གཡུང་དྲུང་བོན་གྱི་ཆེས་མཐོའི་གཙུག་ལག་སློབ་གཉེར་ཁང་གི་བོད་ཀྱི་སྐད་ཡིག་ཡར་སྐུལ་གྱི་གཏམ་བཤད་འགྲན་བསྡུར་ཐེངས་བཞི་པའི་གནས་བསྡུས།

སྤྱིར་སློབ་སྦྱོང་ནི་སྐད་ཡིག་དང་ཁ་བྲལ་ཐབས་མེད་ལ། དེ་བས་བོན་གྱི་གཞུང་ལུགས་ལ་སློབ་གཉེར་བྱེད་མཁན་ཞིག་ཡིན་ན་བོད་ཀྱི་སྐད་ཡིག་ནི་རྨང་གཞིའི་ཤེས་བྱ་ཡིན་པ་རེད། གང་ལགས་ཞེ་ན་བོན་གཞུང་ནི་བོད་ཀྱི་སྐད་ཡིག་གི་བང་མཛོད་ངོ་མ་དེ་ཡིན་ཞིང་བོན་གཞུང་གི་ནང་དུ་གནའ་བོའི་བརྡ་ཆད་གོ་དཀའ་བའི་རིགས་ཧ་ཅང་མང་བས་བོན་གཞུང་ལ་ཐོས་བསམ་བྱེད་མཁན་ཞིག་ཡིན་ཕྱིན་བོད་ཀྱི་སྐད་ཡིག་གཏིང་ཚུགས་པ་ཞིག་དགོས་ངེས་སུ་མཐོང་། དེས་ན་ད་ལན་གཡུང་དྲུང་བོན་གྱི་ཆེས་མཐོའི་གཙུག་ལག་སློབ་གཉེར་ཁང་གི་སྐབས་ཉེར་ལྔ་པའི་བཤད་སྒྲུབ་འདུས་སྡེས་གོ་སྒྲིག་འོག་༧སྐྱབས་རྗེ་སློབ་དཔོན་ཚངས་པ་འཛིན་རིན་པོ་ཆེ་མཆོག་དང་། བཤད་སྒྲུབ་མཁན་པོ་དགེ་བཤེས་སྐལ་བཟང་སྨོན་ལམ་བཤད་སྒྲུབ་དཔོན་སློབ་དགེ་བཤེས་བློ་གྲོས་གཙུག་ཕུད་བཅས་མཁན་སློབ་རྣམས་དང་གཞན་ཟུར་དཔང་དགེ་རྒན་དང་དགེ་བཤེས་རྣམ་པ་སྐབས་ཉེར་ལྔ་བའི་བཤད་སྒྲུབ་འདུས་སྡེའི་ལས་བྱེད་རྣམས་པ་བཅས་ཚང་འཛོམས་ཐོག སྐབས་ཉེར་ལྔ་པའི་བཤད་སྒྲུབ་འདུས་སྡེའི་ཚོགས་གཙོ་བླ་མ་ཚུལ་ཁྲིམས་རྣམ་རྒྱལ་གྱིས་གཙོ་སྐྱོང་གནང་སྟེ་འཛིན་རིམ་འོག་མར་བོད་ཀྱི་སྐད་ཡིག་ཡར་སྐུལ་གྱི་གཏམ་བཤད་འགྲན་བསྡུར་ཐེངས་གཉིས་པ་དེ་ཉིད་དེ་རིང་ཕྱི་ལོ་༢༠༢༠།༡།༡༨།ཉིན་གྱི་ཞོགས་པའི་ཕྱག་ཚོད་༨ཐོག་དངོས་སུ་དབུ་བཙུགས་པ་དང་དེ་ཡང་འཛིན་གྲྭ་གོ་རིམ་བཞིན་ཚད་མ་འཛིན་གྲྭ་ནས་<གཏོར་མའི་>སྐོར་དང་། རྟགས་རིག་འཛིན་གྲྭ་ནས་<ཞེ་སའི་>་སྐོར། སྡུད་གྲྭ་འཛིན་གྲྭ་ནས་< བོད་ཀྱི་ཕོ་མོའི་རྒྱན་གོས་>སྐོར་དང་། རིག་ལམ་སྔོན་འགྲོ་འཛིན་གྲྭ་ནས་༧གསང་གསུམ་བོན་གྱི་མཛོད་འཛིན་དཔལ་རྒྱལ་བ་སྨན་རི་བའི་ཡོངས་འཛིན་<སྨྲ་བའི་སེང་གེ་མཆོག་གི་སྐུ་ཚེའི་མཛད་རྣམ་སྐོར་>སོགས་འཛིན་གྲྭ་སོ་སོར་གཏན་འབེབས་བྱས་པའི་བརྗོད་གཞིའི་ཐོག་ནས་གཏམ་བཤད་རིམ་པས་སྤེལ་ཡོད། འཛིན་གྲྭ་རང་རང་སོ་སོའི་བགྲོ་གླེང་སྐབས་དྲི་བ་དྲིས་ལན་སོགས་གནང་ཡོད་པ་དང་། ཟུར་དཔང་དགེ་རྒན་རྣམས་ཀྱིས་ཀྱང་བགྲོ་གླེང་སྐབས་ཐ་སྙད་བཀོལ་སྤྱོད་བྱེད་སྟངས་ཀྱི་སྤུས་ཚད་དང་དོན་གྱི་འགག་རྩ་བཀྲོལ་ལུགས་སྐད་ཆའི་སྒྱུ་རྩལ་སོགས་ལ་གཞིག་སྟེ་ཨང་རིམ་སྤྲད་ཡོད་པ་དང་མཐར་གཙོ་སྐྱོང་བས་མཇུག་བསྡུས་གཏམ་བཤད་གནང་རྗེས་ཐེངས་འདིའི་གཏམ་བཤད་འགྲན་བསྡུར་གྱི་མཇུག་ཡོངས་སུ་གྲུབ་པ་བཅས་ཀྱི་གནས་བསྡུས་སུ།

མེ་ལོང་ཡེ་ཤེས་དྲ་བའི་གཙོ་སྒྲུབ་པས་ཕྱི་ལོ་༢༠༢༠།༡།༡༨ཉིན་སྤེལ།། །།