ལེགས་བཤད་ལམ་རིམ་ལས། ” ཀྱཻ་མ་སྙིགས་དུས་འདིར་སྐྱེས་པའི། །ཁྲི་གཙུག་བསྟན་ལ་གཤེ་བ་ཚོལ། །དེས་ནི་བུ་ཚས་ཕ་ཁུ་ཡི། །རིགས་རྒྱུད་ངན་པ་བཤད་དང་མཚུངས། ། ” ཞེས་གསུངས་སོ། །

རང་འབྱུང་རིག་པའི་དཔའ་བོར་མཆོད་དོ། །

རྩོམ་པ་པོ། ཅོང་རི་དྲང་སྲོང་ཆེན་མོ་དགེ་བཤེས་གཡུང་རྒྱན་པ།

ཨཱ་རང་རིག་འཛིན་པ་བྲལ་བའི་ཀློང་ཆེན་ནས།།

རང་འབྱུང་ལྷུན་གྲུབ་འདུས་མ་བྱས་པའི་སྐུ།།

རང་གསལ་བླ་མ་སྨྲ་བའི་སེང་ཆེན་རྗེ།།

རང་ལུས་སྤྱི་བོའི་རྒྱན་དུ་གཤེགས་སུ་གསོལ།།

རང་སྣང་དག་པའི་ལུས་ངག་ཡིད་གསུམ་གྱིས།།

རང་གཞན་ཀུན་གྱི་སྒྲིབ་གཉིས་སྦྱོང་བའི་ཕྱིར།།

རང་ལུས་གུས་པའི་རྟུལ་ཤུགས་བརྐྱངས་ཕྱག་གིས།།

རང་འབྱུང་རིག་པ་གསལ་ཕྱིར་ཕྱག་འཚལ་ལོ།།

རང་གཞན་ཚེ་རབས་ནས་བསགས་བག་ཆགས་རྣམས།།

རང་སེམས་སྔར་གནོང་ད་འགྱོད་ཕྱིས་སྡོམ་སྟེ།།

རང་རིག་འཛིན་བྲལ་བླ་མར་སྙིང་ནས་བཤགས།།

རང་གཤིས་ཀ་དག་ཚངས་པའི་དངོས་གྲུབ་སྩོལ།།

རང་གདང་འོད་ལྔའི་འབྱུང་སྣང་ཕྱི་མཆོད་འབུལ།།

རང་ལུས་ཕུང་ལྔའི་གདོས་ལུས་ནང་མཆོད་འབུལ།།

རང་སེམས་དུག་ལྔའི་རྟོག་ཚོགས་གསང་མཆོད་འབུལ།།

རང་རིག་ཡེ་ལྔའི་ཡང་གསང་མཆོད་ཚོགས་འབུལ།།

རང་གསལ་དཀྱིལ་འཁོར་ཡོངས་རྫོགས་བླ་མའི་སྐུ།།

རང་འབྱུང་བོན་སྒོ་ཀུན་གྲགས་བླ་མའི་གསུང་།།

རང་རིག་འཁོར་འདས་ཀུན་གསལ་བླ་མའི་ཐུགས།།

རང་གྲུབ་ཡོན་ཏན་ཕྲིན་ལས་རྫོགས་ལ་བསྟོད།།

རང་འབྱུང་ཐུགས་རྗེའི་བཀོད་པ་བསམ་ཡས་པའི།།

རང་འཛིན་ཀུན་བྲལ་གཞན་ཕན་སྙིང་རྗེའི་ལས།།

རང་གཞན་དོན་གཉིས་ལྷུན་གྲུབ་མཛད་པ་ལ།།

རང་སེམས་གཡོ་མེད་དད་པས་རྗེས་ཡི་རངས།།

རང་སྣང་བདེན་མེད་སྟོན་པའི་མདོ་རྒྱུད་དང་།།

རང་ལུས་ལྷ་སྐུར་བསྒྱུར་པའི་གསང་བསྔགས་དང་།།

རང་རིག་ཀློང་ལ་ལྷུན་རྫོགས་ཡོངས་རྩེའི་བོན།།

རང་གསུང་བོན་སྒོའི་བཀའ་འཁོར་བསྐོར་དུ་གསོལ།།

རང་སེམས་དད་པའི་སྟོབས་བྱུང་བསྟོད་ཚོགས་འདིར།

ང་དག་དགེ་མཆིས་མཁའ་མཉམ་འགྲོ་ལ་བསྔོ།།

རང་རིག་བླ་མའི་བྱིན་རླབས་ཞུགས་ནས་ཀྱང་།།

རང་གཞན་སྐུ་གསུམ་གོ་འཕང་མྱུར་ཐོབ་ཤོག།

   ཅེས་པའི་བསྟོད་ཚིག་ཡན་ལག་བདུན་པ་འདི་ནི། རྩ་བའི་བླ་མ་ཡོངས་འཛིན་སྨྲ་བའི་དབང་པོ་ཤིན་ཏུ་དྲན་པའི་རྐྱེན་གྱིས་བསྐུལ་ནས་གར་བཙུན་གཡུང་རྒྱན་པས་ཅོང་རི་རུ་བྲིས་སོ།། །།

ཁྱུང་ཐོག་རྒོད་ཀྱིས་མཐུན་སྦྱོར་ཞུས།

20800cookie-checkརང་འབྱུང་རིག་པའི་དཔའ་བོར་མཆོད་དོ། །
(སྤྱིའི་གཟིགས་གྲངས། 6 དེ་རིང་། 1)

གཤམ་གྱི་རྩོམ་ཡིག་རྣམས་ལ་སྐུ་ཉིད་ཐུགས་མཉེས་པོ་ཡོང་སྲིད།

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།

མཚམས་སྦྱོར། རྩོམ་ཡིག་གོང་མ།
གཤེན་གྱི་ས…
error: རྩོམ་འདི་བདག་དབང་ཅན་ཡིན།