ལེགས་བཤད་ལམ་རིམ་ལས། ” ཀྱཻ་མ་སྙིགས་དུས་འདིར་སྐྱེས་པའི། །ཁྲི་གཙུག་བསྟན་ལ་གཤེ་བ་ཚོལ། །དེས་ནི་བུ་ཚས་ཕ་ཁུ་ཡི། །རིགས་རྒྱུད་ངན་པ་བཤད་དང་མཚུངས། ། ” ཞེས་གསུངས་སོ། །

སྐྱབས་རྗེ་ཁྱུང་སྤྲུལ་འཇིགས་མེད་ནམ་མཁའི་རྡོ་རྗེ་མཆོག་གི་རྣམ་ཐར།

མཁས་དང་གྲུབ་པའི་དབང་པོ་དྲང་སྲོང་གཡུང་དྲུང་རྒྱལ་མཚན་དཔལ་བཟང་པོའམ་སྐྱབས་རྗེ་ཁྱུང་སྤྲུལ་འཇིགས་མེད་ནམ་མཁའི་རྡོ་རྗེ་མཆོག་གི་ལོ་རྒྱུས་ནི།

རྩོམ་པ་པོ། ཁྱུང་ལུང་དངུལ་མཁར་ཚུལ་ཁྲིམས་ཕུན་ཚོགས།

དམ་པ་འདི་ཉིད་ཀྱི་ཕ་ཡུལ་ནི་ཧོར་ཚོ་སོ་དགུའི་སྤྱི་ཁྱབ་རྒྱལ་པོའི་ནང་བློན་ག་རྒྱ་བསོད་ནམས་བསྟན་དར་དང་།  ཡུམ་ཇིང་གིར་ཧོར་གྱི་གདུང་ལས་བསོད་ནམས་གནམ་མཚོ་གཉིས་ལ་སྲས་བདུན་ལྕམ་གཅིག་བྱུང་བའི་ཆེ་འགོས་སུ་མེ་མོ་བྱ་ཡི་{༡༨༩༧}ལོར་སྐུ་འཁྲུངས།   ལོ་ངོ་བཞི་ཙམ་ནས་དགེ་རྒན་རྣལ་འབྱོར་བ་དྲང་སྲོང་རྒྱལ་བ་ཚུལ་ཁྲིམས་ཀྱི་མདུན་ནས་ཡིག་གེ་འབྲི་ཀློག་བསླབ་པ་ནས་བཟུང་།   སྤ་སྟོན་ཉི་མ་འབུམ་གསལ་དང་རྩ་བའི་བླ་མ་སྒོ་རྒྱལ་ཉི་མ་རྒྱལ་མཚན་སོགས་རང་ཡུལ་གྱི་ཞུ་ཚང་དང་སྐམ་ཚང་སྤ་ཚང་སོགས་བླ་ཁག་ཀུན་དང་། ཕྱོགས་ཕེབས་ཀྱི་བླ་མ་མང་པོ་ག་རྒྱ་ཚང་དུ་ཕེབས་པའི་སྐབས་དང་། དེ་བཞིན་ཕྱོགས་ཀྱི་དགོན་པ་གནས་རི་བླ་རྟེན་བཅས་མཇལ་སྐབས་སུ་སྐྱེས་ཆེན་དུ་མའི་མདུན་དུ་བོན་འབྲེལ་སྣ་ཚོགས་ཐོབ་པ་སོགས་བོན་སྒོ་ཀུན་གྱི་དབང་ལུང་ཁྲིད་རྣམས་རྒྱུན་མ་ཆད་པར་ཀུན་ཐོབ་ཅིང་ལེགས་པར་སྦྱངས་བརྩོན་བྱས།  དེ་ལྟར་ཆུང་དུས་ནས་སྐྱེས་ཐོབ་ཤེས་རབ་ཀྱི་རྩལ་ཆེ་བས་སྤྱིར་སྦྱང་བྱ་ཐ་དག་ལན་རེ་ཟུང་རེས་ཚེགས་མེད་དུ་མཁྱེན་པར་གྲགས།  དེ་ནས་ཁོང་ཉིད་ལ་ཧོར་རྗེའི་རྒྱལ་ཁམས་སྟོད་སྨད་བར་གྱི་མི་དྲག་རྒན་བློན་མང་པོས་ཁྱེད་རང་ག་རྒྱའི་ཡབ་མྱེས་ཀྱི་རྒྱུད་བཟུང་ཧོར་བློན་དུ་བཞུགས་ནས་ཧོར་སྡེ་ཤོག་ཁ་ཀུན་ལ་ཕན་ཆེ་འབྱུང་ངེས་དེ་ལྟར་མཛོད། ཅེས་ཞུས་པ་མ་ཟད་ཡབ་ཡུམ་གཉིས་ཀྱིས་ཀྱང་ཕ་གཞིས་སྦྱར་རྒྱུ་ཁོ་ན་བྱེད་མོད།  དམ་པ་ཁོང་ཉིད་ཀྱང་སྤྱིར་འཁོར་བ་ལ་སྙིང་པོ་མེད་པ་ངེས་འབྱུང་གཏིང་ནས་སྐྱེས་ཏེ་ག་རྒྱའི་མངའ་ཐང་སྙན་གྲགས་ཚང་མ་དོར་ཏེ། སྐྱེས་བུ་དམ་པ་གོང་མའི་རྣམ་ཐར་ཅི་བཞིན་སྐུ་ཚེ་བློས་བཏང་རྒྱུའི་འདུན་པ་བཞིན་དགུང་ལོ་བཅོ་ལྔའི་ངོ་སྟེ་ལྕགས་ཕག་{༡༩༡༡}ལོར་རབ་བྱུང་གི་སྡོམ་པ་ཡང་དག་པར་མནོས་ཤིང་བོན་སྒོ་ཕྱི་ནང་ཀུན་སྦྱངས་བརྩོན་དང་ཉམས་ལེན་རྒྱུན་མ་ཆད་པར་བསྐྱང་། སྐུ་གསུང་ཐུགས་རྟེན་མང་པོ་བཞེངས། གཞན་གྱིས་ག་རྒྱ་ཚང་ལ་དགོས་པའི་བུན་གན་མང་པོ་མེ་ལ་བསྲེགས། དེ་སྐབས་ཤིག་ནས་སྐྱབས་རྗེ་རྩ་བའི་བླ་མ་སྒོ་སྟོན་དང་སྤ་སྟོན་རྫོགས་ཆེན་སོགས་ཀྱི་སྐོར་དབང་ལུང་ཁྲིད་གསུམ་ཟབ་རྒྱས་མང་པོ་མནོས་ཤིང་ཕྱོགས་མེད་རི་ཁྲོད་འགྲིམས་གཅིག་ཚེ་དང་བསྒྲུབ་པ་སྙོམ་པའི་འདུན་པ་དང་དམ་བཅའ་མཛད། དེ་ལྟར་སྤ་སྟོན་ཉི་མ་འབུམ་གསལ་མཆོག་ལ་བཀའ་བབས་ཀྱི་སློབ་མ་དྲུག་ཡོད་པའི་ནང་ཚན་བསྟན་འཛིན་བཀའ་བབས་དྲུང་མུ་ཝེར་ཞི་{གཡུང་དྲུང་རྒྱལ་མཚན་}ཞེས་ཉི་འབུམ་རྣམ་ཐར་ལས་གསུངས།  རང་ལོ་ཉེར་གསུམ་པ་ས་ལུག་{༡༩༡༩}ལོར་ཕ་ཡུལ་སྤང་ཏེ་ཐོག་མར་སྨན་རི་ལ་ཕེབས།  མཁན་ཆེན་ཕུན་ཚོགས་བློ་གྲོས་མཆོག་གི་མདུན་བསྙེན་རྫོགས་ཞུས་པས་ཚུལ་མཚན་གཡུང་དྲུང་རྒྱལ་མཚན་དཔལ་བཟང་པོ་ཞེས་གསོལ་ཞིང་དེ་ནས་བཟུང་དྲང་སྲོང་གི་ཆས་གོས་རྫས་སོགས་ཁྲིམས་དང་ལྡན་པར་མཛད། དེར་སྨན་རིའི་རྣམ་ཀློང་གྱི་སྒྲུབ་ཆེན་འཚོགས་སྐབས་ཡིན་པར་ལས་པ་གཞུང་འཛིན་བཏང་ཞིང་བསྒྲུབ་ཆེན་གྱི་དབང་ལུང་ཡོངས་རྫོགས་ཐོབ། དེར་ཕེབས་པའི་ཕྱོགས་ཀྱི་བླ་ཁག་ཆེ་ཆུང་མང་པོ་ཡོད་པས་འབུལ་བ་དང་བོན་འབྲེལ་དབང་ལུང་སྣ་ཚོགས་རེ་ཞུས།  གཡུང་དྲུང་གླིང་ལ་མཇལ་སྐོར་དང་བོན་འབྲེལ་འབུལ་བ་རྒྱ་ཆེན་མཛད།  དེ་མཁར་སྣ་ལ་ཕེབས་ཏེ་དགེ་སློང་རྣམ་གཉིས་ཀྱི་གསེར་ཞལ་མཇལ་ཏེ་བྱ་བྲལ་དགེ་སློང་ཉི་མ་གྲགས་པའི་མདུན་དུ་དང་ཐོག་ཚེ་དབང་བྱ་རི་མ་ནས་བོད་ཡུལ་མའི་དབང་ལུང་ཁྲིད་མན་ངག་རྗེས་གནང་བཅས་དང་།  