ལེགས་བཤད་ལམ་རིམ་ལས། ” ཀྱཻ་མ་སྙིགས་དུས་འདིར་སྐྱེས་པའི། །ཁྲི་གཙུག་བསྟན་ལ་གཤེ་བ་ཚོལ། །དེས་ནི་བུ་ཚས་ཕ་ཁུ་ཡི། །རིགས་རྒྱུད་ངན་པ་བཤད་དང་མཚུངས། ། ” ཞེས་གསུངས་སོ། །

དཔལ་ལྡན་ཁྲི་བརྟན་ནོར་བུ་རྩེའི་ཉེ་ཆར་གྱི་མཛད་རིམ་གནས་བསྡུས།

   འདི་ལོར་ཞྭ་དཀར་གཡུང་དྲུང་བོན་གྱི་བསྟན་པའི་མངའ་བདག་དཔོན་གསས་བླ་མ་༸སྐྱབས་རྗེ་ཡོངས་འཛིན་སྨྲ་བའི་དབང་པོ་མཆོག་དགུང་གྲངས་དགུ་བཅུ་ཐམ་པ་ཕེབས་པའི་དུས་དང་བསྟུན་ཏེ། རིན་པོ་ཆེ་མཆོག་ཉིད་སླར་ཡང་རང་ཅག་ཀུན་གྱི་མགོན་དུ་གསང་གསུམ་གེགས་མེད་གཡུང་དྲུང་གི་ཁམས་སུ་བརྟན་པ་དང་། ཐུགས་ཀྱི་དགོངས་བཞེད་ལྷུན་གྱིས་འགྲུབ་ཅིང་། མཛད་འཕྲིན་དར་རྒྱས་ཡོང་བའི་ཆེད་སོགས་དགོས་པ་དུ་མར་དམིགས་ནས། གཡུང་དྲུང་བོན་གྱི་བྱེས་ཀྱི་གདན་ས་ཆེན་མོ་༸དཔལ་ལྡན་ཁྲི་བརྟན་ནོར་བུ་རྩེ་རུ་སྐྱབས་རྗེ་མཆོག་གི་སྐུ་ཕྱྭའི་ཞབས་རིམ་ཆེད་རྟེན་འབྲེལ་མཛད་སྒོ་ཚུགས་པའི་གནས་བསྡུས་ནི། ཞང་ཞུང་ལོ་སར་རམ་རྒྱལ་ཟླ་བའི་ཚེས་གཅིག་གི་ཞོགས་པ་ཕྱག་ཚོད་བདུན་པའི་ཐོག་༸སྐྱབས་རྗེ་མཁན་ཆེན་ལུང་རྟོགས་བསྟན་པ་གཡུང་དྲུང་རིན་པོ་ཆེ་མཆོག་དང་། དཔོན་སློབ་ཚངས་པ་བསྟན་འཛིན་རིན་པོ་ཆེ། སྒྲུབ་གྲྭའི་མཁན་པོ་ཚུལ་ཁྲིམས་བསྟན་འཛིན་རིན་པོ་ཆེ། དེ་བཞིན་བཤད་སྒྲུབ་མཁན་པོ་དགེ་བཤེས་སྐལ་བཟང་སྨོན་ལམ་མཆོག བཤད་སྒྲུབ་སློབ་དཔོན་དགེ་བཤེས་བློ་གྲོས་གཙུག་ཕུད་རྣམ་པ་དབུ་བཞུགས་ཐོག་འདུས་མང་འཚོགས་ནས་རྒྱལ་བའི་བཀའ་འགྱུར་རིན་པོ་ཆེ་ཞལ་འབྱེད་གནང་། ཚེ་སྒྲུབ་དང་། བར་ཆོད་ལམ་སེལ་བཅས་གསུངས་ནས་ཚོགས་གྲོལ། ཕྱག་ཚོད་བརྒྱད་པའི་ཐོག་གྲྭ་ཚང་དང་ལྷ་སྡེ་མི་མང་མཉམ་འཛོམས་ཐོག་དགོན་པའི་ཁོར་ཡུག་ལ་གཙང་སྦྲ་དང་”རྟེན་འབྲེལ་ཤིང་ལ་དམོད་བཙུགས་ཞེས་པ”ལྟར། གཡུང་དྲུང་བོན་མི་འགྱུར་བའི་བརྡ་དང་། རིན་པོ་ཆེ་མཆོག་གི་གསང་གསུམ་འགྱུར་མེད་ཚེ་ཡི་རིག་འཛིན་གྱི་ངོ་བོར་བཞུགས་པའི་རྟེན་འབྲེལ་དུ། དུས་བཞིར་རང་མདངས་འགྱུར་བ་མེད་པའི་བླ་ཤིང་ཤུག་པའི་སྡོང་པོ་བརྒྱ་ཕྲག་དུ་མ་དང་། མེ་ཏོག་སོགས་འདེབས་འཛུག་བྱས་མཐར། སྐྱ་སེར་ཡོངས་ཀྱིས་བླ་བྲང་གི་མཐའ་བསྐོར་ནས་སྨོན་ལམ་བསྟན་འབར་མ་དང་། ཡོངས་འཛིན་མཆོག་གི་གསོལ་འདེབས་ལྷ་རྒྱལ་བཅས་གདུང་ཤུགས་དྲག་པོས་དབྱངས་སུ་གྱེར་ནས་ཕྱེ་མར་མཆོད། ཚེས་གསུམ་ཉིན་ཡོལ་མོ་གངས་ཀྱི་རི་རྒྱུད་༼ རྒྱལ་གཤེན་པོར་ ༽ ཞེས་པའི་ས་གནས་སུ་བཞུགས་གུར་ཕུབ་ནས་བསང་གསོལ་གཏོང་རྒྱུ་གྲ་སྒྲིག་བྱས་ཏེ།

