ལེགས་བཤད་ལམ་རིམ་ལས། ” ཀྱཻ་མ་སྙིགས་དུས་འདིར་སྐྱེས་པའི། །ཁྲི་གཙུག་བསྟན་ལ་གཤེ་བ་ཚོལ། །དེས་ནི་བུ་ཚས་ཕ་ཁུ་ཡི། །རིགས་རྒྱུད་ངན་པ་བཤད་དང་མཚུངས། ། ” ཞེས་གསུངས་སོ། །

གདན་ས་ཁྲི་བརྟན་ནོར་བུའི་རྩེར་བོད་ལྕགས་བྱི་ལོའི་སྟོན་པའི་འདས་མཆོད་འཚོགས་པ།

 

 

 

 

 

བདག་ཅག་གི་སྟོན་པ་རྣམ་འདྲེན་བརྒྱད་པ་རྒྱལ་བ་གཤེན་རབ་མི་བོ་ཀུན་ལས་རྣམ་པར་རྒྱལ་བ་དེ་ཉིད་འཛམ་བུ་གླིང་དུ་བསྐལ་ཆེན་གྱི་སྟོན་པ་རུ་བྱོན་ཏེ་མཛད་ཆེན་བཅུ་གཉིས་ཀྱི་མཛད་པ་ཐ་མ་རྣམ་པར་གྲུབ་པའི་མཛད་པ་འམ་མྱང་ངན་འདས་པའི་མཛད་པ་བསྟན་པ་ཡིན་ཏེ། ལུང་ལས། བོན་ཉིད་དབྱིངས་ལ་སྐྱེ་འཆི་མི་མངའ་ཞིང་། །སེམས་ཉིད་ཡེ་ནས་སྐྱེ་འཆི་བདུད་དང་བྲལ། །མི་རྟག་རྟག་ཏུ་རེ་བའི་སེམས་ཅན་རྣམས། །ལན་གཅིག་རྟག་ཏུ་རེ་བ་སུན་ཕྱུངས་ཕྱིར། །འཁོར་བའི་གནས་ནས་མྱ་ངན་འདས་ཚུལ་བསྟན། །ཞེས་གསུངས། དེ་ཡང་སྟོན་པ་མྱ་ངན་འདས་པའི་དུས་ནི་སྟོན་པ་མཆོག་གཤེན་ལོ་གྱ་གཉིས་ཀྱི་ལོ་སྔགས་པའི་ལུགས་ལྟར་སྟོན་ཟླ་ཐ་ཆུང་དང་རྒྱ་རྩིས་ཀྱི་དགུན་ཟླ་ར་བའི་གནམ་སྟོང་གི་ཉི་ཤར་དུས་སུ་མྱང་ངན་ལས་འདས་པ་ཡིན་པ་དང་། དེའི་དུས་ལ་དགེ་བ་ཅི་བྱས་ཐམས་ཅད་འབུམ་འགྱུར་འགྲོ་བ་ཡིན་ཏེ། གསང་སྔགས་རྫོང་འཕྲང་ལས། ཡང་ཁྱད་ནི། སྟོན་པ་གཤེན་རབ་སྐུ་འཁྲུངས་པའི་དུས་ཏེ། ལོ་ཤིང་ཕོ་བྱི་བ། ཟླ་བ་སྔགས་པའི་དགུན་ཟླ་ཆ་ཆུང་། རྒྱ་རྩིས་ཀྱི་དཔྱིད་ར་བ། ཚེས་བཅོ་ལྔའོ། །སྐར་མ་རྒྱལ། དུས་ཚོད་ནམ་ལངས་པའོ། །སྔགས་པའི་སྟོན་འབྲིང་པོ། རྒྱ་རྩིས་པའི་ཐ་ཆུང་གི་ཚེས་བརྒྱད་ལ། བསྟན་པ་བཞག་པ་དང་། གདུང་ཚོབ་མུ་ཆོ་བྱོན་པའི་དུས་སོ། །སྔགས་པས་སྟོན་ཟླ་ཐ་ཆུང་རྒྱ་རྩིས་ཀྱི་རྒྱུན་ཟླ་ར་བའི་གནམ་སྟོང་ལ། མྱ་ངན་འདས་པའི་དུས་ཏེ། དེ་རྣམས་ལ་དགེ་བ་ཅི་བྱས་འབུམ་དུ་འགྲོའོ། །ཞེས་གསུངས་ལྟར་ཡིན་པས། གདན་ས་ཁྲི་བརྟན་ནོར་བུའི་རྩེ་ནས་ལོ་བསྟར་རེ་བཞིན་དུས་ཆེན་འདི་སྲུང་བརྩི་ཞུས་དང་ཞུ་བཞིན་པ་རེད། འདི་ལོ་ ༢༠༢༠ ༡༡ ༡༤ ཉིན་མཆོད་པ་རྣམ་ལྔ་བཤམས་ཏེ་མཆོད་བཟོ་ལེགས་པར་བྱས། དེ་རིང་འབྱུང་ལྡན་༣༠༡བོད་ལྕགས་བྱི་ལོའི་སྔགས་པའི་ལུགས་ལྟར་སྟོན་ཟླ་ཐ་ཆུང་དང་རྒྱ་རྩིས་ཀྱི་དགུན་ཟླ་ར་བའི་གནམ་སྟོང་སྟེ་ཧོར་ཟླ་ ༠༩ པའི་ཚེས་ ༣༠ ཉིན་ཞོགས་པ་སྔ་མོ་གསོ་སྦྱོང་འཚོགས་པ་དང་དེ་ནས་མཁན་སློབ་རྣམ་པ་དབུ་བཞུགས་ཐོག་བདེར་གཤེགས་སྨོན་ལམ་མཐའ་ཡས་ཀྱི་གཞུང་བསྲངས་བ་དང་། དགོང་མོ་མཆོད་མེ་དང་གློག་སྒྲོན་སྤར་ཏེ་སྟོན་པའི་གསོལ་འདེབས་དབྱངས་སུ་བསྐྱོན་ནས་བདག་ཅག་གི་སྟོན་པ་མཆོག་གི་བཀའ་དྲིན་རྗེས་སུ་དྲན་པའི་སྒོ་ནས་དངོས་འབྱོར་ཡིད་སྤྲུལ་ཡིད་ཀྱི་མཆོད་པ་སྣ་ཚོགས་ཕུལ་ཏེ་འདས་མཆོད་སྲུང་བརྩི་ཞུས་པའི་གནས་བསྡུས་སུ།

ཁྱུང་ཁྲི་ལྡེས་ ༢༠༢༠ ༡༡ ༡༥ དགོང་མོར་སྤེལ།། །།

པར་པ་ཁྱུང་ཐོག་རྒོད།

110550cookie-checkགདན་ས་ཁྲི་བརྟན་ནོར་བུའི་རྩེར་བོད་ལྕགས་བྱི་ལོའི་སྟོན་པའི་འདས་མཆོད་འཚོགས་པ།
(སྤྱིའི་གཟིགས་གྲངས། 754 དེ་རིང་། 1)

གཤམ་གྱི་རྩོམ་ཡིག་རྣམས་ལ་སྐུ་ཉིད་ཐུགས་མཉེས་པོ་ཡོང་སྲིད།

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།

མཚམས་སྦྱོར། རྩོམ་ཡིག་གོང་མ།
སྙིགས་དུས་…
error: རྩོམ་འདི་བདག་དབང་ཅན་ཡིན།