རྫོགས་ཆེན་ཞང་ཞུང་སྙན་བརྒྱུད་ཀྱི་མུན་ཁྲིད་རྩ་ལུང་བཅུད་ལེན་རྣམས་རིམ་པ་རྫོགས་པར་མནོས། དགེ་སློང་ཆུང་བ་གཡུང་དྲུང་ཚུལ་ཁྲིམས་དང་ཁྱུང་དཀར་རྣལ་འབྱོར་བཟོད་པ་རིན་པོ་ཆེ་དང་། ཁྱུང་སེར་རྟོགས་ལྡན་ཐེག་མཆོག་བསྟན་འཛིན་བཅས་ཀྱི་དྲུང་དབང་ལུང་ཁྲིད་སོགས་མང་པོ་ཞུས་ཤིང་རྩ་རླུང་དང་སོགས་ལོ་གཅིག་རིང་ཉམས་ལེན་རྩེ་གཅིག་དྲིལ་ཏེ་བཞུགས་པས་ལྟ་བ་བོགས་ཐོན་སྙིང་རྗེ་བྱང་སེམས་རྒྱུད་ལ་ཤར་ཞིང་དགེ་སྦྱོར་བྱེད་པར་སྙིང་ཤེད་ཆེ་རུ་སོང་།  མཁར་སྣའི་དགེ་སློང་རྣམ་གཉིས་ཐུགས་མཉེས་ཤིང་གདམས་ངག་སྐོར་སོགས་གསུངས་གླེང་ཟབ་རྒྱས་དང་ཡོ་བྱད་ལྷག་མ་ཀུན་ཚོགས་སྦྱོར་གཏང་རག་ཕུལ་ཏེ། སྤ་སྟོན་ཉི་མ་འབུལ་གསལ་གྱི་ཞལ་སློབ་མཆོག་དགེ་སློང་སེ་དོལ་བོན་ཉིད་རྒྱལ་མཚན་དང་ཁོང་རྣམ་གཉིས་ལྷན་དུ་ཚེ་འདིར་བློས་བཏང་ཕྱོགས་མེད་དབེན་པའི་རི་ཁྲོད་དུ་ཚེ་དང་སྒྲུབ་པ་སྙོམས་པའི་དམ་བཅའ་མཛད་ཅིང་། རང་ལོ་ཉེར་བཞི་པ་ལྕགས་སྤྲེལ་{༡༩༢༠}དབྱུག་ཟླའི་ཚེས་དགུ་ཉིན་མཁར་སྣ་ནས་ཐོན་ཏེ་སྤྱན་གསལ་དགོན་པ་མཆོད་མཇལ་ཞུས་སྐབས་གྲུ་རིན་དངུལ་ཊམ་གཉིས་ཉར་བ་ལས་དེ་མིན་དངུལ་ཆ་ཚང་དེར་ཉམ་ཐག་སྤྲང་རྒན་ཞིག་ལ་བྱིན།  དེ་ནས་ཕུང་པོ་རི་བོ་ཆེའི་རྩེར་བདུད་འདུལ་གླིང་།  གཙང་བཀྲ་ཤིས་ལྷུན་པོ་དང་པཎ་ཆེན་རིན་པོ་ཆེ་ཐུབ་བསྟན་ཆོས་ཀྱི་ཉི་མ་དང་།  བུ་སྟོན་གདན་ས་དཔལ་ཞ་ལུ་དགོན་པ་རི་ཁྲོད། པན་རྣམ་དགའ་བ་གདོང་གི་དགོན་སྡེ།  དེ་ནས་བཀྲ་ཤིས་ཕྱུག་མོ་དཔལ་རིའི་རྔ་འདོགས་སྒྲུབ་ཕུག་ལ་བསྙེན་མཚམས་དང་། ཞང་ཞུང་སྙན་བརྒྱུད་ལུགས་ཀྱི་རྩ་རླུང་འཕྲུལ་འཁོར་སྦྱངས་པས་གཏུམ་མོ་བདེ་དྲོད་འབར་ཞིང་དབུ་མའི་རྩ་མདུད་གྲོལ་ནས་བདེ་སྟོང་གི་ཉམས་རྒྱུན་ཆད་མེད་པ་བྱུང་། ཚེ་དབང་མཇལ་སྣང་གིས་བྱིན་དབབ་དོན་གཉིས་ནུས་པའི་དབང་ཐོབ་པ་སོགས་རྨིས་ཤིང་གནས་དེར་བཞུགས་རིང་ཉམས་ལེན་གནད་ཕེབས་པའི་རྟགས་མཚན་བཟང་པོ་ཤ་སྟག་བྱུང་བས་གནས་བསྟོད་དང་རྩ་བའི་བླ་མའི་དྲན་གླུ་བླངས།  དེ་ནས་རྒྱལ་རྩེ་དཔལ་མགོན་མཆོད་རྟེན་དང་། ཞུ་རི་ཞིང་གཡུ་འབྲང་ཕྱུག་མོར་ཟླ་གཉིས་རིང་ཞི་ཁྲོ་སྦྲག་མ་བསྒྲུབས། གཤེན་རབ་ཞབས་རྗེས་སར་བྱ་རི་མ་བསྒྲུབས།  སྐྱིད་མཁར་ན་རིང་ཕུག་པར་ཟབ་བཅོད་བསྒྲུབས། ཞུ་རི་ཞིང་བླ་བྲང་བླ་དགོན་རྟེན་བྱིན་ཅན་རྣམས་དང་། དཀྱིལ་རུ་དགོན་པ། རང་ལོ་ཉེར་ལྔ་པ་ལྕགས་བྱ་{༡༩༢༡}ལོར་གཡུང་དྲུང་སྲ་བརྟན་རི་བོ་དང་། འབྲིག་མཚམས་མཐའ་སྐས། གདོང་ནག  མཚོ་རྔ་བྲག་དཀར།  གཤེན་ཆེན་ཀླུ་དགའི་སྒྲུབ་གནས་བྲག་ཕུག་ཀེ་རུ་ཀ།  བ་རི་དང་མཆོད་རྟེན་ཉི་མ། ལྷ་རི་ཉི་ཕུག  ཕག་རིའི་ཕྱོགས་ནས་ཕེབས་ཏེ་འབྲུག་ཡུལ་བོན་གྱི་གཏེར་གནས་སྤ་གྲོ་སྟག་ཚང་སེང་གེ་རྫོང་དང་། དཔལ་ཕུག ཐུགས་རྗེ་ཀུལ་སྒྲོལ་གནས་མོན་ཆུ་མོ་ཕུག སྟག་ཚར་གནས་ཀྱི་ལྡེ་མིག་སོགས་དེ་ལྟར་དགོན་སྡེ་དབེན་ཁྲོད་དུར་ཁྲོད་རྣམས་ལ་འགྲིམས་པའི་ཚེ། ཕྱག་སྐོར་མཆོད་ཚོགས་བོན་འབྲེལ་དཔེ་གཟིགས་དང་ཞི་ཁྲོ་དང་ཟབ་གཅོད་སོགས་ཀྱི་བསྒྲུབས་པ་དང་། གཉན་ས་བཅད་པ་སོགས་ཉམས་ལེན་བརྩོན་བཞིན་གནང་བར། སྙིང་རྗེ་བྱང་སེམས་ཤུགས་འབྱུང་སྐྱེས་ཤིང་ཉམས་རྟོགས་ཀྱི་ཡོན་ཏན་ཐམས་ཅད་རྒྱས།ལྟ་སྒོམ་སྤྱོད་འབྲས་གཡོ་མེད་ཀྱི་བཙན་ས་ཟིན། གནས་བསྟོད་དང་འགུར་མ་སོགས་ཐུགས་ཉམས་ལ་ཤར་བ་ལྟར་བླངས། དུར་ཁྲོད་གནས་ལ་གཅོད་དམིག་འགྱེད་བཞིས་དང་པོ་སློང་ཚད་བར་དུ་ཚར་བཅད་རྗེས་སུ་གྲོལ་ཚད་ཀྱིས་གཉན་ས་བཅད་དེ་ལྷ་འདྲེ་ཡོངས་ལ་བོན་བཤད་དམ་ལ་བཞག་པ་སོགས་ཡུལ་ཕྱོགས་ཀྱི་ལྷ་འདྲེ་མི་གསུམ་ཀུན་ལ་བཀྲ་ཤིས་བསྔོ་སྨོན་ཡང་དག་རེ་མཛད། དེ་ནས་འབྲུག་པ་རྒྱལ་པོས་ཕོ་བྲང་དུ་བོས་ཏེ་བཤོལ་བཏབ་པར་ཉམས་མེད་ལྷ་ཁང་དུ་རྒྱལ་བའི་བཀའ་འགྱུར་དག་འདོན་དང་དེའི་ཕྱོགས་སྐྱ་སེར་ཕོ་མོ་མང་པོ་ལ་སྔོན་འགྲོ་ཁྲིད་མཛད་ཅིང་བསགས་མཁན་སུམ་ཅུ་སྐོར་བྱུང་། དད་ཅན་ཡོན་བདག་འབྲུག་ཀྲོང་སྲས་རྒྱལ་པོ་ལ་མགུར་དབྱངས་དགེ་གཏམ་སྤྲིངས་ཡིག་ཟླ་ཟེར་ཞེས་པ་གནང་མཐར་དེར་འདུ་འཛི་རྣམ་གཡེང་ཟས་ནོར་ལ་སྐྱ་ཟིང་དུ་དགོངས་ནས་ནུབ་གཅིག་གསང་ཐབས་མཛད་དེ་བྱོན།  དེ་ནས་ཇོ་མོ་ལྷ་རིའི་ཕྱོགས་ལྷ་རི་ཉི་ཕུག་ལ་བྱ་རི་མ་བསྒྲུབ་མཛད། དེ་ནས་གྲོ་མོའི་ཕྱོགས་པད་དགོན།ཤུག་པ་གཏན་ཤུག དགོན་ཆུང་། དེ་ནས་རྫི་ལི་ལ། རྒྱ་གར་ཀ་གླིང་སྤུངས་། ཏྲི་སེ་བྲག་ཕུག  གངྒཱ་ལ། ན་ལེཎྜ། བྱ་རྒོད་ཕུང་པོའི་རི། རྡོ་རྗེ་གདན། དུར་ཁྲོད་བསིལ་བ་མཚལ། ཆུ་བོ་ནེ་རཉྫ་ན། གྷ་ཡ་གོ་རི་དང་མཆོད་རྟེན་རྣག་དག་དཀར་པོ། བྷ་ན་ར་ཛཱ། ས་ར་ན་ཐི། རྩ་མཆོག་གྲོང་། ཛཱ་ཏིའི་ཚལ། ས་ཧིག་མ་ཧིག་སོགས་དང་། བལ་ཡུལ་དུ་མཆོད་རྟེན་རྣམ་གསུམ་དང་། ཡམ་བུ་འཕགས་པ།  གླང་རུ་ལུང་བསྟན་སོགས་རྒྱ་བལ་གྱི་གནས་རྟེན་གང་ཡོད་ལ་བྱོན། ཕེབས་ལམ་དུ་འཕྲུལ་འཁོར་རི་ལི་གྷ་དྲིལ་གྲུ་གཟིགས་སོགས་ལའང་ཞུགས། གནས་རྟེན་ཀུན་ལ་ཕྱག་སྐོར་མཆོད་ཚོགས་དང་བསྟན་འགྲོར་ཕན་པའི་སྨོན་ལམ་རྒྱ་ཆེན་རེ་མཛད་བཞིན་ཐོན། དེ་ནས་བལ་བོད་ཀྱི་སོ་མཚམས་མ་རྒྱུད་གསང་མཆོག་གསུང་གི་གནས་ཡོལ་མོ་ལ་ཕྱི་གངས་གྱི་ར་བའི་གནས་ཀྱི་ལྷོ་སྒོར་གཤེན་གསང་འདུས་ཀྱི་སྒྲུབ་གནས་ཨ་སུ་ར་ཡི་བྲག་ཕུག་གམ་བལ་ཡུལ་ཡང་ལེ་ཤོད་ཀྱི་ཕུག་ཏུ་ལོ་གཅིག་ལྷག་ཙམ་རིང་ཉམས་ལེན་ལ་དཀའ་སྤྱད་སྡུན་སྲན་མཛད་པས་སྐུ་ལུས་ཤེད་ཤོར། དེ་ལྟར་ཉམས་ལེན་ཆུ་བོའི་རྒྱུན་གྱི་རྣལ་འབྱོར་ལ་རྩེ་གཅིག་བརྩོན་ཏེ་བཞུགས་ཚེ་དངོས་ཉམས་རྨི་ལམ་ལའང་ཞལ་གཟིགས་ལུང་བསྟན་གྲུབ་པའི་རྟགས་སོགས་དང་ཉམས་རྟོགས་ཁྱད་པར་ཅན་འཕེལ་ཞིང་ཐུགས་ཉམས་ཀྱི་རྩལ་ལས་ཤར་བའི་འགུར་དབྱངས་འགའ་དང་གནས་བསྟོད་བླངས། དེར་ཕྱོགས་ཀྱི་སྐྱ་སེར་ཕོ་མོ་མང་པོ་ལ་དྲང་ངེས་ཀྱི་ཆོས་དང་དགེ་བསྐུལ་དཔག་མེད་མཛད།  དད་སྦྱིན་བལ་ཡུལ་ཆོས་བློན་ཆེན་པོ་དྷརྨ་ས་ཨུ་ལ་དོན་དམ་གྱི་གདམས་ཟབ་གནང་། བོད་ཕྱོགས་སོགས་ཀྱི་གནས་སྐོར་བ་དུ་མ་སླེབས་པར་ཆོས་འབྲེལ་དང་དགེ་བསྐུལ་སྣ་ཚོགས་མཛད།  དེ་ནས་ཕྱོགས་དུ་མས་མཇལ་མཁན་ཇེ་མང་འགྲོ་བས་རྣམ་གཡེང་ཆེ་བ་འོང་ངོ་དང་བལ་ཡུལ་དུ་ཚད་པ་ཆེ་བས་ལོ་མང་མི་སྡོད་དགོངས་ཤིང་དེ་ཕྱོགས་ཀྱི་སློབ་མ་རྣམས་ལ་གདམས་པ་གསུངས་ཏེ།  རང་ལོ་ཉེར་བརྒྱད་པ་ཤིང་བྱི་{༡༩༢༤}རྟ་ཟླའི་ཡར་ཚེས་ཐོན་ཏེ་རྒྱ་གར་ལྷོ་རྒྱུད་ནས་སྐོར་ཏེ་ཟ་ཧོར་མཚོ་པདྨ་དང་། དེ་ནས་ཁུ་ནུའི་རྒྱལ་ས་རམ་པུར་དང་ལིད་དུ་བླ་མ་བསོད་ནམས་འབྲུག་རྒྱལ་མཇལ་དུས་འཁོར་རྒྱུད་འགྲེལ་སོགས་རྩིས་རྒྱུད་རྣམས་གཟིགས། ལིད་དང་། ཨ་ས་རང་། སྦིལ་ཡུལ་གྱི་བླ་མ་བློན་པོ་ཨེམ་རྗེ་སྦྱིན་བདག་སོགས་དེ་ཕྱོགས་སྐྱ་སེར་ཕོ་མོ་མང་པོར་ཚེ་དབང་དང་སྔོན་འགྲོ་ཆོས་སྦྱིན་དང་ཞལ་གདམས་དགོན་ཁག་ལ་མང་ཇ་ཕྱག་འགྱེད་གནང་།  དེ་ནས་ཁུ་ནུའི་སྟོད་ནས་ཤི་རང་ལ་ཐོན་ཏེ་ཤང་རྩེ་ཕི་བང་མཐོ་ལིང་དགོན་པ་སོགས་གླང་ཆེན་གཙང་པོ་རྒྱུད་ནས་རྨ་བྱ་ཆུ་འགོ་ནས་མར་ཁྭ་ཆར་བཅས་མཇལ་ཞིང་།  ཡར་རྨ་བྱ་ཆུ་འགོའི་ཕུགས་ནམ་མཁའ་ཁྱུང་རྫོང་གསང་སྔགས་སྙིང་མའི་བྱ་བཏང་ཆེན་པོ་སྐྱབས་རྗེ་བདེ་བའི་རྒྱལ་པོ་མཆོག་ཞལ་མཇལ་ཚེ་བླ་མ་ཉིད་ཀྱི་ནམ་མཁའ་ནས་གསེར་གྱི་རྡོ་རྗེ་ཞིག་སྐུ་པང་ལྷུང་བའི་དགོངས་ལམ་བྱུང་བཞིན་རྗེས་སུ་མཚན་ཡང་འཇིགས་མེད་ནམ་མཁའི་རྡོ་རྗེ་ཞེས་གསོལ། དེ་ནས་ཁྲོས་མའི་རྒྱུད་གཞུང་ཀུན་དང་།གཉན་ས་ལམ་འཁྱེར་སྐོར། སེམས་རྒྱུད་སྐོར་སོགས་ཟབ་ཆོས་མང་པོའི་ཁྲིད་ལུང་ཐོབ་ཅིང་། དེ་ནས་སྟག་རི་ཁྲ་བོའི་མགུལ་གྱི་གུར་ལ་ནས་གངས་རི་མདུན་དུ་གནས་བསྟོད་བླངས། ཕྱོགས་བཞི་སྒྲུབ་ཕུག་གནས་དགོན་དུར་ཁྲོད་ཀུན་མཇལ་ཕྱག་སྐོར་མཆོད་ཚོགས་བསྔོ་སྨོན་རྒྱ་ཆེན་མཛད།  དེ་ནས་མར་པྲི་ཏ་པུ་རི་དང་།  གཡུང་དྲུང་རིན་ཆེན་འབར་བའི་སྒྲུབ་ཕུག