   ཕྱག་ཚོད་དགུ་པའི་ཐོག་སྐྱབས་རྗེ་ཡོངས་འཛིན་རིན་པོ་ཆེ་མཆོག་དང་མཁན་སློབ་རྣམ་པ་གདན་འདྲེན་ཞུས་ནས་དཔལ་ལྡན་ཁྲི་བརྟན་ནོར་བུ་རྩེའི་གྲྭ་ཚང་དང་། དེ་བཞིན་གསོ་རིག་འབུམ་བཞིའིི་སློབ་གྲྭའི་དགེ་སློབ་རྣམ་པ་དང་། ཕྱྭ་ཀེང་རྩེའི་སློབ་གྲྭའི་དགེ་སློབ་རྣམ་པ། ཏ་པི་ཧྲི་ཙའི་སློབ་གྲྭའི་དགེ་སློབ་རྣམས་དང་། གློ་དོལ་གཙོས་པའི་བལ་ཡུལ་ས་གནས་ཁག་གི་བོན་འབངས་ལྷ་སྡེ་དང་། ཕྱི་རྒྱལ་ཡུལ་གྲུ་ཁག་ནས་ཕེབས་པའི་དད་སྦྱིན་བཅས་མི་མང་སྟོང་ཕྲག་ཙམ་ལྷན་དུ་འཛོམས་ཏེ། ཡོངས་འཛིན་སྨྲ་བའི་དབང་པོ་མཆོག་དང་མཁན་སློབ་དགེ་བཤེས་རྣམ་པ་དབུ་བཞུགས་ཐོག་འདུས་སྡེ་ཡོངས་ཀྱིས་སྐོང་གསོལ་ཕྲིན་བཅོལ་རྒྱས་པ་གསུངས་ནས་ལྷ་བསང་གི་མཆོད་སྤྲིན་རྒྱ་ཆེན་པོ་ཕུལ་ཞིང་། ཚེ་སྒྲུབ། བྱམས་མ། བར་ཆོད་ལམ་སེལ་གྱི་ཀླུང་རྟ་མཁའ་ལ་བཀྱེས་པ་དང་། དར་ལྕོག་དར་ཚོན་སྣ་ལྔ་ཅན་ཕྱོགས་མཚམས་ཀུན་ཏུ་འཐེན་ནས་དར་གདུགས་ཕུབ། དེ་ནས་ཕྱག་ཚོད་བཅུ་གཅིག་ཐོག་གསོལ་ཇ་བཞེས་རྗེས་༸སྐྱབས་རྗེ་མཁན་སློབ་རྣམ་གཉིས་ཀྱི་གསོལ་འདེབས་དང་། བསྟན་རྒྱས་སྨོན་ལམ། ལྷ་རྒྱལ་བཅས་དབྱངས་སུ་གྱེས་ཞིང་ཀི་བསྭོའི་སྒྲ་དང་བཅས་ཏེ་ཕྱེ་མར་མཆོད་པ་བཅས་གྲུབ་རྗེས། ས་གནས་མི་མང་རྣམས་ཀྱིས་གནའ་དེང་གི་ཞབས་བྲོ་དང་གཞས་སྣ་ཕུན་སུམ་ཚོགས་པ་གཟིགས་འབུལ་ཞུས་ནས་ཉིན་དེའི་མཛད་རིམ་མཇུག་གྲུབ་པ་བཅས་ཀྱི་གནས་བསྡུས་སུ་ཏི་སེའི་བུ་ནས་བྲིས། ཟླ་ཚེས། 2015-01-26 00:25:32

(སྤྱིའི་གཟིགས་གྲངས། 162 དེ་རིང་། 1)

གཤམ་གྱི་རྩོམ་ཡིག་རྣམས་ལ་སྐུ་ཉིད་ཐུགས་མཉེས་པོ་ཡོང་སྲིད།

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།

མཚམས་སྦྱོར། རྩོམ་ཡིག་གོང་མ།
༧ གཡུང་དྲུ…
error: རྩོམ་འདི་བདག་དབང་ཅན་ཡིན།