ལེགས་བཤད་ལམ་རིམ་ལས། ” ཀྱཻ་མ་སྙིགས་དུས་འདིར་སྐྱེས་པའི། །ཁྲི་གཙུག་བསྟན་ལ་གཤེ་བ་ཚོལ། །དེས་ནི་བུ་ཚས་ཕ་ཁུ་ཡི། །རིགས་རྒྱུད་ངན་པ་བཤད་དང་མཚུངས། ། ” ཞེས་གསུངས་སོ། །

དམ་པ་རི་ཁྲོད་པ་དང་སྨན་གོང་བ་མཁས་པ་དཔལ་ཆེན་སོགས་ལ་བསྟོད་པ་རོང་སྟོན་གྱིས་མཛད་པ།

མ་པ་རི་ཁྲོད་པ་ལ་བསྟོད་པ་ལྷའི་རྔ་བོ་ཆེ་ཞེས་བྱ་བ། 

བླ་མ་དང་ལྷག་པའི་ལྷ་ལ་ཕྱག་འཚལ་ལོ། །

དགེ་ཚོགས་ཉི་མའི་དཀྱིལ་འཁོར་རབ་རྒྱས་པས། །

བདག་བློའི་མ་རིག་མུན་པ་སེལ་བ་དང༌། །

མཐའ་ཡས་གདུལ་བྱ་པདྨོའི་གཉེན་གྱུར་ཅིང༌། །

ཏིང་འཛིན་སྦྲང་རྩི་ཡོངས་སུ་འཕེལ་བའི་རྒྱུ། །

དམ་པ་རྣམས་ཀྱིས་བསྟོད་པའི་སྒྲ་བསྒྲོགས་ཤིང༌། །

རི་བོའི་དབེན་གནས་ཚད་མེད་ཏིང་འཛིན་བསྒོམ། །

གངས་རིའི་ཁྲོད་ན་རྣལ་འབྱོར་མཆོག་གྱུར་པ། །

ཐར་འདོད་རྣམས་ལ་ཕན་པའི་དགའ་སྟོན་འགྱེད། །

མི་རྟོག་ཏིང་འཛིན་ཕུལ་བྱུང་རབ་མཉེས་ཤིང༌། །

བྱིན་རླབས་འོད་ཀྱིས་འགྲོ་ཀུན་སྨིན་མཛད་པ། །

དམ་པ་རྣམས་ཀྱི་བསྟོད་འོས་ཁྱོད་ལ་ནི། །

རྣམ་པ་ཀུན་ཏུ་དད་པས་ཕྱག་འཚལ་ལོ། །

དེ་ལྟར་བསྟོད་པའི་དགེ་བ་ལས། །

འགྲོ་ཀུན་ཀུན་མཁྱེན་མྱུར་ཐོབ་ཤོག །

ཅེས་རོང་སྟོན་ཆེན་པོས་དཔལ་ནཱ་ལེནྡྲར་སྦྱར་བའོ།།  

 

