གངས་རིའི་ཚིག་མཛོད།
རྩོམ་པ་པོ། ལྡོང་སྐལ་བཟང་།
རིག་པའི་ཕ་སར་མཚན་འཛིན་པའི། །
ཁྱུང་ཡུལ་གྲུབ་བརྒྱའི་འབྱུང་གནས་སུ། །
སྐུ་མཆོག་གངས་དཀར་ལྷུན་པོ་དེ། །
བསོད་ལྡན་འགྲོ་བའི་དཔལ་དུ་ཤར།།
གྲྭ་སའི་གོང་མའི་དཔལ་ཐོབ་པའི།།
གཙང་སྟོད་བཀྲ་ཤིས་སྨན་རི་རུ།།
ཐུགས་གསང་ཡིད་བཞིན་ནོར་བུ་དེ།།
ཐོས་བསམ་རིག་པའི་ནོར་གྱིས་བཀང་།།
ཀླུ་སྒྲུབ་རི་བོའི་བརྗིད་ཆགས་པའི།།
ཁྲི་བརྟན་ནོར་བུའི་རྩེ་མོ་རུ།།
གསུང་དབྱངས་ཡན་ལག་བརྒྱད་ལྡན་དེ།།
རིས་མེད་བསྟན་འགྲོའི་དཔལ་དུ་བཀྱེས།།
འཛམ་གླིང་གངས་རྒྱལ་ཏི་སེ་ཡི།།
འོད་བརྒྱ་ཐུགས་ལ་བསྟིམ་པ་སྟེ།།
ཞང་བོད་སྲིད་པའི་ཕ་ནོར་འདི།།
འཛམ་གླིང་ཤར་ནུབ་ཁྱོན་ལ་འགྱེད།།
དྭངས་གཙང་གནམ་མཚོ་ཕྱུག་མོ་ཡི།།
ཟབ་ཚད་མགྲིན་ལ་བསྐྱིལ་བ་སྟེ།།
སྒོ་བཞི་མཛོད་ལྔའི་བདུད་རྩི་འདི།།
སྐྱེ་འགྲོ་དགའ་བའི་གསོས་སུ་བསྟར།།
ཁ་འབབ་ཆུ་བོ་རྣམ་བཞི་ཡི།།
བཞུར་རྒྱུན་སྐུ་ལ་བཅིང་པ་སྟེ།།
གངས་ཅན་བོད་ཀྱི་ཚིག་མཛོད་ཀྱི།།
མཚན་སྙན་གོ་ལའི་དབུ་རྩེར་འཕུར།།
༢༠༡༣/༡༠/༩