བླ་མེད་རྫོགས་པ་ཆེན་པོའི་སློབ་དཔོན་ནམ་མཁའི་ནོར་བུའི་ཞབས་བརྟན་མར་ཞི་ལྷུན་པོའི་དཔལ་ཞེས་བྱ་བ་བཞུགས།
མཆོག་གསུམ་རིགས་བརྒྱའི་ཁྱབ་བདག་དཔལ་གདོད་མའི་མགོན་པོ་དང་དབྱེར་མེད་པ་ལ་ཕྱག་འཚལ་ལོ། །
ཨེ་མ་ཧོ། ཀ་དག་ཡེ་གཞིའི་སངས་རྒྱས་ལྷ་ཡི་ལམ། །རང་གསལ་རིག་པའི་རྟ་བདུན་དཀྱིལ་འཁོར་རྒྱས། །གཉིས་མེད་རོལ་པའི་འོད་ཟེར་ཡོངས་སུ་འཕྲོས། །ཡེ་གྲོལ་སྐུ་གསུམ་བླ་མར་གསོལ་བ་འདེབས། །རང་གྲོལ་ལྟ་བའི་ལྗོན་བཟང་རྒྱས་པའི་རྩེར། །འགག་མེད་སྒོམ་པའི་འདབ་མ་ཡོངས་སུ་རྒྱས། །སྤང་རྟོགས་འབྲས་བུའི་མེ་ཏོག་ཅི་ཡང་བཞད། །རྣལ་འབྱོར་ལམ་གྱི་སྟོན་པར་གསོལ་བ་འདེབས། །དག་པ་གཉིས་ལྡན་ཁྱབ་བདག་ཀུན་ཏུ་བཟང་། །ལྷུན་གྲུབ་ངེས་པ་ལྔ་ལྡན་ལོངས་སྤྱོད་རྫོགས། །འགྲོ་མགོན་ཕན་བདེའི་དཔལ་དུ་ཅིར་ཡང་སྤྲུལ། །སྐུ་གསུམ་ངོ་བོ་བླ་མར་གསོལ་བ་འདེབས། །ཡེ་གྲོལ་ཀུན་གཞི་རྒྱ་མཚོ་འཁྱིལ་བའི་ཀློང་། །རང་གྲོལ་རིག་པའི་རླབས་ཕྲེང་ཕྱོགས་བཅུར་གཡོ། །མཐའ་གྲོལ་སྟོང་པའི་སྣང་བ་ཅི་ཡང་གསལ། །ཁྲེག་ཆོད་དགོངས་པ་རྫོགས་ལ་གསོལ་བ་འདེབས། །
མིག་མཚོའི་ཐབས་ཀྱིས་བསྐྲུན་པའི་གཤིས་དབྱིངས་སུ། །སྣ་ཚོགས་བཀོད་པའི་ཆོ་འཕྲུལ་བསམ་མཐའ་ཡས། །སྣང་སྲིིད་ཡེ་ཤེས་དབྱིངས་སུ་མཉམ་པར་གཟིགས། །འོད་གསལ་མཐར་རྫོགས་བླ་མར་གསོལ་བ་འདེབས། །མགོན་པོ་ཁྱེད་ཀྱི་མཁྱེན་བརྩེའི་འོད་ཞགས་ཀྱིས། །འགྲོ་ཀུན་ཐར་པའི་ལམ་བཟང་གསལ་བར་མཛད། །ཕན་དང་བདེ་བ་རྒྱ་མཚོའི་སྒོ་བརྒྱ་ཕྱེས། །རྫོགས་ཆེན་རྣལ་འབྱོར་དམ་པར་གསོལ་བ་འདེབས། །མཆོག་གསུམ་བདེན་དང་བདག་ཅག་གསོལ་འདེབས་མཐུས། །དམ་པ་ཁྱེད་ཀྱི་གསང་གསུམ་འགྲོ་མགོན་དུ། །སྲིད་མཐའི་བར་དུ་འགྱུར་མེད་བརྟན་པ་དང་། །འཕྲིན་ལས་མཐའ་རུ་ཕྱིན་པའི་བཀྲ་ཤིས་ཤོག །
ཅེས་མོས་འདུན་དང་བཅས་ཏེ་སྨན་རི་བ་བསྟན་འཛིན་རྣམ་དག་གིས་༡༩༩༧ལོར་ཕུལ།། །།
