སྐར་རྩིས་སྔོན་འགྲོ།
གཙུག་ན་རིན་ཆེན་དང་། མི་དབང་འདོད་པ་དགུ་འགྱུར་དང་། ལྷ་མིན་ཐང་བཟང་རིང་སྐྱེས་ཏེ། འཇིག་རྟེན་མངའ་དབང་ཆེ་བཞི་དང་། ས་བདག་ཀླུ་གཉན་གཏོད་བཞི་ཡིས། རྗེ་བློན་བཙུན་མོ་འབངས་འཁོར་བཅས། འཁོར་ཚོགས་བྱེ་བ་གྲངས་མེད་ལ། མཐོ་ཐོག་སྤྱི་རྒྱུག་མཛོད་ཀྱི་བོན། དབང་ལྡན་དུས་ཀྱི་འཁོར་ལོ་གསུངས། དེ་ཡང་མདོ་རྒྱུད་གཉིས་ཡིན་ཏེ། མདོ་ནི་བསྐལ་སྲིད་འབྲོས་འདེད་མདོ། རྒྱུད་ལ་སྒྲུབ་མཆོད་མན་ངག་གསུམ། སྒྲུབ་པ་དབང་དྲག་རྒྱས་པ་སྟེ། འཁོར་ལོ་རོལ་པ་སྐུ་ཡི་རྒྱུད། འཁོར་ལོ་དབང་ཕྱུག་གསུང་གི་རྒྱུད། འཁོར་ལོ་གསང་བ་ཐུགས་ཀྱི་རྒྱུད། རྒྱུད་སྲུང་ཀིང་དང་མགོན་པོ་དང་། དཔལ་འབར་ཨེ་ཀ་ཙཱ་ཏི་དང་། འཇིག་རྟེན་མངའ་དབང་བདག་པོས་སྐྱོངས། ལེའུ་སྟོང་ཕྲག་བརྒྱ་དང་བཅས། མཆོད་སྦྱིན་དུས་ཀྱི་འཁོར་ལོ་ནི། བདུན་བཅུ་རྩ་བཞི་རྩ་བའི་ལྷ། རྒྱལ་ཆེན་ཕྱོགས་ཀུན་སྐྱོངས་བཅས་པའི། སངས་རྒྱས་བསྟན་པ་བརྟན་པའི་ཕྱིར། རབ་ཏུ་གནས་པའི་ཆོ་ག་དང་། ཚོགས་བསགས་མཆོད་འབུལ་རིམ་པའོ།། མན་ངག་དུས་ཀྱི་འཁོར་ལོ་ནི། སྐལ་སྲིད་ཆགས་གནས་འཇིག་སྟོངས་དང་། དུས་བཞི་འབྱུང་བའི་དར་རྒུད་དང་། སྐྱེ་འཕེལ་ཚེ་རབས་ལས་རྩིས་དང་། སྔོན་དང་མ་འོངས་ད་ལྔ་དང་། ལོ་ཟླ་ཞག་གྲངས་དུས་ཚོད་ཀྱིས། ཀུན་རྫོབ་མངོན་པར་ཤེས་པ་སྟེ། གཙུག་ལག་རྩིས་ཀྱི་སྐོར་དང་བཅས། ས་བོན་གསེར་ཐུབ་འོད་སྲུང་ལ། བསྟན་པ་རིན་ཆེན་གཉེར་གཏད་དེ། རྟག་གཟིགས་ཤམ་བྷ་ལའི་ཞིང་དེར། ཤིན་ཏུ་དར་ཞིང་རྒྱས་པའོ།། དེ་ནས་གདུང་སོབ་ཆེན་པོ་ཡིས། ལོ་ཙ་མཁས་པ་རྒྱན་དྲུག་ལ། དགོངས་འགྲེལ་ཆ་ལག་དང་བཅས་ཏེ། ལེགས་པར་གཏན་ལ་ཕབ་ཏེ་བཤད། ལོ་ཙ་ཆེན་པོ་དེ་དྲུག་གིས། ཞང་ཞུང་རྒྱ་གར་རྒྱ་ནག་དུ། བསྒྱུར་ཞིང་བསྟན་པ་སྤེལ་བར་མཛད། བར་དེར་ཙི་ལུ་པཎ་ཆེན་གྱིས། ཆོས་ཀྱི་ལུགས་སུ་བསྒྱུར་བྱས་ཤིང་། བོན་བསྟན་དར་ནུབ་བྱུང་གྱུར་ཡང་། སྨོན་ལམ་རྣམ་དག་འབྲས་བུ་དང་། སེམས་ཅན་སྤྱི་མཐུན་བསོད་ནམས་ཀྱིས། བོན་བསྟན་ཕྱི་དར་བྱུང་བའི་དུས། མཆོད་སྦྱིན་དུས་ཀྱི་འཁོར་ལོ་དང་། གཙུག་ལག་དཔལ་འབུམ་སྐོར་དང་ནི། གཡེན་ཁམས་སེལ་བའི་མདོ་སྡེ་དང་། གཞན་ཡང་གཙུག་ལག་རྩིས་སྐོར་ལའང། གཏེར་དང་སྙན་རྒྱུད་ལས་ཐོན་ཞིང་། ཁྱད་པར་མཁན་ཆེན་བསོད་བློ་ལ། དག་སྣང་ལུང་བསྟན་རྩིས་ཀྱིས་འབུམ། ཤེལ་དཀར་ཟ་མ་ཏོག་ཞེས་པ། ཡོད་མོད་རྒྱས་པར་མ་ཕེབ་རུང་། མདོར་བསྡུས་འབྱུང་བཞིན་དེ་དག་དང་། གཤེན་བསྟན་སྨན་རིའི་ཕྱག་རྒྱུན་གྱིས། དགོང་དོན་ལག་ལེན་ཞལ་ཁྲིད་རྣམས། བུམ་པ་གང་བྱོའི་ཚུལ་ལྟ་བུར། རྫོགས་པར་བདག་ལ་བསྩལ་བར་བརྟེན། རང་དང་རང་འདྲའི་འགྲོ་རྣམས་ལ། ཕན་སེམས་སྐྱ་རེངས་ཀྱིས་དྲངས་ཏེ། ལག་ལེན་གསལ་སྒྲོན་འདི་བརྩམས་སོ།། ཞེས་སྐར་རྩིས་ཀྱི་ལེགས་པར་བཤད་པ་སྣང་སྲིད་གསལ་བའི་སྒྲོན་མ་ངོ་མཚར་འོད་ཟེར་ འབུམ་ལྡན་ལས། གླེང་གཞིའི་ལོ་རྒྱུས་མདོ་ཙམ་བསྟན་པའི་སྐབས་ཏེ་དང་པོའོ།། །།
ཤོག་ཁྲ་དེ་ལེགས་པོ་ཞིག་འདུག་ཀྱང་། པར་དེ་ཅུང་ཡོ་འདུག་པ་དེས་ལྟ་སྟབས་བདེ་བོ་དེ་ཙམ་མི་འདུག
སྐུ་ཉིད་ཀྱིས་དགོངས་ཚུལ་གསུངས་པར་བཀའ་དྲིན་ཆེ་ཞུ།