ལེགས་བཤད་ལམ་རིམ་ལས། ” ཀྱཻ་མ་སྙིགས་དུས་འདིར་སྐྱེས་པའི། །ཁྲི་གཙུག་བསྟན་ལ་གཤེ་བ་ཚོལ། །དེས་ནི་བུ་ཚས་ཕ་ཁུ་ཡི། །རིགས་རྒྱུད་ངན་པ་བཤད་དང་མཚུངས། ། ” ཞེས་གསུངས་སོ། །

བོད་ལྕགས་གླང་ལོའི་གདན་ས་ཁྲི་བརྟན་ནོར་བུའི་རྩེ་རུ་གཤེན་གྱི་དཀའ་ཐུབ་ཆེན་མོ་འཚོགས་བཞིན་པའི་གནས་བསྡུས།

 

 

 

 

ཧོར་ཟླ་བརྒྱད་པ་འདི་ནི་འདུལ་བའི་ལོ་འགོ་རུ་གྲགས་པའི་དུས་ཚོད་འདི་ལ་སྔར་སྨན་རི་ལ་བརྒྱད་པ་ལོ་གསར་ཞེས་ལོ་གསར་གཏོང་བའི་སྲོལ་ཡོད་ལ། དུས་འགྱུར་རྗེས་སུ་དུས་ཚོད་འདི་ལ་༧སྐྱབས་རྗེ་ཡོངས་འཛིན་རིན་པོ་ཆེའི་ཐུགས་དགོངས་བླ་ན་མེད་པ་ལྟར། སྐྱབས་རྗེ་མཁན་སློབ་རྣམ་གཉིས་ཀྱིས་བྱེས་ཀྱི་གདན་ས་སྨན་རི་ནས་དབུ་བཙུགས་ཏེ་ཧོར་ཟླ་ ༨ ཚེས་ ༡ནས་ ༨ བར་དུ་བྱེས་ཀྱི་གདན་ས་གཉིས་ལ་དཀའ་ཐུབ་འདི་ཉིད་འཚོགས་པའི་སྲོལ་ཕྱེས་གནང་བ་རེད། དེ་ཡང་གཤེན་གྱི་མཛད་མདོ་རྒྱས་པ་ལས། རྣམ་དག་དཀའ་ཐུབ་འདུལ་བའི་བོན། །སྐལ་ལྡན་རིག་ཅན་མ་གཏོགས་པས། །སྐལ་མེད་ཕལ་གྱིས་སྤྱོད་ཡུལ་མིན། ཞེས་དང་། རྒྱུ་འབྲས་ཤེས་པས་མི་ཆོག་ཁྱིམ་སྤང་དགོས། །ཁྱིམ་ཐབ་སྤངས་པས་མི་ཆོག་རབ་བྱུང་དགོས། །རབ་ཏུ་བྱུང་བས་མི་ཆོག་གོང་འཕེལ་དགོས། །གོང་འཕེལ་བླང་བས་མི་ཆོག་དཀའ་ཐུབ་དགོས། །དཀའ་ཐུབ་བྱས་པས་མི་ཆོག་མཐར་ཕྱིན་དགོས། །ཞེས་དང་། དཀའ་ཐུབ་ཉམས་སུ་ལེན་ཚུལ་རབ་ཏིང་ངེ་འཛིན་འགོག་པ་རུ་ཉམས་སུ་ལེན་པ་དང༌།འབྲིང་དཀའ་བ་མཐར་ཕྱིན་དུ་ཉམས་སུ་ལེན་པ་དང༌། ཐ་མ་ལོ་ཟླ་ཞག་གྲངས་སུ་ལེན་དགོས་ཚུལ་གསུངས་པ་བཞིན་དཀའ་ཐུབ་ཕྱག་ལེན་ཇི་ལྟར་གནང་ཚུལ་སྐྱབས་རྗེ་ཡོངས་འཛིན་སྨྲ་བའི་དབང་པོས་ཕྱག་བཞེས་ཟིན་བྲིས་མཛད་པ་(དཀའ་ཐུབ་ལ་གནས་ཚུལ་གྱི་ལག་ལེན་མདོ་དོན་གསལ་བྱེད)གཞིར་བཟུངས་ནས། འདི་ལོར་ཧོར་ཟླ་བདུན་པའི་ཉི་ཤུ་ནང་ནས་དཀའ་ཐུབ་ཆེན་མོའི་སྔོན་འགྲོ་སྟ་བོན་གྱི་རིམ་པ་རྡུལ་ཚོན་དཀྱིལ་འཁོར་བཏབ་པ་དང་། ཧོར་ཟླ་ ༧ ཚེས་ ༣༠ ཉིན་བཅའ་བཟོའི་ལས་རིམ་ལ་ཞུགས་ཏེ་གཙུག་ལག་ཁང་གི་ཕྱི་ནང་ལ་གཙང་སྦྲ་དང་། དཀྱིལ་འཁོར་མཆོད་རྫས་བཤམ་བཀོད་ཀྱི་རིམ་པ་གྲུབ་པར་བྱས། ཧོར་ཟླ་བརྒྱད་པའི་ཚེས་ ༡ ཉིན་དངོས་གཞིའི་དཀའ་ཐུབ་ཆེན་མོ་དབུ་བཙུགས་ཏེ་སྐྱབས་རྗེ་སྒྲུབ་གྲྭའི་མཁན་རིན་པོ་ཆེ་མཆོག་དང༌། བཤད་སྒྲུབ་མཁན་རིན་པོ་ཆེ་དང་འདུལ་བའི་མཁན་པོ་རྣམ་གསུམ་དབུ་བཞུགས་ཀྱི་ཐོག་འདུས་མང་རྣམས་ཞོགས་པའི་ཕྱག་ཚོད་ ༤ ནས་འདུལ་བའི་གསོ་སྦྱོང་འཚོགས། ཞོགས་ཇ་གསོལ་རྗེས་འདུལ་བའི་མཁན་པོ་དགེ་བཤེས་བསམ་གཏན་གཙུག་ཕུད་མཆོག་གིས་འདུལ་བའི་ལོ་རྒྱུས་སྐོར་ནས་སློབ་གཉེར་བ་རྣམས་ལ་གསུང་ཁྲིད་གནང་། ཕྱག་ཚོད་ ༩ཐོག་གཤེན་གྱི་དགེ་སྤྱོད་ཀྱི་ཆོ་གའི་གཞུང་བསྲངས་ཏེ་ཆུ་གཏོར་གསུངས། ཕྱག་ཚོད་ ༡༢ ཐོག་ཉིན་གུང་གསོལ་ཚིགས་བཞེས་ཏེ་བསྐོར་བའི་སྨོན་ལམ་དང་འཁོར་བ་དོང་སྤྲུགས་ཀྱི་སྙིང་པོ་བརྗོད་བཞིན་གཙུག་ལག་ཁང་ལ་སྐོར་བ་ཕེབས། དེ་ནས་ཕྱག་ཚོད་ ༣ ཐོག་གཡུང་དྲུང་སེམས་དཔའི་ལྟུང་བཤགས་གསུངས་ནས་གསོལ་ཇ་བཞེས་རྗེས་ཡུམ་མདོ་བཀླགས་ཏེ་ཚོགས་གྲོལ། ཕྱག་ཚོད་ ༥ ནས་ཕྱེད་བར་འཆད་ར་འཚོགས། དེ་ནས་འདུས་སྡེ་དང་མང་ཚོགས་ལ་ཁྲུས་གསོལ་གནང་བ་དང་འདུལ་ཆོག་ལྟར་ཉུ་ལེ་བཀར་བའི་ཆོ་ག་དང་། ཐེག་ཆེན་གྱི་བསྔོ་བ་གསུངས་རྗེས། གཙུག་ལག་ཁང་དུ་སྨོན་ལམ་རྣམ་གསུམ་དང་སངས་རྒྱས་མཚན་དཔེའི་མདོ་ལས་བྱུང་བའི་སྨོན་ལམ་བཅས་གསུངས་ནས་འཚོགས་གྲོལ། ཕྱག་ཚོད་ ༧ ནས་ ༩ དགེ་བཤེས་དང་འཛིན་གྲྭ་རྒན་པ་ཚོས་བར་དུ་ཟབ་མོ་ལྟ་བའི་ཉམས་ལེན་དང་། འོག་མ་ཚོས་དཔེ་ལྟ། བློ་འཛིན་སོགས་དུས་ཚོད་གང་འགབ་ཀྱི་དགེ་སྦྱོར་ལ་འབད་བརྩོན་གནང་བ་བཅས་དཀའ་ཐུབ་ཀྱི་རིང་ཉིན་རེའི་དགེ་སྦྱོར་གྱི་བྱ་བཞག་ཡིན། དཀའ་ཐུབ་ཀྱི་དགོས་པ་དང་བྱུང་རིམ་ནི། གཤེན་གྱི་དཀའ་ཐུབ་ཆེན་མོ་ནི་སྟོན་པ་ཡང་དག་པར་རྫོགས་པའི་སངས་རྒྱས་རྒྱལ་བ་གཤེན་རབ་མི་བོ་ཆེ་དེ་ཉིད་གཤེན་ལོ་ ༣༡ བཞེས་པའི་དུས་སུ། རང་རྒྱུད་ཆེ་བའི་དྲེགས་པ་གཞོམ་ནས། གཞན་རྒྱུད་ཉོན་མོངས་གི་ཟུག་རྔུ་སངས་པ་དང༌། རང་ལུས་ཕུང་པོའི་སྟོབས་ཤེད་སྨད་ནས། གཞན་དག་ལང་ཚོའི་སྒྱུ་མ་བསྒྱུར་བ་དང་། རང་ཉིད་དཀའ་ཐུབ་ཀྱི་སྙིང་རུས་བསྐྱེད་ནས། གཞན་དག་དྲང་པོའི་ལམ་ལ་འཛུད་པ་དང༌། རང་ཉིད་འདུ་འཛིའི་གཡེང་བ་སྤངས་ནས། གཞན་དག་ཐར་པ་ལ་སྤྲོ་བ་བསྐྱེད་པ་དང་། རང་ཉིད་ལྷག་པའི་ཚུལ་ཁྲིམས་བསྲུངས་ནས། གཞན་དག་འགྲོ་བ་དང་བ་འདྲེན་པའི་ཕྱིར་དུ། ཁྱིམ་སྤངས་རབ་བྱུང་གི་མཛད་པ་མཛད་ནས་དཀའ་བ་རྣམ་གསུམ་སྤྱད་དེ། དང་པོ་སུམ་ཅུ་རྩ་གསུམ་གྱི་གནས་སུ་ངང་པའི་རྒྱལ་པོ་ཆུ་འབྱེད་དང་ཐབས་ཅིག་ཏུ། ཆུ་དང་འོ་མ་ཕྱེས་པའི་ཐིགས་རེ་དང་། འབྲས་སཱ་ལུའི་ཉག་མ་རེ་གསོལ་ནས་བྱ་ཡི་དཀའ་ཐུབ་ལོ་གཅིག་མཛད་པ་དང༌། གཉིས་པ་རྒྱལ་ཆེན་རིགས་བཞིའི་གནས་སུ། སྤྲེའུའི་རྒྱལ་པོ་ཧ་ནུ་མ་དྷ་དང་ལྷན་དུ་ཤིང་ཐོག་གི་འབྲུ་མ་རེ་དང་། ཤིང་ལོའི་སྟེང་དུ་ཁ་བ་བབས་པའི་ཆུ་ཐིགས་རེ་གསོལ་ནས་སྤྲེའུའི་དཀའ་ཐུབ་ལོ་གཅིག་མཛད། གསུམ་པ་འོལ་མོ་ལུང་རིང་གི་བྱང་ནུབ་ཟད་མཚམས་མེ་ཏོག་གི་གླིང་ལ་མཁའ་ལྡིང་གི་རྒྱལ་པོ་ཤང་ཤང་དང་ཐབས་ཅིག་ཏུ་བཞུགས་ནས་ཆུ་སིང་གའི་ཐིགས་པ་རེ་དང༌། རྩྭ་ཨུ་མེར་གྱི་མཆོག་མ་རེ་གསོལ་ནས་མི་ཡི་དཀའ་ཐུབ་ལོ་གཅིག་མཛད། དེ་ནས་རི་བོ་གསེར་ལྡན་གྱི་རྩ་བ་ཆུ་བོ་གྱིམ་ཤང་གི་འགྲམ་དུ་བྱོན་ནས་འཁོར་སྡེ་བཞི་ཡ་བརྒྱད་ལ། རྣམ་དག་འདུལ་བ་ཁྲིམས་ཀྱི་བོན་སྡེ་ལས། ༡བསླབ་གསུམ་ཡོངས་དག་གི་སྡེ་དང༌། ༢རྣམ་དག་དཀའ་ཐུབ་ཀྱི་སྡེ། འདུས་ཁྲིམས་གཙང་མའི་སྡེ། ༤སྲུང་ཁྲིམས་ངོ་བསྟོད་ཀྱི་སྡེ། ༥སྦྱང་ཐོབ་མཐར་ཕྱིན་གྱི་སྡེ། ༦རྒོལ་བ་ཚར་གཅོད་ཀྱི་སྡེ། ༧མུ་བཞི་མཐའ་བསལ་གྱི་སྡེ།༨གལ་པོ་རྩོད་སྤོང་གི་སྡེ། ༩དག་པ་རྣམ་གྲོལ་གྱི་སྡེ། ༡༠སྤོབས་པ་མཐར་ཕྱིན་གྱི་སྡེ་བཅས་འདུལ་བྱེད་སྡེ་བཅུ་རུ་གཏན་ལ་ཕབ་སྟེ་གསུངས། དེ་ནས་འདུལ་བ་ཁྲིམས་ཀྱི་གླིང་གསས་ཁང་བ་རབ་གསེར་གླིང་དུ་བྱོན་ནས་འདུས་པའི་འཁོར་རྣམས་ཁྱིམ་སྤངས་རབ་ཏུ་བྱུང་བའི་ཕྱིར་འདུལ་བ་རྒྱུད་དྲུག་ཏུ་གཏན་ལ་ཕབ། ཕོ་གླིང་དང་མོ་གླིང་གནས་རིགས་སོ་སོར་འཛིན་པའི་ཆེད་དུ་གསས་མཁར་ཁྲི་སྨོན་རྒྱལ་བཞད་དང༌། ཁོ་མ་ནེ་ཆུང་གཉིས་ཀྱི་བར། མཆོད་རྟེན་རྣམ་དག་དཀར་པོའི་དྲུང་དུ་འདུས་པའི་འཁོར་རྣམས་ལ། འདུལ་བ་ཁྲིམས་ཀྱི་སྡོམ་པ་ཕོག་ནས་གཤེན་གྱི་དགེ་སྤྱོད་རྣམ་པར་དག་པའི་དོན་བསྟན་ཏེ། ལུས་ངག་ཡིད་གསུམ་གྱི་སྒོ་ནས་རྣམ་དག་འདུལ་བའི་བསླབ་བྱ་ཉམས་སུ་ལེན་པའི་སྡེ་མང་དུ་ཡོད་པ་མ་ཟད། འཁོར་སྡེ་བཞི་ཡ་བརྒྱད་ལས་བྲག་དགོན་དཀའ་ཐུབ་ཀྱི་སྡེ་ཞེས་པ་དམིགས་བསལ་དཀའ་ཐུབ་ཉམས་ལེན་ལ་བརྩོན་མཁན་གྱི་སྡེ་ཡང་བྱུང༌། དུས་དེ་ནས་བཟུང་འདུལ་བའི་མཁན་རྒྱུད་མ་ཆད་པར་ད་ལྟའི་རྒྱལ་བ་སྨན་རིའི་མཁན་སློབ་རྣམ་གཉིས་མ་ཐུག་གི་བར་དུ་དཀའ་ཐུབ་མཛད་པའི་སྐྱེས་མཆོག་དུ་མ་བྱུང་མྱོང་ཡོད་པ་དང་། ད་ལྟའི་ཆར་རྒྱལ་བ་སྨན་རིའི་མཁན་སློབ་གཉིས་ཀྱི་ཐུགས་རྗེའི་སྐྱབས་འོག་ཏུ་གདན་ས་གཉིས་གཙོས་པའི་བོད་ཕྱི་ནང་གཉིས་ལ་དཀའ་ཐུབ་འཚོགས་མཁན་བྱུང་དང་བྱུང་བཞིན་པ་བཅས་ཀྱི་གནས་བསྡུས་འདི་ཁྱུང་ཁྲི་ལྡེས་ ༢༠༢༡ ༠༩  ༠༨ ཉིན་སྤེལ།། །།

པར་པ་དྲུང་མུ་ཉེ་ལོ།

 

 

(སྤྱིའི་གཟིགས་གྲངས། 870 དེ་རིང་། 1)

གཤམ་གྱི་རྩོམ་ཡིག་རྣམས་ལ་སྐུ་ཉིད་ཐུགས་མཉེས་པོ་ཡོང་སྲིད།

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།

མཚམས་སྦྱོར། རྩོམ་ཡིག་གོང་མ།
ཕྱི་ལོ་༢༠༢…
error: རྩོམ་འདི་བདག་དབང་ཅན་ཡིན།