གདན་ས་ཁྲི་བརྟན་ནོར་བུ་རྩེ་ནས་སྲིད་རྒྱལ་འབུམ་ཚོགས་འབུལ་བཞིན་པ།
ལོ་ལྟར་བཞིན་གཡུང་དྲུང་བོན་གྱི་གདན་ས་ཆེན་མོ་དཔལ་ལྡན་ཁྲི་བརྟན་ནོར་རྩེའི་འདུས་སྤྱི་ནས་ལོ་དུས་ཀྱི་གསོལ་ཁ་དང་། ཟླ་དུས་ཀྱི་མཆོད་པ་རུ་ལོ་འགོ་ལ་སྲིད་རྒྱལ་འབུམ་ཚོགས་དང་། ལོ་མཇུག་ཏུ་དྲན་པའི་འབུམ་ཚོགས་གཉིས་ཆག་མེད་དུ་འབུལ་སྲོལ་ཡོད་པ་བཞིན།
འདི་ལོ་ཤིང་སྦྲུལ་ལོའི་ཧོར་ཟླ་ ༠༣པའི་ ཚེས་༨དང་། ཕྱི་ལོ་ ༢༠༢༥ ཟླ་ ༥ པའི་ཚེས་ ༥ནས་བཟུང་བདུན་ཕྲག་གཅིག་གི་རིང་བླ་སྤྲུལ་དགེ་བའི་བཤེས་གཉེན་རྣམ་པ་དབུ་བཞུགས་ཐོག་སྐྱབས་གནས་འདུས་སྡེ་རྒྱ་མཚོས་དམ་ཅན་བསྟན་སྲུང་ཡོངས་ཀྱི་གཙོ་མོ་མ་མཆོག་སྲིད་པ་རྒྱལ་མོའི་འབུམ་ཚོགས་ཀྱི་མཆོད་སྤྲིན་རྒྱས་འབུལ་ཞུ་བཞིན་མཆིས།
དེ་ཡང་འགྲོ་ཀུན་ཕན་བདེའི་གཞི་རྩ་སངས་རྒྱས་བསྟན་པ་རིན་པོ་ཆེ་དར་ཞིང་རྒྱས་ལ་ཡུན་རིང་དུ་གནས་པ་དང་། ཞྭ་དཀར་གཡུང་དྲུང་བོན་གྱི་བསྟན་པའི་གཙུག་རྒྱན་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་༣༤པ་མཆོག་དང་། དམུ་རྒྱལ་གཤེན་གྱི་གདུང་སྲས་རྣམ་གཉིས་བཅས་ཀྱི་གཙོས་བསྟན་འཛིན་གྱི་སྐྱེས་ཆེན་གང་ན་སུ་བཞུགས་རྣམས་ཀྱི་ཞབས་བརྟན་དང་།
ཁྱད་པར་དུ་རང་ཅག་གཡུང་དྲུང་བོན་གྱི་འདུལ་སྔགས་རྫོགས་གསུམ་གྱི་དབང་ལུང་ཁྲིད་དང་མན་ངག་གི་ཆུ་བོ་གཅིག་ཏུ་བསྡུས་ཏེ་འཛིན་སྐྱོང་སྤེལ་བའི་བཀའ་དྲིན་ཤིན་ཏུ་ཆེ་བ་རྒྱུད་གསུམ་བསྟན་པའི་མངའ་བདག་མཁས་གྲུབ་བྱེ་བའི་བཤེས་གཉེན༧སྐྱབས་རྗེ་རྩ་བའི་བླ་མ་ཡོངས་འཛིན་སྨྲ་བའི་དབང་པོ་མཆོག་དགུང་ལོ་བརྒྱར་བཞེས་པའི་དུས་ཚོད་དམིགས་བསལ་བ་འདི་དང་བསྟུན་མཆོག་ཉིད་ཞབས་པད་ཡུན་དུ་བརྟན་ཞིང་གསང་གསུམ་གྱི་འཕྲིན་ལས་ཉིན་བཞིན་རྒྱས་པ་དང་། བསླབ་གསུམ་སེམས་དཔའི་འདུས་སྡེ་རབ་ཏུ་འཕེལ་ཞིང་། ཡངས་པའི་འཇིག་རྟེན་གྱི་ཞིང་འདིར་སྤྱིར་ནད་མུག་འཁྲུག་རྩོད་དང་། ས་ཡོམ། མེ་ཆུའི་འཇིགས་པ་སོགས་མི་མཐུན་པའི་རྒུད་པ་མཐའ་དག་ཞི་ནས་འཛམ་གླིང་ཞི་བདེའི་དཔལ་གྱིས་ཁྱབ་པ་དང་། འགྲོ་བ་ལྷ་དང་བཅས་པའི་མཆོད་སྡོང་དགོན་སྡེ་ཆེན་པོ་འདི་ཡི་དད་སྦྱིན་རིས་སུ་མ་ཆད་རྣམས་དང་ལྷག་པར་དུ་ད་ལན་འབུམ་ཚོགས་ཆེན་མོ་འདིར་མཆོད་འབྲེལ་ཞུ་དང་ཞུ་བཞིན་རྣམས་ཀྱི་ཚེ་བསོད་ལས་ཀླུང་ཐམས་ཅད་ཟླ་བ་ཡར་གི་ངོ་བཞིན་དུ་རྒྱས་ཤིང་འཕེལ་ནས་གང་བསམ་ལྷུན་གྱིས་འགྲུབ་པ་བཅས་གང་འཕྲིན་བཅོལ་གྱི་དམིགས་པ་དེ་བཞིན་དུ་འགྲུབ་པའི་སྨོན་འདུན་གྱིས་བརྒྱན་ཏེ། ད་ལན་གྱི་མ་མཆོག་སྲིད་པ་རྒྱལ་མོའི་འབུམ་ཚོགས་རྒྱས་འབུལ་ཞུ་བཞིན་པའི་གསར་གནས་སུ་
མེ་ལོང་ཡེ་ཤེས་དྲ་བའི་གཙོ་སྒྲུབ་པས་ཕྱི་ལོ་ ༢༠༢༥ ༥ ༨ ཉིན།
པར་པ་ཁྱུང་ཐོག་རྒོད།
