ལེགས་བཤད་ལམ་རིམ་ལས། ” ཀྱཻ་མ་སྙིགས་དུས་འདིར་སྐྱེས་པའི། །ཁྲི་གཙུག་བསྟན་ལ་གཤེ་བ་ཚོལ། །དེས་ནི་བུ་ཚས་ཕ་ཁུ་ཡི། །རིགས་རྒྱུད་ངན་པ་བཤད་དང་མཚུངས། ། ” ཞེས་གསུངས་སོ། །

ཕྱི་ལོ་ ༢༠༢༠ ལོའི་གཡུང་དྲུང་བོན་གྱི་ཆེས་མཐོའི་གཙུག་ལག་སློབ་གཉེར་ཁང་གི་ཡིག་རྒྱུགས་ཆེན་མོ།

 

 

 

 

དེ་ཡང་སྲིད་པའི་འཇིག་རྟེན་གྱི་ཁམས་ཆེན་པོ་འདིར་འགྲོ་བ་མི་ཡི་རིགས་ཐོག་མར་བྱུང་བ་ནས་བཟུང་སྡུག་བསྔལ་མི་འདོད་ཅིང་བདེ་བ་འདོད་པ་ཁོ་ན་ཡིན་ལ། དེ་ཡང་སྡུག་བསྔལ་བྲལ་ཐབས་དང་བདེ་བ་བླ་ན་མེད་པའི་རྒྱུ་ནི་སངས་རྒྱས་ཀྱི་བསྟན་པ་རིན་པོ་ཆེ་འདི་ཁོ་ན་ལས་གཞན་མ་མཆིས། དེས་ན་སངས་རྒྱས་ཀྱི་བསྟན་པ་རིན་པོ་ཆེ་དར་ཞིང་རྒྱས་དགོས། སངས་རྒྱས་ཀྱི་བསྟན་པ་རིན་པོ་ཆེ་དར་ཞིང་རྒྱས་པ་ལ་གཞུང་སྡེ་སྣོད་གསུམ་ལ་འཆད་རྩོད་རྩོམ་གསུམ་གྱི་བྱ་བ་རླབས་པོ་ཆེ་ཉིད་ལ་རག་ལས་པས། ཚུལ་དེ་དག་ལ་གོམས་འདྲིས་དང་ཡར་སྐུལ་གྱི་ཐབས་མཆོག་བླ་ན་མེད་པ་ནི་རྒྱུགས་སྤྲོད་དེ་ཆགས་ཡོད་སྟབས་འདི་ག་གཡུང་དྲུང་བོན་གྱི་ཆེས་མཐོའི་གཙུག་ལག་སློབ་གཉེར་ཁང་ནས་ཀྱང་། འཆད་སྦྱོང་ལ་བདུན་ཕྲག་གི་བགྲོ་གླེང་དང༌། བཤད་རྒྱུགས། རྩོད་སྦྱོང་གི་ཆེད་དུ་འཆད་ར་དང་བདུན་ཕྲག་དམ་བཅའ། རྩོམ་རིག་སྐོར་ལ་རྨང་གཞི་སུམ་རྟགས་དག་གསུམ་དང་སྙན་ངག་རྒྱན་གསུམ། གཞན་ཡང་རྩིས་དཀར་ནག སྐུ་གསུང་ཐུགས་རྟེན་གྱི་ཐིག་རྩ། གསོ་བ་རིག་པ་བཅས་རིག་གནས་སྐོར་འཛིན་གྲྭ་སོ་སོའི་སྐབས་དང་བསྟུན་ནས་ཡིག་རྒྱུགས་སྤྲོད་ལེན་བྱེད་པ་དང༌། ཁྱད་པར་དུ་མདོ་སྔགས་རྫོགས་གསུམ་གྱི་དཀའ་གནད་སྐོར་ལ་ལོ་རེར་རྩོད་རྒྱུགས་དང་བྲིས་རྒྱུགས་གཉིས་བཤད་གྲྭའི་སློབ་གཉེར་བ་ཡོངས་རྫོགས་མཉམ་དུ་གཏོང་དགོས་པས། ཡིག་རྒྱུགས་ཆེད་དུ་སློབ་གཉེར་བ་རྣམས་ཟླ་བ་གཅིག་གི་རིང་སྐབས་བབ་བསླབ་བྱའི་རྩ་འགྲེལ་རྣམས་ལ་ཆེད་དམིགས་ཀྱིས་སྦྱོང་བརྡར་ནན་ཏན་གྱིས་གྲྭ་སྒྲིག་བྱེད་ནས་རྒྱུགས་སྤྲོད་གཏོང་སྲོལ་ཡོད། འདི་ལོར་སྐབས་ཉེར་དྲུག་པའི་བཤད་སྒྲུབ་འདུས་སྡེས་གོ་སྒྲིག་འོག