སྟག་གཟིག་དང་ཞང་ཞུང་གི་སྐོར།
རྩོམ་པ་པོ། ཡོངས་འཛིན་སློབ་དཔོན་བསྟན་འཛིན་རྣམ་དག
སྟག་གཟིག་གི་སྐོར།
ད་དུང་སྟག་གཟིག་ཞང་ཞུང་བོད་བཅས་ཀྱི། མི་རིགས་ས་ཡུལ་ལས་སོགས་ཞིབ་བཤད་ན། རྟག་གཟིགས་ཕུགས་པ་དག་ཞིང་འོལ་མོ་གླིང༌། མུ་ཁྱུད་བདལ་མཚོ་དབལ་སོ་གངས་རིས་བསྐོར། གཡུང་དྲུང་དགུ་བརྩེགས་ཕོ་བྲང་གླིང་བརྒྱད་དང༌། ཕྱི་ནང་བར་གྱི་གླིང་དང་མཐའ་གླིང་ལ། ནང་བཅུད་དམུ་གཤེན་ཧོས་ཤག་དཔོ་རྒྱ་གཏོ་དཔྱད་གཉན། རྒྱལ་རིགས་རྗེ་རིགས་དམངས་རིགས་བྲམ་ཟེ་བཅས། རྒྱལ་བློན་འབངས་བཅས་བསམ་མཐའ་ཡས་པས་ཁེངས། སྐད་ནི་ནང་གླིང་གཡུང་དྲུང་ལྷ་ཡི་སྐད། བར་གླིང་བཅུ་གཉིས་དེ་ལས་བསྒྱུར་བའི་སྐད། འབབ་ཆུ་བརྒྱད་རྒྱུད་བསྒྱུར་བའི་སྐད་བརྒྱད་ནི། གཙང་མ་ལྷ་སྐད་ན་ར་ཛ་རའི་རྒྱུད། དག་པ་ལྷ་སྐད་པཀྵུ་བྱང་གི་རྒྱུད། སཾ་སྐྲྀ་ལྷ་སྐད་གྱིམ་ཤང་ནུབ་ཀྱི་རྒྱུད། ཁྲི་ཝེར་ལྷ་སྐད་སིན་དྷུ་ལྷོ་རྒྱུད་བསྒྱུར། ཧོ་ཅི་འཕྲུལ་སྐད་ལྷོ་ཤར་གངྒཱའི་རྒྱུད། སྤོས་ཅི་འཕྲུལ་སྐད་ལྷོ་ནུབ་སི་ཏའི་རྒྱུད། ཅི་གུང་འཕྲུལ་སྐད་སེང་ག་བྱང་ནུབ་རྒྱུད། ཅུང་རྩེ་འཕྲུལ་སྐད་བྱང་ཤར་གསེར་ལྡན་རྒྱུད། བཅུས་གཙོས་སྐད་རིགས་བརྒྱ་དང་དྲུག་ཅུ་བཞི། ཡི་གེའི་གཟུགས་ནི་སྤུངས་སོ་ཆེ་ཆུང་སོགས། གཟུགས་དབྱིབས་བཀོད་པ་མི་འདྲ་དུ་མར་གསུངས། འདི་ཉིད་དག་ཞིང་མོས་པའི་ཡིད་ཡུལ་ལས། ས་སྟེང་འདི་ན་བརྟགས་ཏེ་བཙལ་བ་བླུན། གལ་ཏེ་ཏི་སེའི་སྐོར་དང་པ་ཤ་སོགས། ཡིན་པར་འདོད་པ་ངེས་ན་དེར་སྐྱེ་བའི། སྨོན་ལམ་འདེབས་ཡུལ་ཁོ་ན་བྱེད་དགོས་པ་ཅིའི་ཕྱིར་ཡོད། དེ་ཡང་བདག་ཅག་གི་སྟོན་པས། སྐྱེ་སྒོ་གཅོད་པའི་མདོ་ལས། འོལ་མོ་ལུང་རིང་གནས་སུ་སྐྱེ་བར་ཤོག ལུས་ངན་འཁོར་བའི་ལུས་སུ་མི་སྐྱེ་ཞིང༌། ཞེས་གསུངས་པས། ཞིང་འདི་ཉིད་འཁོར་ཞིང་ཐུན་མོང་བ་ལས་ངེས་པར་ཁྱད་དུ་འཕགས་པ་ཞིག་ཡིན་དགོས་པས་སོ། །