ཁྱུང་ལུང་དངུལ་མཁར་སྡོང་དུ་དྲན་པའི་རྡོ་སྐུ་རང་བྱོན། སེ་བོན་ཞབས་རྗེས་བཅས་མཇལ། དེ་ནས་ཁྱུང་ལུང་དགོན་པའི་ལྟག་ལྡེབས་ནཀྵུ་ཕུག་ཞེས་བོད་སྐད་དུ་དགའ་བྱེད་ཕུག་ཅེས་པའི་གནས་ལ་མཆེད་གྲོགས་ཁོང་རྣམ་གཉིས་ཀྱི་ཐོག་མར་བྱ་རི་མ་འབུམ་རེ་བསྒྲུབས་ཤིང་རྒུན་རིང་མཚམས་བཅད་རྒྱ་བཞུགས། དེ་ནས་མཆེད་གྲོགས་སེ་དོལ་བོན་ཉིད་རྒྱལ་མཚན་དང་ཁོང་རྣམ་ཀྱིས་དགོངས་པར། དཔྱིད་ཀ་གངས་རི་ལ་ཞག་བརྒྱ་གཅིག་ཙམ་སྒྲུབ་པ་མཛད། དེ་ནས་རྨ་བྱའི་ཆོས་འཁོར་དུ་ཆོས་ཞུ་ནས་མངའ་རིས་བྱང་བརྒྱུད་རུ་ཐོག་ཕྱོགས་ལ་གནས་འབྲེལ་བྱས་ཏེ་དེ་ནས་ལ་དྭགས། སེང་པ། ཁ་ཆེན། ཨོ་རྒྱན། བྲུ་ཤ་སོགས་བོད་ཡུལ་རྣ་བ་མི་ཐོས་པའི་ས་རུ་སོང་ནས་གངས་ཁྲོད་གཡའ་ཁྲོད་ནགས་གསེབ་བྲག་ཕུག་གང་རེད་ཅིག་དུ་དགེ་སྦྱོང་མཛད་དེ་རུས་གོང་བོར་རྒྱུའི་བློ་ཐག་གཏིང་ནས་བཅད་ཀྱང་། དེ་སྔོན་པུ་རང་རྫོང་དཔོན་གྱིས་རྫོང་དུ་ཁོང་རྣམ་གཉིས་ཟླ་ཤས་མཆོད་གནས་འགྲོ་དགོས་ཤེས་ནན་ཆེར་བྱས་པར་མ་ལྡོག་པའི་རྐྱེན་ཁས་ལེན་དགོས་བྱུང་བས། ཁོང་ཉིད་ཡེ་ཤེས་དབལ་མོའི་ལུང་བསྟན་པར་མཆེད་གྲོགས་ཉིད་མ་ཕེབས་ནས་དགའ་ཞེས་གསུངས་པས། གྲོགས་ཀྱི་ཞལ་ནས་རྨིས་ལྟས་དེ་ལྟར་ང་རང་ལ་བྱུང་མོད་དེ། ཁར་དུས་འགྲོ་རྒྱུ་བྱས་ཚར་བས་མི་ཆོས་དང་ལྷ་ཆོས་གང་ལའང་འགལ་བའི་བྱ་བ་ཡིན་པས་ལན་གཅིག་ཅིས་ཀྱང་འགྲོ།  གལ་སྲིད་ཕྲན་མ་འཁོར་བ་འདྲ་བྱུང་ནས་ཁྱེད་ཐག་རིང་ལ་ཕེབས་པ་མི་བཟང་། གནས་འདིར་ལོ་གསུམ་ཅིས་ཀྱང་བཞུགས་ཤེས་གསུངས།   དེ་ལྟར་མཁྱེན་བཞིན་ཏུ་གཞན་དོན་གཙོར་བྱེད་སེམས་དཔའི་སྤྱོད་མཆོག་ཉིད་ལྷུར་བཞེས་ཏེ་བདེ་བཞུགས་ན་དགའ་འཆི་སྐྱིད་འགུར་དབྱངས་བཅས་བླངས་ཤིང་ཐེ་ཚོམས་རེ་དོགས་གང་ཡང་མེད་མཆེད་གྲོགས་ཉིད་ཕེབས། ཤུལ་དུ་རྗེ་ཉིད་དཀོན་མཆོག་ལ་གསོལ་བ་བཏབ་ནས་ཉམས་ལེན་ལ་བརྩོན་པའི་ཚེ་སྐྱོ་ཤས་དད་གདུང་ཉམས་རྟོགས་གོང་འཕེལ་དང་བཅས་བྱ་རི་མ་སོགས་བསྒྲུབས། དཔྱིད་ཀར་མཆེད་གྲོགས་སྤུ་རང་ནས་ཚུར་ཕེབས་པའི་ལམ་བར་དུ་དགོངས་པ་གཤེགས་པས་ཐུགས་སྐྱོ་བའི་ངང་དུ་ཞེ་དགུའི་དགོངས་རྫོགས་སུ་དམིགས་ཏེ་དགེ་སྦྱོར་གང་ནུས་འབད།  རང་ལོ་ཉེར་དགུ་པ་ཤིང་གླང་{༡༩༢༥}ལོ་ནས་ལོ་གསུམ་རིང་རྩེ་གཅིག་ཟབ་མོའི་སྒོམ་སྒྲུབ་ལ་བརྩོན་བཞིན་བཞུགས། དེ་ནས་གངས་མཚོ་དང་སྤུ་རང་ནམ་མཁའ་ཁྱུང་རྫོང་དུ་བླ་མའི་མདུན་དུ་སྔ་ཕྱི་ལན་འགའ་ཕེབས་ཤིངདབང་ལུང་ཁྲིད་སོགས་མང་པོ་ཐོབ།  དེ་སྐབས་ཤིག་ནས་དཔྱད་གསུམ་དག་རྩིས་འགོ་བཙུགས།   བསྙེན་མཚམས་དང་རྩ་རླུང་། ཁྲེགས་ཆོད། ཐོད་རྒལ་བསྒོམས་པས་ཉམས་ལེན་ཆུ་བོའི་རྒྱུན་གྱི་རྣལ་འབྱོར་འབྱམས་ཀླས་པ་ཉམས་རྟོགས་རྩལ་ཀུན་རྫོགས་ཚེ་ལྟ་སྒོམ་སྤྱོད་གསུམ་དང་སེམས་འགུར་སོགས་བླངས། སློམ་མ་འགའ་ཞིག་ལ་ལུང་ཁྲིད་དང་ཞལ་འདོན་སོགས་གནང་སྟེ་རྒྱུན་གྱི་ཉམས་ལེན་བྱེད་དུ་འཇུག   དེ་ནས་རང་ལོ་སོ་བཞི་པ་ལྕགས་རྟ་{༡༩༣༠}ལོར་ས་ཟླའི་ཡར་ཚེས་ལ་འཁོར་སློབ་བརྒྱ་ཕྲག་དང་བཅས་ཏེ་གངས་ཏི་སེར་གནས་བསྟོད་དང་གནས་དགོན་ཀུན་ལ་ཕྱག་སྐོར་མཆོད་ཚོགས་རྒྱ་ཆེན་དང་ཆོས་སྦྱིན་དབང་ལུང་སོགས་མཛད་དེ་ཟླ་ཤས་མཚམས་བཅད་རྒྱ་མཛད།  དེ་སྐབས་སུ་དཔལ་ལྡན་ཚུལ་ཁྲིམས་དེ་ནས་བཟུང་ཁྱུང་སྤྲུལ་ཆེན་པོའི་གམ་རྒྱུན་དུ་གནས་པ་ཡིན། དེ་ནས་ཁྱུང་ལུང་ནས་ཐོན་གླང་ཆེན་གཙང་པོའི་བརྒྱུད་ཀྱི་དགོན་སྡེ་ཀུན་མཇལ་ཞིང་མང་ཇ་ཕྱག་འགྱེད་ཚེ་དབང་བྱིན་རླབས་ཆོས་སྦྱིན་རེ་མཛད་བཞིན་ཕེབས། ཁུ་ནུ་དང་རྒྱ་གར་བྱང་ཆུབ་ལྗོན་ཤིང་དང་དེ་ཕྱོགས་ཀྱི་གནས་ཀུན་མཇལ་ཞིང་དྷི་ཧ་ལི་རུ་ཁྲོས་མའི་སྐོར་སོགས་འཕྲུལ་པར་བཏབ།  དེང་སྐབས་བོད་ཀྱི་ལོ་རྒྱུས་ཐོག་ཆོས་དཔེ་འཕྲུལ་པར་བཏབ་མཁན་ཐོག་མ་ཁྱུང་སྤྲུལ་རིན་པོ་ཆེ་ཡིན་པའི་ལོ་རྒྱུས་འདུག དེ་ནས་ཟ་ཧོར་མཚོ་པདྨ་བསྙེན་མཚམས་སོགས་མཛད། རང་ལོ་སོ་ལྔ་པ་ལྕགས་ལུག་ཟླ་{༡༩༣༡}དང་པོར་ཁུ་ནུ་རྒྱལ་ས་རམ་པུར་རྒྱལ་པོ་པོ་ཏམ་སེང་ཧ་དང་བཙུན་མོ་སོགས་ལ་ཆོས་འབྲེལ་གནང་ཞིང་བྱམས་མ་རིག་སྐྱོབ་ཀྱི་སྲུང་བ་བྱིན་པས་ཕྱི་ལོར་རྒྱལ་སྲས་ཤིག་འཁྲུངས། དེའང་ཁུ་ནུ་ཡུལ་ལོ་ལྔ་བཞུགས་རིང་དུ་རི་ཁྲོད་སྒྲུབ་ཁང་གསར་བཞེངས་མཚམས་བསྙེན་སྒྲུབ་བཅད་རྒྱ་དང་རི་ཆོས་སོགས་མཛད་ཅིང་། རང་སློབ་གྲྭ་པ་བཞི་ཕ་ཡུལ་ཕྱོགས་ལ་དཔེ་ཆ་ལེན་དུ་བཏང་བས་ག་རྒྱ་དང་ཕ་ཡུལ་ནས་དཔེ་ཆ་རྣམས་བླངས་ཏེ་རྒྱལ་རྩེ་ནས་སྦྲག་ཐོག་བརྒྱུད་དེ་ཁུ་ནུ་རྒྱལ་ས་ཅིན་དུ་འབྱོར།  