༧སྐྱབས་རྗེ་དཔོན་སློབ་འཕྲིན་ལས་ཉི་མ་རིན་པོ་ཆེ་མཆོག་གློ་དོལ་ཕྱོགས་ཀྱི་བསྟན་འགྲོའི་མཛད་འཕྲིན་གྲུབ་ནས་གདན་ས་ཁྲི་བརྟན་ནོར་བུ་རྩེར་ཞབས་སོར་བདེ་བར་འཁོད་པ།
གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་གི་༧སྐྱབས་རྗེ་དཔོན་སློབ་འཕྲིན་ལས་ཉི་མ་རིན་པོ་ཆེ་མཆོག་གློ་དང་དོལ་པོའི་ཕྱོགས་ཀྱི་བོན་གྱི་གནས་ཆེན་ཁག་དང་དགོན་སྡེ་ཁག་ཏུ་ཕེབས་ཏེ་དེ་རིང་ ༢༠༢༢ ཟླ་ ༠༩ ཚེས་ ༢༤ ཉིན་གདན་ས་ཁྲི་བརྟན་ནོར་བུ་རྩེ་རུ་ཞབས་སོར་བདེ་བར་འཁོད་ཡོད་པ་དང་། སྐབས་དེར་གྲྭ་ཚང་སྤྱི་གཉེར་དགེ་བཤེས་གཡུང་དྲུང་ཚུལ་ཁྲིམས་གཙོས་དགོན་གྱི་ལས་སྣེ་བ་དག་ཕེབས་བསུར་ཆེད་བཅར་དང་། འདུས་མང་ནས་དགོན་གྱི་རྒྱལ་སྒོ་ཕྱི་རུ་སེར་ཕྲེང་བསྒྲིགས་ཏེ་དར་གདུགས་རྒྱལ་མཚན་དང་ཕྱེ་མ་འཕུར་མ་སོགས་མཛེས་པའི་རྒྱན་དང་། རྔ་གཤང་དུང་གླིང་སོགས་སྙན་པའི་སྒྲ་དང་། ལྷ་བསང་བདུག་སྤོས་སོགས་ཞིམ་པའི་དྲི་དང་། དགའ་དད་གུས་པ་སོགས་དྭངས་བའི་སེམས་ཀྱི་མཆོད་སྤྲིན་བཅས་ཀྱིས་ཕེབས་བསུ་ཞུས་ཏེ་འཆད་རའི་ཐོག་གཤེན་རབ་མཆོད་རྔ་བརྡུངས། དེ་ནས་ཚོགས་ཁང་དུ་གཅན་ལྔ་རིན་ཆེན་ཁྲི་ལ་བཞུགས་སུ་གསོལ་ཏེ་༧སྐྱབས་རྗེ་སྒྲུབ་གྲྭའི་མཁན་པོ་ཚུལ་ཁྲིམས་བསྟན་འཛིན་རིན་པོ་ཆེ་མཆོག་ནས་མཎྜལ་འདེགས་འབུལ་དང་སྐྱ་སེར་ཚང་མས་མཇལ་ཁ་ཞུས་ཏེ་བླ་བྲང་དུ་གདན་ཞུས་བྱས་པའི་གནས་བསྡུས་སུ་མེ་ལོང་ཡེ་ཤེས་དྲ་བའི་གཙོ་སྒྲུབ་པས་ ༢༠༢༢ ཟླ་ ༠༩ ཚེས་ ༢༤ ཉིན་སྤེལ།། །།
པར་པ་ཁྱུང་ཐོག་རྒོད།