རང་ཅག་འགྲོ་བ་ཕལ་པའི་དབང་པོའི་ཡུལ་དུ་མ་གྱུར་ན་མེད་པར་འདོད་པ་དང༌། འཛམ་གླིང་གི་ས་དང་འབྲེལ་ཏེ་ཡོད་ན་རང་རེས་མཐོང་དགོས་པ་སོགས་ནི་ཧ་ཅང་གི་བློ་སྒོ་དོག་པས། དེ་ལྟར་ན་སྲིད་པའི་ཡུལ་ས་གཡེན་སྡེ་དང༌། ལྷ་རིགས་གཉན་སྡེ་ཀླུ་རིགས་སོགས་མི་དང་རང་བཞིན་གྱིས་བསྐལ་དོན་ཅན་རྣམས་མེད་པར་འདོད་དགོས་ལ། དེ་ལྟར་ན་གཞུང་རྣམས་ལས་རྒྱང་འཕེན་ལ་དགག་པ་བྱས་པའི་རིགས་པ་རྣམས་འདིར་དྲན་ཆོག་པ་འདྲ་སྙམ། ལན་གཅིག་འོལ་གླིང་གི་དཔྱད་པ་བཞག་ནས་སྐབས་ཀྱི་བརྗོད་བྱ་རྒྱལ་རབས་ལ་འཇུག་པ་ཡིན་པས།
ཞང་ཞུང་གི་སྐོར།
དེ་ལ་སྟག་གཟིག་གི་ཡུལ་ལམ་ཞང་ཞུང་སྒོ་བར་མའི་ཡུལ་ཡང་འབོད་པའི་གནས་སུ་འཁོད་པའི་མི་རིགས་ནི་འགའ་ཞིག་རྟག་གཟིགས་ཧོས་རིགས་ལས་གྲོལ་ཞིང༌། ཕལ་ཆེར་གྱི་མི་ཡི་རིགས་ནི་སྔོན་བཤད་པ་ལྟར། རྒྱལ་བུ་འཐིང་གེའི་རྒྱུད་ལས་བྱུང་ཚུལ་བཤད་པ་ལྟར་ལ། འདི་ལ་སྒོ་བར་མ་འབོད་ན་ཕུགས་པ་གང་ཞེ་ན། རྟག་གཟིགས་འོལ་མོའི་གླིང་ལ་སྒོ་ཕུགས་དང༌། སྟག་གཟིག་ཡུལ་ལ་བར་མ་དང༌། ཕྱི་མ་ཞང་ཞུང་ཞེས་པའི་སྒྲ་གཉིས་ལ། འདྲ་མཐུན་མང་བས་འཁྲུལ་གཞི་ཆེ་བ་ཡིན་འདུག་ཀྱང༌། ཁུངས་ལྡན་གྱི་གཞུང་ལས་བྱུང་ཚུལ་ལ་ཞིབ་ཏུ་འདྲིས་པའི་ངལ་བ་བྱེད་མཁན་ཡོད་ན་ངེས་པར་གསལ་བར་རྟོགས་ནུས་སོ། །
དེ་ལྟར་ཞིབ་ཏུ་བརྟག་ལོང་མེད་པ་ཚིག་སྤྱི་ཙམ་ཞིག་གོ་བས་དྲངས་ཏེ་བསྟོད་སྨད་བྱེད་པ་ལ་རིངས་ན་དཔྱད་པའི་ཕུགས་ཐག་ཐུང་བས་གནད་དོན་དཔྱིས་ཕྱིན་པ་དཀའོ། །རྒྱལ་གཤེན་མི་ལུས་བསམ་ལེགས་ཀྱིས་མཛད་པའི་མ་རྒྱུད་སངས་རྒྱས་རྒྱུད་གསུམ་གྱི་འགྲེལ་བའི་དབུ་འཆད་ལས། ཞང་ཞུང་བར་པའི་ཡུལ་སྲིད་པའི་ཞིང་ཁམས་རྣམ་པར་དག་པ་འཛམ་གླིང་ས་ཡི་སྙིང་པོ་ཞང་ཞུང་བོན་གྱི་རྒྱལ་པོའི་ཞིང་ཁམས་ན། ཡབ་གཡུང་དྲུང་བོན་གྱི་རྒྱལ་པོ་གྱེར་ཝེར་ཐ་ཚན་ཧི་པང་རྐྱ་ཞེས་བྱ་བ། འཛམ་བུ་གླིང་གི་རྒྱལ་ཁམས་ལ་དབང་བསྒྱུར་བ་ཞིག་ཡོད་པ་ལ། ཡབ་སྐུ་བགྲེེས་ནས་དགུང་དུ་གཤེགས་པའི་དུས་ལ་ཐུག་པ་ལས་སྲས་མེད་ནས་མཐའ་གམ་གི་རྒྱལ་ཕྲན་བཅུ་གཉིས་ཀྱིས། རྒྱལ་པོ་དགུང་དུ་གཤེགས་ནས་འབངས་ཀྱི་རྒྱལ་ས་མི་ཟིན་པས། རང་ཅག་རྣམས་ཀྱིས་དབུས་གྱུར་རྒྱལ་་་་་ ཁམས་དམག་གིས་བཅོམ་ལ་ལོངས་སྤྱོད་བླང་ཞེས་བགྲོས་པས། དབུས་ཀྱི་རྒྱལ་འབངས་ཀུན་ཤིན་ཏུ་སྡུག་ཅིང་བྲེད་ནས་གཤེན་རབ་ཐམས་ཅད་ཀྱིས་ལྷ་རྣམས་ལ་གསོལ་བ་བཏབ་པས། ཡུམ་སྲིད་པའི་ལྷ་མོ་འཁོར་དང་བཅས་པ་ནམ་མཁའ་ལ་བྱོན་ནས་ལུང་བསྟན་ཏེ། ལོ་གཅིག་ནས་རྒྱལ་བུ་འབྱོན་ཏེ་ཐོས་པ་རྒྱ་མཚོས་བོན་གྱི་བསྟན་པ་བསྐྱང་བར་ལུང་བསྟན་པས། བཙུན་མོ་ལྷ་ཟ་གཡུང་དྲུང་རྒྱན་ཞེས་བྱ་བ་ལས་མེ་ཏོག་ཨུད་དུ་འབར་བ་ཁ་ཟུམ་པ་ཞིག་བཙས་པར་གྱུར་ཏོ། །ཞེས་པས་ཞང་ཞུང་བར་མའི་ཡུལ་དང༌།
ཡང་མཁས་དབང་ཧ་རོ་སྦོ་ལེས། རྒྱ་ཡི་རྒྱལ་རབས་ལས་ཡེ་ཤུ་མ་ཤི་ཀ་འཁྲུངས་རྗེས་ཕྱི་ལོ་༦༡༥༽ནང་སྐོར་ཨ་རབ་པའི་སྐུ་ཚབ་དོན་གཅོད་རྒྱ་ནག་གི་ཡུལ་དུ་བཞག ཨ་རབ་པའི་ཡུལ་ལ་རྒྱ་ཡིས་ཏ་ཞིག་དང༌། ཏ་ཟིག་སོགས་འབོད་སྐད་གསུངས། འོན་ཀྱང་ཏ་ཟིག་ཅེས་པའི་མིང་དེ་རྒྱ་ཡིས་ཡུལ་དེ་ལ་གསར་དུ་བཏགས་པའི་རྒྱུ་མཚན་གང་ཡང་བཤད་རྒྱུ་མེད་པས་ཆེས་སྔ་མོའི་དུས་ནས་ཡུལ་འདི་རྣམས་ལ་མིང་དེ་སྐད་བརྗོད་པ་ཡིན་པར་གསལ། དུས་དེར་རྒྱ་ནག་ནས་ཨ་རབ་པས་གོས་ཆེན་གྱི་འབུ་དང༌། དེ་གསོ་བྱེད་ཀྱི་ཤིང་བཅས་བླངས་ཏེ་ཨ་རབ་པའི་ཡུལ་དུ་དར། དེའི་དུས་ཡུལ་གཉིས་ཀྱི་བར་འགྲོ་ལམ་དེང་སྐབས་ཤིན་ཅང་ཟེར་བའི་ལུང་པ་འདིར་བརྒྱུད་ནས་འགྲོ་བས། འདིར་གོས་ཆེན་གྱི་ལམ་ཟེར་བའི་མིང་ཡང་ཆགས་ཡོད། ཇི་ལྟར་བཤད་པའི་ཞང་ཞུང་བར་མའི་ཡུལ་དང༌། རྟག་གཟིགས་ཞེས་པའི་ལུང་གིས་བསྟན་པའི་ས་དེ་ཨ་རབ་པའི་ལུང་པ་འདི་ཡིན་ཞེས་མཐའ་གཅིག་ཏུ་ངེས་པའི་རྒྱུ་མཚན་ད་དུང་མ་རྟོགས་པས་བཤད་པ་འདི་ཙམ་དུ་ལུས།
ཞང་ཞུང་སྒོ་པའི་སྐོར།
བསྟན་འབྱུང་༡༡༠༽ཕྱི་མ་སྒོ་པ་ཞང་ཞུང་དངོས་ཀྱི་ཡུལ། སྟོད་ན་ཁ་ཆེའི་ཡུལ་མཚམས་སེང་པའི་ཕྱིན། བྱང་ཕྱོགས་ཧོར་གྱི་གངས་རྒྱུད་ཚུན་དང་སྨད། སུམ་པ་གླང་གི་གྱིམ་ཤོད་ཡན་ཆད་དང༌། ལྷོ་རྒྱུད་རྒྱ་གར་བལ་པོའི་ཡུལ་ཁམས་ཚུན། ཞེས་དང༌། སྐྱབས་སྟོན་ཁྲོ་འགྲེལ་༣༡་༤༽སྤྱིར་ཞང་ཞུང་དང་བོད་གཉིས་དང་པོ་ས་བགོས་ལ། གཙང་ཁ་རག་ཡན་མན་ཡིན་ལ། ལིག་མི་རྐྱ་ཡི་དུས་ཞང་ཞུང་ལ་དམག་སྟོང་སྡེ་དགུ་ཁྲི་དགུ་འབུམ་སུམ་པའི་སྟོང་བུ་ཆུང་ཡར་དེའི་མངའ་རིས། ༥ མར་པ། སྟག་ལོ་གུ་རིབ་ཁྱུང་བྱིད། ཁྱུང་པོ། འུ་སངས། སུམ་པའོ། །ཞེས་སོ། །སྦལ་ཏེ། རྐང་ཕྲན། ལ་དྭགས། ཟང་མཁར། གར་ཞ། ཉུང་ཏི། སྤི་ཏི། ཁུ་ནུ། ཚང་ས། དྲུག་ཉི། ཉི་ཏི། ཀྱོ་ནམ། ཤ་ཁོག མགར་ཡང༌། ཚང་རོ། ཏི་དཀར། སླེ་མི་དང༌། ཝོམ་གློ། སེ་རིབ། དོལ་པོ། ཀྲུག་སྐྱེས་སོགས། ཀྵོར་མང་ཡུལ་ཡན་གྱི་ལྷོ་རྒྱུད་དང༌། རུ་ཐོག གུ་གེ སྤུ་ཧྲེང་སྐོར་གསུམ་དབུས་བཟུང་བའི་ཁ་ཡུག་ཁ་སྐྱོར་ཁ་རག་ཡུལ། ཅི་ཤང་ཅི་ན་གུ་རུབ་ཚོགས་ཅུ་དང༌། ར་སངས་ནག་ཙང་ཤང་གྱེར་བྱང་རྒྱུད་བཅས། ཡུལ་ཁམས་དྲུག་ཅུ་ཁྲི་སྡེ་བརྒྱད་ཅུའི་ཞིང༌། བྱ་རུ་ཐོག་པའི་རྒྱལ་པོ་བཅོ་བརྒྱད་བྱོན། དེ་ཡང་གངས་ཏི་སེའི་མདུན་ཉེ། རི་སྤོས་རི་ངད་ལྡན་གྱི་རྩ་བ། མཚོ་མུ་ལེ་ཁྱུད་ཀྱི་འགྲམ་དུ་ཞང་ཞུང་སྲིད་པའི་རྒྱལ་པོ་ཁྲི་ཝེར་ལ་རྗེ་གུ་ལང་གསེར་གྱི་བྱ་རུ་ཅན་བྱོན། དེས་གངས་ཏི་སེའི་མདུན་ཞོལ་དུ་གསས་ཁང་ནོར་བུ་སྤུངས་རྩིགས་བཞེངས། སངས་རྒྱས་སྟོན་པའི་ཞལ་མཇལ་ཁྲི་རྗེ་ལུང་བསྟན་མདོ་གསུངས། གར་ལྗང་གཡུ་ལོ་རྗོང་མཁར་དུ་བཞུགས། དེང་སྐབས་རྒྱང་གྲགས་དགོན་ཟེར་བའི་ས་གནས་ཀྱི་སྐོར་ཡིན་ཟེར། པུ་མར་ཧྲིང་གི་་་་་ ༼སྤུ་རེངས་༽ ཡུལ་དུ་སྟག་ཆེན་རྔམ་རྫོང་མཁར་ཞེས་བྱ་བར། སྤུངས་རྒྱུང་གྱེར་གྱི་རྒྱལ་པོ་འོད་ཀྱི་བྱ་རུ་ཅན་བཞུགས། ཞང་ཞུང་ཙུ་ནའི་ཡུལ་ཤོད་དུམ་པ་ཚལ་༼དེང་སང་གུང་དུམ་ཟེར་༽དུ་གསེར་གྱི་མཁར་ཞེས་བྱ་བ་དེ་རུ། གུ་ཝེར་ནོར་གྱི་རྒྱལ་པོ་ག་ལྗང་འོད་ཀྱི་བྱ་རུ་ཅན་བཞུགས། ཞང་ཞུང་ཙི་ནའི་ཡུལ་སྤོས་རི་ངད་ལྡན་གྱི་རྩ་བར། གྲོང་ཁྱེར་སྟག་སྣ་གླིང་གི་དབུས་༼དེང་དུས་བོན་རི་སྟག་སྣ་རོང་ཟེར་༽སྟག་སྣ་དབལ་གྱི་རྫོང་མཁར་ཞེས་བྱ་བ་དེ་རུ། ལ་དྭགས་ཀྱི་ཡུལ་དུ་ཡོད་པའི་སྟག་སྣ་ཟེར་བ་འདི་ལ་སྟག་སྣ་གཟི་བརྗིད་རྒྱལ་པོའི་ཕོ་བྲང་ཡོད་པ་ཡིན་ནམ་སྙམ་ཡང་དཔྱད། སྟག་སྣ་གཟི་བརྗིད་རྒྱལ་པོ་ཁྲི་ལྡེམ་ལྕགས་ཀྱི་བྱ་རུ་ཅན་བཞུགས། ཞང་ཞུང་ཁ་ཡུག་གི་ཡུལ་མུ་རྫོང་ཆེན་པོ་ཁྲོ་ཆུ་མཁར་ཞེས་བྱ་བ་དེ་རུ། སད་ཧྲི་གྱེར་གྱི་རྒྱལ་པོ་ཨུཏྤལ་འོད་ཀྱི་བྱ་རུ་ཅན་གྱི་དབང་བསྒྱུར། ཞང་ཞུང་ཁྱུང་ལུང་གི་གྲོང་ཁྱེར་རྒྱལ་བ་མཉེས་ཡུལ་གྱི་ཁབ་ཁྱུང་ཆེན་༼དེང་སྐབས་མཁར་གདོང་ཟེར་༽སྤུངས་པའི་རི་ལ་གཡུང་དྲུང་སེམས་དཔའི་འདུས་སྡེ་ཆགས། ཡུལ་དབུས་སུ་དངུལ་མཁར་དཀར་པོ་ཁྲོ་ཆུའི་རྨེང་རྡོ་ཅན་དེ་རུ། སླ་ཀྲ་གུ་གེའི་རྒྱལ་པོ་རིན་ཆེན་འོད་ཀྱི་བྱ་རུ་ཅན་གྱིས་མངའ་བསྒྱུར། ཞང་ཞུང་རུ་ཐོག་གི་ཡུལ་དུ། རུ་ཐོག་གནམ་རྫོང་མཁར་དུ། མུ་མར་ཐོག་རྒོད་རྒྱལ་པོ་ཨེཎ་འོད་ཀྱི་བྱ་རུ་ཅན།
གཞན་ཡང་དེ་རྣམས་གངས་རིའི་དཀར་ཆག་ལྡེབ་༥༩༩༽ནས་སྲིད་པ་གནམ་ནས་བསྐོས་པའི་ཞང་ཞུང་སྲིད་པའི་རྒྱལ་པོ། ཁྲི་ཝེར་ལ་རྗེ་གུ་ལང་གསེར་གྱི་བྱ་རུ་ཅན་དང༌། ཞང་ཞུང་ཟིལ་གནོན་རྒྱལ་པོ་རླབས་ཆེན་ཁྱུང་གི་བྱ་རུ་ཅན་དང༌། ཧྲི་དོ་གྱེར་སྤུངས་རྒྱལ་པོ་ཀང་ཀ་ཤེལ་གྱི་བྱ་རུ་ཅན་དང་གསུམ་ནི། གངས་རི་ཆེན་པོའི་མདུན་རྒྱང་རི་གཡུ་ལོ་ལྗོངས་པའི་རྫོང་མཁར་དུ་ཆགས་སོ། །
ཁྱུང་ལུང་རྒྱལ་བ་མཉེས་ཡུལ་དུ་སླས་ཀྲ་གུ་གེའི་རྒྱལ་པོ་རིན་ཆེན་འོད་ཀྱི་བྱ་རུ་ཅན་དང༌། རྒྱུང་ཡར་མུ་ཁོད་རྒྱལ་པོ་གཞའ་ཚོན་འོད་ཀྱི་བྱ་རུ་ཅན་དང༌། ཀྱི་ལེ་གུ་གེ་རྒྱལ་པོ་ཨུན་ཆེན་དུང་གི་བྱ་རུ་ཅན་དང་གསུམ་མོ། །ཞང་ཞུང་པུ་མར་༼དེང་སྤུ་ཧྲེང་ཟེར་༽ཧྲེང་གི་ཡུལ་དུ་སྤུངས་རྒྱུང་གྱེར་གྱི་རྒྱལ་པོ་བྱི་རུ་འོད་ཀྱི་བྱ་རུ་ཅན་དང༌། ཉེ་ལོ་ཝེར་ཡ་རྒྱལ་པོ་ཕྲ་མེན་འོད་ཀྱི་བྱ་རུ་ཅན་དང་གཉིས་སོ། །ཞང་ཞུང་ཙི་ཎའི་༼ལ་དྭགས་དང་འདི་གཉིས་བརྟག་དགོས་༽ཡུལ་དུ་སྟག་སྣ་གཟི་བརྗིད་རྒྱལ་པོ་ཟོམ་ཤང་ལྕགས་ཀྱི་བྱ་རུ་ཅན་དང༌། ཛྭ་དམར་ཐིས་སྤུངས་རྒྱལ་པོ་མེ་དཔུང་འོད་ཀྱི་བྱ་རུ་ཅན་དང་གཉིས་སོ། །ཞང་ཞུང་ཏ་རོག་ཡུལ་དུ་བདུད་འདུལ་དབལ་གྱི་རྒྱལ་པོ་ཉི་ཤེལ་འོད་ཀྱི་བྱ་རུ་ཅན་དང༌། ལི་ཝེར་གྱེར་གྱི་རྒྱལ་པོ་ཟླ་ཤེལ་འོད་ཀྱི་བྱ་རུ་ཅན་དང་གཉིས་སོ། །ཞང་ཞུང་སྟ་སྒོའི་ཡུལ་དུ་ཤེལ་རྒྱུང་ཧྲི་དོ་རྒྱལ་པོ་ཛོ་དམར་འོད་ཀྱི་བྱ་རུ་ཅན་དང། ལིག་མུར་ནམ་མཁའི་རྒྱལ་པོ་བཱཻཌཱུརྻ་འོད་ཀྱི་བྱ་རུ་ཅན་དང་གཉིས་སོ། །ཞང་ཞུང་ཁ་སྐྱོར་ཡུལ་དུ་མུ་ཝེར་ནོར་གྱི་རྒྱལ་པོ་ག་ལྗང་འོད་ཀྱི་བྱ་རུ་ཅན་དང༌། ཞང་ཞུང་ཁ་ཡུག་ཡུལ་དུ་སད་ཧྲི་གྱེར་གྱི་རྒྱལ་པོ་ཨུཏྤལ་འོད་ཀྱི་བྱ་རུ་ཅན་དང༌། ཞང་ཞུང་ལ་དྭགས་ཡུལ་དུ་ཉེ་ལོ་ཝེར་ཡ་རྒྱལ་པོ་གནམ་ལྕགས་དབལ་གྱི་བྱ་རུ་ཅན་དང༌། ཞང་ཞུང་རུ་ཐོག་ཡུལ་དུ་མུ་མར་ཐོག་རྒོད་རྒྱལ་པོ་ཨེཎྚ་འོད་ཀྱི་བྱ་རུ་ཅན་སོགས། ཞང་ཞུང་གི་རྒྱལ་པོ་བྱ་རུ་ཅན་བཅོ་བརྒྱད་འདི་རྣམས་ཀྱི་རིང་ལ་ཞང་ཞུང་ཁྲི་སྡེ་བཅོ་བརྒྱད་ལ་སོགས་ཡུལ་ཆེན་བཅོ་བརྒྱད་ཀྱི་མགོ་བོ་ནོན་པ་དང༌། གཡུང་དྲུང་བོན་གྱི་བསྟན་པ་ཕྱོགས་བཅུར་རྒྱས་ཤིང༌། དེ་རྣམས་སྐུ་ཚེ་ཡང་མི་ལོ་སྟོང་ཕྲག་བར་དུ་བཞུགས་པ་དང༌། ཕུང་པོ་ལྷག་མེད་དུ་སངས་རྒྱས་པ་ཡང་ཡོད་པའོ། །ཞེས་སོ། །འདི་རྣམས་ཀྱིས་བླ་ན་བཀུར་བའི་བོན་གཤེན་གཡུང་དྲུང་སེམས་དཔའ་འདུས་པའི་སྡེ་ཡང་གྲངས་མང་དུ་འཕེལ་བའི་ཚུལ་བཤད་དོ། །
འདིར་བཤད་བྱ་རུ་ཞེས་པའི་གོ་གནས་ཀྱི་ཐོབ་ཐང་ལ་བྱུང་བའི་རྟགས་ཏེ་བྱ་ཁྱུང་གི་རྭ་ཡི་དབྱིབས་ལྟ་བུ་དབུ་རྒྱན་བཟོ་བའི་སྲོལ་འདུག་ཅིང༌། གཞན་ཡང་མི་ཡི་རྒྱལ་པོ་རྣམས་ཀྱི་ཆེ་རྟགས་ཙམ་དུ་མ་ཟད་མཆོད་པའི་ཞིང་དང་བཀུར་པའི་གནས་ལ་ཡང་རྒྱན་སྲོལ་ཡོད་དོ། །མཆོད་རྟེན་གྱི་རྩེ་ལ་བྱ་རུ་ཁྱུང་རུས་བརྒྱན་པ་དང༌། ཡི་དམ་ཁྲོ་བོའི་འཁོར་འགའ་ལ་ཡང་དབུ་ལ་གནམ་ལྕགས་བྱ་རུ་ཁྱུང་རུ་འཁྲུངས་ཞེས་དང༌། རྣམ་དག་སྒྲུབ་པ་ལྡེབ་༣༡༢༽བྱ་རུ་ཐོབ་པའི་གཤེན་བརྒྱད་དེ། འགྱུར་མེད་གསེར་གྱི་བྱ་རུ་ཅན་ཞེས་སོགས་བརྒྱད་བཤད་དོ། །བྱ་ཡི་སྤྱི་རྗེ་ཁྱུང་ཡིན་པར་བཤད་ཅིང༌། དེ་ཡི་མགོའི་གཡས་གཡོན་དུ་རྭ་ཡི་རྣམ་པ་ཅན་ཕྲ་སྦོམ་དང་རིང་ཐུང་གི་ཚད་དབྱིབས་སོགས་གསལ་བར་བཤད་པ་དཀའ་ཡང་བློ་ཡིས་རགས་ཙམ་དཔྱད་ཚེ་བྱ་རྒྱལ་ཁྱུང་གི་རུ་