དཔྱད་གསུམ་དག་རྩིས་དང་ཟབ་ཆོས་ཁྲོས་མ་སོགས་ཀྱི་དཔར་རྩ་བྲིས་ཏེ་དྷེ་ཧ་ལིར་དཔར་བཏབ་སྟེ།སྟོད་སྨད་བར་གསུམ་དད་སྦྱིན་བླ་གྲྭ་སྐྱ་སེར་ཀུན་ལ་ཆོས་སྦྱིན་བྱས། མི་སེར་སྟོང་ཕྲག་མང་པོ་ལ་ཚེ་དབང་བྱིན་རླབས་དང་སྔོན་འགྲོ་བློ་ལྡོག་སོགས་དྲང་ངེས་ཀྱི་ཁྲིད་ལུང་ཆོས་འཁོར་བཙུགས་ཤིང་དགེ་བསྐུལ་ཆོས་བཤད་གང་ཟབ་མཛད་ཅིང་དགེ་བསྐུལ་དགེ་ཚོགས་རྒྱ་ཆེན་སྤེལ།  སྤང་པ།  ཨ་ས་རོང་། ཧྲིབ་རང་།  མུ་རང་།  རིས་སྤག སྤིལ། སྐྱབ།བྱང་།པུ། ཀ་ནམ། ཤར་པ། སུམ་ནམ། ཧང་། ལི། ཅང་། ན་གོའི་ཡུལ་བཅས་ལ་ཡས་མས་ཕེབས་སྐབས། དེར་སྤང་པའི་ཡུལ་ལྷ་བསམ་འགྲུབ་དབང་རྒྱལ་གཙོས་པའི་ཨ་ས་རོང་སོགས་ཡུལ་སོ་སོའི་ཡུལ་ལྷ་ཆེན་པོ་བཅུ་དྲུག་དང་ཡན་ལག་དྲེགས་ཚོགས་རྣམས་ལ། དེ་སྔོན་ར་ལུག་སོགས་སེམས་ཅན་སྲོག་བཅད་དེ་ཤ་ཁྲག་དམར་ཆོག་འབུལ་བའི་འཚེ་བ་ལོག་ལམ་དུ་སོང་བའི་སྲོལ་ཡོད་པས། ལྷ་འདྲེ་ཀུན་དམ་ལ་བཏག་ཅིང་ཡུལ་གྱི་ལྷ་མི་སེར་སྐྱ་ཀུན་གྱིས་སྡིག་རྒྱུན་གཅོད་པའི་བློས་བླངས་ཆོད་དོན་འགྱིས་ཤིང་ཡུལ་ལྷའི་གསོལ་མཆོད་དང་མཆོད་པ་གྲོ་ཁུར་དཀར་མངར་རིགས་བརྟེན་དུ་བཅུག  སྤང་དང་ཨ་ས་རང་བར་གྱི་རི་རྩེར་རྡོ་ལ་ཞབས་རྗེས་ཤིག་དང་། ཧྲིབ་ཀྱི་རྒྱབ་རི་ཀེ་ལ་ཤའམ་གངས་ཆེན་དེའི་རྩེ་དང་གསེང་ཡར་མར་ལ་བྱ་བཞིན་ཕེབས་པ་སོགས་གྲུབ་པའི་རྟགས་ཀྱང་མཛད། དེ་ལྟར་ལྷ་འདྲེ་དང་སྐལ་ལྡན་རྗེས་འཇུག་མང་པོ་སྨིན་འགྲོ་གྱི་ལམ་མཆོག་བཀོད་གྲུབ་ཅིང་ཀུན་ལ་ཆོས་གདམས་དང་བདེ་བཞུགས་འགུར་གླུ་བཅས་མཛད་དེ་ཐོན། དེ་ནས་ཚུར་རིབ་ནས་རིམ་པར་བརྒྱུད་དེ་རྩ་རང་ཁྱུང་ལུང་རྒྱ་ཉི་ནམ་མཁའ་ཁྱུང་རྫོང་བཅས་ཕེབས། 

སྐྱབས་རྗེ་ཁྱུང་སྤྲུལ་རིན་པོ་མཆོག་གིས་ཞང་ཞུང་ཕུག་པ་ཁྱུང་ལུང་དངུལ་མཁར་དུ་དགོན་སྡེ་ཆགས་བཏབ་ཚུལ་ནི།

ཇི་སྐད་དུ།  སྐྱབས་རྗེ་འཁོར་ལོའི་མགོན་པོ་ཁྱུང་སྤྲུལ་འཇིགས་མེད་ནམ་མཁའ་མཆོག་ཉིད་སྐུ་ཚེ་གང་བོ་ཕྱོགས་མེད་ཀྱི་མི་ཡུལ་དུ་བྱ་བྲལ་མཛད་དེ་དགེ་སྦྱོར་གནང་རྒྱུའི་དམ་བཅའ་ཞིག་གོང་དུ་ཞུས་པ་བཞིན་ཡིན་མོད།   འོན་ཀྱང་སྔོན་ལས་དང་འཕྲལ་རྐྱེན་བཟང་པོ་ཡིས་བསྐུལ་བ་སྟེ།   རྣམ་ཐར་ལས།  ཅི་སྐད་དུ་སྙན་བརྒྱུད་བོན་ལས། ཁྱུང་ལུང་དངུལ་མཁར་རྒྱལ་བ་མཉེས་པའི་ཡུལ། འོད་འཕྲོ་གཡུང་དྲུང་སྤུངས་བའི་རི་བོ་ལ།  བླ་ཆེན་སྤྲུལ་པས་སླར་ཡང་བསྟན་རྒྱས་བྱེད།  ཞེས་དང་། ཚེ་དབང་རིག་འཛིན་འདི་ནས་སླར་བྱོན་ཏེ། བྱ་རྒྱལ་ལུས་ལ་བཀའ་རྟགས་རི་མོ་བརྒྱན། ཞེས་ནས་། མཐུ་སྟོབས་ལྡན་ཅིང་བསྟན་པའི་དགྲ་བགེགས་འདུལ། དགོན་གནས་འདེབས་ཤིང་གསས་ཁང་རྟེན་གསུམ་བཞེངས། འཆད་ཉན་བྱེད་ཅིང་བསྒོམ་སྒྲུབ་བསྟན་པ་སྤེལ།  ཞེས་སོགས་བན་བོན་གྱི་མ་འོངས་ལུང་བསྟན་གྱི་རིགས་མང་པོའི་ནང་དུ་འཁོད་ཅིང་ལུང་གིས་ཟིན་པ་ནི་རྣམ་ཐར་ནང་དུ་གསལ་བ་ལྟར་གཞིར་གཞག་ཐོག    དེ་བཞིན་སྐྱབས་རྗེ་མཆོག་གི་ཐུགས་བསམ་གྱི་བཞེས་སྟངས་ཀྱི་ཀུན་སློང་ནི།   སྨོན་ལམ་གཟི་བརྗིད་འབུམ་བརྡལ་ལས།   ཁོང་རིན་པོ་ཆེའི་ཞལ་ནས།  སྔོན་ཡུལ་ཆེན་བཅོ་བརྒྱད་བོད་སོགས་དང་ཁྱད་པར་ཞང་ཞུང་སྒོ་གོང་གི་ལྗོངས་འདིར་བླ་ཆེན་དྲན་པ་ཡབ་སྲས་སོགས་རིག་འཛིན་སེམས་དཔའ་སེམས་མ་གྲུབ་ཐོབ་བསམ་གྱིས་མི་ཁྱབ་པ་བྱོན་ཅིང་། དུས་དེར་ལུགས་འབྱུང་རྒྱལ་བསྟན་རིན་པོ་ཆེ་རབ་ཏུ་དར། གཤེན་རྣམས་དབུ་འཕང་འཐོ། ས་སྤྱོད་ཀུན་མངའ་ཐང་ཆེ། འགྲོ་ཀུན་བདེ་སྐྱིད་ཀྱི་ཉི་མ་ཤར་བའི་གནས་ཀྱི་འདུན་པ་རྗེས་སུ་དྲན་ན། ད་ལྟ་གྱེར་བསྟན་ལྷག་ཞབས་ཙམ་ལས་མེད་པ་འདི་ཤིན་ཏུ་ཡིད་ཕམ་ཞིང་སེམས་སྐྱོ་བའི་གནས་སུ་གྱུར། སླར་ཉམ་ཆུང་དབང་ཞན་བདག་ལྟ་བུས་གྱེར་བསྟན་མེ་རོ་སློང་ནུས་དཀའ་ཡང་སྔོན་ནས་སྨོན་ལམ་དང་། ད་ལྟ་རང་འདོད་ཀྱི་བློ་ངན་རྒྱབ་ཏུ་བསྐྱུར་ཏེ་བསྟན་དང་འགྲོ་ལ་ལྷག་བསམ་ཀུན་དྷ་ལྟར་དཀར་ངོས་རྒྱབ་རྟེན་དཀོན་མཆོག་ལ་བཅོལ་ཏེ། བསམ་བྱ་གྱེར་བསྟན་ཕྱོགས་བཅུ་དུས་གསུམ་རྒྱལ་བའི་ཐུགས་ཀློང་གར་ཁྱབ་དེ་ཉིད་མི་ནུབ་དར་ཞིང་རྒྱས་པའི་སྨོན་པ་འདི་བགྱིས་པ་ཡིན་པས།  