གཡུང་དྲུང་བོན་གྱི་ཆེས་མཐོའི་གཙུག་ལག་སློབ་གཉེར་ཁང་གི་སྐབས་ཉེར་བདུན་པའི་ལོ་འཁོར་མཇུག་བསྡོམས་མཛད་སྒོ།
གཡུང་དྲུང་བོན་གྱི་ཆེས་མཐོའི་གཙུག་ལག་སློབ་གཉེར་ཁང་གི་བཤད་སྒྲུབ་འདུས་སྡེ་སྐབས་ ༢༧ པ་དང་། སྔར་སྲོལ་གསོ་རིག་འབུམ་བཞིའི་སློབ་གྲྭ། གཞི་རིམ་སྔོན་འགྲོའི་སློབ་གྲྭ་བཅས་ཀྱི་ལོ་གཅིག་གི་སློབ་གཉེར་ལས་རིམ་ཡོངས་སུ་གྲུབ་མཚམས་ཀྱི་མཇུག་བསྡོམས་འཚོགས་ཆེན་ཉིན་གཉིས་རིང་གི་གནས་ཚུལ།
ཕྱི་ལོ་ ༢༠༢༢ ཟླ་བ་ ༠༢ པའི་ཚེས་ ༢༡ ཉིན་གྱི་ཕྱི་དྲོ་ཕྱག་ཚོད་ ༠༤ པར་༧སྐྱབས་རྗེ་མཁན་ཆེན་ལུང་རྟོགས་བསྟན་པ་གཡུང་དྲུང་རིན་པོ་ཆེ་མཆོག་དང་། སྐྱབས་རྗེ་སློབ་དཔོན་ཚངས་པ་བསྟན་འཛིན་རིན་པོ་ཆེ་མཆོག སྐྱབས་རྗེ་སྒྲུབ་གྲྭའི་མཁན་པོ་ཚུལ་ཁྲིམས་བསྟན་འཛིན་རིན་པོ་ཆེ་མཆོག བཤད་སྒྲུབ་མཁན་པོ་དགེ་བཤེས་སྐལ་བཟང་སྨོན་ལམ། བཤད་སྒྲུབ་སློབ་དཔོན་དགེ་བཤེས་བློ་གྲོས་གཙུག་ཕུད་རྣམ་པ་གཙོས་མཁན་སློབ་རྣམས་དང་། གྲྭ་ཚང་བླ་མ། རྩ་འཛིན་སློབ་དཔོན། དགེ་བའི་བཤེས་གཉེན་རྣམ་པ། གྲྭ་ཚང་གི་ལས་བྱེད་རྣམ་པ། སྐབས་ཉེར་བདུན་པ་དང་ཉེར་བརྒྱད་པའི་བཤད་སྒྲུབ་འདུས་སྡེའི་འགན་འཛིན་གསར་རྙིང་རྣམ་པ་དང་གྲྭ་མང་བཅས་གཙུག་ལག་ཁང་དུ་ཡོངས་སུ་འཛོམས་རྗེས་སྐབས་ཉེར་བདུན་པའི་བཤད་སྒྲུབ་འདུས་སྡེའི་དགེ་སྐོས་ཚུལ་ཁྲིམས་མཁས་གྲུབ་ལགས་ནས་ཚོགས་འདུ་དབུ་འཛུགས་ཀྱི་འཚམས་འདྲི་དང་བཅས་མཛད་རིམ་ངོ་སྤྲོད་གནང་། དེ་ནས་སྐབས་ཉེར་བདུན་པའི་བཤད་སྒྲུབ་འདུས་སྡེའི་དགེ་སྐོས་ལགས་ཀྱིས་འཚོགས་འདུ་སྟངས་འཛིན་འོག་མཛད་རིམ་ལྟར་སྐབས་ཉེར་བདུན་པའི་བཤད་སྒྲུབ་འདུས་སྡེའི་ཚོགས་གཙོ་ཤེས་རབ་ཡེ་ཤེས་ལགས་དང་། སྐབས་ཉེར་བདུན་པའི་སྒྲུབ་གྲྭའི་དགེ་སྐོས་གཤེན་གྱི་དགེ་སྦྱོར་བ་ཡེ་ཤེས་རྒྱ་མཚོ་རྣམ་པ་གཉིས་ནས་རིམ་པ་བཞིན་གཡུང་དྲུང་བོན་གྱི་ཆེས་མཐོའི་གཙུག་ལག་སློབ་གཉེར་ཁང་གི་སློབ་གཉེར་བ་རྣམ་པའི་ལོ་གཅིག་རིང་འཚོགས་དང་འཆད་ར། དམ་བཅའ། བགྲོ་གླེང་། དཔེ་ཁྲིད། རིག་གནས་དཔེར་བརྗོད་བཅས་དང་། དེ་བཞིན་སྒྲུབ་གྲྭ་བ་རྣམ་པའི་ལོ་གཅིག་རིང་གི་ཐུན་དང་བསགས་སྦྱོང་། དཔེ་ཁྲིད་བཅས་ལ་སྒེར་ཆད་དང་སྤྱི་ཆད་བྱུང་བ་རྣམས་སྒྲོག་སྦྱངས་གནང་། དེ་རྗེས་གྲྭ་ཚང་སྤྱི་གཉེར་ཆེན་མོ་དགེ་བཤེས་གཡུང་དྲུང་ཚུལ་ཁྲིམས་དང་། གྲྭ་ཚང་དགེ་སྐོས་ཆེན་མོ་དགེ་བཤེས་ཤེས་རབ་མཆོག་རྒྱལ། དེ་བཞིན་སྐབས་ཉེར་བདུན་དང་ཉེར་བརྒྱད་པའི་བཤད་སྒྲུབ་འདུས་སྡེའི་ལས་བྱེད་གསར་རྙིང་བཅས་ནས་གྲྭ་ཚང་གི་སྒྲིག་ལམ་དང་འབྲེལ་བའི་གསུང་བཤད་རིམ་པར་གནང་། དེ་རྗེས་བཤད་སྒྲུབ་དཔོན་སློབ་དགེ་བཤེས་བློ་གྲོས་གཙུག་ཕུད་དང་། བཤད་སྒྲུབ་མཁན་པོ་དགེ་བཤེས་སྐལ་བཟང་སྨོན་ལམ་། སྐྱབས་རྗེ་སྒྲུབ་གྲྭའི་མཁན་པོ་ཚུལ་ཁྲིམས་བསྟན་འཛིན་རིན་པོ་ཆེ་མཆོག སྐྱབས་རྗེ་སློབ་དཔོན་ཚངས་པ་བསྟན་འཛིན་རིན་པོ་ཆེ་མཆོག སྐྱབས་རྗེ་མཁན་ཆེན་ལུང་རྟོགས་བསྟན་པ་གཡུང་དྲུང་རིན་པོ་ཆེ་མཆོག་བཅས་ནས་བཀའ་སློབ་ཟབ་རྒྱས་གནང་། མཐར་དགོང་མོའི་ཕྱག་ཚོད་བརྒྱད་པ་ཐོག་སྐབས་ཉེར་བདུན་པའི་བཤད་སྒྲུབ་འདུས་སྡེའི་དགེ་སྐོས་ཚུལ་ཁྲིམས་མཁས་གྲུབ་ལགས་ཀྱིས་མཇུག་བསྡུའི་གཏམ་བཤད་གནང་སྟེ་ཉིན་འདི་ཡི་ཚོགས་འདུའི་མཛད་རིམ་གྲུབ།
ཉིན་གཉིས་པར་གཙོ་བོ་ལོ་འཁོར་རྒྱུགས་སྤྲོད་ནང་བརྒྱ་ཆ་མཐོ་ཤོས་ལེན་མཁན་རྣམས་ལ་གཟེངས་རྟགས་འབུལ་རྒྱུ་དང་། ལོ་ལྟར་བཞིན་བཤད་སྒྲུབ་འདུས་སྡེའི་ལས་བྱེད་དང་། སྔར་སྲོལ་གསོ་རིག་འབུམ་བཞིའི་སློབ་གྲྭའི་ལས་བྱེད་གསར་རྙིང་བརྗེ་རྒྱུའི་མཛད་སྒོ་བཅས་ཡིན། དེ་ཡང་ཕྱི་ལོ་ ༢༠༢༢ ཟླ་བ་ ༠༢ པའི་ཚེས་ ༢༢ ཉིན་གྱི་སྔ་དྲོ་ཕྱག་ཚོད་ ༨ པའི་ཐོག་སྐྱབས་རྗེ་མཁན་ཆེན་ལུང་རྟོགས་བསྟན་པ་གཡུང་དྲུང་རིན་པོ་ཆེ་མཆོག་དང་། སྐྱབས་རྗེ་སློབ་དཔོན་ཚངས་པ་བསྟན་འཛིན་རིན་པོ་ཆེ་མཆོག་དང་། སྐྱབས་རྗེ་སྒྲུབ་གྲྭའི་མཁན་པོ་ཚུལ་ཁྲིམས་བསྟན་འཛིན་རིན་པོ་ཆེ་མཆོག བཤད་སྒྲུབ་མཁན་པོ་དགེ་བཤེས་སྐལ་བཟང་སྨོན་ལམ་མཆོག བཤད་སྒྲུབ་སློབ་དཔོན་དགེ་བཤེས་བློ་གྲོས་གཙུག་ཕུད་མཆོག་གཙོས་མཁན་སློབ་རྣམས་དང་། རྩ་འཛིན་སློབ་དཔོན་རྣམ་པ། དགེ་རྩ་ཚོགས་པའི་ལས་བྱེད་གྲྭ་ཚང་བླ་མ་དགེ་བཤེས་བློ་གྲོས་མཆོག་ལེགས་གཙོས་ལས་བྱེད་རྣམས་དང་། བཙའ་སྐྱོང་ལྷན་ཚོགས་ཀྱི་སྤྱི་གཉེར་དགེ་བཤེས་གཡུང་དྲུང་ཚུལ་ཁྲིམས་གཙོས་བཙའ་སྐྱོང་ལྷན་ཚོགས་ཀྱི་ལས་བྱེད་རྣམ་པ་དང་། གདན་ས་ཁྲི་བརྟན་ནོར་བུ་རྩེའི་འདུས་མང་དང་། སྔར་སྲོལ་གསོ་རིག་འབུམ་བཞི་སློབ་གྲྭའི་སློབ་སྤྱི་རྩ་འཛིན་སློབ་དཔོན་དགེ་བཤེས་བདེན་གཉིས་བཤད་སྒྲུབ་མཆོག་དང་སྨན་དགེ་གནམ་སྲས་གཙོས་དགེ་རྒན་རྣམས་དང་སློབ་ཕྲུག་རྣམ་པ། གཞི་རིམ་སྔོན་འགྲོའི་སློབ་གྲྭའི་འགན་འཛིན་དགེ་བཤེས་གཙུག་ཕུད་རབ་གསལ་དང་རྒན་དོན་གྲུབ་རྒྱལ་མཚན་གཙོས་དགེ་རྒན་རྣམས་དང་སློབ་ཕྲུག་ལྷན་རྒྱས་བཅས་ཚོགས་ཁང་དུ་ཡོངས་སུ་འདུ་འཛོམས་གནང་རྗེས། སྐབས་ཉེར་བདུན་པའི་བཤད་སྒྲུབ་འདུས་སྡེའི་དགེ་སྐོས་ཚུལ་ཁྲིམས་མཁས་གྲུབ་ལགས་ཀྱིས་ཚོགས་འདུ་དབུ་འཛུགས་ཀྱི་འཚམས་འདྲི་དང་བཅས་ཏེ་མཛད་རིམ་གསལ་བསྒྲགས་གནང་། དེ་རྗེས་མཛད་རིམ་ལྟར་ཐོག་མར་༸སྐྱབས་རྗེ་མཁན་ཆེན་ལུང་རྟོགས་བསྟན་པ་གཡུང་དྲུང་རིན་པོ་ཆེ་མཆོག་ནས་སྐབས་ཉེར་བདུན་པའི་བཤད་སྒྲུབ་འདུས་སྡེའི་ལས་བྱེད་རྣམ་པ་དང་སྐབས་ཉེར་བརྒྱད་པའི་བཤད་སྒྲུབ་འདུས་སྡེའི་ལས་བྱེད་རྣམས་ལ་འཚམས་འདྲིའི་ཁ་བཏགས་བསྒྲོན་ཞིང་ལས་བྱེད་གསར་རྙིང་བརྗེ་ལེན་གནང་། དེའི་རྗེས་སྔར་སྲོལ་གསོ་རིག་འབུམ་བཞིའི་སློབ་སྤྱི་རྩ་འཛིན་སློབ་དཔོན་དགེ་བཤེས་བདེན་གཉིས་བཤད་སྒྲུབ་ལགས་ཀྱིས་འཚམས་འདྲི་དང་བཅས་ངོ་སྤྲོད་གནང་རིམ་བཞིན་སློབ་གྲྭའི་ལས་བྱེད་གསར་རྙིང་བརྗེ་ལེན་གྱི་ཁ་བཏགས་བསྒྲོན། དེའི་རྗེས་སུ་གཡུང་དྲུང་བོན་གྱི་ཆེས་མཐོའི་གཙུག་ལག་སློབ་གཉེར་ཁང་གི་སློབ་གཉེར་བའི་ཁྲོད་ནས་ལོ་གཅིག་ནས་ལོ་བཅོ་ལྔ་བར་བཤད་སྒྲུབ་འདུས་སྡེའི་འཚོགས་དང་འཆད་ར་དཔེ་ཁྲིད་རིག་གནས་དཔེར་བརྗོད་སོགས་གང་ཡང་མ་ཆད་པ་བྱུང་བ་རྣམས་དང་། སྐབས་ཉེར་བདུན་པའི་རིང་རྒྱུད་བུ་ཆུང་བཅུ་གཉིས། སྒྲོན་མ་དྲུག མ་རྒྱུད་གཞི་ཡེ་སངས་རྒྱས་པའི་རྒྱུད་ཆ་ཚང་། ས་ལམ་འགྲེལ་ཆ་ཚང་། ཐེག་འགྲེལ་ཆ་ཚང་། ཐེག་འགྲེལ་མདོ་གཞུང་། ཐེག་འགྲེལ་སྔགས་གཞུང་། དབུ་མའི་རང་འགྲེལ། ཚད་མ་རྣམ་འབྱེད་ཀྱི་རང་འགྲེལ། རྟགས་ཀྱི་རིགས་པའི་རྣམ་བཤད། རྟགས་རིགས་ཚད་མའི་གཞུང་འཇུག སུམ་ལྡན་སྡུད་གྲྭའི་རྣམ་བཤད་བཅས་དམིགས་བསལ་གཞུང་ཆེན་ཁག་ངག་རྒྱུགས་འཕར་མ་འབུལ་མཁན་རྣམས་དང་། རིགས་ལམ་སྔོན་འགྲོའི་འཆད་རྒྱུགས། དེ་རྗེས་འཛིན་གྲྭ་སོ་སོའི་བྲིས་རྒྱུགས་དང་རྩོད་རྒྱུགས། ངག་རྒྱུགས། དམིགས་བསལ་སྔགས་རྫོགས་གཞུང་ཆེན་ཆེད་སྦྱོང་གི་འཆད་རྒྱུགས་བྲིས་གཟུགས་སོགས་རྒྱུགས་སྤྲོད་ཁག་གི་བརྒྱ་ཆ་མཐོ་ཤོས་ལེན་མཁན་རྣམས་ལ་དམིགས་བསལ་གཟེངས་རྟགས་བསྩལ་གནང་མཛད། དེའི་རྗེས་གཞི་རིམ་སྔོན་འགྲོའི་སློབ་གྲྭའི་འགན་འཛིན་དགེ་བཤེས་གཙུག་ཕུད་རབ་གསལ་ལགས་ཀྱིས་རྒྱུགས་སྤྲོད་སྐོར་གསལ་བཤད་གནང་རིམ་བཞིན་བོད་ཡིག་འཛིན་གྲྭ་དང་པོ་ནས་བཞི་པ་བར། དབྱིན་ཇིའི་འཛིན་གྲྭ་གཉིས་པ་ནས་བཞི་པ་བར། བལ་སྐད་འཛིན་གྲྭ་དང་པོ། གཏམ་བཤད། འདོན་རྒྱུགས། བྲིས་གཟུགས། ཀུན་སྤྱོད་ཡག་ཤོས་སོགས་བྱ་དགའ་གསོལ་རས་བསྩལ་གནང་བ་དང་། གཞི་རིམ་སྔོན་འགྲོའི་འཛིན་གྲྭའི་ལས་བྱེད་བརྗེ་ལེན་བཅས་གནང་། དེའི་རྗེས་སྔར་སྲོལ་གསོ་རིག་འབུམ་བཞིའི་སློབ་གྲྭའི་འགན་འཛིན་རྩ་འཛིན་སློབ་དཔོན་དགེ་བཤེས་བདེན་གཉིས་བཤད་སྒྲུབ་ལགས་ཀྱིས་རྒྱུགས་སྤྲོད་སྐོར་གསལ་བཤད་གནང་བ་དང་རིམ་བཞིན་གསོ་བ་རིག་པའི་བྲིས་རྒྱུགས་དང་། སྨན་གྱི་ངག་རྒྱུགས། བརྡ་སྤྲོད་དང་སྙན་ངག་གི་བྲིས་རྒྱུགས། སྨན་གྱི་ལོ་རྒྱུས་ཀྱི་བྲིས་རྒྱུགས། དབྱིན་ཇིའི་སྐད་ཡིག་བྲིས་རྒྱུགས། ཨང་རྩིས་བྲིས་རྒྱུགས་བཅས་ཀྱི་ཨང་རིམ་དང་པོ་དང་གཉིས་པ་གསུམ་པ་ཐོབ་མཁན་དང་། དང་བླངས་ཞབས་ཞུའི་བཟང་སྤྱོད་ཅན་གྱི་སློབ་མ་བཅས་ལ་དམིགས་བསལ་གྱི་གཟེངས་རྟགས་བསྩལ་གནང་མཛད། དེའི་རྗེས་སྐྱབས་རྗེ་མཁན་ཆེན་ལུང་རྟོགས་བསྟན་པ་གཡུང་རིན་པོ་ཆེ་མཆོག་ནས་གདན་ས་ཁྲི་བརྟན་ནོར་བུ་རྩེའི་འདུས་མང་ཡོངས་དང་། སྔར་སྲོལ་གསོ་རིག་འབུམ་བཞིའི་སློབ་གྲྭ། གཞི་རིམ་སྔོན་འགྲོའི་སློབ་གྲྭ། དགེ་རྒན་དང་ལས་བྱེད་སོགས་སྤྱི་ཡོངས་ལ་བཀའ་སློབ་ལམ་སྟོན་གྱི་བཀའ་དྲིན་བསྩལ་གནང་མཛད། དེའི་རྗེས་སྐབས་ཉེར་བདུན་པའི་བཤད་སྒྲུབ་འདུས་སྡེའི་ཚོགས་གཙོ་ཤེས་རབ་ཡེ་ཤེས་ལགས་ཀྱིས་མཇུག་བསྡུའི་གཏམ་བཤད་གནང་གྲུབ་རྗེས་མཉམ་པར་བསྒྲོན་ཏེ་འདི་ལོའི་གཡུང་དྲུང་བོན་གྱི་ཆེས་མཐོའི་གཙུག་ལག་སློབ་གཉེར་ཁང་གི་སྐབས་ཉེར་བདུན་པའི་བཤད་སྒྲུབ་འདུས་སྡེའི་ལོ་འཁོར་མཇུག་བསྡོམས་ཀྱི་འཚོགས་འདུ་ཆེན་མོ་མཇུག་ལེགས་པར་གྲུབ་པའི་གནས་བསྡུས་སུ་མེ་ལོང་ཡེ་ཤེས་ཀྱི་དྲ་བའི་གཙོ་སྒྲུབ་པས་ ༢༠༢༢ ཟླ་བ་ ༠༢ པའི་ཚེས་ ༢༡ ཉིན་སྤེལ།། །།
པར་པ་ཏི་སེའི་བུ་དང་ཚུལ་ཁྲིམས་དྲི་མེད།