ཕྱི་ཟླ་ པའི་ཚེས་ ༡༨ བོད་ལྕགས་བྱི་ལོའི་ཧོར་ཟླ་ ༦ པའི་ཚེས་ ༢༩ ཉིན་གྱི་ཞོགས་ཀ་ཆུ་ཚོད་ ༥ ཐོག་ཞོགས་ཇ་བཞེས་གྲུབ་པ་དང༌། སྐྱབས་རྗེ་མཁན་ཆེན་ལུང་རྟོགས་བསྟན་པ་གཡུང་དྲུང་རིན་པོ་ཆེ་དང་། སྐྱབས་རྗེ་དཔོན་སློབ་རིན་པོ་ཆེ། སྐྱབས་རྗེ་སྒྲུབ་གྲྭའི་མཁན་རིན་པོ་ཆེ། བཤད་སྒྲུབ་སློབ་དཔོན་རིན་པོ་ཆེ་གཙོས་པའི། གྲྭ་ཚང་བླ་མ་དང༌། རྩ་འཛིན་སློབ་དཔོན། གཞུང་ཁྲིད་དགེ་རྒན་རྣམ་པ་དང་དགེ་བཤེས་རྣམ་པ་བཅས་ཀྱིས་སྟངས་འཛིན་འོག ཆུ་ཚོད་༦པའི་ཐོག་རྒྱུགས་ཞུགས་པ་རྣམས་ཐོ་འགོད་གནང་སྟེ། རྒྱུགས་སྤྲོད་དོ་དམ་མི་སྣས་རྒྱུགས་ཞུགས་རྣམས་ནས་ཤོག་འཛར་སོགས་རྒྱུགས་སྤྲོད་ཀྱི་སྒྲིག་གཞི་དང་འགལ་བའི་རིགས་ཁུར་ཡོད་མེད་ལུས་བཤེར་བྱས་ཏེ་རྒྱུགས་སྤྲོད་ར་བའི་ནང་དུ་ཨང་རིམ་བཞིན་སོ་སོའི་བཞུགས་གྲལ་དུ་འཁོད་དེ་དགེ་རྒན་རྣམ་པས་འཛིན་གྲྭ་སོ་སོའི་རྒྱུགས་ཤོག་བཀྲམས། དེ་རྗེས་ཆུ་ཚོད་ ༧།༢༠ ཐོག་སྒྲུབ་གྲྭའི་དགེ་སྐོས་མཆོག་ནས་རྒྱལ་རྔས་བརྡ་བཏང་སྟེ་རྒྱུགས་སྤྲོད་བྱེད་འགོ་ཚུགས།  དུས་མཚུངས་སུ་གཞི་རིམ་སློབ་གྲྭའི་སློབ་སྤྱི་དང་དགེ་རྒན་རྣམ་པའི་སྟངས་འཛིན་འོག གཞི་རིམ་སློབ་མ་རྣམས་ཡིག་གཟུགས་འགྲན་བསྡུར་དང་། རྒྱུན་ཤེས་འགྲན་བསྡུར། ཀློག་རྩལ་འགྲན་བསྡུར་བཅས་ཀྱི་རྒྱུགས་སྤྲོད་བཏང་སྟེ་རྗེས་ཕྱི་དྲོར་མཇུག་གྲུབ་པའི་གནས་བསྡུས་སུ་

ལི་བློ་གསལ་ནས་ཕྱི་ལོ་ ༢༠༢༠ ཟླ་ ༨ ཚེས་ ༡༨ ཉིན། 

པར་པ་དགེ་བཤེས་སྦྱིན་པ་མཆོག་སྒྲུབ།

109592cookie-checkཕྱི་ལོ་ ༢༠༢༠ ལོའི་གཡུང་དྲུང་བོན་གྱི་ཆེས་མཐོའི་གཙུག་ལག་སློབ་གཉེར་ཁང་གི་ཡིག་རྒྱུགས་ཆེན་མོ།
(སྤྱིའི་གཟིགས་གྲངས། 1,311 དེ་རིང་། 1)

གཤམ་གྱི་རྩོམ་ཡིག་རྣམས་ལ་སྐུ་ཉིད་ཐུགས་མཉེས་པོ་ཡོང་སྲིད།

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།

མཚམས་སྦྱོར། རྩོམ་ཡིག་གོང་མ།
སྔོན་གླེང་…
error: རྩོམ་འདི་བདག་དབང་ཅན་ཡིན།