གདན་ས་ཁྲི་བརྟན་ནོར་བུའི་རྩེ་རུ་སྲིད་རྒྱལ་འབུམ་ཚོགས་འབུལ་བཞིན་པའི་གནས་ཕྲིན།

བདག་ཅག་གི་སྟོན་པ་རྣམ་འདྲེན་བརྒྱད་པ་རྒྱལ་བ་གཤེན་རབ་མི་མཆོག་གི་བསྟན་མཆོག་མདོ་སྔགས་སེམས་གསུམ་གྱི་བསྟན་པ་དང་འགྲོ་བའི་བདེ་སྐྱིད་ཐམས་ཅད་འཇིག་རྟེན་དུ་ཡུན་རིང་དུ་གནས་པ་ལ། ཡི་དམ་བོན་སྐྱོང་སྲུང་མའི་ཐུགས་རྗེའི་ནུས་མཐུ་ལ་བརྟེན་དགོས་པ་ཡིན་སྟབས། མདོ་སྔགས་བཤད་སྒྲུབ་བསྟན་པའི་འབྱུང་གནས། གཡུང་དྲུང་བོན་གྱི་གདན་ས་ཆེན་མོ་༧དཔལ་ལྡན་ཁྲི་བརྟན་ནོར་བུ་རྩེ་རུ་ལོ་ལྟར་རེ་བཞིན་སྙིགས་དུས་འདྲེན་མཆོག་བླ་ཆེན་དྲན་པ་ནམ་མཁའ་དང་སངས་རྒྱས་གཡུང་དྲུང་བོན་གྱི་བསྟན་སྲུང་གཙོ་མོ་མ་མཆོག་སྲིད་པ་རྒྱལ་མོ་གཉིས་ལ་འབུམ་ཚོགས་རེ་རྒྱས་འབུལ་ཞུས་དང་ཞུ་བཞིན་ཡོད་པ་ལྟར། འདི་ལོ་ཧོར་ཟླ་ ༠༣ པའི་ནང་མ་གཅིག་སྲིད་པ་རྒྱལ་མོ་ལ་འབུམ་ཚོགས་འབུལ་བའི་དུས་ཚོད་དེ་ཐུག་ཡོད། དེ་ཡང་མ་རྒྱུད་ཚོགས་བྱང་ལས། ཚོགས་ཀྱི་མཆོད་པ་བྱིན་གྱིས་བརླབས་པ་ནི། །ཉོན་མོངས་ལྔ་བཀུག་དུག་བསྒྲལ་དག་ཚངས་བྱ། །འབྲུ་ལྔས་མང་པོ་སྤེལ་ལ་ཡོངས་སུ་འབུལ། །ཕར་ལ་མཆོད་པས་རྒྱལ་བ་མ་ལུས་མྱེས། །ཚུར་ལ་བྱོན་པས་བཀྲ་ཤིས་གླུ་དབྱངས་ལེན། །ཚེ་བཀྲག་དབང་དང་ཡེ་ཤེས་དངོས་གྲུབ་ནོད། །གླན་བྱུག་བཀོད་པས་སྲུང་སྐྱོབ་གོ་ཆ་གྱུར། རྒྱས་པར་རྐང་ཐོན་འབུལ་པས་དངོས་གྲུབ་ཞུ། །བཞི་བཅུ་རྩ་ལྔ་ཡེ་ཤེས་རང་དབང་ཐོབ། །ཚོགས་ཀྱི་དམ་ཚིག་བསྲེ་བ་གཉིས་མེད་འབྲེལ། །ཡེ་ཤེས་དཀྱིལ་འཁོར་གསས་མཆོག་དྲག་ཏུ་དབབ། །ཡི་དམ་མཁའ་འགྲོ་བསྐུལ་ལ་དགྲ་བགེགས་བསྒྲལ། །ཚོགས་ཕུད་འབུལ་ཞིང་གཡུང་དྲུང་ལང་ཚོ་རོལ། དེ་བཞིན་ཡེ་ཤེས་ཚོགས་ཀྱི་དགོངས་པར་གནས། །སྨོན་ལམ་གདབ་ཅིང་ཚོགས་ཀྱི་བཤད་པ་བཏང་། །ཡེ་ཤེས་བསྡུ་ཞིང་གོ་བགོ་རྫོགས་རིམ་སྒོམ། །དེའི་ཡེ་ཤེས་མངོན་དུ་རྙེད་པར་འགྱུར། །ཞེས་གསུངས་པ་ལྟར། གཞི་ཡི་བག་ཆགས་བསལ་བ་དང་། ལམ་གྱི་རྟོག་པ་སྦྱོང་བ་དང་། འབྲས་བུ་ཡེ་ཤེས་ཀྱི་ཚོགས་རྫོགས་པའི་ཕྱིར་དང་། ལྷག་པར་དུ་སངས་རྒྱས་གཡུང་དྲུང་བོན་གྱི་བསྟན་པའི་གཙུག་རྒྱན་ཆེན་མོ་དཔལ་རྒྱལ་བ་སྨན་རི་བའི༸སྐྱབས་རྗེ་མཁན་སློབ་རྣམ་གཉིས་དང་རྒྱལ་བ་གཤེན་ཚང་ཡབ་སྲས་གཙོས་པའི་རིས་སུ་མ་ཆད་པའི་བསྟན་འཛིན་སྐྱེས་བུ་རྣམས་ཀྱི་སྐུ་ཚེ་བསྐལ་བརྒྱར་བརྟན་ཅིང་ཐུགས་ཀྱི་བཞེད་དགོངས་ལྷུན་གྱིས་འགྲུབ་པ་དང་། ཡངས