དཔལ་ལྡན་ཁྲི་བརྟན་ནོར་བུའི་རྩེར་ཚད་མའི་རིགས་སྒྲ་ཆེན་མོ་འཚོགས་པ།
རྩོམ་པ་པོ། ཏི་སེའི་བུ།
བཤད་སྒྲུབ་བསྟན་པའི་འབྱུང་གནས་གཡུང་དྲུང་བོན་གྱི་གདན་ས་ཆེན་མོ་དཔལ་
ལྡན་ཁྲི་བརྟན་ནོར་བུའི་རྩེར་༸སྨྲ་བའི་དབང་པོ་སྐྱབས་རྗེ་ཡོངས་འཛིན་སློབ་དཔོན་རིན་པོ་ཆེའི་བཀའ་སློབ་ལམ་སྟོན་གཞིར་བཟུང་སྟེ། སྔོན་དུས་གཙང་བཀྲ་ཤིས་སྨན་རི་དགོན་དུ་ལོ་ལྟར་རེ་བཞིན་བོད་ཟླ་དང་པོའི་སྨོན་ལམ་གྱི་ཚོགས་གྲོལ་ནས། དབྱར་རྒྱས་རི་ཁྲོད་མཛོད་བཟང་ཕུག་ཏུ་སློབ་གཉེར་བ་ཡོངས་རྫོགས་ཕེབས་ཏེ་ཞག་ཞེ་དགུའི་རིང་ལ་ཚད་མའི་རིགས་སྒྲ་ཆེན་མོ་འཚོགས་སྲོལ་བྱུང་བ་བཞིན། སྤྱི་ལོ་1996ལོ་ནས་བཟུང་ད་ལྟའི་བར་དུ་ཧོར་ཟླ་༡༠པའི་ཚེས་༡་ནས་ཚེས་༢༡་བར་ལོ་ལྟར་ཚད་མའིི་རིགས་སྒྲ་ཆེན་མོ་ནི་མཚན་ཉིད་པའི་སློབ་ཚན་གལ་ཆེན་ཞིག་ཏུ་བརྩིས་ནས་གཏན་འཇགས་སུ་འཚོགས་ཐུབ་པར་བྱུང་ཡོད། 
སྤྱི་བཏང་ཚད་མའི་གཞུང་ལུགས་འདི་ཉིད་བཀའ་དང་བཀའ་བརྟེན་སྤྱི་ཡི་དགོངས་པ་འགྲེལ་བྱེད་ཀྱི་ལག་ཆ་ལྟ་བུར་གྱུར་ཞིང་། འདི་ལ་འཇུག་ནས་དགག་སྒྲུབ་རྩོད་པའི་ལ་ཤན་དབྱེ་བའི་དགོས་ཆེད་ནི།
འགྲོ་མགོན་རིན་པོ་ཆེའི་(1998-1263)ཚད་མ་ཀུན་བཏུས་ལས། “སེམས་ཅན་ཐམས་ཅད་ཀྱི་བདེ་སྡུག་ནི། དེ་ཁོ་ན་ཉིད་ཀྱི་དོན་རྟོགས་པ་དང་མ་རྟོགས་པ་ལས་བྱུང་ཞིང་། དེ་ཉིད་རྟོགས་པར་བྱེད་པའི་ཐབས་སུ་ཐམས་ཅད་མཁྱེན་པས་བོན་གྱི་སྒོ་མོ་དུ་མར་གསུངས་ལ། དེ་དག་གི་དོན་འགྲེལ་ཞིང་ཤེས་བྱའི་གནས་ལུགས་རྟོགས་པར་བྱེད་པ་ལ་ཚད་མ་གསུམ་གྱིས་གཏན་ལ་དབབ་དགོས་ཏེ།” ཞེས་གསུངས་པ་དང་།
རྗེ་རིན་པོ་ཆེའི་(1356-1415)ཚད་མ་རྣམ་འབྱེད་འཕྲུལ་སྒྲོན་ལས། “རྩོད་པ་ཁྱད་པར་ཅན་གྱིས་མ་ཟིན་པའི་གོ་བ་ལ་ཡང་དག་པའི་དོན་སྤྱི་འཆར་དཀའ་སྟེ། ལོང་བ་ལྷ་ཁང་དུ་ཕྱིན་པའི་ལག་ཏུ་རྫས་ཁྲ་བོ་གཏད་པ་བཞིན་ནོ། །དེའི་ཕྱིར་རྩོད་པ་ལ་དགོས་པ་ཆེན་པོ་འདི་ཉིད་ཡོད་པས། རྫོགས་པའི་སངས་རྒྱས་ཐོབ་པར་འདོད་པའི་སྐྱེས་བུ་རྣམས་ཀྱིས་ཐུགས་ལ་ཞེན་པར་མཛོད་ཅིག” ཅེས་དང་།
