གཡུང་དྲུང་བོན་གྱི་གདན་ས་ཆེན་མོ་༧དཔལ་ལྡན་ཁྲི་བརྟན་ནོར་བུའི་རྩེའི་གཡུང་དྲུང་བོན་གྱི་ཆེས་མཐོའི་གཙུག་ལག་སློབ་གཉེར་ཁང་གི་བྲིས་རྒྱུགས་ཀྱི་གནས་བསྡུས།

གཡུང་དྲུང་བོན་གྱི་ཆེས་མཐོའི་གཙུག་ལག་སློབ་གཉེར་ཁང་གི་བཤད་གྲྭའི་སློབ་གཉེར་བ་རྣམས་ལ་ལོ་རེར་རྩོད་རྒྱུགས་དང་བྲིས་རྒྱུགས་གཉིས་སློབ་གཉེར་བ་ཡོངས་རྫོགས་མཉམ་དུ་གཏོང་དགོས་པ་དང་། ཡིག་རྒྱུགས་ཀྱི་ཆེད་དུ་སློབ་གཉེར་བ་རྣམས་ཟླ་བ་གཅིག་གི་རིང་སྐབས་བབ་བསླབ་བྱའི་རྩ་འགྲེལ་རྣམས་ལ་ཆེད་དམིགས་ཀྱིས་སྦྱོང་བརྡར་ནན་མོ་བྱས་ཏེ་རྒྱུགས་སྤྲོད་གཏོང་གིན་ཡོད། འདི་ལོར་སྐབས་སུམ་ཅུ་བའི་བཤད་སྒྲུབ་འདུས་སྡེས་གོ་སྒྲིག་འོག ཕྱི་ལོ་༢༠༢༤ཕྱི་ཟླ་༨པའི་ཚེས་༢༠ཉིན། ༧སྐྱབས་རྗེ་དཔོན་སློབ་རིན་པོ་ཆེ། ༧སྐྱབས་རྗེ་སྒྲུབ་གྲྭའི་མཁན་རིན་པོ་ཆེ། བཤད་སྒྲུབ་མཁན་སློབ་རྣམ་གཉིས། རྩ་འཛིན་སློབ་དཔོན་རྣམ་པ་དང་དགེ་བཤེས་རྣམ་པ་བཅས་རྒྱུགས་སྤྲོད་དོ་དམ་མི་སྣས་སྟངས་འཛིན་འོག ཞོགས་པའི་ཕྱག་ཚོད་༧དང་སྐར་མ་༣༠ཐོག་རྒྱུགས་ཞུགས་པ་རྣམས་ཐོ་འགོད་གནང་རྗེས། རྒྱུགས་སྤྲོད་དོ་དམ་མི་སྣས་རྒྱུགས་ཞུགས་རྣམས་ནས་ཤོག་འཛར་སོགས་རྒྱུགས་སྤྲོད་ཀྱི་སྒྲིག་གཞི་དང་འགལ་བའི་རིགས་བསྣམས་ཡོད་མེད་ལུས་བཤེར་བྱས་ཏེ་རྒྱུགས་སྤྲོད་ར་བའི་ནང་དུ་ཨང་རིམ་བཞིན་སོ་སོའི་བཞུགས་གྲལ་དུ་འཁོད་དེ་དགེ་རྒན་རྣམ་པས་འཛིན་གྲྭ་སོ་སོའི་རྒྱུགས་ཤོག་བཀྲམས། དེ་རྗེས་ཕྱག་ཚོད་༨པའི་ཐོག་སྒྲུབ་གྲྭའི་དགེ་སྐོས་མཆོག་ནས་རྒྱ་རྔས་བརྡ་བཏང་སྟེ་རྒྱུགས་སྤྲོད་ཀྱི་དབུ་བཙུགས། རྒྱུགས་སྤྲོད་ལ་དངོས་སུ་ཞུགས་མཁན་གྱི་སློབ་གཉེར་བ་ནི་གཡུང་དྲུང་བོན་གྱི་ཆེས་མཐོའི་གཙུག་ལག་སློབ་གཉེར་ཁང་གི་སློབ་འཆར་རེའུ་མིག་ལྟར་རིགས་ལམ་སྔོན་འགྲོའི་འཛིན་གྲྭ་ནས་རྫོགས་ཆེན་འཛིན་གྲྭ་བར་གྱི་སློབ་མ་རྣམས་དང་། གཞུང་ཆེན་ཆེད་སྦྱོང་གྱི་སློབ་གཉེར་བ་བཅས་རྒྱུགས་ཁོངས་སུ་ཞུགས་ཡོད། གཞན་ཡང་གཞི་རིམ་སྔོན་འགྲོའི་སློབ་ཕྲུག་རྣམས་ལོ་ལྟར་ཟླ་བ་དྲུག་རེའི་མཚམས་ནས་རྒྱུགས་སྤྲོད་གཏོང་སྲོལ་ཡོད་པ་དང་། སློབ་ཚན་ལའང་བོད་ཡིག་དང་། བལ་སྐད། སྤྱིར་བཏང་ཚན་རིག ཨང་རྩིས། དབྱིན་སྐད། སྤྱི་ཚོགས་ཚན་རིག ཡིག་གཟུགས། དཔེ་ཆ་ཤར་འདོན་སྦྱོར་ཀློག གཏམ་བཤད་བགྲོ་གླེང་བཅས་ཡོད་པ་རྣམས་གཞི་རིམ་སྔོན་འགྲོའི་སློབ་གྲྭའི་འགན་འཛིན་གཙོས་དགེ་རྒན་རྣམ་པའི་དབུ་ཁྲིད་འོག་འདི་ལོའི་ཕྱི་ཟླ་༧་ཚེས་༢༡་ནས་ཕྱི་ཚེས་༢༨་བར་བདུན་ཕྲག་གཅིག་གི་རིང་རྒྱུགས་སྤྲོད་བཏང་ཡོད། དེ་བཞིན་སྔར་སྲོལ་གསོ་རིག་འབུམ་བཞིའི་སློབ་མ་རྣམས་ལ་ཡང་རྒྱུགས་སྤྲོད་སློབ་ཚན་ལ་བརྡ་སྤྲོད་དང་། སྙན་ངག སྨན་གྱི་ལོ་རྒྱུས། བལ་སྐད། དབྱིན་སྐད། གསོ་བ་རིག་པའི་བྲིས་རྒྱུགས། གསོ་བ་རིག་པའི་ངག་རྒྱུགས་བཅས་ཟླ་བ་དྲུག་རེའི་མཚམས་སུ་རྒྱུགས་སྤྲོད་གཏོང་སྲོལ་ཡོད་པ་ལྟར། སྔར་སྲོལ་གསོ་རིག་འབུམ་བཞི་སློབ་གྲྭའི་འགན་འཛིན་གཙོས་དགེ་རྒན་རྣམ་པའི་དབུ་ཁྲིད་འོག་འདི་ལོའི་ཟླ་དྲུག་སྔོན་མའི་ཡིག་རྒྱུགས་དེ་ཕྱི་ཟླ་༧ཚེས་༢༤ཉིན་ནས་ཕྱི་ཚེས་༢༨བར་ཉིན་གྲངས་ལྔ་ཡི་རིང་བཏང་ཡོད་པ་བཅས་ཀྱི་གནས་བསྡུས་སུ།

རིག་པའི་མེ་ལྕེས་ཕྱི་ལོ་༢༠༢༤ཟླ་༨ཚེས་༢༠ཉིན་སྤེལ།

པར་པ་ཁྱུང་ཐོག་རྒོད་དང་ཞང་ཚུལ་མི།