བླ་མ་དམ་པ་སྨན་གོང་འདུལ་བ་ལ་བསྟོད་པ་མེ་ཏོག་ཕྲེང་འཛིན་ཞེས་བྱ་བ།

བླ་མ་དང་ལྷག་པའི་ལྷ་ལ་ཕྱག་འཚལ་ལོ། །

མང་དུ་ཐོས་པའི་གཟི་བརྗིད་ཡལ་འདབ་ཅན། །

ཚད་མེད་ཡོན་ཏན་མེ་ཏོག་རབ་རྒྱས་ཤིང༌། །

གསུང་རབ་ཀུན་ལ་མི་འཇིགས་འབྲས་བུ་ཅན། །

ཡང་དག་རིག་པའི་འོད་ཟེར་ཕྱོགས་བཅུར་འཕྲོ། །

ཕས་ཀྱི་རྒོལ་བའི་དཔུང་ཚོགས་ཟིལ་གྱིས་གནོན། །

རྩོམ་པ་སྐྱོན་མེད་མཁས་པའི་ཡིད་འཕྲོག་ཅིང༌། །

འཆད་པ་ངག་གི་ཟེར་གྱིས་མུན་པ་སེལ། །

མཁས་བཙུན་འགྲན་ཟླ་བྲལ་བའི་ཆོས་ཀྱི་རྗེ། །

སྤྱོད་པ་དྲི་མེད་མཛེས་པའི་རྒྱན་དང་ལྡན། །

ངག་གི་སྒོ་ནས་བཀྲ་ཤིས་ཕུན་ཚོགས་པ། །

ལྷ་ཡི་ཡིད་འོང་མེ་ཏོག་ཆར་པ་ཕབ། །

འོད་ཟེར་སྤྲོས་པའི་མཆོད་རྟེན་མངོན་སུམ་མཐོང༌། །

གང་གི་ཞབས་པད་གུས་པས་བསྟེན་པ་དག །

ཐར་ལམ་མངོན་ཕྱོགས་སྐལ་བ་ཅན་དུ་གྱུར། །

དོན་གཉིས་དབང་འབྱོར་དཔལ་ལྡན་བླ་མའི་ཞབས། །

གཙུག་གི་ནོར་བུས་གུས་པས་མཆོད་པར་བགྱི། །

འདི་ལ་དགེ་བ་གང་ཞིག་ཐོབ་པ་ཡིས། །

ཐམས་ཅད་མཁྱེན་པའི་གོ་འཕང་ཐོབ་གྱུར་ཅིག །

ཅེས་རོང་སྟོན་ཆེན་པོས་དཔལ་ནཱ་ལེནྡྲའི་དགོན་པར་སྦྱར་བའོ།།

 

མཁས་པ་དཔལ་ཆེན་ལ་བསྟོད་པ་དཔལ་གྱི་འབྱུང་གནས་ཞེས་བྱ་བ།

བླ་མ་དང་ལྷག་པའི་ལྷ་ལ་ཕྱག་འཚལ་ལོ། །

གསུང་རབ་མང་དུ་ཐོས་པའི་སྨྲ་བ་པ། །

རིག་གནས་ཀུན་ལ་མི་འཇིགས་སྤོབས་པ་ཅན། །

ཉི་མའི་འོད་ཀྱི་སྐར་མའི་ཚོགས་བཞིན་དུ། །

རིག་པའི་སྟོབས་ཀྱི་ཕས་རྒོལ་ཟིལ་གྱིས་གནོན། །

འཆད་པ་ཉི་མའི་འོད་ཀྱིས་གདུལ་བྱ་ཡི། །

བློ་གྲོས་པདྨོ་རབ་ཏུ་རྒྱས་པ་དང༌། །

སྐྱོན་བྲལ་རྩོམ་པ་མཁས་པ་དགའ་བྱེད་ཅིང༌། །

དུས་རྣམས་རྟག་ཏུ་དགེ་བའི་རང་བཞིན་ཅན། །

སྤོབས་པ་མི་ཟད་མཁས་པའི་མཆོག་གྱུར་པ། །

བསྟན་པ་ཉིན་མོར་བྱེད་པའི་སྣང་བ་ཅན། །

ཀུན་ཏུ་རྣམ་པར་རྒྱལ་བའི་སྟོབས་མངའ་བ། །

འགྲོ་བའི་དེད་དཔོན་ཁྱོད་ལ་གུས་པས་འདུད། །

མཁས་པ་ཕུལ་ཕྱིན་ཁྱོད་ལ་རབ་བསྟོད་པ། །

མཁས་པའི་གོ་འཕང་མཆོག་ཏུ་བརྙེས་གྱུར་ཅིག །

ཅེས་རོང་སྟོན་ཆེན་པོས་ནཱ་ལེནྡྲར་སྦྱར་བའོ།།  

རོང་སྟོན་ཆེན་པོའི་གསུང་འབུམ་ཐོར་བུ་བསྟོད་ཚོགས་ཀྱི་སྐོར་ལས་ཏི་སེའི་བུས་ཟུར་དུ་བཏོན།

 

འཛམ་གླིང་སྤྱི་བསྟོད་བཞུགས་སོ།།

དངོས་རྣམས་མ་ལུས་ཅི་བཞིན་མངོན་སུམ་མཁྱེན། ཚད་མེད་ཐུགས་རྗེས་འགྲོ་བ་ཡོངས་ལ་ཁྱབ། མཐའ་ཡས་འགྲོ་བ་ཀུན་གྱི་སྐྱོབས་པའི་དཔལ། ལྷ་མིའི་སྟོན་པ་དེ་ལ་མཆོད་པ་འབུལ། ཆེ་བའི་ཡོན་ཏན་དཔལ་གྱིས་མངོན་མཐོ་ཞིང་། ཕ་རོལ་ཕྱིན་དྲུག་སྤྱོད་པ་རྣམ་པར་དག འགྲོ་དྲུག་འདྲེན་མཛད་འཕྲིན་ལས་བླ་ན་མེད། གོང་མ་ཆེ་དྲུག་ཞབས་ལ་མཆོད་པ་འབུལ། བཅུ་གསུམ་སྟོབས་ཀྱིས་བདུད་བཞིའི་དཔུང་ཚོགས་འཇོམས། བཅུ་གསུམ་རིག་འཛིན་ས་ཡི་མཐར་ཐུག་སྙེད། རྫུ་འཕྲུལ་སྟོབས་ཀྱིས་ཞིང་ཁམས་མཐའ་ཡས་བསྒྲོད། གདུང་རྒྱུད་བཅུ་གསུམ་ཞབས་ལ་མཆོད་པ་འབུལ། འཛམ་གླིང་མཁས་པ་ཀུན་གྱི་གཙུག་གི་རྒྱན། རིག་གནས་ཀུན་ལ་མི་འཇིགས་སྤོབས་པ་ཐོབ། ཤེས་བྱའི་མཁའ་ལ་བློ་གྲོས་ཐོགས་མེད་འཁྱུག མཁས་པ་མི་བཞིའི་ཞབས་ལ་མཆོད་པ་འབུལ། སྐད་གཉིས་སྨྲ་བ་འཇིག་རྟེན་ཀུན་གྱི་མིག སྒྲ་སྐད་ཀུན་ལ་མཁས་པ་ཕུལ་དུ་ཕྱིན། ལེགས་བཤད་ངག་གི་ཟློས་གར་བསྒྱུར་མཛད་པ། ལོ་པཎ་གཤེན་བརྒྱད་ཞབས་ལ་མཆོད་པ་འབུལ། སྲིད་པའི་གནས་སུ་བརྩེ་བའི་གར་བསྒྱུར་ཞིང་། བསྟན་པ་སྐྱོང་ཞིང་འགྲོ་བའི་དོན་མཛད་པ། དགེ་ལེགས་ཡོན་ཏན་ཐམས་ཅད་འབྱུང་བའི་གནས། མ་མཆོག་སྲིད་རྒྱལ་ཞབས་ལ་མཆོད་པ་འབུལ། གསུང་རབ་རིན་ཆེན་གཏེར་སྒོ་འབྱེད་པའི་གཤེན། རྒྱལ་བསྟན་ནོར་བུའི་བང་མཛོད་ཀླུ་དབང་མཚན། སྐལ་ལྡན་རྣམས་ལ་མདོ་རྒྱུད་དགའ་སྟོན་འགྱེད། གཤེན་ཆེན་ཀླུ་དགའི་ཞབས་ལ་མཆོད་པ་འབུལ། བསྟན་པ་མི་ནུབ་བོན་གྱི་རྒྱལ་མཚན་འཛུགས། རྗེས་འཇུག་གདུལ་བྱ་ཡོངས་སུ་སྨིན་པར་མཛད། བྱིན་རླབས་བདུད་རྩིའི་ཆར་རྒྱུན་འབེབས་མཛད་པ། བྲུ་ཞུ་སྤ་རྨེའུ་ཞབས་ལ་མཆོད་པ་འབུལ། དམ་པ་རྣམས་ལ་གུས་པས་བསྟོད་པ་ཡི། བསྟོད་ཚིག་མེ་ཏོག་འཕྲེང་བ་རབ་སྤེལ་བས། དགེ་ཚོགས་དྲི་མེད་གང་ཞིག་ཐོབ་པ་དེས། འགྲོ་ཀུན་སྲིད་པའི་མཚོ་ལས་བསྒྲོལ་བར་ཤོག ཅེས་པའི་ཚུལ་འདི་ནི་རོང་སྟོན་ཤེས་བྱ་ཀུན་རིག་གིས་སྦྱར་བའོ།། དགེའོ།།

98880cookie-checkདམ་པ་རི་ཁྲོད་པ་དང་སྨན་གོང་བ་མཁས་པ་དཔལ་ཆེན་སོགས་ལ་བསྟོད་པ་རོང་སྟོན་གྱིས་མཛད་པ།
(སྤྱིའི་གཟིགས་གྲངས། 377 དེ་རིང་། 1)

གཤམ་གྱི་རྩོམ་ཡིག་རྣམས་ལ་སྐུ་ཉིད་ཐུགས་མཉེས་པོ་ཡོང་སྲིད།

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།

མཚམས་སྦྱོར། རྩོམ་ཡིག་གོང་མ།
ཕྱི་ལོ་ ༢༠…
error: རྩོམ་འདི་བདག་དབང་ཅན་ཡིན།