ཁྲི་བརྟན་ནོར་བུ་རྩེའི་ལོ་འཁོར་མཇུག་བསྡོམས་ཚོགས་འདུ།

གནས་ཚུལ་མཁོ་གཏོང་ཞུ་མཁན། ཏི་སེའི་བུ།

༄༅།།བཤད་སྒྲུབ་བསྟན་པའི་འབྱུང་གནས་གཡུང་དྲུང་བོན་གྱི་གདན་ས་ཆེན་མོ་དཔལ་ལྡན་ཁྲི་བརྟན་ནོར་བུའི་རྩེའི་གཡུང་དྲུང་བོན་གྱི་ཆེས་མཐོའི་གཙུག་ལག་སློབ་གཉེར་ཁང་གི་སྐབས་ ༢༡ པའི་བཤད་སྒྲུབ་འདུས་སྡེ་དང་། སྔར་སྲོལ་གསོ་རིག་འབུམ་བཞིའི་སློབ་གྲྭ། གཞི་རིམ་སྔོན་འགྲོའི་སློབ་གྲྭ་བཅས་ཀྱི་ལོ་འཁོར་མཇུག་བསྡོམས་ཆེན་མོའི་གནས་ཚུལ།

①ཕྱི་ལོ་ ༢༠༡༦ ལོའི་ཟླ་ ༡ ཚེས་ ༢༩ ཉིན་ཞོགས་པའི་ཕྱག་ཚོད་ ༨ ཐོག༸སྐྱབས་རྗེ་མཁན་རིན་པོ་ཆེ་དང་། དཔོན་སློབ་རིན་པོ་ཆེ། སྒྲུབ་གྲྭའི་མཁན་རིན་པོ་ཆེ། བཤད་སྒྲུབ་མཁན་སློབ་རྣམ་གཉིས། རྩ་འཛིན་སློབ་དཔོན་རྣམ་པ། དགེ་བཤེས་རྣམ་པ། བཙའ་སྐྱོང་ལྷན་ཚོགས་དང་བཤད་སྒྲུབ་འདུས་སྡེའི་ལས་བྱེད། བཤད་སྒྲུབ་སློབ་གཉེར་བ་རྣམ་པ་བཅས་ཆེས་མཐོའི་གཙུག་ལག་སློབ་གླིང་ཁང་དུ་ཚང་འཛོམས་ཐོག བཤད་སྒྲུབ་འདུས་སྡེའི་དགེ་སྐོས་ཤེས་རབ་མཆོག་རྒྱལ་ལགས་ནས་ཚོགས་འདུའི་མཛད་རིམ་ངོ་སྤྲོད་གནང་ནས་ཚོགས་འདུ་དབུ་འཛུག་གནང་།

②བཤད་སྒྲུབ་འདུས་སྡེའི་ཚོགས་གཙོ་མཆོག་ནས་བཤད་སྒྲུབ་སློབ་གཉེར་བ་རྣམས་ལོ་འཁོར་གཅིག་གི་རིང་། ཚོགས་དང་། རྩོད་པ། དཔེ་ཁྲིད། དམ་བཅའ། རིག་གནས་བགྲོ་གླེང་སོགས་སྒེར་དོན་དུ་ཆད་པ་དང་། སློབ་གཉེར་བས་དགོངས་ཤོག་ཕུལ་གྲངས་བཅས་པ་སྒྲོགས་སྦྱང་གནང་། སྒྲུབ་གྲྭའི་དགེ་སྐོས་མཆོག་ནས་སྒྲུབ་གྲྭ་བའི་ཐུན་དང་བསགས་སྦྱང་སྒེར་དོན་ཆད་པ་རྣམས་སྒྲོག་སྦྱང་གྲུབ་རྗེས་སུ། གྲྭ་ཚང་དང་བཤད་སྒྲུབ་འདུས་སྡེའི་ལས་བྱེད་གསར་རྙིང་རྣམ་པས་གསུང་བཤད་རིམ་བཞིན་གནང་།

