༧རྒྱལ་བ་སྨན་རིའི་ཁྲི་འཛིན་༣༣པ་མཆོག་གི་འདས་མཆོད་ཐེངས་ལྔ་པ་གདན་ས་ཁྲི་བརྟན་ནོར་བུའི་རྩེ་རུ་འཚོགས་པ།
༧གདན་ས་ཁྲི་བརྟན་ནོར་བུའི་རྩེ་རུ་ཞྭ་དཀར་བསྟན་པའི་གཙུག་རྒྱན་མཉམ་མེད་རྒྱལ་བ་གཉིས་པའི་རྒྱལ་ཚབ་སྨན་རིའི་ཁྲི་འཛིན་སོ་གསུམ་པ་མཆོག་སྐུ་ཞི་བར་གཤེགས་ནས་མི་ལོ་ལྔ་་འཁོར་བའི་འདས་མཆོད་ཐེངས་ལྔ་པ་དེ་ཉིད་ཕྱི་ལོ་ ༢༠༢༢། ཟླ་ ༠༩། ཚེས་ ༡༩ བོད་ཆུ་སྟག་ལོའི་ཧོར་ཟླ་ ༠༧ པའི་ཚེས་ ༢༤ ཉིན་ཚོགས་གནང་བ་རེད། དེ་ཡང་ཕྱི་ཚེས་ ༡༨ ཉིན་མོ་འདས་མཆོད་ཀྱི་སྟ་བོན་མཆོད་བཟོ་ལེགས་པར་བྱས་ཏེ། ཕྱི་ཚེས་ ༡༩ ཞོགས་པ་ཆུ་ཚོད་ ༠༥ དང་སྐར་མ་ ༣༠ ནས་རྒྱལ་རྔ་བརྡུངས་ཏེ། ༧སྐྱབས་རྗེ་དཔོན་སློབ་རིན་པོ་ཆེ། སྐྱབས་རྗེ་སྒྲུབ་གྲྭའི་མཁན་རིན་པོ་ཆེ། བཤད་སྒྲུབ་མཁན་སློབ་རྣམ་གཉིས་བཅས་དབུ་བཞུགས་ཐོག གྲྭ་མང་རྣམས་འཚོགས་ཁང་རྙིང་པའི་ནང་འཚོགས་ཏེ། ཨ་ཁྲིད་ཀྱི་སྔོན་འགྲོ་དང་གསོལ་འདེབས་གསུངས་ནས། ལུང་ལས། སྤྲོས་བྲལ་ཡང་གསང་དོན་གྱི་མཆོད་པ་འདི། ཞེས་གསུངས་པ་ལྟར། སྤྲོས་བྲལ་དོན་དམ་གྱི་མཆོད་པ་བླ་མེད་རྫོགས་པ་ཆེན་པོའི་གནས་ལུགས་རང་བྱུང་ཡེ་ཤེས་ཀྱི་ཉམས་ལེན་བསྐྱངས་ཏེ་ཐུན་གཅིག་བཞུགས་ནས་འཚོགས་གྲོལ།
དེ་ནས་ཆུ་ཚོད་ ༠༦ དང་སྐར་མ་ ༤༠ ཐོག་འཚོགས་འདོན་གསུངས་ནས་ཞོགས་ཇ་བཞེས། ཆུ་ཚོད་ ༠༧ དང་སྐར་མ་ ༣༠ ཐོག་ནས་འཚོགས་ཁང་རྙིང་པའི་ནང་འཚོགས་ཏེ་སྙན་བརྒྱུད་ཀྱི་སྔོན་འགྲོ་དང་གསོལ་འདེབས་གསུངས་ནས་བླ་མེད་རྫོགས་པ་ཆེན་པོའི་ཉམས་ལེན་ངང་ལ་ཐུན་གཅིག་བཞུགས། ཆུ་ཚོད་དགུ་པའི་ཐོག་འཚོགས་ཁང་གསར་པའི་ནང་མཁན་སློབ་རྣམ་པ་དབུ་བཞུགས་ཐོག་གྲྭ་མང་འཚོགས་ཏེ་མ་ཏྲི་རིན་ཆེན་སྒྲོན་མའི་གཞུང་བསྲངས། གཞི་རིམ་སྔོན་འགྲོའི་སློབ་གྲྭ་ཚོས་སློབ་ཁང་ནང་དམ་པ་གང་དེའི་གསོལ་འདེབས་དབྱངས་སུ་བསྐྱོན་པ་དང་སྒོམ་གྱི་ཉམས་ལེན་ལ་བརྩོན་པ་གནང་། ཉིན་རྒྱབ་ཆུ་ཚོད་ ༠༢ ཐོག་འཚོགས་ཁང་གསར་པའི་ནང་འཚོགས་ཏེ་མ་ཏྲི་རིན་ཆེན་སྒྲོན་མའི་གཞུང་མཐར་ཕྱུངས། ཆུ་ཚོད་ ༠༤ ཐོག་འཚོགས་ཁང་རྙིང་པའི་ནང་འཚོགས་ཏེ་རྫོགས་ཆེན་གྱི་སྔོན་འགྲོ་དང་གསོལ་འདེབས་གསུངས་ནས་བླ་མེད་རྫོགས་པ་ཆེན་པོའི་ཉམས་ལེན་ལ་ཐུན་གཅིག་གཞུགས། སླར་ཡང་ཆུ་ཆོད་༠༥པའི་ཐོག་འཆད་རའི་ནང་དུ་མ་རྒྱུད་ཀྱི་དགོངས་སྤྱོད་རྣམ་གསུམ་གསུངས་ནས་བླ་མེད་རྫོགས་པ་ཆེན་པོའི་ཉམས་ལེན་ལ་ཐུན་གཅིག་བཞུགས།
དགོང་མོ་ཞིང་གཤེགས་དམ་པ་མཆོག་གི་གསོལ་འདེབས་དབྱངས་སུ་གྱེར་བ་དང་ཕྱག་སྐོར་མཆོད་འབུལ་བྱས་ཏེ་སྒོ་གསུམ་དགེ་ལ་འབད་ནས་དམ་པ་མཆོག་གི་དུས་དྲན་སྲུང་བརྩི་ཞུས་པའི་གནས་བསྡུས་སུ་མེ་ལོང་ཡེ་ཤེས་དྲ་བའི་གཙོ་སྒྲུབ་པས་ ༢༠༢༢། ༠༩། ༡༩ ཉིན་སྤེལ།། །།
པར་པ་ཁྱུང་ཐོག་རྒོད།