ཞེས་ཞལ་གསལ་བར་གསུངས།  དེ་བཞིན་ཁོང་གིས་གསུང་འབུམ་ནང་དུ་གསལ་བའི་ཁྱུང་ལུང་དངུལ་མཁར་གྱི་སྐོར་འགའ་ཤས་འགོད་ནས།སྐྱབས་རྗེ་མཁས་གྲུབ་འཇིགས་མེད་ནམ་མཁའི་རྣམ་ཐར་དབྱར་སྐྱེས་རྔ་དབྱངས་དད་པའི་རྨ་བྱ་རྣམ་པར་རྩེ་བ་ལས། དེ་ནས་གཡུང་དྲུང་རིན་ཆེན་འབར་བའི་བྲག་ཕུག  ཁྱུང་ལུང་དངུལ་མཁར་སྡོང་། དྲན་པའི་རྡོ་སྐུ་སེ་བོན་ཞབས་རྗེས་བཅས་མཇལ་ནས་ཁྱུང་ལུང་དགོན་དུ་སོང་། དགོན་པའི་ལྟག་འདེབས་རྒྱ་ཞང་གི་སྐད་དུ་དགའ་བྱེད་ཕུག་ཅེས་པ་སྔོན་བླ་ཆེན་དྲན་པས་བྱིན་བརླབས་ཤིང་བར་དུ་རྗེ་གྲུབ་ཐོབ་མང་པོས་བྱིན་གྱིས་བརླབས་པའི་ཕུག་པ་དེ་རུ་སོང་ནས། ཞེས་དང་། བཅུ་པ་ཁྱུང་ལུང་དངུལ་མཁར་རྒྱལ་བ་མཉེས་པའི་རི་ཁྲོད་དུ་རྩེ་གཅིག་སྒྲུབ་པ་ཟབ་མོ་ལ་བཞུགས་པའི་ཚུལ་ནི། ཞེས་དང་།  བླ་ཆེན་དྲན་པའི་སྒྲུབ་གནས་ཞང་ཞུང་ཁྱུང་ལུང་དངུལ་མཁར་གནས་སུ། ཞེས་དང་། ཞང་ཞུང་ཁྱུང་ལུང་དགའ་བའི་དབེན་ཚལ་ནས། ཞེས་དང་། དབེན་གནས་ཁྱུང་ལུང་དངུལ་མཁར་འདིར། སླེབས་ནས་ལོ་གསུམ་ཟླ་དྲུག་སོང་། ཞེས་དང་།  བཅུ་གཉིས་པ་ཞང་ཞུང་ཕུག་པ་ཁྱུང་ལུང་དངུལ་མཁར་དུ་དགོན་སྡེ་གསར་བསྐྲུན་ཆགས་བཏབ་ཚུལ་ནི།  ཞེས་དང་།  ལྟེ་བར་ཏི་སེ་གངས་ཀྱི་ཀླུ་དབང་ཕྱོགས།  ཁྱུང་ཆེན་སྤུངས་རི་གུ་རུ་དཔལ་རྒྱས་སུ། ཞེས་སོགས་གསུངས་པ་དང་། ད་དུང་རྣམ་ཐར་དེར་མཁས་དབང་དཔལ་ཚུལ་མཚོ་མ་པང་གསེར་བྲག་བྱ་སྐྱིབ་སྒྲུབ་གནས་སུ་ཡོད་དུས་གནས་ཚུལ་ཡི་གེ་དང་བསྒྲག་ཁྱུང་སྤྲུལ་རིན་པོ་ཆེ་ལ་ཕུལ་བའི་༧དཔལ་ཁྱུང་ལུང་དངུལ་མཁར་གྱི་་གནས་བསྟོད་ངང་པའི་མགྲིན་དབྱངས་ཞེས་པ་ལས།  བླ་ཆེན་དྲན་པའི་གདན་ས་ཆེ།  ཁྱུང་ལུང་དངུལ་མཁར་གནས་མཆོག་ལ། ཞེས་དང་།  སོ་བདུན་སྒྲུབ་པ་གནས་ཀྱི་གཙོ།  རང་བྱུང་ཁྱུང་ཆེན་སྤུངས་པའི་རི།  ཞེས་དང་། ཁྱུང་ལུང་དངུལ་མཁར་རྟེན་གསུམ་དགོན།  རི་ལ་སྐོར་བ་བྱེད་མི་དང་།  དགོན་ལ་མཆོད་པ་འབུལ་མི་རྣམས།  ཞེས་སོགས་གནས་དང་སྒྲུབ་ཕུག  གུར་གྱམ་དགོན་པ་དྲན་པའི་མགུར་གླུ་ཞིག་ཀྱང་ཡོད་པ་ཡིན།  རྣམ་ཐར་འཇུག་བྱང་ལས། སྒྲུབ་གནས་སུམ་ཅུ་རྩ་བདུན་གྱི་འགོ་བོ་དཔལ་ཞང་ཞུང་ཁྱུང་ལུང་དངུལ་མཁར་གྱི་རི་ཁྲོད་དུ། ཞེས་སོགས་གསུངས་པ་དང་དེ་བཞིན་གསུང་གདམས་ཕྱོགས་བསྒྲིག་དང་། སྨན་སྦྱོར་སྟོང་རྩའི་གཞུང་སོགས་སྨན་དཔེ་ལེའུ་ཚན་བཞི།  དཔྱད་གསུམ་དག་རྩིས་ཕྱི་ནང་གསང་བ་ཡང་གསང་བཞིའི་རྩིས་གཞུང་རྒྱས་བསྡུས་ཆ་ལག་རེའུ་མིག་དང་།  འབྲས་རྩིས་རད་ཎིའི་བང་མཛོད།    དག་ཡིག་མིང་གཞི་བརྡ་སྤྲོད་རྩ་འགྲེལ་རེའུ་མིག་བཅས།   དཀྱིལ་འཁོར་ཐིག་རྩ།  དབྱངས་ཅན་སྒྲ་མདོ།    ཚོགས་འདོན་བརྒྱུད་རིམ་ཀུན་ཚང་བླ་མའི་གསོལ་འདེབས་བཅས་ཞང་ཞུང་ཁྱུང་ཆེན་སྤུངས་རི་དང་ཁྱུང་ལུང་དངུལ་མཁར། འོད་འཕྲོ་གཡུང་དྲུང་རིན་ཆེན་འབར་བའི་སྒྲུབ་ཕུག གུ་རུ་དཔལ་རྒྱས་བཅས་ནི་རྩ་ཆེན་ཡིན་པའི་ཚུལ་སོགས་འདི་ཚོའི་སྐོར་ཁ་གསལ་འཁོད་ཡོད་མོད་འདིར་ཡིག་ཚོགས་ལ་དོགས་ཤིང་ཚང་མ་འདིར་ལུང་དུ་དྲངས་མེད།  མདོར་ན་ལུང་ཁུངས་དེ་རྣམས་ལས་ཞིབ་ཚག་བྱས་ཏེ་ལྟས་ན་ཁྱུང་སྤྲུལ་རིན་པོ་ཆེ་མཆོག་གིས་བཞེད་དགོངས་ནི་ཞང་ཞུང་གི་གཙོ་བོའི་རྒྱལ་ས་ནི་ས་གནས་གང་ལ་ངོས་འཛིན་གནང་བཞིན་ཡོད་མེད་ཧ་གསལ་པོར་གོ་ངེས་པ་མ་ཟད་ཁོང་གིས་ཁྱུང་ལུང་དངུལ་མཁར་ཞེས་པའི་ཚིག་དེ་གཡས་གཡོན་ས་གནས་ཁག་ལ་ངེས་མེད་གང་བདེར་བྲིས་གནང་མཛད་པས་དེ་སྐབས་སུ་ཁྱུང་ལུང་དངུལ་མཁར་གྱི་སྐོར་ལ་རྩོད་ཉོག་རྩ་ནས་མེད་པའི་ངོས་འཛིན་ཐུབ་པ་ཡིན།  