ཀུན་མཁྱེན་ཉི་མའི་(1813-1863)ཤེས་ཕྱིན་སྐབས་དང་པོ་ལས། “སྤྱིར་ཚད་མའི་གཞུང་རྣམས་ནི་དབུ་སེམས་ཀྱི་སྒྲུབ་བྱེད་ཡིན་པས་ཤིན་ཏུ་གལ་ཆེ་བར་ཟུངས་ཤིག” ཞེས་ངེས་དོན་ཚད་མའི་སྐྱེས་བུ་རྣམས་ཀྱིས་ཕྱི་རབས་རྗེས་འཇུག་ལ་གདམས་པའི་ལུང་མཆོག་འདི་དག་གི་དགོས་དམིགས་གསལ་པོ་རྟོགས་པའི་སྒོ་ནས། འདི་ལོ་ཡང་བོད་ཟླ་༡༠པའི་ཚེས་༡ནས་ཐེངས་ཉི་ཤུ་པའི་ཚད་མའི་རིགས་སྒྲ་ཆེན་མོ་དེ་ཉིད་སླར་ཡང་དབུ་འཛུག་གནང་སྟེ། བཤད་གྲྭ་བའི་ཁོངས་ནས་རྟགས་རིགས་འཛིན་གྲྭའི་ཡན་གྱི་སློབ་གཉེར་བ་ཀུན་ཚད་མའི་རིགས་སྒྲ་ཆེན་མོར་ཞུགས་ཏེ། རྗེ་བདག་ཉིད་ཆེན་པོའི་འཕྲུལ་སྒྲོན་རྣམ་ལྔའི་ནང་ཚན་ཚད་མ་རྣམ་འབྱེད་འཕྲུལ་གྱི་སྒྲོན་མེ་དེ་ཉིད་སྦྱང་བྱ་གཙོ་བོར་བཟུང་ཞིང་། 
གཞན་ཡང་དྲན་
པའི་རྣམ་འབྱེད་འཕྲུལ་ལྡེ། མན་ངག་ལུང་གི་ཚད་མ། གཏན་ཚིགས་ངེས་པའི་གལ་མདོ། འགྲོ་མགོན་གྱི་ཚད་མ་རིག་གཏེར་སོགས་ཞང་བོད་ཀྱི་གནའ་རབས་ཀྱི་མཁས་གྲུབ་ལོ་པཎ་རྣམ་པས་མཛད་པའི་ཚད་མ་རིག་པའི་གཞུང་ལུགས་རྣམས་ཀྱིས་ཟུར་བརྒྱན་ཏེ་ཁྱོན་བདུན་ཕྲག་གསུམ་གྱི་རིང་ལ་དམིགས་སུ་བཀར་ནས་ཚད་མ་རིག་པའི་གནས་ལ་ཐོས་བསམ་གྱི་སྤྱི་རྒྱ་གཅོད་བཞིན་མཆིས། དེ་ཡང་ཉིན་ལྟར་སྔ་དྲོའི་ཕྱག་ཚོད་༨ནས་༡༠་བར་རྩོད་སྦྱོང་གནང་རྒྱུ་དང་། ༡༠་ནས་༡༡བར་དཔོན་སློབ་རིན་པོ་ཆེ་དང་། བཤད་སྒྲུབ་མཁན་སློབ་བཅས་ཀྱི་མདུན་ནས་དཔེ་ཁྲིད་ཞུ་རྒྱུ་དང་། ༡༡་ནས་༡༢་བར་ནང་སྦྱོང་། ཉིན་རྒྱབ་ཕྱག་ཚོད་༤ནས་༥་བར་དུ་གླིང་ཚན་སོ་སོའི་བར་འཆད་རར་ཐུག་རྒྱག་རྒྱུ། ༥ནས་༦་བར་ནང་སྦྱོང་། ༦ནས་༩བར་དམ་བཅའ་འཚོགས་རྒྱུ་བཅས་བདུན་ཕྲག་གཉིས་ཀྱི་རིང་ལ་གནང་རྒྱུ་དང་། བདུན་ཕྲག་གསུམ་པར་འཛིན་གྲྭ་ཕན་ཚུན་རིགས་ལམ་འགྲན་རྩོད་ཀྱི་ཐུག་ཆེན་རྒྱག་རྒྱུ་བཅས་ནི་རིགས་སྒྲའི་སྐབས་ཀྱི་སློབ་ཚན་བྱ་བཞག་ཡིན་ནོ།།
ཞེས་པའི་མཚམས་སྦྱོར་ཉུང་འདུས་འདི་ཉིད་༢༠༡༥། ༡༡། ༡༤། ཉིན་ཏི་སེའི་བུ་ནས་སྤེལ།
