གཏམ་བཤད་འགྲན་བསྡུར་ཐེངས་བཅུ་གཅིག་པ།
གཡུང་དྲུང་བོན་གྱི་ཆེས་མཐོའི་གཙུག་ལག་སློབ་གཉེར་ཁང་གི་འཛིན་རིམ་འོག་མའི་གཏམ་བཤད་འགྲན་བསྡུར་ཐེངས་བཅུ་གཅིག་པ།
སྤྱི་ལོ་ ༢༠༢༣ ལོའི་ཟླ་ ༠༦ པའི་ཚེས་ ༡༠ ནས་ ༡༡ བར་ཉིན་གཉིས་རིང་། གཡུང་དྲུང་བོན་གྱི་ཆེས་མཐོའི་གཙུག་ལག་སློབ་གཉེར་ཁང་གི་སྐབས་ཉེར་དགུ་པའི་བཤད་སྒྲུབ་འདུས་སྡེའི་གོ་སྒྲིག་འོག གདན་ས་དཔལ་ལྡན་ཁྲི་བརྟན་ནོར་བུ་རྩེར་མཆོག་ལྔའི་གསས་ཁང་མཐོང་གྲོལ་འོད་འབར་གྱི་ནང་དུ་༧སྐྱབས་རྗེ་མཁན་ཆེན་ལུང་རྟོགས་བསྟན་པ་གཡུང་དྲུང་རིན་པོ་ཆེ་མཆོག་དང་། བཤད་སྒྲུབ་དཔོན་སློབ་དགེ་བཤེས་བློ་གྲོས་གཙུག་ཕུད་རིན་པོ་ཆེ། རྩ་འཛིན་སློབ་དཔོན་དགེ་བཤེས་སངས་རྒྱས་ཡེ་ཤེས་། རྩ་འཛིན་སློབ་དཔོན་དགེ་བཤེས་ཚུལ་ཁྲིམས་རྒྱ་མཚོ། རྩ་འཛིན་སློབ་དཔོན་དགེ་བཤེས་ཁྲི་ལྡེ་ཚུལ་ཁྲིམས་བཅས་དགེ་རྒན་རྣམ་པ་བཞི་དང་། སྐབས་ཉེར་དགུ་པའི་བཤད་སྒྲུབ་འདུས་སྡེའི་རྒྱུན་ལས་བཅས་ལྷན་འཛོམས་ཐོག གཡུང་དྲུང་བོན་གྱི་ཆེས་མཐོའི་གཙུག་ལག་སློབ་གཉེར་ཁང་གི་འཛིན་རིམ་འོག་མའི་སློབ་གཉེར་བ་ ༣༩ གཏམ་བཤད་འགྲན་བསྡུར་ལ་དངོས་སུ་ཞུགས་ཡོད། གཏམ་བཤད་ཀྱི་བརྗོད་གཞི་སོ་སོའི་འདོད་མོས་ལྟར་ཡིན་ལ་བརྗོད་གཞི་དེ་དང་འབྲེལ་བའི་བགྲོ་གླེང་དང་དྲི་བ་དྲིས་ལན་གནང་ཡོད། དགེ་རྒན་རྣམས་ཀྱིས་ཀྱང་གཏམ་བཤད་སྐབས་ཐ་སྙད་བཀོལ་སྤྱོད་བྱེད་སྟངས་ཀྱི་སྤུས་ཚད་དང་། དོན་གྱི་འགག་རྩ་བཀྲོལ་ལུགས་ངག་རིག་གི་སྒྱུ་རྩལ་སོགས་ལ་གཞིགས་ནས་སྐར་གྲངས་སྤྲད་ཡོད་པ་དང་། མཇུག་མཐར་༧སྐྱབས་རྗེ་མཁན་ཆེན་ལུང་རྟོགས་བསྟན་པ་གཡུང་དྲུང་རིན་པོ་ཆེ་མཆོག་ནས་དགེ་འདོན་སྐྱོན་སེལ་གྱི་བཀའ་སློབ་བཀའ་དྲིན་བསྐྱངས་རྗེས་ཐེངས་འདིའི་གཏམ་བཤད་འགྲན་བསྡུར་གྱི་མཇུག་ཡོངས་སུ་གྲུབ་པ་བཅས་ཀྱི་གནས་བསྡུས་སུ།
མེ་ལོང་ཡེ་ཤེས་དྲ་བའི་གཙོ་སྒྲུབ་པས་སྤྱི་ལོ་ ༢༠༢༣ ལོའི་ཟླ་བ་ ༠༦ པའི་ཚེས་ ༡༡ ཉིན།
པར་པ་ཁྱུང་ཐོག་རྒོད།