ཁྱུང་ལུང་ཡུལ་ཚོས་ཕུལ་བའི་ཁྱུང་ལུང་དངུལ་མཁར་གུ་རུ་དཔལ་རྒྱས་ཐང་དུ་རང་ལོ་སོ་དགུ་པ་ཤིང་ཕག་{༡༩༣༥}དབོ་ཟླའི་ཡར་ཚེས་ནས་བླ་སློབ་འཁོར་དང་བཅས་པས་ཞབས་རིམ་ཚོགས་མཆོད་སོགས་བོན་སྤྱོད་རིགས་དག་འདོན་རྒྱ་ཆེན་བགྱིས་ཏེ་གཡུང་དྲུང་རིན་ཆེན་འབར་བའི་སྒྲུབ་ཕུག་ཉམས་གསོ་དང་འབྲེལ་དགོན་པ་བསྐྲུན་རྒྱུའི་ཆ་རྐྱེན་ཀུན་ལྟ་གོན་དང་རྒུན་རིང་བཅད་རྒྱ་མཛད།  རང་ལོ་བཞི་བཅུ་པ་མེ་བྱི་{༡༩༣༦}ཧོར་ཟླའི་ཚེས་གསུམ་དགེ་བའི་ཉིན་ནས་ཁོང་བླ་སློབ་རྣམས་ཀྱིས་ཐུགས་བསྟན་གཟི་འབར་མདོ་སྔགས་གྲགས་རྒྱས་གླིང་གི་ལྷ་ཁང་རྨེངས་གཏིང་སྟེ། དེ་ནས་ལོ་རིམ་དུས་མཆོད་དང་གར་འཆམ་སོགས་དེ་མཚུངས་བཙུན་དགོན་གཡུ་ལོ་བཀོད་བཅས་རིམ་པར་བསྐྲུན་འགོ་བཙུག།  རང་ལོ་ཞེ་ལྔ་པ་ལྕགས་སྦྲུལ་{༡༩༤༡}ལོར་ཧ་སག་ཁ་པའི་ཇག་ཚོགས་སླེབས་པས་དགོན་པའི་རྟེན་རྣམས་བཤིག་གཏོར་བསྲེགས་རྡིབ་བཏང་ཡང་ཉམས་གསོ་མཛད།  ཕ་ཡུལ་ག་རྒྱ་ཡབ་ཚང་གིས་བཀའ་འགྱུར་རྟེན་འགྱུར་སོགས་རྟེན་མཆོད་གྱ་ནོམ་གཡག་རྒྱབ་སོ་ལྔ་སྒ་སྟན་ཆ་འགྲིགས་བཅས་འབྱོར་བ་སོགས་སྐུ་གསུང་ཐུགས་རྟེན་རབ་རྒྱས་དང་། ཁྱུང་ལུང་དངུལ་མཁར་གདོང་ལ་ལོ་རྒྱུས་ལ་གྲགས་ཆེ་བ་ཞང་ཞུང་དྲན་པ་ནམ་མཁའི་རྡོ་སྐུ་རང་བྱོན་ལ་ལྷ་ཁང་བཅས་བསྐྲུན།  དད་སྦྱིན་བལ་པོའི་ཆོས་བློན་ཆེན་པོ་དྷརྨ་སཱ་ཨུད་དང་ཁུ་ནུ་རྒྱལ་པོ་སོགས་ཕྱོགས་ཀྱི་མི་ཆེན་སོགས་དད་སྦྱིན་མང་པོས་མཐུན་རྐྱེན་རྒྱ་ཆེན་ཕུལ། ཐུགས་དམ་སྤྱི་སྤུངས་ཞི་ཁྲོ་རྒྱས་བསྒྲུབ་སོགས་གསས་མཁར་མཆོག་ལྔ། བཀའ་སྲུང་དམ་ཅན་རྒྱ་མཚོ་དང་སྒེར་སྲུང་ཨ་བསེའམ་ལྷ་བཙན་ཐོག་མདའ་མེ་འབར་སོགས་ཞང་ཞུང་སྲིད་པའི་ལྷ་རིགས་དང་སྨན་ཚོགས་རྣམས་ཀྱིས་ཕྲིན་ལས་བསྒྲུབ་པར་ཞལ་བཞེས་གཡར་དམ་བཅས། རྒུན་རིང་ལ་མཚམས་བསྙེན་བསྒྲུབ་བཞུགས་མཛད་ཅིང་སློབ་མ་རྣམས་ལ་ཟབ་གཅོད་དང་ཁྲོས་མ་སོགས་གཉན་ཁྲོད་རི་འགྲིམས་ཀྱི་ཟབ་ཁྲིད་རྒྱུན་སྤྱོད་དང་།  སྡེ་སྣོད་གསུམ་དང་རིག་གནས་ཀྱི་བཤད་ཁྲིད་སྐྱེད་རྫོགས་སྒོམ་སྒྲུབ་ཀྱི་དབང་ལུང་ཁྲིད་རྒྱུན་བཅས་གནང་། དེ་སྐབས་སྟོད་གནས་སུ་གནས་གཟིགས་ཕེབས་པའི་སྨན་རི་མཁན་ཆེན་བསྟན་པ་བློ་གྲོས། གཤེན་འཛམ་གླིང་རིན་པོ་ཆེ།  རྒྱལ་བ་ཀརྨ་པ་བཅུ་དྲུག  སྙིང་མའི་བླ་མ་སངས་རྒྱས་བཟང་པོ་སོགས་ཕྱོགས་ཀྱི་བན་བོན་གྱི་བླ་མ་མང་པོ་བྱོན་པར་དབང་ལུང་ཞུས་པ་སོགས་ཆོས་འབྲེལ་འགའ་ཞིག་མཛད། དེ་ལྟར་སྔ་ཕྱིར་མངའ་རིས་སྐོར་གསུམ་སྤྱི་ཁྱབ་སྒར་དབུ་གུར་ལྷན་དང་། རུ་ཐོག་པུ་ཧྲང་རྩ་མདའ་བཅས་རྫོང་བཞི་བཅས་ཀྱི་ཤོད་དྲུང་ངམ་དཔོན་བཅས་ལ་བསྟན་དགོན་བསྐྲུན་ཆོག་གི་མགོ་མཆན་དང་མ་འོངས་ལུང་བསྟན་ཞལ་གདམས་བོན་བྱུང་སོགས་ཞུ་ལན་མང་པོ་དང་དབང་དང་བྱིན་རླབས་ཆོས་འབྲེལ་མཛད་པས། བཀའ་ལག་གཙང་བཙན་མེ་བྱི་ཅན་སོགས་རྒྱབ་གནོན་དམ་རྒྱ་རིམ་པར་རྩལ་ཞིང་། བོད་གཞུང་གིས་ཀྱང་མངའ་རིས་ཁུལ་འདིར་བོན་དགོན་བརྒྱད་ལྷག་ཙམ་གསར་བསྐྲུན་བྱེད་ཆོག་པའི་བཀའ་ལག་གཙང་བཙན་དམ་རྒྱ་ཅན་ཡང་ཐོབ་པ་མ་ཟད་ཁྲིམས་འགོ་རང་བཙན་ལྟ་བུར་ཐོབ། དེ་ལྟར་མངའ་རིས་ཁུལ་འདིར་བོན་ལ་དོགས་པའི་རྣམ་རྟོག་བཅད་དེ་སྐོར་གསུམ་སྒར་སྤྱིའི་དབུ་བླ་བཅས་མཛད།  སླར་ཡང་རང་ལོ་ང་གཉིས་པ་ས་བྱི་{༡༩༤༨}ལོར་ཁྲུམས་ཟླའི་ཚེས་ལ་ཨོ་རྒྱན་ཅལ་བྷན་མ་རྒྱུད་གནས་ཆེན་གངས་ཆེན་རིགས་ལྔ་སོགས། ཟ་ཧོར་མཚོ་པདྨ། བལ་ཡུལ། རྒྱ་གར་འཕགས་ཡུལ་ཐུབ་པའི་གནས་ཆེན་བཅས་གནས་ཀུན་མཇལ་ཞིང་དྷིལ་ལིར་གསུང་རབ་འཕྲུལ་དཔར་འདེབས་པའི་སྣག་ཤོག་སོགས་ཉེར་མཁོ་རྣམ་བསྒྲུབ་སྟེ་ཕྱིར་དགོན་པར་བསྐྱོད།  དེ་ནས་མཚམས་བསྙེན་སྒྲུབ་ཀྱི་ཞོལ་དུ་བླ་སློབ་རྣམས་ཀྱིས་སྐྱབས་རྗེ་མཆོག་གིས་གསུངས་བརྩམས་དང་དཀྱིལ་འཁོར་ཐིག་རྩ་དཔེ་རིས། ཙག་ལི་ཐང་སྐུ། ཡི་དམ་རིགས་ཀྱི་སྒྲུབ་སྐོར།  ཤར་རྫའི་བཀའ་འབུམ་སོགས་དཔར་རྩ་བྲིས་ཏེ་ཞུ་དག་ལ་སོགས་མཛད་ནས་ཐང་སྐུ་དང་གླེགས་བམ་ཁྲི་ཕྲག་གྲངས་དཔར་བསྐུན་མཛད་ཅིང་དགོན་པར་བཞུགས་པ་སོགས་སྟོད་སྨད་ཀུན་ལ་ཆོས་སྦྱིན་གནང་སྟེ་སྤེལ།  