ཁྱུང་སྤྲུལ་འཇིགས་མེད་ནམ་མཁའི་རྡོ་རྗེའམ་གཡུང་དྲུང་རྒྱལ་མཚན་གྱི་མཛད་རྣམ་ཚིགས་སུ་བཅད་པ།
ཁྱུང་སྤྲུལ་འཇིགས་མེད་ནམ་མཁའི་རྡོ་རྗེའམ་གཡུང་དྲུང་རྒྱལ་མཚན། ༡༨༩༧ ལོར་སྐུ་འཁྲུངས། ༡༩༣༦ ལོར་སྟོད་ཞང་ཞུང་ཁྱུང་ལུང་དངུལ་མཁར་དུ་གུར་གྱམ་མདོ་སྔགས་གྲགས་རྒྱས་གླིང་ཕྱག་བཏབ། ༡༩༥༥ ཤིང་མོ་ལུག་བོད་ཟླ་བཅུ་གཅིག་པའི་ཚེས་གསུམ་ཉིན་དགོངས་པ་རྫོགས།
“ད་ནི་བྱེ་བྲག་རང་གི་རྩ་བའི་བླ། །གཞན་རྣམས་གོང་ཁུངས་སོ་སོར་བཀོད་དེ་འདིར། །ངོ་སྤྲོད་འདེབས་བྱེད་དྲིན་ལྡན་དམ་པ་གཉིས། །བྱོན་ཚུལ་མདོ་ཙམ་བཀྲོལ་འོས་ཆེ་ནའང། །ཡི་གེའི་འཇིག་ཕྱིར་མ་སྟོང་ཙམ་ཞིག་ནི། །དང་པོ་དྲང་སྲོང་གཡུང་དྲུང་རྒྱལ་མཚན་ནམ། །འཁོར་ལོའི་མགོན་པོ་འཇིགས་མེད་ནམ་མཁའ་ནི། །མདོ་སྟོད་ཧོར་འབྲོག་ཚོ་དགུའི་སྤྱི་རྒྱལ་གྱི། །ནང་བློན་ག་རྒྱ་ཚང་ཞེས་རིགས་མཐོ་བ། །ཡབ་ནི་ག་རྒྱ་བསོད་ནམས་བསྟན་དར་དང། །ཡུམ་ནི་ཧོར་མོ་ནམ་མཚོ་ཞེས་གཉིས་ལ། །སྲས་བདུན་ལྕམ་གཅིག་བྱུང་བའི་ཆེ་འགོས་ཏེ། །རབ་ཚེས་མེ་མོ་བྱ་ཡི་ལོ་ལ་འཁྲུངས། །ཆུང་ནས་སྐྱེས་ཐོབ་ཤེས་རབ་རྩལ་ཆེ་བས། །སྦྱང་བྱ་ཐ་དག་ལན་རེ་ཟུང་རེས་མཁྱེན། །སྲིད་པའི་ཕུན་ཚོགས་དུག་སྦྲུལ་གཟེབ་ལྟར་བསྐྱུར། །སྒོ་སྟོན་ཉི་མ་རྒྱལ་ལས་རབ་བྱུང་སྟེ། །ཕྱི་ནང་དབང་ཁྲིད་ངོ་སྤྲོད་བཅས་པ་ཞུས། །དགེ་རྒན་རྒྱལ་བ་ཚུལ་ཁྲིམས་དང་འགྲོགས་བསྟེན། །སྤ་སྟོན་ཉི་མ་འབུམ་གསལ་མདུན་དྲུང་དུ། །མདོ་སྔགས་སེམས་གསུམ་དབང་ཁྲིད་ཅི་རིགས་ཞུས། །དགུང་ལོ་ཉེར་གསུམ་ཐོག་ནས་བྱ་བཏངས་ཕེབས། །སྨན་རི་ལ་སོགས་གྲྭ་སར་འབུལ་ཚོགས་སྦྱར། །མཁན་ཆེན་ཕུན་བློའི་མདུན་ནས་དབང་གདམས་ནོད། །མཁན་སློབ་རྣམས་སོགས་བཤེས་གཉེན་མང་བསྟེན་ཅིང། །ཁྱད་པར་དགེ་སློང་ཉི་མ་གྲགས་པའི་མདུན། །ཐེག་ཆེན་ཉམས་རྒྱུད་མ་ལུས་རྫོགས་པར་ཞུས། །དེ་ནས་མཁར་སྣར་ལོ་གཅིག་སྒྲུབ་མཛད་དེ། །མུན་ཁྲིད་ཁྲ་ཁྲིད་འོད་གསལ་བཅུད་ལེན་བསྐྱངས། །དེ་རྗེས་ཉང་སྟོད་ཕྱུག་མོ་དཔལ་རི་དང། །འབྲིག་མཚམས་མཐའ་དཀར་ལྷ་རི་ཉི་ཕུག་སོགས། །གཙང་དབུས་ལྷོ་འབྲུག་རྒྱ་བལ་ཟ་ཧོར་དང། །ཁུ་ནུ་མངའ་རིས་གངས་རི་མཚོ་གསུམ་སོགས། །ཞང་ཞུང་གནས་ཆེན་དབེན་ཁྲོད་ཀུན་ཉུལ་བསྒྲུབ། །སྒོམ་རྟོགས་ནམ་མཁའ་ལྟ་བུ་མཐའ་དང་བྲལ། །མཁྱེན་རབ་ཉི་མ་བརྒྱ་པའི་གཟི་འོད་འབར། །ཕྱི་ནང་རྒྱུད་སྡེ་རིག་གཞུང་ཀུན་ལ་མཁས། །བཀའ་ཡི་འཁོར་ལོས་མཐའ་འཁོབ་དགེ་ལ་བཙུད། །ཁྱུང་ལུང་དངུལ་མཁར་བོན་བསྟན་སྒྲུབ་སྡེ་བཏབས། །ཐུགས་དམ་ཞི་ཁྲོ་མཛད་དེ་སྒྲུབ་རྒྱུན་བཙུགས། །བཤད་སྒྲུབ་རྒྱལ་མཚན་སྒོམ་རྟོགས་གཟི་འོད་འབར། །དམ་ཅན་རྒྱ་མཚོས་དབྱེར་མེད་འཕྲིན་ལས་སྒྲུབ། །ཆོས་ཚན་མང་པོས་འགྲོ་བློ་ཚིམས་པར་མཛད། །སྨན་རྩིས་ལ་སོགས་རིག་གཞུང་བསྟན་བཅོས་བརྩམས། །བོན་གྱི་རྒྱུད་སྡེ་མང་པོ་འཕྲུལ་དཔར་དྲངས། །བསྟན་འགྲོའི་དོན་མཛད་རྒྱ་ཆེན་གྲུབ་པའི་ངང།།
དགུང་གྲངས་དྲུག་ཅུ་ཐོག་མར་མ་འོངས་ཀྱི། །འབྱུང་ཚུལ་ལུང་བསྟན་བསྩལ་ཏེ་མཁའ་སྤྱོད་གཤེགས། །གསུང་སྐྱེས་བོན་ཆོས་སློབ་མ་རབ་ཏུ་མང། །གདུལ་བྱ་སྨིན་གྲོལ་ཕྲིན་ལས་རྒྱུད་འཛིན་དང། །གསང་གསུམ་བསྟན་རྒྱུན་ཞལ་ལུང་བཞིན་དུ་གྲུབ། །གཞན་ཕན་འཕྲིན་ལས་བསྟན་འགྲོའི་དཔལ་མགོན་གྱུར།།” ཞེས་གསལ།
(མ་རྩོམ་ཡོང་ཁུངས། མཁས་དབང་དཔལ་ལྡན་ཚུལ་ཁྲིམས་ཀྱི་གཡུང་དྲུང་བོན་གྱི་བསྟན་འབྱུང་ཕྱོགས་བསྡུས་ལས་སོ། །)
