ་དུ་བཞུགས། མེ་རྒྱུང་དཀར་ནག་ཏུ་ཕ་བ་རྒྱལ་གཟིགས་གསས་ཆུང་བཞུགས། ཕ་བ་སྟག་སླག་ཅན་༼འདི་ས་མིང་གཞན་དང་ནོར་བ་མིན་ན་གར་ཡོད་མ་ཤེས་སོ།༽བྱ་བ་རུ་དམུ་གཤེན་ཙོ་གེ་བཞུགས། སྟ་སྒོའི་མདུན་དུ་དམུ་ཤོད་ཏྲམ་ཕུག་ཏུ་ཤོད་ཏྲམ་ཆེན་པོ་བཞུགས། དེང་སང་མིང་དེ་ཀར་ཆགས། ད་རོག་ལྕགས་ཕུག་ཏུ་དམུ་རྒྱལ་བ་བློ་གྲོས་བཞུགས། བླ་མ་འདིའི་སྐུ་ཚེའི་སྨད་ལ་ཟང་ཟང་ལྷ་བྲག་ཏུ་བཞུགས། ཡུལ་དྭ་རོག་གི་བྲག་རི་ལ་དཔོན་ཆེན་བཙན་པོ་བཞུགས། ཡུལ་དང་ས་འདི་རྣམས་ཕལ་ཆེར་དེང་དུས་ཀྱང་འབོད་པས་བརྡ་འཕྲོད་པ་ཡོད། །

ལོ་རྒྱུས་ལྡན་པའི་གཞུང་ལས་བྱུང་བའི་དངོས། །
དངོས་སུ་མཐོང་ཚེ་ལོ་རྒྱུས་ཅན་གྱི་ཡུལ། །
ཡུལ་ཅན་འགྲོ་བ་མཆོག་དམན་ཕལ་པ་གང༌། །
གང་བྱུང་རྟོགས་འདི་རྟོག་གེས་དཔྱོད་ཚུལ་ཡིན། །

གཏན་ཚིགས་ལྡན་པའི་ལོ་རྒྱུས་ལུས་ཕྲའི་བཞིན། །
གཙང་མཛེས་གསལ་བར་ངོམས་ཀྱང་ཕྱོགས་ལྷུང་གི །
ན་ཚོད་བགྲེས་པོས་འདྲེན་བྱེད་ཡུལ་དཀའ་ན། །
འཁྱོག་བཤད་འཁར་བར་རྟག་ཏུ་བརྟེན་པར་མཛོད། །

                                                                              (འབེལ་གཏམ་ལུང་གི་སྙིང་པོ་ལས་དྲངས།)

11910cookie-checkཞང་ཞུང་གི་གྲུབ་ཐོབ་སྐྱེས་མཆོག་རྣམས་བཞུགས་པའི་ས་གནས།
(སྤྱིའི་གཟིགས་གྲངས། 21 དེ་རིང་། 1)

གཤམ་གྱི་རྩོམ་ཡིག་རྣམས་ལ་སྐུ་ཉིད་ཐུགས་མཉེས་པོ་ཡོང་སྲིད།

1 Response

  1. N.d.g. ལགས་ཀྱིས:

    སྐྱབས་རྗེ་རྒྱལ་བ་སྨན་རིའི་ཡོངས་འཛིན་ཆེན་མོ་སློབ་དཔོན་བསྟན་འཛིན་རྣམ་དག་རིན་པོ་ཆེ་མཆོག་གི་གསུངས་ཟབ་མོ་འདི། དྲ་ལམ་འདི་ན་མཇལ་བའི་གོ་སྐབ་རྙེད་སོང་བས་སྙིང་ནས་མེ་ལོང་ཡེ་ཤེས་དྲ་ལམ་གྱི་ཚོགས་མི་ཡོངས་ལ་ཐུགས་རྗེ་ཆེ་ཞེས་ཞུས་བཞིན་ཡོད། སླད་མའི་ཆ་ལའང་འདི་འདྲ་བའི་ཟབ་དོན་ཟབ་མོ་བདག་འདྲར་གནང་བའི་རེ་བ་ཆེ། གུས་སློབ་གཉེར་བ་ཀླ་ཀློ་བས།

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།

མཚམས་སྦྱོར། རྩོམ་ཡིག་གོང་མ།
    སྔོན་ར…
error: རྩོམ་འདི་བདག་དབང་ཅན་ཡིན།