③དེ་ནས་སྐྱབས་རྗེ་མཁན་རིན་པོ་ཆེ་ལུང་རྟོགས་བསྟན་པ་གཡུང་དྲུང་མཆོག་ནས་ལོ་གྲངས་ཧྲིལ་པོ་གཅིག་ནས་དགུའི་བར་རྩོད་པ། དཔེ་ཁྲིད། རིག་གནས་དཔེར་བརྗོད་བཅས་གང་ཡང་མ་ཆད་པའི་བཤད་སྒྲུབ་སློབ་གཉེར་བ་རྣམས་ལ་ལོ་གྲངས་མང་ཉུང་ལ་དཔག་པའི་དམིགས་བསལ་གཟེངས་རྟགས་གནང་། དེ་བཞིན་གཏན་ཚིགས་རིག་པའི་རྣམ་བཤད། མཚོན་བྱེད་ཞེ་ལྔ། རྗེ་ཡི་དབུ་མའི་འགྲེལ། ཀུན་མཁྱེན་ཉི་མའི་ཤེར་ཕྱིན་སྐབས་དང་པོ་བཅས་ཆ་ཚང་ངག་རྒྱུགས་འབུལ་མཁན་གྱི་སློབ་གཉེར་བ་རྣམས་ལ་བྱ་དགའི་གཟེངས་རྟགས་རིམ་པར་གནང་བ་དང་། བཤད་སྒྲུབ་འདུས་སྡེའི་སློབ་གླིང་ཁྲོད་ནས་ལོ་འཁོར་གྱི་བྲིས་རྒྱུགས་དང་རྩོད་རྒྱུགས། རིག་གནས་ངག་རྒྱུགས་བཅས་ཀྱི་བརྒྱ་ཆའི་ཨང་ཐོབ་པ་རྣམས་ལ་གཟེངས་རྟགས་དང་བྱ་དགའ་གནང་།

④གཞི་རིམ་སློབ་གྲྭའི་སློབ་སྤྱི་དོན་གྲུབ་རྒྱལ་མཚན་ལགས་ཀྱིས་གསུང་བཤད་དང་འབྲེལ། སློབ་གྲྭའི་ཁྲོད་ནས་ཡིག་གཟུགས་འགྲན་བསྡུར་དང་། ཚན་རིག དབྱིན་བལ་བོད་གསུམ་སྐད་ཡིག ལོ་རྒྱུས་དྲི་བ་དྲིས་ལན། སྲོལ་རྒྱུན་རི་མོ། དེང་དུས་རི་མོ། ཡ་རབས་ཀུན་སྤྱོད་། སྤྱི་ཡོངས་ཀྱི་ཐད་ནས་བརྒྱ་ཆའི་ཨང་རིམ་མཐོ་ཤོས་ཀྱི་སློབ་ཕྲུག་རྣམས་ལ་བྱ་དགའ་གནང་།

⑤སྔར་སྲོལ་གསོ་རིག་འབུམ་བཞིའི་སློབ་གྲྭའི་སློབ་སྤྱི་དགེ་བཤེས་བདེན་གཉིས་བཤད་སྒྲུབ་ལགས་ཀྱིས་གསུང་བཤད་གནང་ནས་གསོ་རིག་བྲིས་རྒྱུགས་དང་ངག་རྒྱུགས། དབྱིན་བལ་བོད་ཀྱི་སྐད་ཡིག འཚོ་བའི་རྒྱུན་ཤེས་སྐོར། རྒྱལ་རབས་ལོ་རྒྱུས། ཡ་རབས་ཀུན་སྤྱོད། སྤྱི་ཡོངས་ཀྱི་ཐད་ནས་བརྒྱ་ཆའི་ཨང་རིམ་མཐོ་ཤོས་ཀྱི་སློབ་ཕྲུག་རྣམས་ལ་དམིགས་བསལ་གྱི་བྱ་དགའ་དང་གཟེངས་རྟགས་གནང་།

⑥དེ་ནས་སྐབས་ཉེར་གཅིག་པ་དང་ཉེར་གཉིས་པའི་བཤད་སྒྲུབ་འདུས་སྡེའི་ལས་བྱེད་དང་། སྔར་སྲོལ་གསོ་རིག་འབུམ་བཞིའི་སློབ་གྲྭའི་ལས་བྱེད་གསར་རྙིང་བརྗེ་ལེན་བྱས།

⑦མཁན་རིན་པོ་ཆེ་དང་། དཔོན་སློབ་རིན་པོ་ཆེ། བཤད་སྒྲུབ་མཁན་སློབ་རྣམས་ནས་སློབ་སྦྱོང་བྱེད་ཕྱོགས་དང་འབྲེལ་བའི་བཀའ་སློབ་ཟབ་རྒྱས་བསྩལ་ཏེ་སྐབས་ ༢༡ པའི་བཤད་སྒྲུབ་འདུས་སྡེའི་ཚོགས་གཙོ་ཚུལ་ཁྲིམས་མཆོག་རྒྱལ་ལགས་ནས་གཡུང་དྲུང་བོན་གྱི་ཆེས་མཐོའི་གཙུག་ལག་སློབ་གཉེར་ཁང་གི་ལོ་འཁོར་གྱི་ཚོགས་འདུ་དེ་ཉིད་མཇུག་བསྡོམས་གནང་བ་བཅས་ཀྱི་གནས་ཚུལ་ཉུང་འདུས་སུ་ཏི་སེའི་བུ་ནས་ ༢༠༡༦།༡།༢༩ ཉིན་སྤེལ།