སྟོན་པའི་འཁྲུངས་མཆོད་ཆེན་མོ།
རྩོམ་པ་པོ། གངས་སེང་།
༄༅། །ཧོར་ཟླ་བཅུ་གཉིས་པ་འདི་བདག་ཅག་གི་སྟོན་པ་རྣམ་མཁྱེན་ཡང་དག་པ་རྫོགས་པའི་སངས་རྒྱས་གཤེན་རབ་མི་བོ་ཀུན་ལས་རྣམ་པར་རྒྱལ་བ་དེ་ཉིད་ཀྱི་སྐུ་ཡི་འཁྲུངས་ཟླ་དང་། དེའི་ཚེས་བཅོ་ལྔ་ནམ་ལངས་ཡོས་ཀྱི་དུས་སུ་སྐུ་དངོས་སུ་བལྟམས་པའི་དུས་ཚིགས་ཁྱད་པར་འཕགས་པའི་ཉིན་དེ་མགོ་ཚུགས་པ་ཡིན། དེའི་ཚུལ་ནི། ཀུན་མཁྱེན་ཉི་མ་བསྟན་འཛིན་གྱིས་མཛད་པའི་བསྟན་རྩིས་ཀྱི་རྣམ་བཤད་མཐོང་བའི་དགའ་སྟོན་ནམ་དྭོགས་བསལ་པན་ཙ་ལི་ཀའི་ཆུན་པོ་ལས། ལོ་ཡི་རྒྱལ་པོ་ཤིང་ཕོ་བྱི་བ། ཟླ་བའི་དང་པོ་དཔྱིད་ཟླ་ར་བ། མེ་སྟག་གི་ཟླ་བ། ཞག་གི་སྙིང་པོ་ཚེས་བཅོ་ལྔ། དུས་ཚོད་ཀྱི་དང་པོ་ནམ་ལངས་པ་དང་། སྐར་མའི་དམ་པ་རྒྱལ་གྱི་རུ་གོང་ལ་སྐུ་བལྟམས་པ་ཡན་ཆད། མདོ་རྒྱུད་མཐའ་དག་གི་དགོངས་པ་གཅིག་ཏུ་འདུས་པ་ཡིན་པས་སོམ་ཉི་དང་བྲལ་བ་ཡིན་ནོ། །ཞེས་དང་། ཡང་ཁོང་གིས་མཛད་པའི་སངས་རྒྱས་ཀྱི་བསྟན་རྩིས་ངོ་མཚར་ནོར་བུའི་ཕྲེང་བ་ལས། ལོ་རྒྱལ་ཤིང་ཕོ་བྱི་བ་ཡི། དཔྱིད་ར་མེ་སྟག་ཟླ་ཚེས་༡༥ཀྱི། རྒྱལ་ཕུར་འཛོམས་པའི་ནམ་ལངས་ལ། འགྲོ་བ་རང་མཐུན་ཆ་ལུགས་སུ། མངོན་པར་བལྟམས་པ་ཕྱིན་གྱི་ལོ། ཞེས་དང་། མཁས་གྲུབ་ལུང་རྟོགས་རྒྱ་མཚོས་མཛད་པའི་བསྟན་འབྱུང་ཀེ་ཏ་ཀའི་དོ་ཤལ་ལས། དེ་ནས་ལོ་ཡི་རྒྱལ་པོ་ཤིང་ཕོ་བྱི་བ་ལ་དགོངས། ཟླ་བའི་རྒྱལ་པོ་དཔྱིད་ར་སྟག