དུང་སོ་མུ་ཏིག་བསྟར་བའི་ལོ་བརྒྱ་བ།
དུང་སོ་མུ་ཏིག་བསྟར་བའི་ལོ་བརྒྱ་བ།
རྩོམ་པ་པོ། གྲུ༔སྟོང་བཙན།
བོད་བརྒྱུད་ནང་བསྟན་བན་བོན་ཟུང་གི་གཞུང་། །
རྒྱ་ཆེན་ཐོས་པའི་མཐའ་རྒྱ་གཏིང་ནས་ཆོད། །
སྨན་རྩིས་ཕྱི་ལུགས་སྐད་ཡིག་ཀུན་ལ་མཁས། །
བོད་གཞུང་མཁས་པའི་དབང་པོ་ངོ་མཚར་ཆེ། །
ཀུན་སྤྱོད་འདུལ་བའི་ཉམས་ལེན་ཞི་ཞིང་དུལ། །
བསམ་པ་རིག་སྟོང་རྫོགས་ཆེན་ནམ་མཁའི་མདངས། །
རྟོགས་པའི་གདིང་རྙེད་གདམས་པ་སེམས་ལ་ཤར། །
བསྟན་འཛིན་རྣམ་པར་དག་པ་ངོ་མཚར་ཆེ། །
ཉིན་མཁན་ཀུན་ཏུ་ཞི་དུལ་བག་ཡོད་ཀྱི། །
བཅོས་མིན་ཉམས་ལེན་སྒོ་གསུམ་གདན་དུ་འཁྱོལ། །
མཇལ་བའི་མོད་ལ་ཞི་བདེའི་སྣང་བ་སྟེར། །
གཡུང་བོན་བསྟན་འཛིན་ཆེན་པོ་ངོ་མཚར་ཆེ། །
བརྒྱད་ཅུ་དགུ་བཅུའི་བླ་རྒན་ཕལ་མོ་ཆེ། །
ཧོན་ལོག་རྫི་དིབ་སྐྲ་བྱི་དུང་སོ་འཐོར། །
རོ་ལ་དབུགས་ཐོགས་འཁྲུལ་གཏམ་ནར་མར་སྨྲ། །
སྐུ་ཉིད་དེ་ལས་ལྡོག་པ་ངོ་མཚར་ཆེ། །
དབུ་ཡི་དུང་ལོ་རྐང་གཅིག་མ་བུད་ཅིང་། །
སྤྱན་དང་སྙན་ལྕོག་བློ་རིག་དྭངས་སང་ངེ་། །
གཞོན་ནུའི་ཚེམས་འཕྲེང་མ་མཐོར་མུ་ཏིག་བསྟར། །
དགུང་ལོ་བརྒྱ་པའི་སྐྱེས་བུ་ངོ་མཚར་ཆེ། །
བན་བོན་བར་གྱི་ཞེ་འཁོན་སློང་མ་མྱོང་། །
བསམ་བློ་གསར་པར་ལྟ་ལོག་འབོད་མ་མྱོང་། །
ཆོས་དང་ཟང་ཟིང་འབྲེལ་བ་གཅོད་མ་མྱོང་། །
དྲང་སྲོང་དགེ་སྦྱོང་ཆེན་པོ་ངོ་མཚར་ཆེ། །
དགེ་བཅུའི་ཁྲིམས་ནག་འབངས་ལ་སྤེལ་མ་མྱོང་། །
འབྲོག་འགོག་ཤ་འགོག་སྡིག་ཉེས་གསོག་མ་མྱོང་། །
དམ་པ་གོང་མའི་ཕྱག་གཞེས་གཙང་མ་བསྐྱངས། །
དམ་ཚིག་གཙང་མའི་བླ་མ་ངོ་མཚར་ཆེ། །
རང་གི་རྩ་དོན་སྲོག་དང་བསྡོས་ཏེ་སྲུང་། །
དད་ལྡན་ཡོངས་ལ་དགྱེས་པའི་ཞལ་རས་སྟོན། །
མི་སྐྱའི་མགོ་བོ་གནོན་པའི་སྒེར་གཅོད་མིན། །
བོད་ཀྱི་ཆོས་པ་གཙང་མ་ངོ་མཚར་ཆེ། །
བཞུགས་པའི་ལོ་བརྒྱར་གསེར་འོད་ཆེམ་ཆེམ་འཕྲོ། །
བཞུད་པའི་དེ་རིང་ཞབས་རྗེས་དྭངས་ཤིང་གཙང་། །
ཆོས་རིག་སྲུང་བའི་དགེ་བཤེས་ཁྱེད་ལྟ་བུ། །
ཁོ་བོ་ཅག་གི་ཡིད་ངོར་ལྗིག་ཏིག་ཏིག །
རྟེན་འབྱུང་འབྱུང་བཞིས་གྲུབ་པའི་སྐུ་ལུས་དང་། །
དཔྱོད་ཤེས་འོད་ཀྱི་གོང་བུ་ནང་གི་ཐུགས། །
དྭངས་བའི་རྡུལ་ལས་གྲུབ་པའི་ནམ་མཁའི་ཀློང་། །
དབྱེར་མེད་རོ་གཅིག་ཐིམ་ལ་གུས་པས་འདུད། །
སྐུ་ཚེ་མཐར་ཕྱིན་སྤྱོད་པ་རྨད་དུ་བྱུང་། །
རྗེས་རབས་གངས་ཅན་པ་ཡི་སེམས་ནང་དུ། །
ནག་ནོག་དྲི་མས་མ་ལྷད་བཞུད་པ་ནི། །
བླ་ཆེན་ཞིག་གི་ངོ་མཚར་མཛད་པ་དངོས། །
དེ་སྐད་སྒྲོ་བཏགས་རྫུན་གྱི་གཡའ་བྲལ་ཞིང་། །
བདེན་གཏམ་མུ་ཏིག་དཀར་པོའི་འཕྲེང་བ་འདི། །
གངས་རིའི་དགེ་སློང་ཉོན་མོངས་དུལ་ལ་འབུལ། །
དགྱེས་པ་སྐྱེད་ཅིག་རིགས་མཐུན་ན་གཞོན་ཚོ། །
2025/6/13
