༧སྨན་རིའི་དཔོན་སློབ་རིན་པོ་ཆེ་མཆོག་དང་སྐྱོང་སྤྲུལ་རྣམ་གཉིས་༧ཡོངས་འཛིན་རིན་པོ་ཆེའི་སྐུ་གམ་དུ་བཅར་བ།
༧སྐྱབས་རྗེ་སྨན་རིའི་དཔོན་སློབ་འཕྲིན་ལས་ཉི་མ་རིན་པོ་ཆེ་མཆོག་དང་། ༧སྐྱབས་རྗེ་མཁན་རིན་པོ་ཆེ་ལུང་རྟོགས་བསྟན་པ་གཡུང་དྲུང་། སྐྱོང་སྤྲུལ་དགེ་བཤེས་བསྟན་འཛིན་རྣམ་རྒྱལ་རིན་པོ་ཆེ་རྣམ་པ་གསུམ་༧སྐྱབས་རྗེ་ཞིང་གཤེགས་དམ་པའི་དགོངས་རྫོགས་མཆོད་འབུལ་རྣམས་ལེགས་གྲུབ་བྱུང་བ་དང་། བསྟན་འགྲོའི་དོན་ཆེད་ཡུལ་ཁག་སོ་སོ་ནས་ཧྥ་རན་སི་ལ་ཕེབས་སྐྱོད་གནང་སྟེ། ཕྱི་ལོ་ ༢༠༡༧ ཟླ་ ༡༡ ཚེས་ ༠༨ ཉིན་གྱི་དགོང་མོར་༧སྐྱབས་རྗེ་སྨན་རིའི་ཡོངས་འཛིན་སློབ་དཔོན་བསྟན་འཛིན་རྣམ་དག་རིན་པོ་ཆེའི་གདན་ས་བཞི་པ་ནུབ་གླིང་བོན་གྱི་འདུས་སྡེ་གཤེན་བསྟན་དར་རྒྱས་གླིང་དུ་ཞབས་སོར་བདེ་བར་འཁོད་པ་དང་
གོང་ཟླའི་ཕྱི་ཚེས་ ༠༩ དང་། ༡༠ ཡི་སྔ་དྲོ་བར་༧སྐྱབས་རྗེ་ཡོངས་འཛིན་རིན་པོ་ཆེའི་སྐུ་གམ་དུ་དགྱེས་ཞལ་མཉམ་འཛོམས་ངང་གསུང་གླེང་ལྷུག་སྩོལ་གནང་ནས་བཀའ་སློབ་ལམ་སྟོན་ཞུས། ཉིན་གུངགསོལ་ཚིགས་བཞེས་གྲུབ་རྗེས་༧སྨན་རིའི་དཔོན་སློབ་འཕྲིན་ལས་ཉི་མ་རིན་པོ་ཆེ་མཆོག་དང་། སྐྱོང་སྤྲུལ་དགེ་བཤེས་བསྟན་འཛིན་རྣམ་རྒྱལ་རིན་པོ་ཆེ་རྣམ་གཉིས་ནས་༧ཡོངས་འཛིན་རིན་པོ་ཆེར་གྱེས་མཇལ་ཞུས་པ་དང་སྦྲགས་གཤེན་བསྟན་དར་རྒྱས་གླིང་གི་དགེ་སློབ་རྣམས་ཀྱིས་ཕེབས་སྐྱེལ་ཞུས་པའི་གནས་བསྡུས་སུ།
ཕྱི་ལོ་ ༢༠༡༧ ཟླ་ ༡༡ ཚེས་ ༡༡ ཉིན།