ནགས་ཚལ་དབེན་པའི་རྒྱང་གླུ་རྒྱལ་གཤེན་དཔའ་བོའི་བཞད་སྒྲ།
རྩོམ་པ་པོ། ལི་བློ་གསལ།
ཟབ་གསང་རྫོགས་པ་ཆེན་པོའི་མན་ངག་གི་གཏེར་མཛོད། །མཁའ་ཁྱབ་འགྲོ་ལ་འགྱེད་མཛད་བརྩེ་ཆེན་ཀྱི་བདག་ཉིད། །
མཁྱེན་རབ་རལ་གྲི་ཕྱར་བའི་ཡོངས་འཛིན་གྱི་བླ་མས། །སྐལ་བཟང་ལས་ལྡན་བུ་ལ་དགོངས་རྟོགས་དེ་འཕོས་ཤིག །
འདུ་འཛིའི་གྲོང་ལས་བརྒལ་བའི་ལྷིང་འཇགས་ཀྱི་སྐྱེད་ཚལ། །བག་ཡོད་དྲང་སྲོང་དགྱེས་པའི་ནགས་ཀླུང་གི་ཁྲོད་ན། །
རང་རྒྱུད་བོན་དང་འདྲེས་ཏེ་དགེ་སྦྱོར་གྱི་ངང་ནས། །ངོ་མཚར་གཤིས་ལ་བལྟ་བའི་བྱིན་ཆེན་དེ་སྩོལ་ཅིག །
བོན་བརྒྱད་སྒྱུ་མའི་སྒེག་མོ་རྒྱང་རིང་དུ་བསྲིངས་ཏེ། །ཡང་དབེན་རྒྱལ་གཤེན་དཔའ་བོའི་སྒྲུབ་གནས་ཀྱི་ཞིང་དུ། །
བོན་ཉིད་ཀུན་ཏུ་བཟང་མོ་གཏན་གྲོགས་སུ་བསུས་ནས། །བདེ་སྟོང་ལྷན་ཅིག་སྐྱེས་པའི་དགའ་སྟོན་དེ་སྩོལ་ཅིག །
ཤར་ཕྱོགས་དྲི་ཟའི་རི་བོ་མཐོང་ཡངས་སུ་ཕྱེ་ཞིང་། །ལྷོ་ཕྱོགས་ནགས་ཀླུང་སྟུག་པོ་ནོར་བུ་དག་སྤུངས་འདྲ། །
ནུབ་ཕྱོགས་གཡུ་མདངས་འབར་བའི་ཚང་ཚིང་གིས་མཛེས་ཤིང། །བྱང་ཕྱོགས་ཡོལ་བ་འཐེན་འདྲའི་མཚན་ལྡན་གྱི་གནས་མཆོག །
མཁན་སློབ་ཉི་ཟླ་ཟུང་གི་གཟི་འོད་དེ་འཕྲོ་བཞིན། །ཞབས་སེན་དབང་གི་རྒྱལ་པོ་གནས་འདི་རུ་བཀོད་ནས། །
ངོ་མཚར་རྟེན་འབྲེལ་སྟོང་གི་བྱིན་རླབས་ཀྱི་ན་བུན། །བསྐལ་པ་མ་སྟོང་བར་དུ་ཡལ་མེད་དུ་གནས་ཡོད། །
དྲི་ཞིམ་ནགས་ཀླུང་སྟུག་པོའི་རི་སུལ་གྱི་དབུས་ན། །དྲོད་འཇམ་ལུས་ལ་འཚམ་པའི་དྲི་བཞོན་དང་འགྲོགས་ཏེ། །
ཡིད་འོང་ལྗོན་ཤིང་ལྷ་མོའི་རོལ་རྩེད་ལ་བརྟེན་ནས། །ནགས་ཚལ་དབེན་པར་སྤྲོ་བའི་རྒྱང་གླུ་ཞིག་ལེན་ནོ། །
འབྲལ་མེད་འཕགས་པའི་ནོར་བདུན་སྙིང་དབུས་སུ་ཉར་ན། །བླ་མེད་བྱང་ཆུབ་ལམ་བཟང་གཏན་གྲོགས་སུ་བསུ་ཆོག །
འཇིག་རྟེན་བོན་བརྒྱད་འཛིན་པ་རང་གྲོལ་དུ་སོང་ན། །གཤེན་གྱི་དགེ་སྦྱོར་ཞེས་པའི་མིང་དོན་དེ་ཚང་སྐད། །
དྲ་རྒྱའི་བརྡ་རྟགས་མེད་པའི་དབེན་གནས་ཀྱི་ཁྲོད་ན། །ཕྱོགས་རིས་གདོན་གྱིས་བརླམས་པའི་དྲ་འབུ་དེ་མི་འདུག །
བསླུ་བྲིད་མགོ་སྐོར་གཏོང་བའི་དྲ་འདྲེ་ཡང་མི་འདུག །བྱིང་རྒོད་གཅུན་ཡང་མི་དགོས་གཞི་ཐོག་ཏུ་གནས་སྐད། །
སྔོ་ལྗང་གཡུ་ལོ་རྒྱས་པའི་འཁྲིལ་ཤིང་གི་རྩེ་ལ། །དཀར་དམར་མེ་ཏོག་བཞད་པའི་འདབ་ལོ་ཡི་ཐོག་ཏུ། །
འགྱུར་ཁུག་དབྱངས་བདུན་རྫོགས་པའི་ཁུ་བྱུག་གི་མགྲིན་པས། །མ་བསྐུལ་སྒྲ་འཛིན་ལྷ་མོ་དབང་མེད་དུ་བཀུག་སོང་། །
ཆུ་སྐྱེས་ཟོལ་གྱིས་འཛུམ་པའི་ཟེའུ་འབྲུ་ཡི་དཀྱིལ་དུ། །རབ་མངར་སྦྲང་རྩིས་བཟི་བའི་རྐང་དྲུག་གི་ཚོགས་ཀྱིས། །
དགའ་བདེའི་གཤོག་ཟུང་གཡོ་བའི་རྣམ་འགྱུར་གྱི་མཛེས་སྡུག། །སྒྲུབ་གཤེན་སྐྱོ་བ་སངས་པའི་དཔྱིད་དཔལ་དུ་མཛེས་སོང་། །
མ་བཀོད་ནགས་ཀླུང་མཛེས་ལྗོངས་སྤང་མཐོ་ཡི་རྩེ་ན། །མ་རྙོག་ཡན་ལག་བརྒྱད་ལྡན་རང་བྱུང་གི་འབབ་ཆུ། །
མ་བཤམས་ལྷུན་གྱིས་གྲུབ་པའི་དྭངས་བསིལ་གྱི་མཆོད་པ། །མ་བསྒྲུབས་ལས་ཀྱིས་སྤྲུལ་པའི་བདུད་རྩི་དང་འདྲ་སོང་། །
འདུ་འཛིའི་གྲོང་ལས་བརྒལ་བའི་དབེན་གནས་ཀྱི་རི་ཁྲོད། །གཏན་བདེའི་ཐར་པ་འདོད་པའི་གཞིས་ཁྱིམ་རང་ཡིན་སྐད། །
སེམས་ལ་བྱམས་བརྩེས་ཕྱུག་པའི་དབེན་གནས་ཀྱི་བུ་ལ། །གདོང་ལ་འཛུམ་མདངས་རྒྱས་པའི་སྤྲོ་ཉམས་ཀྱིས་ཁེངས་ཡོད། །
ནེའུ་གསིང་དབང་གཞུ་བཀྲ་བའི་ལྡིང་ཁང་གི་ནང་དུ། །འབོལ་གདན་གྲུ་བཞིའི་སྟེང་དུ་སོས་དལ་གྱི་ངང་ནས། །
