མཚན་ལྡན་བླ་མའི་མཆོད་ཐབས་ནོར་བུའི་ཕྲེང་བ།
མཚན་ལྡན་བླ་མའི་མཆོད་ཐབས་ནོར་བུའི་ཕྲེང་བ་ཞེས་བྱ་བ་བཞུགས་སོ། །
༄༅། །ཨེ་མ་ཧོ། རྣམ་དག་འགྱུར་མེད་སྤྲུལ་པའི་ཞིང་ཁམས་སུ། དུས་གསུམ་སངས་རྒྱས་ངོ་བོ་བླ་མ་རྗེ། འགྲོ་དྲུག་འཁོར་བའི་ཆུ་ལས་བསྒྲལ་བའི་ཕྱིར། བླ་མེད་ཕོ་བྲང་གཞལ་ཡས་གནས་གསུམ་དུ། སྐྱོན་བྲལ་པདྨ་གསལ་འཚེར་ཉི་ཟླའི་གདན། གཅན་ལྔ་རིན་ཆེན་ཁྲི་ལ་བཞུགས་སུ་གསོལ། ཨ་ཨཱོྃ་ཧཱུཾ། ཅི་པར་རཏྣ་ཐ་ཚན་ར་ཡོ་ཛ། ཨེ་མ་ཧོ། རྒྱལ་བ་ཀུན་འདུས་དཔོན་གསས་བླ་མ་ལ། སྒྲུབ་གཤེན་གཙོར་བྱས་མཁའ་མཉམ་སེམས་ཅན་གྱིས། ལུས་ཕྱག་ཡན་ལག་ལྔ་ལྡན་ཕྱག་འཚལ་ལོ། ངག་ཕྱག་སྤྲོ་དགའི་དབྱངས་ཀྱིས་ཕྱག་འཚལ་ལོ། ཡིད་ཕྱག་རྩེ་གཅིག་མོས་འདུན་ཕྱག་འཚལ་ལོ། སྒོ་གསུམ་ལས་ངན་སྡིག་སྒྲིབ་བྱང་གྱུར་ཅིག ཨ་ཨཱོྃ་ཧཱུཾ། ཅི་པར་རཏྣ་རྐོ་ཕུང་ཨག་ཤོ་ཁྲི་རྩེ་གུ་དུན་ཧྲུན། ཨེ་མ་ཧོ། ཡུལ་མཆོག་གཙོ་བོ་བླ་མའི་སྤྱན་སྔ་རུ། བདག་ནི་ཐོག་མར་འཁྲུལ་ནས་ད་ལྟའི་བར། སྡིག་བཅུ་ལ་སོགས་མི་དགེ་གྱུར་ཚད་བཤགས། སྡོམ་གསུམ་འགལ་སྲིད་ཁས་བླངས་ཉམས་པ་བཤགས། སེམས་ཉིད་མ་རྟོགས་གཟུ་ལུམ་གྱུར་ཚད་བཤགས། བྱང་དག་ཚངས་པའི་མཆོག་གི་དངོས་གྲུབ་སྩོལ། ཨ་ཨཱོྃ་ཧཱུཾ། ཅི་པར་རཏྣ་རྐོ་ཕུང་ཨག་ཤོ་ཁྲི་རྩེ་ཨུ་དུག་ཀྴ་ཡ་ནི་སྭཧཱ། ཨེ་མ་ཧོ། མཚན་ལྡན་བླ་མ་མཉམ་མེད་ཆེན་པོ་ལ། བླ་མེད་མཆོད་པ་ཕྱི་ནང་གསང་གསུམ་འབུལ། ཕྱི་རུ་སྣོད་བཅུད་མཆོད་ཡོན་ཇི་སྙེད་པ། ཇི་སྙེད་རང་གི་ལུས་སྲོག་རྒྱན་ལ་སོགས། དེ་ཡང་ཆགས་མེད་བློ་ཡིས་ལིངས་ཀྱིས་འབུལ། ནང་དུ་རང་གི་འབྱུང་དུག་ཕུང་པོ་ལ། རྟོག་ཚོགས་གཟུང་འཛིན་འཁྲུལ་པ་ཅི་ཤར་ཡང༌། དེ་ཡང་རང་གྲོལ་ཀློང་དུ་ཁྲོལ་གྱིས་འབུལ། སྐྱེ་མེད་སྙིང་པོ་སེམས་ཀྱི་རང་མདངས་ལ། འགག་མེད་སྐུ་དང་ཡེ་ཤེས་ཅི་ཤར་ཡང༌། དེ་ཡང་ཁྱབ་བདལ་ཀློང་དུ་ཕྱམ་གྱིས་འབུལ། ཨ་ཨཱོྃ་ཧཱུཾ། ཅི་པར་རཏྣ་ཟུར་ནམ་དེ་ཤོ་ཧ་ར་ཐིམ་ཐིམ་ཡེ་སྭཧཱ། ཨེ་མ་ཧོ། མཐའ་བྲལ་འགྱུར་མེད་སེམས་ཀྱི་རྐོང་བུ་རུ། སྤྲོས་བྲལ་རང་གྲོལ་ཆེན་པོའི་སྡོང་བུ་བཙུགས། ཁྱབ་བདལ་བདེ་ཆེན་གཉུག་མའི་སྒྲོན་མེ་བལྟམས། མཚན་ལྡན་སྤྱན་ལ་ལྟ་བའི་ཞུགས་མར་འབུལ། གཡོ་མེད་རང་གསལ་ཆེན་པོའི་སྤོས་ཕོར་དུ། འཛིན་མེད་རང་མདངས་འོད་གསལ་སྤོས་དཀར་བླུགས། སོ་མ་རང་ལུགས་རྒྱུན་གྱི་དུད་པ་འཐུལ། འགྲོ་མགོན་ཤངས་ལ་བསྒོམ་པའི་སྤོས་མཆོད་འབུལ། མ་བཅོས་རང་གསལ་ལྷུག་པའི་ཏིང་ཕོར་དུ། མ་འགགས་རོལ་པ་རང་ཤར་ཡོན་ཆབ་བླུགས། སྣ་ཚོགས་རྒྱན་ཤར་ཆགས་མེད་རྩི་སྨན་བཏབ། དྲིན་ཅན་སྐུ་ལ་སྤྱོད་པའི་ཡོན་ཆབ་འབུལ། རྣམ་དག་ཡེ་བསྲུང་ཆེན་པོའི་ལྷུང་བཟེད་དུ། དྲི་བྲལ་རང་སེམས་གཙང་མའི་ལྷ་སངས་བཙུགས། བསྲུང་མཚམས་ཕྱོགས་རིས་བྲལ་བའི་རྩི་བཅུད་བསྐུས། དྲིན་ཅན་མགུལ་ལ་དམ་ཚིག་ཞལ་ཟས་འབུལ། ཡེ་ནས་རང་སེམས་སངས་རྒྱས་དུང་ཕོར་དུ། ཉམས་རྟོགས་མངོན་གྱུར་ཨུཏྤལ་མེ་ཏོག་བླུགས། ལྷུན་གྲུབ་གཞན་ཕན་ལེགས་པའི་འོད་ཟེར་འཕྲོ། དྲིན་ཅན་ཐུགས་ལ་ཕྲིན་ལས་མེ་ཏོག་འབུལ། ཨ་ཨཱོྃ་ཧཱུཾ། ནེ་ཏིང་ཤིམ་ཕོད་དང་ར་བོང་ངེ་ནེ་ར་ཟུར་ནམ་དེ་ཤོ་ཐིམ་ཐིམ་ཡེ་སྭཱཧཱ། ཨེ་མ་ཧོ། སྤྱི་གཙུག་འགྱུར་མེད་བདེ་བའི་ཕོ་བྲང་དུ། ཀུན་སྙོམས་མཐའ་བྲལ་ཀུན་བཟང་ངང་ལ་བཞུགས། བླ་མ་བོན་གྱི་སྐུ་ལ་གསོལ་བ་འདེབས། འགྲོ་དྲུག་ཐུགས་རྗེས་ཟུངས་ལ་བདག་རྒྱུད་ཁྲོལ། མགྲིན་པ་འོག་མིན་དབྱིངས་ཀྱི་ཕོ་བྲང་ན། ཞི་ཁྲོའི་སྐུ་ལ་མཚན་དང་དཔེ་བྱད་ལྡན། བླ་མ་རྫོགས་པའི་སྐུ་ལ་གསོལ་བ་འདེབས། འགྲོ་དྲུག་ཐུགས་རྗེས་ཟུངས་ལ་བདག་རྒྱུད་ཁྲོལ། ཐུགས་ཀ་འགྲོ་འདུལ་སྤྲུལ་པའི་ཞིང་ཁམས་སུ། གང་མོས་སྐུར་སྟོན་སྣ་ཚོགས་ཕྲིན་ལས་མཁན། བླ་མ་སྤྲུལ་པའི་སྐུ་ལ་གསོལ་བ་འདེབས། འགྲོ་དྲུག་ཐུགས་རྗེས་ཟུངས་ལ་བདག་རྒྱུད་ཁྲོལ། དལ་འབྱོར་སྐུ་ལ་རྒྱལ་བ་མ་ལུས་འདུས། ཚངས་པའི་གསུང་གིས་བཀའ་རྒྱུད་མཐའ་དག་སྟོན། སྤྲོས་བྲལ་ཐུགས་ལ་མཁྱེན་པའི་ཡེ་ཤེས་རྒྱས། ལེགས་འབྱུང་ཡོན་ཏན་འགྲོ་ལ་བུ་བཞིན་སྐྱབས། རྩོལ་མེད་ཕྲིན་ལས་ནམ་མཁའི་མཐའ་དང་བྲལ། བླ་མ་འགྲན་ཟླ་བྲལ་ལ་གསོལ་བ་འདེབས། འགྲོ་དྲུག་ཐུགས་རྗེས་ཟུངས་ལ་བདག་རྒྱུད་ཁྲོལ། མཉམ་མེད་སྐུ་གསུམ་རྫོགས་ལ་གསོལ་བ་འདེབས། འགྲོ་དྲུག་ཐུགས་རྗེས་ཟུངས་ལ་བདག་རྒྱུད་ཁྲོལ། སྨྲ་བའི་འཛམ་གླིང་རྒྱན་ལ་གསོལ་བ་འདེབས། འགྲོ་དྲུག་ཐུགས་རྗེས་ཟུངས་ལ་བདག་རྒྱུད་ཁྲོལ། མཚུངས་མེད་ཨུ་དུམ་འབར་ལ་གསོལ་བ་འདེབས། འགྲོ་དྲུག་ཐུགས་རྗེས་ཟུངས་ལ་བདག་རྒྱུད་ཁྲོལ། སྐྱེ་མེད་དོན་དམ་རྟོགས་ལ་གསོལ་བ་འདེབས། འགྲོ་དྲུག་ཐུགས་རྗེས་ཟུངས་ལ་བདག་རྒྱུད་ཁྲོལ། སྒྲིབ་མེད་མཁྱེན་གཉིས་ལྡན་ལ་གསོལ་བ་འདེབས། འགྲོ་དྲུག་ཐུགས་རྗེས་ཟུངས་ལ་བདག་རྒྱུད་ཁྲོལ། བླ་མ་ཁྱོད་ནི་འཁོར་འདས་རང་དབང་བསྒྱུར། བདག་སོགས་རྗེས་འབྲངས་གསོལ་འདེབས་བུ་རྣམས་ལ། ནམ་མཁའི་མཐའ་དང་བྲལ་བའི་འགྲོ་དོན་སྩོལ། མཐོང་ཐོས་དྲན་རིག་གྲོལ་བའི་བྱིན་རླབས་སྩོལ། རྒྱུ་དྲུག་དོང་ནས་སྤྲུགས་པའི་ཐུགས་རྗེ་སྩོལ། འབྲལ་མེད་རྒྱུན་དུ་འགྲོགས་པའི་སྨོན་ལམ་སྩོལ། མཉམ་མེད་ཐུགས་རྗེས་རྒྱུན་དུ་བཟུང་དུ་གསོལ། འདི་སོགས་དུས་གསུམ་དགེ་བ་ཅི་བགྱིས་པ། དེ་སྙེད་འགྲོ་ཀུན་རྣམ་མཁྱེན་འཐོབ་ཕྱིར་བསྔོ། ཇི་སྲིད་རྫོགས་པའི་སངས་རྒྱས་མ་ཐོབ་པར། དེ་སྲིད་གནས་ངན་ལུས་སྤང་དལ་འབྱོར་འཐོབ། བསླབ་གསུམ་རྒྱུད་ཁྲོལ་ས་ལམ་དུས་གཅིག་བསྒྲོད། རྫོགས་སངས་རྒྱས་ནས་མཁའ་མཉམ་དོན་བྱེད་ཤོག །
ཅེས་པ་གཡས་རུའི་དཀའ་ཐུབ་འདུལ་བ་རྒྱལ་མཚན་གྱིས་མཚན་ལྡན་འགྲོ་མགོན་བློ་གྲོས་རྒྱལ་མཚན་གྱི་སྐུ་གདུང་མདུན་དུ་མོས་གུས་གདུང་བ་ཆེན་པོས་ཐོལ་ཤར་དུ་ཕུལ་བ་དགེའོ།།
