འཛམ་གླིང་གི་མྱི་བོ་ཆེ་རྣམ་གཉིས་དྲན་པ།
འཛམ་གླིང་གི་མྱི་བོ་ཆེ་རྣམ་གཉིས་དྲན་པ།
འཛམ་བུ་གླིང་ན་འཁྲུངས་ནས་འདས་ཉིན་བར། །
དོན་ཡོད་བྱས་བས་སྐུ་ཚེ་འདའ་བ་ལས། །
དོན་མེད་ལས་ཀྱིས་ཆུ་ཚོད་རྫོགས་མྱོང་མེད།
ཆུང་ནས་ཐོས་དོན་བཙལ་ནས་མཁྱེན་རབ་རྒྱས། །
སྨིན་གྲོལ་གདམས་པས་གདུལ་བྱ་བོན་ལ་བསྐུལ། །
མཚན་ལྡན་བླ་མ་རྣམ་གཉིས་སྐུ་དྲིན་དྲན། །
ཕ་ནོར་གཡུང་དྲུང་བོན་བསྟན་འཛམ་གླིང་སྤེལ། །
ཕ་མེས་རིག་གཞུང་ཟབ་མོ་སྲོག་གིས་བསྲུངས། །
ཕ་ཆོས་རྫོགས་ཆེན་རྣལ་འབྱོར་རྣམ་གཉིས་དྲན། །
གྱེར་བསྟན་རླུང་དཀྱིལ་མར་མེ་གཟིམས་མ་བཅུག །
གྱེར་དང་གཤེན་གྱི་རང་སྒྲ་འགག་མ་བཅུག །
གྱེར་སྤུངས་རྣམ་གཉིས་ཐུགས་དྲིན་བསྐལ་པར་དྲན། །
བླ་རྒན་རྣམ་གཉིས་བཀའ་དྲིན་བརྗོད་མཐའ་བྲལ། །
དྲིན་ཆེན་རྣམ་གཉིས་མཛད་བཟང་གླེང་ཐབས་དབེན། །
མཁན་སློབ་རྣམ་གཉིས་སྙིང་གི་གཏིང་ནས་དྲན། །
བཞུགས་ན་བཞུགས་རིན་ཡོད་པ་བསྟན་འགྲོའི་མིག །
གཤེགས་ན་གཤེགས་ཚུལ་ཁྱད་འཕགས་དད་པའི་གསོས། །
གླེང་ན་གླེང་རིན་ཆེ་བ་ནམ་ཡང་དྲན། །
མིག་ཆུ་རྫུན་མས་སྐྱོ་གདུང་དགོས་དོན་མེད། །
མྱ་ངན་རྫུན་མས་འཁྲབ་སྟོན་བྱ་དོན་མེད། །
ཟོལ་བསྟོད་རྫུན་མས་ཅལ་འདྲོགས་ལངས་དོན་མེད། །
སྐུ་དྲིན་ཤེས་ནས་གླེང་ན་རིན་ཐང་ཆེ། །
བྱིན་རླབས་དད་པས་ཞུས་ན་རྒྱུད་ལ་སྨིན། །
རང་བཞིན་གསང་བོར་སྨྲས་ན་གཟི་བརྗིད་ལྡན། །
དགུང་ལོའི་བབ་དང་བསྟུན་ཏེ་ཞི་བར་གཤེགས། །
མཛད་བཟང་གནམ་སའི་བར་ན་སྐས་ཤིག་བཙུགས། །
ཞབས་རྗེས་བསུབ་ཐབས་མེད་དོ་སྨན་རི་བ། །
དགོངས་རྒྱུད་རྟོགས་པ་འཕོ་བར་བྱིན་གྱིས་རློབས། །
བྱམས་བརྩེས་འབྲལ་མེད་སྐྱོང་བར་བྱིན་གྱིས་རློབས། །
ཐུགས་རྗེས་རྟག་ཏུ་གཟིགས་པར་བྱིན་གྱིས་རློབས། །
གདོང་བཙུན་རྒྱ་ཐར་བྱ་བའི་སྐྱབས་འོག་པས། །
དེ་ལྟར་དྲན་གདུང་བྱིན་རླབས་ཞུ་ཚིག་འགའ། །
ཁམས་ཀྱི་ཉག་རོང་ཡུལ་དུ་གུས་པས་བཏེགས། །
༢༠༢༥།༦།༢༢ཉིན།