དཀར་དམར་མེ་ཏོག་བཞད་པའི་དྲི་ངད་ལ་བརྟེན་ནས། །ཉིན་མོར་མི་རྟོག་དགོངས་པའི་རྣལ་འབྱོར་དེ་སྤྲོ་འོ། །
སྟོན་མཚན་ཟླ་བའི་འཛུམ་དཀར་ལྷག་ལྷག་ཏུ་བཞད་ཅིང་། །རྒྱུ་སྐར་དོ་ཤལ་རྒོད་པའི་མཚན་མོ་ཡི་དུས་སུ། །
གྲག་འགུལ་ཅི་ཡང་མེད་པའི་ལྷིང་འཇགས་ཀྱི་ཁྲོད་དུ། །ཡེངས་མེད་རྣལ་འབྱོར་བརྩོན་པའི་གྲྭ་རྐྱང་དེ་སྐྱིད་པ། །
ཉམས་མྱོང་སྒོམ་པ་ཤར་བའི་ལས་ལྡན་གྱི་བུ་ཡིས། །གཤིས་ཀྱི་བདེ་བར་རོལ་བའི་འཛུམ་མདངས་དེ་རྒྱས་ཤིང་། །
འཁོར་འདས་རོ་གཅིག་རྟོགས་པའི་གཅེར་གྲོལ་གྱི་ལྟ་བ། །མ་བཅོས་གཉུག་མའི་ཀློང་ནས་ལྷག་ལྷག་ཏུ་ཤར་སོང་། །
འཁྲུལ་རྟོག་ཆར་སྤྲིན་ནག་པོ་མཁའ་མཐའ་རུ་དེངས་ནས། །རྟོག་མེད་སྐར་མ་འོད་ཆེན་ལམ་ལམ་དུ་འབར་སོང་། །
རྣམ་རྟོག་བློ་ཡི་གཡང་ལུགས་ཕྱོགས་མཐར་རུ་རལ་ནས། །གཉུག་དྲན་རིག་པའི་ཟླ་ཞལ་རྗེན་གཅེར་དུ་མཇལ་སོང་། །
དགག་སྒྲུབ་སྤྲོས་པ་བྲལ་བའི་བློ་འདས་ཀྱི་ལྟ་བ། །བཟུང་འཛིན་གདོད་ནས་དག་པའི་ཡེ་གྲོལ་གྱི་སྒོམ་པ། །
མ་བཅོས་གཤིས་ཀྱི་ངང་དུ་ལྷུག་པ་རུ་ཞོག་དང་། །རང་བྱུང་ཡེ་ཤེས་ཆེན་པོ་ལྷག་ལྷག་ཏུ་ཤར་ཡོང་། །
མི་ཚེ་ལྷག་མའི་གོམ་སྟབས་དབེན་གནས་ལ་སྤོས་ཏེ། །གཏན་བདེའི་ཐམས་ཅད་མཁྱེན་ལ་བློ་ཁ་དེ་ཕྱོགས་ནས། །
བཅོས་མིན་ངེས་འབྱུང་དྲག་པོ་རྒྱུད་ཐོག་ཏུ་འཁྲུངས་བའི། །ན་དགའ་འཆི་བྲོད་ཅན་གྱི་རྣལ་འབྱོར་དེ་སྐྱིད་པ། །
ཉམས་དགའ་བག་ཕེབས་དབེན་པའི་རི་ཁྲོད་ཀྱི་བཀོད་པ། །རྨད་བྱུང་ཡ་མཚན་སྟོང་གི་མཛེས་སྡུག་གིས་བརྒྱན་ཤིང་། །
སུ་ཞིག་གང་གི་དཔལ་ལ་རྗེས་ཆགས་སུ་མཆིས་ཚེ། །ལན་གཅིག་རྒྱལ་གཤེན་རྒྱལ་བོའི་དབེན་གནས་སུ་ཕེབས་ཞུ། །
མཛེས་སྡུག་གཞོན་ནུའི་ལང་ཚོ་འཇའ་ཚོན་གྱི་རི་མོ། །མཚན་དང་སྙན་པའི་གྲགས་པ་སྟོང་གཟུགས་ཀྱི་བྲག་ཆ། །
དགའ་ཞིང་བརྩེ་བའི་གཉེན་གྲོགས་ཚོང་འདུས་ཀྱི་མགྲོན་པོ། །ཐམས་ཅད་མི་རྟག་བསམ་བཞིན་དབེན་གནས་འདིར་ཕེབས་ཤིག །
འཁོར་དང་མངའ་ཐང་གཟི་བརྗིད་རྨི་ལམ་གྱི་སྣང་བ། །རྒྱུ་དང་དཔལ་འབྱོར་ལོངས་སྤྱོད་རྩྭ་མགོ་ཡི་ཟིལ་པ། །
བསགས་མཐའ་ཟད་ཅིང་འདུས་མཐའ་བྲལ་བ་ལ་གཞིགས་ནས། །ནགས་ཚལ་དབེན་པའི་རི་ལ་བློ་བདེའི་ངང་ཕེབས་ཤིག །
གསོན་མཐའ་རོ་ལས་མེད་པའི་མཛེས་སྡུག་གི་ལྷ་མོ། །བརྩིགས་མཐའ་རྡུལ་ལས་མེད་པའི་དྲི་ཟ་ཡི་གྲོང་ཁྱེར། །
སྐྱིད་མཐའ་སྡུག་གིས་བཟུང་བའི་ཀུན་རྫོབ་ཀྱི་སྣང་བ། །གཏན་དུ་ཐར་བདེ་འདོད་ན་དབེན་གནས་འདིར་ཕེབས་ཤིག །
དལ་འབྱོར་བཅོ་བརྒྱད་ཚང་བའི་མཛེས་སྡུག་གི་ཕུང་པོ། །སྟོན་མཇུག་མེ་ཏོག་འདྲ་སྟེ་མི་རྟག་པའི་རང་བཞིན། །
འདི་ལ་བློ་ལྡན་སུ་ཞིག་ཡིད་བརྟན་ཞིག་མེད་ཕྱིར། །དལ་འབྱོར་སྙིང་པོ་ལེན་ལ་དབེན་གནས་འདིར་ཕེབས་ཤིག །
ཀུན་རྫོབ་བཅོས་མའི་བོན་ལ་རེ་ཐག་དེ་ཆད་ནས། །སྙིང་ནས་ཐར་པ་འདོད་པའི་སྐྱེས་བུ་ཞིག་མཆིས་ན། །
རྒྱལ་བསྟན་ཀུན་གྱི་སྙིང་པོ་བླ་མེད་ཀྱི་ལྟ་བ། །སྙིང་དབུས་དམ་དུ་བཅངས་ནས་དབེན་ཁྲོད་འདིར་ཕེབས་ཤིག །
ཅེས་པ་འདི་ནི་མདོ་ཁམས་ལི་ཐང་བ་དགེ་བཤེས་བློ་གྲོས་འོད་གསལ་རྒྱལ་མཚན་ནམ་བརྡ་སྤྲོད་ཀུན་བཤད་ཀྱི་མིང་དུ་བོན་དབྱིངས་རང་གྲོལ་དུ་འབོད་པས་རབ་བྱུང་བཅུ་བདུན་པའི་ས་མོ་ཕག་གི་ལོ་ཁྲུམས་ཟླ་བརྒྱད་པའི་དཀར་ཕྱོགས་རྒྱལ་བ་དང་པོའི་ཚེས་ལ་སྐབས་གསུམ་ལྷ་ཡི་དགའ་ཚལ་མི་ཡུལ་དུ་འཕོས་པ་འདྲ་བའི་རང་བྱུང་གི་གནས་མཆོག་རྒྱལ་གཤེན་དཔའ་བོའི་སྒྲུབ་གནས་སུ་རྩ་རླུང་ཞགས་བརྒྱའི་ཐུན་མཚམས་ཏེ་ཕྱི་ལོ ༢༠༡༩།༡༠།༥། ཉིན་སྦྱར་བས་རྣལ་འབྱོར་བཙན་ས་ཟིན་པའི་རྒྱུར་གྱུར་ཅིག་གུ། །