རྩོམ་དེབ་འགྲེམས་པ།
༄༅།། ༸དཔལ་ལྡན་ཁྲི་བརྟན་ནོར་བུའི་རྩེ་གཡུང་དྲུང་བོན་གྱི་ཆེས་མཐོའི་གཙུག་ལས་སློབ་གཉེར་ཁང་གི་སློབ་གཉེར་བ་བདག་གི་རྩོམ་གྲོགས་ག་ཐ་ཚུལ་ཁྲིམས་རབ་བརྟན་ནམ་དྲ་མིང་ཞང་ཚུལ་མི་འབོད་པའི་རྩོམ་དེབ་<<ཚོར་བའི་གླིང་བུ་>>ཞེས་པ་འདི་ནི། མི་བུ་ཞིག་འཇིག་རྟེན་ཁམས་སུ་རྡོག་ཐོན་བྱུང་སྟེ། དགའ་གདུང་ཁྲོ་ཆགས་ཀྱི་འཚོ་བའི་བརྒྱུད་རིམ་ཁྲོད་ནས་ཚོགས་དྲུག་གི་མྱོང་ཚོར་དབྱངས་སུ་བཀུག་པའི་གླིང་བུ་ཞིག་གམ། ཁོ་བོའི་བསམ་བློའི་ཁ་ཕྱོགས། སེམས་ཀྱི་དད་ཞེན། འཚོ་བའི་གནས་སྟངས། མི་ཚེའི་བཞུད་ལམ་བཅས་ཟུར་བལྟས་ལེབ་མཐོང་གིས་རྒྱུད་ལོང་བྱེད་ཆོག་པའི་སེམས་ཀྱི་གཏིང་ནས་བུས་པའི་སྙུག་གླིང་དྲུག་འགྱུར་མ་དེ་ཡིན།
དེ་རིང་༸སྐྱབས་རྗེ་ཡོངས་འཛིན་སྨྲ་བའི་དབང་པོ་མཆོག་ལ་ས་སྟེང་བོན་འབངས་ཡོངས་ཀྱིས་མཎྜལ་བརྟན་བཞུགས་རྒྱས་འབུལ་གྱི་མཛད་སྒོ་ཆེན་མོའི་སྐབས་སུ།
དད་སྤྲོའི་རླབས་ཕྲེང་ཉིལ་བའི་དབྱངས་གསལ་ངག་གི་མཆོད་སྤྲིན་དང། རྩ་བའི་བླ་མའི་ཐུགས་བཟུང་ཚུལ་ལ། རབ་ཤེས་རབ་དང་། འབྲིང་སྤྱོད་ལམ། ཐ་མ་ཟང་ཟིང་གིས་ཐུགས་བཟུང་བའི་ཚུལ་གསུམ་ཡོད་པ་ལས། ཤེས་རབ་ཀྱིས་ཐུགས་བཟུང་བའི་བསམ་པས་ཀུན་ནས་བསླངས་ཏེ་རིན་པོ་ཆེ་རྣམ་པ་ལ་ཐོག་མའི་པར་ཕུད་བཅས་ཕུལ་ནས་མིག་སྔར་འགྲེམས་སྤེལ་ཞུས་ཡོད་པ་རེད།
ཏི་སེའི་བུ་ནས། ༢༠༡༦།༤།༢༠།ཉིན་སྤེལ།