ལ་བྱ་རུ་ཞེས་དང༌། བྱ་ཁྱུང་གི་རུ་དབྱིབས་མཚུངས་པས་ཁྱུང་རུ་ཞེས་བརྗོད་པའི་ཕྱིར། ཞང་ཞུང་ཞེས་པའི་མིང་འདི་ཡང༌། ཞང་ཞུང་གི་སྐད་དུ་ཁྱུང་ལ་ཞུང་ཞེས་བརྗོད་ཅིང༌། དེ་བོད་སྐད་དུ་བསྒྱུར་ན་ཁྱུང་ཞེས་འབྱུང་བས་ཁྱུང་གི་ལུང་པའམ། ཁྱུང་པོའི་ལུང་པ་ཞེས་བརྗོད་པ་ཡིན་པར་བཤད། ཡུལ་དེའི་སྐད་ནི། སྨར་གྱི་སྐད་དང༌། དར་མའི་སྐད། དིར་མའི་སྐད་དང༌། དར་མ་དིར་གྱི་སྒྲ། གུ་གེའི་སྐད་དང༌། ཕལ་པོ་གླང་གི་སྐད་བཅས་དང༌། སྨར་ནི་སྒོ་པ་སྤྱི་ཡི་མཆོག་སྐད་ཡིན། གུ་གེའི་སྒྲ་ནི་ཡི་གེའི་སྐད་ཞེས་པའི་དོན་ཡིན་ལ། དར་མ་ལྷོ་སྐད། དིར་མ་བྱང་རྒྱུད་སྐད། དར་མ་དིར་ནི་སྟོད་སྨད་ཕལ་སྤྱིའི་སྐད། ཡི་གེ་སྨར་ཡིག་ཆེ་ཆུང་ལས་སོགས་ཡིན།
གཞན་ཡང་ཞང་ཞུང་དྲག་ཡིག་ཅེས་པའང་ཡོད་པའི་དཔེ་རིས་ཀྱི་རྒྱུན་ཡོད་པ་ནི། སྔར་ཞང་ཞུང་སད་ནེ་ག་འུས་བོད་རྒྱལ་གྲི་གུམ་གྱི་དུས་སུ་རྟ་ནག་དུང་ཕོར་དུ་བོན་གཏེར་དུ་སྦས་དུས་ཞང་ཞུང་གི་དྲག་ཡིག་དང་བོད་ཡིག་འདྲེས་མར་དར་གྱི་ཐོག་ཏུ་བྲིས་པ་ཕྱིས་ཉིད་ཀྱི་སྤྲུལ་སྐུ་གུ་རུ་རྣོན་རྩེས་གཏེར་ཐོན་པ་དེ་ཁོང་གི་གཏེར་སློབ་གཉལ་སྟོན་གཞོན་ནུ་འབུམ་གྱིས་གཏེར་དཔེའི་ཐོག་ནས་དཔེ་བཤུས་པ་ཡིན་ཏེ། མ་རྒྱུད་སངས་རྒྱས་རྒྱུད་གསུམ་གྱི་འགྲེལ་བ་གཏེར་མ་ལས། སྤྲུལ་སྐུ་གུ་རུ་རིན་པོ་ཆེ་ལ་བདག་བཙུན་པ་གཞོན་གྱིས་ཞུས་ནས་དར་དཀར་དངོས་ལ་བྲིས། མ་དཔེ་ལ་ཞང་ཞུང་གི་དྲག་ཡིག་འདི་འདྲ་དང༌། བོད་ཡིག་འདྲེས་མར་སྣང་ངོ༌། །ཞེས་དང༌། འགྲེེལ་གྱི་དབུ་འཆད་ལས། ཞང་བོད་འདྲེས་མ་ལ་བོད་ཡིག་མང་བར་འདུག ཞང་ཡིག་ཀྱང་ཀ་ཁ་སྣང་བ་ལ་ལེགས་པར་བརྟགས་པས་མི་ཁྲོལ་བ་མ་བྱུང༌། ཞེས་གསུངས། ཞང་ཞུང་གི་དྲག་ཡིག་འདི་གཏེར་དཔེ་དར་དཀར་གྱི་ངོས་ལས་གཞོན་གྱིས་བཤུས་པའི་དཔེ་དེ་ཉིད་ལས། བླ་མ་གཡུང་དྲུང་སྙིང་པོས་བྲིས་པ་འདི་ལྟར།
ཚུལ་འདི་རྣམས་ཀྱིས་ཞང་ཞུང་གི་ཡི་གེའི་ཚུལ་རྣམས་གསལ་ཤེས་ཐུབ་པར་མངོན། གཞན་ཡང་ཞང་ཞུང་ལིག་མིན་རྐྱའི་ཕྱག་ཐམ་སྨན་རིའི་བླ་བྲང་གི་རྩིས་སྤྲད་དུ་ཡོད་པ་འདིའི་ངོས་སུ་ཡང་ཞང་ཞུང་གི་ཡི་གེ་གསལ་བར་འདུག་ཅིང༌། དེ་ཡང་འདི་ལྟར།
“ཁ་ཚན་པ་ཤང་ལིག་ཞི་ར་ཙ། ཐམས་ཅད་དབང་བསྒྱུར་སྲིད་པའི་རྒྱལ་པོ།”
ཞང་ཞུང་གི་རྒྱལ་ས་གྲགས་ཆེ་བ་དབུས་ཕྱོགས་སུ་མཁར་བཞི་དང༌། ཕྱོགས་ཀྱི་རྫོང་བཞིའོ། །མཁར་བཞི་ནི། ཁྱུང་ལུང་དངུལ་མཁར། སྤུ་ཧྲིང་སྟག་ལ་མཁར། སྨེ་ཤང་བྱི་བ་མཁར། མ་པང་སྤོས་མོ་མཁར། གཞན་ཡང་གད་ཀྱི་བྱི་བ་མཁར་ནི། སྐྱབས་སྟོན་གྱི་ཁྲོ་འགྲེལ་ལྡེབ་༥༩༽མཁར་ལྔའི་ནང་ཚན་གད་ཀྱི་བྱི་བ་མཁར་ཟེར་བ་གཡག་དང་རྐྱང་གི་ཐོད་པ་བ་གམ་དུ་བཏགས་པ་དེ་རུ་རིག་འཛིན་ཀུན་འཚོགས་ཏེ་ཞེས་དང༌། ཁ་ཡུག་འདམ་མཁར། གུ་གེ་རྩ་ཧྲེང་མཁར། བྱང་གི་ར་བཞི་མཁར། དེ་སོགས་མཁར་གཞན་ཡང་མང་དུ་ཡོད་པར་བཤད། ཕྱོགས་ཀྱི་རྫོང་བཞི་ནི། དྭང་ར་ཁྱུང་ཆེན་རྫོང༌། སེ་རིབ་འབྲུག་མོ་རྫོང༌། རུ་ཐོག་སེང་གེ་རྫོང༌། མང་ཡུལ་སྟག་མོ་རྫོང༌། གཞན་ཡང་སྦིལ་ཏི་ཧྲང་རྫོང་སོགས་མང་ཞིག་ཡོད་སྐད་དོ། །
གནའ་བོའི་གནས་ཡུལ་ཁང་རྫས་མི་རིགས་སོགས་རིམ་བཞིན་འགྱུར་ནས་སྔར་སྲོལ་ཇེ་ཉམས་སུ་གྱུར་པས་ད་ལྟ་ཞང་ཞུང་གི་ཡུལ་དང་སྐད་ཡིག་མི་རིགས་བཅས་འདིར་ཡོད་འདི་ཡིན་ཞེས་སྨྲ་མི་ཤེས་པ་ལྟ་བུར་གྱུར་བཞག འོན་ཀྱང་ད་ལྟའི་སྐབས་སུ་སྟོད་ཕྱོགས་ཀྱི་ས་གནས་ཀྱི་རི་ལུང་པ་ཆུ་སོགས་ཀྱི་མིང་སྔར་བཞིན་བསྡད་པ་དཔེར་ན། རྒྱུང་དགུ་དང༌། དྭ་རོག དྭང་ར། སྟ་སྒོ། མ་མིག རུ་ཐོག ཏི་ཙེ། གུ་གེ ཁ་རྩེ། རི་ཏི། ཟ་ལང༌། མ་པང༌། ཏིང་རྩེ། ཡི་ཏི། ཏི་འོབ། སུ་སྨུར་སོགས་མང་པོ་ཡོད་ཅིང༌། སྦིལ་ཏི། ཁུ་ནུ་སོགས་མཐའ་མཚམས་སུ་ཞང་ཞུང་གི་ཡུལ་སྐད་མ་བཅོས་པ་ཡི་ནང་དུ་ཞིབ་ཏུ་བརྟགས་ན་ཞང་སྐད་མང་པོ་འདྲེས་པ་ཤེས་པར་ནུས་སོ། །དེ་ནི་སྔར་གྱི་གོམས་གཤིས་རྙིང་པའི་འཕྲོ་ཡིན་ནོ། །བོད་རྒྱལ་རྒྱུད་པ་འཁྱལ་བས་སྟོད་ཞང་ཞུང༌། ལ་དྭགས་ཀྱི་ས་གནས་བཟུང་ཕྱིན་ཡུལ་གྱི་མིང་ཡང་མངའ་རིས་སྐོར་གསུམ་དུ་ཆགས་སོ། །
༼འབེལ་གཏམ་ལུང་གི་སྙིང་པོ་ལས་ཟུར་དུ་ཕྱུང་།༽
