རིག་པའི་དཔའ་བོ་རྣམས་ལ་ཕུལ་བའི་བསྟོད་ཚིག་རྫོགས་ལྡན་གསར་པའི་དགའ་སྟོན།
ཡོངས་འཛིན་སྨྲ་བའི་དབང་པོའི་མཁྱེན་བརྩེའི་ཀློང་ནས།།
མདོ་སྔགས་བསྟན་པའི་ཉི་མ་ཕྱོགས་མེད་བཞད་དེ།།
མཆོག་ཐུན་དངོས་གྲུབ་ནོད་བའི་ཐུགས་སྲས་བརྒྱ་ཕྲག །
རབ་འབྱམས་དགེ་བཤེས་མཚན་གྱི་ཅོད་པན་བཞེས་སོང་།།
མདོ་སྔགས་རིག་གནས་རྒྱ་མཚོའི་སློབ་མཐར་ཕྱིན་ཚེ།།
མཁན་སློབ་ཉི་ཟླ་གཉིས་ཀྱི་ཕྱག་ཟུང་དྲོད་མོས།།
བཀའ་རྟགས་ཕྱག་ཐམ་ཅན་གྱི་ཕྱག་ཁྱེར་གནང་སྟེ།།
བསྟན་དང་འགྲོ་བའི་དོན་དུ་ཁྲི་འདོན་བྱས་སོང་།།
སྨྲ་སེང་མི་ཡི་དབང་པོའི་གདམས་ངག་ཟབ་མོ།།
རྣམ་དཔྱོད་ཤེས་རབ་རིག་པས་ལོ་མང་འཐུངས་པའི།།
ལུང་རིག་ན་ཚོད་སྨིན་པའི་བོན་དབྱངས་སྙན་མོར།།
མི་འདྲ་བྱིན་རླབས་ཚན་ཁ་གཞན་ལས་འཕགས་ཡོད།།
ཟླུམ་གཟུགས་འཇིག་རྟེན་ཡངས་པའི་གོ་ལའི་ཁྱོན་འདིར། །
རིག་སྨྲ་ཚར་དུ་དངར་བའི་རི་བདུན་དབུས་ན།།
དཔལ་གྱིས་མངོན་པར་མཐོ་བའི་རི་རྒྱལ་ཇི་བཞིན།།
གཟེངས་སུ་བསྟོད་པའི་དགེ་མཚན་འབུར་དུ་དོད་ཡོད།།
སྐབས་གསུམ་མི་ཡུལ་འཕོས་འདྲའི་གདན་ས་དེ་ན།།
སྒོ་བཞི་མཛོད་ལྔའི་གླེགས་བམ་གསེར་ཞལ་ཕྱེས་ནས།།
འཆད་རྩོད་རྩོམ་པའི་ཉི་ཟེར་ཕྱོགས་བརྒྱར་འཕྲོས་ཏེ།།
ལྔ་རིག་འགའ་ཚལ་སྣུམ་པོ་ལྷུག་པར་བཞད་སོང།།
བཅུ་ཕྲག་རིག་པ་སྨྲ་བའི་དགེ་བཤེས་ཁྱེད་ཚོ།།
མཁས་བཙུན་བཟང་གསུམ་འཛོམས་པའི་འདུལ་འཛིན་ངོ་མ།།
བསྙེན་རྫོགས་སྡོམ་པ་འབོགས་མཁན་གྲྭ་སའི་མཁན་པོ།།
བཤད་སྒྲུབ་བསྟན་པ་སྐྱོང་བའི་ཡོངས་འཛིན་དཔོན་གསས།།
གསོན་པོ་ལམ་སྟོན་གནང་བའི་ཐར་པའི་དེད་དཔོན།།
ཕྱི་མའི་རྣམ་ཤེས་འདྲེན་པའི་འཕོ་འདེབས་བླ་མ།།
འདི་ཕྱི་གཉིས་ཀྱི་སྐྱབས་གནས་མཆོག་གསུམ་ཀུན་འདུས།།
སྙིགས་མའི་འགྲོ་བ་འདྲེན་པའི་དུས་ཀྱི་སྒྲོན་མེ།།
དགག་སྒྲུབ་ཚུལ་ལ་མཁས་པའི་རིག་པའི་དཔའ་བོ།།
རྨོངས་པའི་རིགས་ནད་སེལ་བའི་འཚོ་བྱེད་གཞོན་ནུ།།
གསང་ཆེན་བསྟན་པ་འཛིན་པའི་རིག་འཛིན་རྣམ་བཞི།།
ཡེ་གྲོལ་རྫོགས་པ་ཆེན་པོའི་གཤེན་གྱི་རྣལ་འབྱོར།།
འཆད་ན་བཀའ་ལུང་ཟབ་མོའི་མདུད་པ་བཀྲལ་མཁས།།
རྩོད་ན་ཕས་རྒོལ་འཇོམས་པའི་ཐོག་རྒོད་དམར་ནག།
རྩོམ་པ་ལས་ཀྱི་འཁོར་ལོའི་གླེགས་བམ་མཐུག་པོ།།
ལྔ་རིག་དགའ་ཚལ་མཛེས་པའི་དཔལ་དུ་གཏམས་སོང་།།
སངས་རྒྱས་བསྟན་པའི་གསལ་བྱེད་བཀའ་འགྲེལ་མོད་ས།།
མདོ་སྔགས་དཀའ་གནད་བཀྲལ་བའི་དཔྱད་དེབ་སྟུག་ས།།
སྙན་འཇེབས་འོ་མའི་རྒྱ་མཚོ་རྣ་བར་འཁྱིལ་པའི།།
སྒྱུ་རྩལ་ཚིག་གིས་ཕྱུག་པའི་སྙན་དེབ་འབེལ་ས།།
སང་ཉིན་གང་བྱུང་མི་མཁྱེན་ཕྱི་མ་མཁྱེན་པའི།།
གྲུབ་རྫུན་གཏེར་རྫུན་མང་པོས་ལ་ལུང་གང་ཚེ།།
སྡོམ་གསུམ་ངུར་སྨྲིག་འཛིན་པའི་གཤེན་གྱི་འདུས་སྡེ།།
རབ་འབྱམས་བཤེས་གཉེན་བརྒྱ་ཕྲག་བསྟན་པའི་རྒྱན་རེད།།
༧ གཡུང་དྲུང་བོན་གྱི་གདན་ས་ཆེན་མོ་དཔལ་ལྡན་ཁྲི་བརྟན་ནོར་བུ་རྩེར་གཡུང་དྲུང་བོན་གྱི་ཆེས་མཐོའི་གཙུག་ལག་སློབ་གཉེར་ཁང་གི་རབ་འབྱམས་དགེ་བའི་གཤེས་གཉེན་བརྒྱ་ཕྲག་གཅིག་ལས་བརྒལ་བའི་དུས་ཁྱད་པར་ཅན་དང་བསྟུན་ནས་གདན་ས་༧ཆེན་མོ་དཔལ་ལྡན་ཁྲི་བརྟན་ནོར་བུ་རྩེའི་དགེ་སྒྲུབ་གླིང་དུ་བཞུགས་པའི་མཁན་སློབ་རྣམ་པ་དབུ་བཞུགས་ཐོག་དགེ་བཤེས་དང་སྒྲུབ་ཐོན་པ་རྣམས་སྤྲོ་གསེང་ལ་ཕེབས་སྐབས་སྤྲོ་སེམས་འཁོལ་བའི་ངང་ནས་ལི་བློ་གསལ་གྱིས་ཕྱི་ལོ་༢༠༢༣།༠༣།༠༢་ཉིན་བྲིས།
རྩོམ་པ་པོ། ལི་བློ་གསལ།