སྐར་མའི་དང་པོ་རྒྱལ། ཞག་གི་སྙིང་པོ་བཅོ་ལྔ། དུས་ཚོད་ཀྱི་དང་པོ་ནམ་ལངས་ལ་དགོངས་ཏེ། ཞེས་གསུངས་པས་མཁས་གྲུབ་རྣམ་གཉིས་ཀྱིས་སྟོན་པ་སྐུ་འཁྲུངས་པའི་དུས་གཟེར་འགྱུར་བ་མེད་པའི་གནད་ནི། ལོ་ཤིང་ཕོ་བྱི་བ་དང་། ཟླ་བ་དཔྱིད་ར་སྟག། ཞག་གི་སྙིང་པོ་ཚེས་བཅོ་ལྔ། རེས་གཟའ་ཕུར་བུ། སྐར་མ་རྒྱལ་ལ་བཞེད་པ་དེ་ཡིན། དེ་ནི་འགྱུར་བ་མེད་པའི་དུས་གཟེར་ཞིག་ཡིན་པའི་རྒྱུ་མཚན་ནི། ལོ་གཅིག་ནང་ཟླ་བ་བཅུ་གཉིས་ཡོད་པའི་ནང་ནས་ཚེས་བཅོ་ལྔ་ལ་སྐར་མ་རྒྱལ་དང་རེས་གཟའ་ཕུར་བུ་འཛོམས་པའི་དུས་ཚོད་ནི། བོན་པོ་རང་གི་ལུགས་ཐུན་མོང་མ་ཡིན་པའི་འབྱུང་རྩིས་ལ་གཞིར་བཞག་བྱས་པ་ཡིན་ན། ཧོར་ཟླ་བཅུ་གཉིས་པའི་ཚེས་བཅོ་ལྔ་མ་གཏོགས་ཟླ་བ་གཞན་གྱི་ཚེས་བཅོ་ལྔ་ལ་དེ་འདྲ་འབྱུང་བ་མི་སྲིད་པའི་གནད་དེ་ཡིན། དེས་ན་ཧོར་ཟླ་བཅུ་གཉིས་པ་དེ་རྒྱལ་ཟླ་བ་དང་། དེའི་ཚེས་བཅོ་ལྔ་དེ་སྟོན་པ་སངས་རྒྱས་གཤེན་རབ་མི་བོ་སྐུ་འཁྲུངས་པའི་དུས་ཚིགས་ཁྱད་པར་ཅན་ངོས་བཟུང་དགོས་པ་ཀུན་མཁྱེན་དང་མཁས་གྲུབ་རྣམ་གཉིས་ཀྱི་དགོངས་པ་ཕྱིན་ཅི་མ་ལོག་པ་ཡིན་འདུག་གོ།
འོ་ན་ཀུན་མཁྱེན་ཉི་མ་དང་མཁས་གྲུབ་ལུང་རྟོགས་རྒྱ་མཚོ་གཉིས་ཀྱིས་དེ་ལྟར་གསུངས་པ་དེ་ལུང་གང་ལ་གཞི་བཅོལ་ཡོད་ཅེ་ན། དེ་ནི་བླ་ཆེན་དྲན་པ་ནམ་མཁས་མཛད་པའི་དྲང་དོན་མུན་སེལ་སྒྲོན་མ་དང་མཛད་མདོ་འབྲིང་པོ་གཟེར་མིག་གཉིས་ལ་གཞི་བཅོལ་ཡོད། དེའི་ཚུལ་ནི། དྲང་དོན་མུན་སེལ་སྒྲོན་མའི་གཤེན་རབ་མཛད་པ་མཐར་ཕྱུང་གི་གཟེར་བུ་ལས། དེ་ཡང་ལོ་ཡི་དང་པོ་བྱི་བ། ཟླ་བའི་དང་པོ་དཔྱིད་ཟླ་ར་བ། ཞག་གི་དང་པོ་ཚེས་བཅོ་ལྔ། སྐར་མའི་དང་པོ་རྒྱལ་གྱི་རུ་གོང་། དུས་ཚོད་ཀྱི་དང་པོ་ནམ་ལངས་ལ་སྐྱེ་བ་བཞེས་པ་སྟེ། ཞེས་དང་། གཟེར་མིག་ལས། གཤེགས་པའི་དུས་ཚོད་ཀྱང་འདི་ལགས་ཏེ། ལོའི་འགོ་བོ་བྱི་བ་ལ་དགོངས་ནས་གཤེགས་པ་ནི། འཇིག་རྟེན་གྱི་ཁམས་སུ་མཛད་པ་བཅུ་གཉིས་ཀྱི་དོན་མཐར་ཕྱིན་པས། ནན་ཏན་གྱིས་སེམས་ཅན་འདུལ་ཞིང༌། ཞིབ་ཏིག་གིས་བསྟན་པ་སྤེལ་བ་ལགས་སོ། །ཟླ་བའི་འགོ་བོ་དཔྱིད་ཟླ་ར་བ་ལ་དགོངས་ནས་གཤེགས་པ་ནི། ཟླ་བ་བཅུ་གཉིས་ཀྱི་འགོ་དཔྱིད་ཟླ་ར་བ་ལ་དགོངས་ནས་བྱོན་པ་ལགས་སོ། །ཞག་གི་སྙིང་པོ་ཚེས་བཅོ་ལྔ་ལ་གཤེགས་པ་ནི། སྔོན་གྱི་སྟོན་པ་རྣམས་གཤེགས་པའི་དུས་ཁྱད་པར་ཅན་གྱི་རྗེས་དང༌། ཟླ་གསང་ཐིག་ལེའི་དངོས་གྲུབ་ནོད་པས་གཤེགས་པའོ། །སྐར་མའི་དམ་པ་རྒྱལ་གྱི་རུ་གོང་དུ་གཤེགས་པ་ནི། བདུད་ལྔ་དབང་དུ་བསྡུས་ཏེ་རྒྱལ་བ་དང༌། འཇིག་རྟེན་ཟིལ་གྱིས་གནོན་ཏེ་རྒྱལ་བའི་ཕྱིར་རོ། །ཞེས་གསུངས་པས་ལོ་ཟླ་ཞག་དེ་དག་ལ་བྱོན་པའི་དགོས་པ་དང་། ལྷག་པར་སྐར་མ་རྒྱལ་ལ་སངས་རྒྱས་སྐུ་འཁྲུངས་དགོས་པའི་རྒྱུ་མཚན་དང་བཅས་པ་ཞིབ་ཕྲར་བཤད་དོ། །
རྒྱལ་ཟླ་དཔྱིད་ར་བ་ཡིན་པའི་ཚུལ་ནི། གཟེར་མིག་དེ་ཉིད་ལས། མུ་ཁྱུད་བདལ་པའི་མཚོ་འགྲམ་དུ། གཞི་བཙལ་གནས་ཀྱི་ཕོ་བྲང་ནི། དཔྱིད་ཟླ་ར་བའི་བཅུ་བཞི་ལ། སྐར་མ་དབང་བསྒྱུར་ལག་དུས་སུ། །ས་བཟུང་ཀུན་ཀ་དེ་རུ་འཚོགས། །དེ་ལ་ཀོང་ཙེས་ལན་གསོལ་པ། །གཏོ་བུ་འབུམ་སངས་མཁས་པའི་མཆོག །ཤིན་ཏུ་རྩུབ་པའི་བཤའ་ལག་ལ། །ཞི་རྒྱས་མཆོད་པ་ཅང་རུང་ངམ། །དྲག་པོས་སྲིན་པོ་བསྒྲལ་བའི་དུས་ལགས་ན། །གཏོ་བུའི་ཐུགས་ལ་འཁྲུལ་བ་ཅང་སྲིད་དམ། དེ་སྐད་ཅེས་ཀོང་ཙེས་གསོལ་པས། དེ་ལ་ཡང་གཏོ་བུས་གསུངས་པ། རྒྱུ་སྐར་ཉི་ཤུ་རྩ་བརྒྱད་ལ། དབང་སྒྱུར་ལག་འདི་བསྔགས་པ་ཡིན། བཟང་ཡང་དབང་སྒྱུར་ལག་གིས་བཅོས་ཏེ། ཡང་ཡང་མང་པོ་བཤའ་བ་ཡིན་ཏེ་ཟློས། ངན་ཀྱང་དབང་བསྒྱུར་ལག་གིས་བཅོས་ཏེ། ཡང་ཡང་མང་པོར་བཤའ་བ་ཡིན་ཏེ་ཟློས། དེ་ཕྱིར་ལག་འདི་བཟང་ལ་ཡང་ཡང་ཟློས་ཏེ་འོང་བས་བསྔགས་པ་ཡིན། དེ་སྐད་ཅེས་གཏོ་བུས་གསུངས་པས་ཀུན་ཀྱང་རྟོག་པ་ཚིམས། དེ་རིང་བཅུ་བཞིའི་གདུགས་ལ་གཞི་བཟུང་ཡོ་བྱད་གསོག ནངས་པར་བཅོ་ལྔ་རྒྱལ་ལ་མཆོད་སྦྱིན་རྒྱས་པར་འབུལ་བར་གཅད། ཅེས་གསུངས་པས་དཔྱིད་ར་བའི་ཚེས་བཅུ་བཞི་ལ་སྐར་མ་ལག་དང་། དེའི་ཕྱི་ཉིན་ཚེས་བཅོ་ལྔ་ལ་སྐར་མ་རྒྱལ་འབྱུང་བའི་དུས་ནི་ཧོར་ཟླ་བཅུ་གཉིས་པ་དེ་ཡིན་པས་ཟླ་བ་དེ་དཔྱིད་ར་ཡིན་པར་གསལ་པོར་གསུངས། རྟ་པ་ཟླ་བའི་ཚེས་བཅུ་བཞི་ལ་སྐར་མ་ལག་དང་དེའི་ཕྱི་ཉིན་བཅོ་ལྔ་ལ་སྐར་མ་རྒྱལ་མི་ཁེལ་བ་འབྱུང་རྩིས་ལ་གོ་བ་ཡོད་ན་དེས་ཆོག་པས་མང་དུ་བཤད་མི་དགོས་སོ། །
དེས་ན་ཧོར་ཟླ་བཅུ་གཉིས་པ་འདི་རང་ལུགས་འཁྲུལ་མེད་དཔྱིད་ཟླ་ར་བ་ངོས་འཛིན་དགོས་པ་མདོ་གཟེར་མིག་གིས་ཁ་གསལ་གོ་བདེ་བྱས་ནས་གསུངས་འདུག་པས་གཡུང་དྲུང་བོན་ལུགས་འཛིན་པ་ཀུན་གྱིས་ལུང་འདི་དང་འདི་འདྲ་ལ་ཡིད་རྟོན་བྱས་ནས་རྒྱལ་ཟླ་བའི་ཚེས་བཅོ་ལྔ་ལ་སྟོན་པའི་འཁྲུངས་མཆོད་ཆེན་མོ་ངོས་འཛིན་གནང་ཐུབ་ན་ཁུངས་ལུང་ཡོད་པ་ཞིག་དང་སྐལ་པ་བཟང་པོ་རེད་སྙམ། དེ་མིན་སྔར་སྲོལ་ཡིན་ཞེས་བཤད་ནས་རྒྱུ་མཚན་མེད་བཞིན་དུ་རྟ་ཟླ་ལ་སངས་རྒྱས་འཁྲུངས་ཞེས་ཨུ་ཚུགས་བྱེད་པ་འདི་ནི་སངས་རྒྱས་ཀྱི་བཀའ་སྣང་མེད་དུ་གཡུགས་ནས་ཡུལ་ལུགས་ལ་མཁྲེགས་འཛིན་བྱེད་པ་ཙམ་ལས་གཞན་པའི་རྒྱུ་མཚན་གང་ཡང་མ་མཐོང་ངོ་།། །།