་པའི་འཇིག་རྟེན་ཁམས་འདིར་ནད་མུག་འཁྲུག་རྩོད་དང་འབྱུང་བའི་འཇིགས་པ་ཐམས་ཅད་མིང་མེད་དུ་ཞི་ཞིང་། ཁྱད་པར་དུ་བཤད་སྒྲུབ་ཀྱི་བསྟན་པ་འདི་ཉིད་དར་ཞིང་རྒྱས་པ་དང་སྦྱིན་པའི་བདག་པོ་རྣམས་ཀྱི་ཚེ་དང་བསོད་ནམས་དཔལ་དང་གྲགས་པ། ཁ་རྗེ་དབང་ཐང་ཐམས་ཅད་གོང་ནས་གོང་དུ་འཕེལ་བ་སོགས་དགོས་པའི་སྒོ་དུ་མ་ལ་དམིགས་ནས་སྲིད་རྒྱལ་འབུམ་ཚོགས་འདི་ཉིད་འཚོགས་པ་རེད། དེ་ཡང་ཐོག་མར། རིག་འཛིན་འདུས་པ་ལས། བཟའ་དང་བཅའ་དང་བཏུང་དང་བགོ། ཞེས་པ་ལྟར། ཚོགས་རྫས་རྣམས་འབྱོར་བ་རང་གིས་བསྒྲུབས། མེད་པ་རིན་གྱིས་ཉོས། ཡོད་པ་ཕུགས་ནས་ཕྱུངས་ཏེ་ཕུན་སུམ་ཚོགས་པ་བསགས། དེ་ནས་ཧོར་ཟླ་ ༠༣ ཚེས་ ༡༩ཉིན་གྲྭ་མང་རྣམས་ཀྱིས་མཆོད་བཟོ་ལེགས་པར་བྱས་ཤིང་ཕྱི་ཉིན་ཚེས་ ༢༠ ནས་༢༥ དང་སྤྱི་ལོ་ ༢༠༡༩ཟླ་བ་ ༠༥ ཚེས་ ༢༣ནས་ཚེས་ ༢༩བར་བདུན་ཕྲག་གཅིག་གི་རིང་དགེ་བའི་བཤེས་གཉེན་རྣམ་པ་དབུ་བཞུགས་ཐོག་གྲྭ་བཙུན་ཡོངས་རྫོགས་རྒྱས་འཚོགས་གནང་བཞིན་པ་རེད། ད་ལན་མ་གཅིག་སྲིད་པ་རྒྱལ་མོ་གཙོས་པའི་བོན་སྐྱོང་སྲུང་མ་རྣམས་ལ་འབུམ་ཚོགས་ཕུལ་བའི་བྱིན་རླབས་མཐུ་དང་ནུས་པ་ལ་བརྟེན་ནས༸སྐྱབས་རྗེ་མཁན་སློབ་གཤེན་གསུམ་གཙོས་པའི་འཛམ་གླིང་གང་སར་བཞུགས་པའི་བོད་གཞིས་བྱེས་གཉིས་ཀྱི་བསྟན་འཛིན་སྐྱེས་ཆེན་རྣམས་ཀྱི་སྐུ་ཚེ་ལ་བར་ཆོད་མེད་ཅིང་ཕྲིན་ལས་རྒྱས་པ་དང་། འཇིག་རྟེན་ཁམས་འདིར་ནད་མུག་འཁྲུག་རྩོད་དང་འབྱུང་བའི་འཇིགས་པ་ཐམས་ཅད་ཞི་ཞིང་། ཁྱད་པར་དུ་སངས་རྒྱས་གཡུང་དྲུང་བོན་གྱི་མདོ་སྔགས་བསྟན་པའི་འབྱུང་གནས་དཔལ་ལྡན་ཁྲི་བརྟན་ནོར་བུའི་རྩེ་འདི་ལ་དངོས་ཤུགས་བརྒྱུད་གསུམ་ནས་རྒྱབ་སྐྱོར་དང་རོགས་རམ་གནང་མཁན་གྱི་འཛམ་གླིང་གང་སར་བཞུགས་པའི་དད་ལྡན་མི་མང་རྣམ་པ་དང་། སྒོས་སུ་ལོ་མང་རིང་འབུམ་ཚོགས་ཀྱི་ཚོགས་སྦྱོར་རྒྱུ་ཡི་ཡོན་བདག་གནང་བའི་<<ཧི་མ་ལ་ཡའི་ཞང་ཞུང་རྫོགས་ཆེན་གླིང་གི་དབུ་འཛིན་བླ་མ་ཨ་དཀར་བ་འཆི་མེད་བློ་བཟང་>>མཆོག་གི་རླབས་ཆེན་གྱི་མཛད་ཕྲིན་བཅས་ལ་དུས་རྟག་ཏུ་མ་གཅིག་སྲིད་པ་རྒྱལ་མོ་གཙོས་བོན་སྐྱོང་བསྟན་སྲུང་རྣམས་ཀྱིས་ཁ་འཛིན་མཐུ་དཔུང་སྡོང་གྲོགས་མཛད་དེ་ཁ་ལས་ཀླུང་རྟ་དར་ཞིང་ཚེ་བསོད་དཔལ་འབྱོར་མཛད་ཕྲིན་རྒྱས་པའི་གསོལ་སྨོན་དང་བཅས་ཏེ་འབུམ་ཚོགས་འབུལ་བཞིན་པའི་གནས་བསྡུས་འདི་ཁྱུང་ཁྲི་ལྡེས་ ༢༠༡༩ཟླ ༠༥ ཚེས་ ༢༦ཉིན་སྤེལ།།  །།