ཁྲོ་བོ་དབང་ཆེན་སོགས་ཡིག་རྡོ་མང་པོ་བརྐོས། དགོན་པའི་དཀོར་པ་གྲོང་ལྔ་བཅུ་ཡན་མན་ལ་མངའ་ཁུལ་དད་སྦྱིན་ཚོས་ཕུལ་བའི་ར་ལུག་སྟོང་ཕྲག་ཕྱེད་གཉིས་ལྷག་ཙམ་དང་ནོར་གནག་བརྒྱ་ལྷག་ཡོད་ཅིང་འཚོ་གནས་ས་རྒྱའང་ཆེན་པོ་ཡོད་པར་ཇི་སྲིད་མི་ཉམས་བར་དུ་བསྟན་རྒྱུན་བཆོད་རྩར་བཙུགས། རང་ལོ་ང་བདུན་པ་ཆུ་སྦྲུལ་{༡༩༥༣-༡༩༥༥}དང་ཤིང་རྟ་དང་ཤིང་ལུག་ལོའི་དཔྱིད་སོས་བཅས་སྔ་ཕྱིར་གངས་མཚོ་སྐོར་ཞིང་ནམ་མཁའ་ཁྱུང་རྫོང་དུ་ཕེབས་ཏེ་རྩ་བླ་བདེ་རྒྱལ་སྐུ་གདུང་དང་ལྷ་ཁང་གསར་བཞེངས་ཀྱི་མཐུན་རྐྱེན་དང་ཨར་ལས་ཀྱི་རྒྱུ་འགྲོ་གང་མང་བཏང་ཞིང་དགོན་པ་ཕར་ཆེར་འགྲུབ་དགེ་བཙུན་རྣམས་ལ་རོགས་རམ་གང་དྲག་མཛད།   དེ་སྐབས་སུ་སྤ་སྤྲུལ་བསྟན་པ་རྒྱལ་མཚན་རིན་པོ་ཆེ་དང། དགེ་སློང་མཁས་གྲུབ་བསྟན་འཛིན་དབང་གྲགས་མཆོག་ཟུང་དང་། སྒྲུབ་མཁན་བྱ་བཏང་དྲང་སྲོང་བརྩོན་འགྲུས་རྒྱལ་མཚན་རིན་པོ་ཆེ་བཅས་འདིར་ཕེབས་བཞུགས་ཏེ་སྒྲུབ་མཁན་མཆོག་མཁན་པོ་གནང་བའི་གྲུབ་དབང་ཤར་རྫའི་ལུགས་ཀྱི་བསྒྲུབ་གྲྭ་བཙུགས།  རྒྱལ་ཚབ་མཁས་གྲུབ་དགེ་སློང་བསྟན་འཛིན་དབང་གྲགས་མཆོག་ལ་དགོན་འདིའི་འཛིན་སྐྱོང་སྤེལ་གསུམ་སྨིན་གྲོལ་གྱི་བསྟན་རྒྱུན་རྩལ་ཞིང་ཁོང་གིས་ཀྱང་བླ་མ་གོང་མའི་བསྟན་རྒྱུན་བསྐྱངས་ཏེ་མཛད་ཅིང་ཞང་ཞུང་གི་རིག་གནས་མཚོན་པའི་བོད་ཀྱི་རིག་གནས་ལ་སྐུ་ལས་དཔེ་མེད་གནང་མཛད་དེ་འཛིན་སྐྱོང་སྤེལ་གསུམ་གྱི་ཐོག་ལ་མཛད་རྗེས་མི་དམན་པ་བཞག་མཛད་ཡོད།    དེ་ནས་སྤྱིར་མངའ་རིས་སྐོར་གསུམ་དང་བྱེ་བྲག་ཁྱུང་ལུང་གུར་གྱམ་གཙོས་པའི་སློབ་ཚོགས་སེར་སྐྱ་རྣམས་ལ་ཞལ་གདམས་བསླབ་བྱ་དང་སྨོན་ལམ་བཅས་མཛད་དོ། དེ་ནས་རྗེ་ཉིད་ཀྱིས་སྔ་ཕྱིའི་གསུང་རྩོམ་སྐོར་ལ་ནི། སྨན་སྦྱོར་སྟོང་རྩའི་གཞུང་སོགས་གཅེས་བཏུས་བཟོ་ཐབས་སྨན་དཔེ་ལེའུ་ཚན་བཞི།  དཔྱད་གསུམ་དག་རྩིས་ཕྱི་ནང་གསང་བ་ཡང་གསང་བཞིའི་རྩིས་གཞུང་རྒྱས་བསྡུས་ཆ་ལག་རེའུ་མིག་དང་།  འབྲས་རྩིས་རད་ཎི་བང་མཛོད།ཀེག་རྩིས་རྡེའུ་བཅས།  དག་ཡིག་མིང་གཞི་བརྡ་སྤྲོད་རྩ་འགྲེལ་རེའུ་མིག་བཅས།  སྔགས་འབུམ། ཀེག་རྩིས་རྡེའུ།དཀྱིལ་འཁོར་ཐིག་རྩ། དབྱངས་ཅན་སྒྲ་མདོ།  བྱིངས་སྒྲུབ་རེའུ་ཁ།  ཚོགས་འདོན་བརྒྱུད་རིམ་ཀུན་ཚང་བླ་མའི་གསོལ་འདེབས། རང་རྣམ།{བཀའ་བསྡུ་བ་པོ་མཁས་དབང་ཚུལ་ཡིན།།}དེ་བཞིན་ཉམས་འགུར་སྐོར། རི་ཆོས། ཞལ་གདམས།བསྟོད་ཚོགས། གསོལ་འདེབས། བསྐུར་ཡིག  མ་འོངས་ལུང་བསྟན།   གནས་བསྟོད། ཡུལ་ལྷའི་ལོ་རྒྱུས་དང་གསོལ་མཆོད་སྐོར་སོགས་བསྟན་བཅོས་པོད་བཅུ་གསུམ་ལ་རྩོམ་འཕྲོ་འགའ་ལས་ཕར་ཆེར་གྲུབ།   རང་ལོ་ང་དགུ་པ་ཤིང་ལུག་{༡༩༥༥}ལོའི་ཟླ་བཅུ་གཅིག་ཚེས་གསུམ་གྱི་སྔ་དྲོར་སྐྱབས་རྗེ་མཆོག་དགོངས་པ་བོན་དབྱིངས་སུ་གཟིགས་པར་མཛད་དོ།   དེ་ལྟར་རྣམ་ཐར་རྒྱས་པ་ནི་ཁྱུང་སྤྲུལ་མཆོག་གིས་ཟིན་ཐོ་བཏབ་ཅིང་དཔལ་ཚུལ་གྱིས་བཀའ་བསྡུ་བྱས་པའི་{སྐྱབས་རྗེ་མཁས་གྲུབ་འཇིགས་མེད་ནམ་མཁའི་རྣམ་ཐར་དབྱར་སྐྱེས་རྔ་དབྱངས་དད་པའི་རྨ་བྱ་རྣམ་པར་རྩེ་བ}ཞེས་པ་དང་མགུར་མ་བཅས་ཤོག་ལྡེབས་དྲུག་བརྒྱ་བཞི་ཅུ་ཞེ་གཉིས་ཀྱི་བདག་ཉིད་ཅན་བཞུགས་ཡོད།    མདོར་ན་སྐྱབས་རྗེ་ཁྱུང་སྤྲུལ་རིན་པོ་ཆེ་ནི་ཞང་ཞུང་གི་གནའ་མཁར་ཁྱུང་ལུང་དངུལ་མཁར་གྱི་འགྲམ་དུ་དགོན་པ་བཏབ་ཅིང་ཁུལ་འདིར་ཞང་ཞུང་རིག་གནས་ཞིབ་འཇུག་གི་མེ་རོ་སྤར་གནང་མཁན་དེ་ཡིན་པས་འདིར་ཁོང་གིས་རྣམ་ཐར་མདོར་བསྡུས་ཤིག་ཁྱད་དུ་བཀོད་པ་ཡིན། བླ་མའི་གོང་མའི་བརྒྱུད་འཛིན་བ་ཚུལ་ཁྲིམས་ཕུན་ཚོགས་ཀྱིས།  

(མ་རྩོམ་ཡོང་ཁུངས། ཞང་ཞུང་ཁྱུང་ལུང་དངུལ་མཁར་རིག་གནས།)

84991cookie-checkསྐྱབས་རྗེ་ཁྱུང་སྤྲུལ་འཇིགས་མེད་ནམ་མཁའི་རྡོ་རྗེ་མཆོག་གི་རྣམ་ཐར།
(སྤྱིའི་གཟིགས་གྲངས། 135 དེ་རིང་། 1)

གཤམ་གྱི་རྩོམ་ཡིག་རྣམས་ལ་སྐུ་ཉིད་ཐུགས་མཉེས་པོ་ཡོང་སྲིད།

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།

མཚམས་སྦྱོར། རྩོམ་ཡིག་གོང་མ།
རྩོམ་པ་པོ།…
error: རྩོམ་འདི་བདག་དབང་ཅན་ཡིན།