མཁའ་འགྲོ་ཅོ་ཟ་བོན་མོའི་རྣམ་ཐར་སྐལ་ལྡན་སེམས་ཀྱི་སྒྲོན་མེ།
བླ་མེད་རྫོགས་པ་ཆེན་པོའི་དོན་ལ་ཉམས་ལེན་གནང་ཚུལ།
བོན་གྱི་རྫོགས་ཆེན་གྱི་བླ་མ་གཤེན་ཆེན་ལི་ཤུ་སྟག་རིང་དང་མཇལ་ནས་དེའི་དྲུང་ནས་རྫོགས་ཆེན་བསྒྲགས་པ་སྐོར་གསུམ་དང་། རྫོགས་པ་ཆེན་པོ་ཡང་རྩེ་ཀློང་ཆེན་དྲང་ངེས་ཀྱི་སྐོར་རྣམས་རྫོགས་པར་ཞུས། བླ་མ་ལི་ཤུས་མཁའ་འགྲོ་ཅོ་ཟ་བོན་མོར་མན་ངག་ངོ་སྤྲོད་ཀྱི་གདམ་པ་འདི་ལྟར་གདམས། རྫོགས་པ་ཆེན་པོ་ཡོངས་རྩེ་ཀློང་ཆེན་ལས། ཡེ་ཤེས་སྤྲུལ་པའི་མཁའ་འགྲོ་ཉོན། །རྒྱལ་ཐེབས་སྤྱི་བླུགས་ལྟ་བའི་དབང་། །རང་བཞིན་ཆ་ལུགས་ཕྱག་རྒྱ་བཅའ། །སྤྱན་རྩ་སེང་གེ་ལྟ་བུ་སྟེ། །རིག་པ་མདུན་གྱི་མཁའ་ལ་གཏད། །རྟོག་མེད་སྤྲོས་བྲལ་བསམ་བརྗོད་བྲལ། །སོ་མ་ལྷུག་པ་མ་བཅོས་པ། །ཀུན་ཏུ་བཟང་པོའི་དགོངས་པ་དེ། །ངོ་སྤྲོད་བྱས་ལ་ངེས་ཤེས་བསྐྱེད། །ཅེས་གསུངས། ཅོ་ཟ་བོན་མོས་བླ་མ་ལི་ཤུས་ཅི་ལྟར་གདམས་པ་བཞིན་ཉམས་སུ་བླངས་པས་བོན་ཉིད་ཀྱི་དགོངས་པ་མངོན་དུ་གྱུར་ནས་ཧས་པོ་རིའི་རྩེ་མོར་མགུར་འདི་ལྟར་བཞེངས་སོ། །《རྫོགས་ཆེན་བསྒྲགས་པ་སྐོར་གསུམ། བརྟེན་འགྱུར་སོག་པོད། ལྡེབ་མ་༢༥༦ལས། 》ཨེ་མ་ཧོ། ཡ་མཚན་ཆེ། ཉིན་དང་མཚན་མེད་བཞུགས་ཡུལ་ན། །གཏན་དུ་གསལ་བའི་ཉི་མ་ཤར། །དྲོ་ནི་བདག་མོའི་ངོས་ལ་དྲོ། །བོན་དང་སེམས་སུ་སྤྲོད་པས་གཤེན་རབ་དྲིན་པོ་ཆེ། །སེམས་ལ་སེམས་ཀྱིས་ལྟ་བ་རང་ལ་རང་དྲིན་ཆེ། །འཁོར་བའི་གདོས་ཐག་མ་བཅད་ན། །ངས་དང་གནས་སུ་མི་ཕྱིན་ནོ། །ཉོན་མོངས་རྟོག་པ་མ་བསྙིལ་ན། །ངས་དང་གནས་སུ་མི་ཕྱིན་ནོ། །རྒྱལ་པོ་བཙོན་དུ་མ་བཟུང་ན། །ངས་དང་དམག་མི་མི་ཐུལ་ལོ། །ལྟ་བ་རྫོགས་ཆེན་སྐུ་མཁར་ལ། །ལུང་དྲུག་དམའ་བུག་ཤར་གྱིས་བཏོད། །མན་ངག་བརྒྱད་ཀྱི་བ་གམ་བཏག, །སེམས་ཉིད་གསལ་བའི་གཞུ་བརྡུང་《བདུངས་》ནས། །ཡིག་ཆུང་བཞི་ཡི་མདའ་གཏོང་བས། །དུག་ལྔའི་ཤིང་ཕུབ་ཟང་བཏོན་ནས། །འགྲོ་བ་འཁོར་བའི་མི་དྲུག་བསད། །འཁྲུལ་པའི་འགྲན་ཟླ་མེད་པར་རྒྱལ། །ཆགས་སྡང་དགྲ་གཉིས་མ་བསད་ན། །སེམས་ཀྱི་བུ་གཅེས་ཡབ་དབང་མེད། །དུག་གསུམ་ཆུ་བོ་མ་བཅད་ན། །ཡེ་ཤེས་མེ་ལ་འབར་དབང་མེད། །འཁོར་བའི་གྲྭ་གྲོགས་མ་བསུམ་ན། །བདེ་བའི་རྟ་ལ་རྒྱུག་དབང་མེད། །བུ་གཉེན་གྲོགས་དང་མ་བྲལ་ན། །རང་སེམས་བྱ་རྒོད་འཕུར་དབང་མེད། །རྣམ་རྟོག་གི་སྡོང་པོ་མ་བཅད་ན། །འཁོར་བའི་ལོ་འདབ་རྒྱས་པར་མཆིས། །དུག་ལྔའི་དགྲ་དང་མ་བྲལ་ན། །འོར་མོ་ཁུང་དུ་འཁྲིད་པར་མཆིས། །གཟུགས་ཕུང་རེ་རྡུལ་མ་བཤིགས་ན། །ཉོན་མོངས་སྐུ་དང་བཅས་ནས་མཆིའོ། །ཡེ་ཤེས་མར་མེ་མ་བཏང་ན། །མ་རིག་མུན་པ་སྲོས་པར་མཆིའོ། །ལྟ་བ་རྫོགས་ཆེན་མཁར་ཡོད་པས། །ཉོན་མོངས་དམག་གིས་ང་མི་འཇིགས། །མི་འགྱུར་བརྟན་པའི་གོ་ཡོད་པས། །དུག་ལྔའི་མཚོན་གྱིས་ང་མི་འཇིགས། །ཡེ་ཤེས་སེམས་དཔའི་གྲོགས་ཡོད་པས། །གྲོགས་དང་བྲལ་བས་ང་མི་འཇིགས། །སེམས་ལ་སྤྱོད་པའི་རྫས་ཡོད་པས། །རྫས་དང་བྲལ་བས་ང་མི་འཇིགས། །ཐམས་ཅད་བྲལ་བས་བདེ་བའི་མཆོག །ཡོངས་དང་བྲལ་བས་བདེ་བའི་མཆོག །གཅིག་པུར་གནས་པས་བདེ་བའི་མཆོག །འཁོར་དང་བྲལ་བས་བདེ་བའི་མཆོག །བོན་དང་སེམས་སུ་སྤྲོད་པ་གཤེན་རབ་དྲིན་པོ་ཆེ། །འཁོར་བའི་འདམ་ལས་སྒྲོལ་བའི་གཤེན་རབ་དྲིན་པོ་ཆེ། །ཉོན་མོངས་རྒྱ་མཚོ་སྐེམ་པའི་གཤེན་རབ་དྲིན་པོ་ཆེ། །སངས་རྒྱས་སུ་སྟོན་པའི་གཤེན་རབ་དྲིན་པོ་ཆེ། །རང་སེམས་རང་གིས་རྟོགས་པའི་ཅོ་ཟ་བོན་གཅིག་མ། །ལྟད་མོ་སེམས་ལ་ལྟ་བ་ཡི། །གཏན་གྲོགས་སེམས་ལ་ཚོལ་བ་ཡི། །ལོངས་སྤྱོད་སེམས་ལ་འགྱེད་པའི་ཅོ་ཟ་བོན་གཅིག་མ། །ང་ཡི་ལྟ་བ་ནམ་མཁའ་འདྲ། །ང་ཡི་སྤྱོད་པ་ས་གཞི་འདྲ། །ང་ཡི་སྒོམ་པ་ཞུགས་མར་འདྲ། །ང་ཡི་མན་ངག་བདུད་རྩི་འདྲ། །འཁོར་བའི་སེམས་ཅན་ཉོན་མོངས་ཀུན། །རྗེ་དཔོན་འདོད་ན་ཡི་དམ་ལྷ། །གཏན་གྲོགས་འདོད་ན་རང་གི་སེམས། །བྲན་གཡོག་འདོད་ན་བསྟན་སྲུང་ཚོགས། །ལོངས་སྤྱོད་འདོད་ན་བོན་གྱི་དབྱངས་《དབྱིངས》། །ལྟ་ན་རང་གི་སེམས་ལ་ལྟོས། །མཆོད་ན་བདེར་གཤེགས་རིགས་ལྔ་མཆོད། །སྒོམ་ན་མི་རྟོག་ཤེས་རབ་སྒོམས། །འདུག་ན་དགོན་པའི་གནས་སུ་འདུག །ཅེས་ཅོ་ཟ་བོན་མོས་ཧས་པོ་རིའི་རྩེ་མོར་མགུར་བཞེངས་པའོ། །དེ་ནས་སྒོམ་པ་ཀློང་དུ་གྱུར་ནས་སངས་རྒྱས་སོ། །ཞེས་གསུངས། ཅོ་ཟས་བླ་ཆེན་དྲན་པ་ནམ་མཁའི་མདུན་ནས་སྤྱི་རྒྱུད་ཆེན་མོ་ཡེ་ཁྲི་མཐའ་སེལ་དང་། རྫོགས་པ་ཆེན་པོ་ནམ་མཁའ་འཕྲུལ་གྱི་མཛོད་ཆེན་གྱི་གདམ་སྐོར། དབང་བཞི་དང་། རིག་པ་རྩལ་དབང་དང་བཅས་པ་རྫོགས་པར་མནོས་ཏེ་རྒྱུད་ལ་སྨིན་གྲོལ་གྱི་དོན་མངའ་བར་མཛད་པ་དང་། ཐོས་བསམ་གྱི་གཙོ་བོ་རྫོགས་ཆེན་བསྒྲགས་པ་སྐོར་གསུམ་མཛད་ཀྱང་གཞི་ཤར་གྲོལ་རིག་པའི་ཡེ་ཤེས་ཀྱི་མྱོང་བ་རྫོགས་ཆེན་ནམ་མཁའ་འཕྲུལ་གྱི་མཛོད་ཆེན་གདམ་སྐོར་ཉམས་སུ་བླངས་པ་ལ་བརྟེན་ནས་རྒྱུད་ལ་སྐྱེས་པར་གསུངས། དེ་ཡང་བླ་ཆེན་དྲན་པ་ནམ་མཁས་ཅོ་ཟ་བོན་མོ་ལ་རྒྱུན་གནས་ཀྱི་མན་ངག་གསུམ་གྱིས་ངོ་སྤྲོད་ཀྱི་གདམ་པ་འདི་ལྟར་གདམས་ཏེ།《ནམ་མཁའ་འཕྲུལ་གྱི་མཛོད་ཆེན་ལས་མན་ངག་གནད་ཀྱི་ལྡེ་མིག་༢༢༦ལས། མཛད་པ་པོ་དྭགས་པོ་དྲན་པ་ནམ་མཁའ། ཁྲི་བརྟན་ནོར་བུ་རྩེའི་དཔེ་མཛོད་ཁང་གིས་དཔར་སྐྲུན་ཞུས།》ཅོ་ཟ་ནམ་མཁའ་ལ་ལྟོས་དང་སྤྲིན་རང་འབྱུང་རང་གྲོལ། ཁར་ཚང་《ཁ་རྩང་》གི་སྤྲིན་དེ་རིང་གི་སྤྲིན་མིན། ད་ཅིའི་སྤྲིན་དེ་ད་ལྟའི་སྤྲིན་མིན། སྤྲིན་གློ་བུར་བ་རང་སར་གྲོལ་བས། སྒྲིབ་བྱེད་ལ་སྙིང་པོ་མེད། ནམ་མཁའ་ཆེན་པོས་སྤྲིན་མ་སྤངས། གདོད་ནས་བྲལ་བར་རྒྱུན་དུ་གནས། ཕྱི་ཡི་སྣང་བ་དཀར་དམར་ལ་ལྟོས་དང་། དགྲ་རུ་སྣང་བ་དགྲ་མིན། གཉེན་དུ་སྣང་བ་གཉེན་མིན། དགྲ་གཉེན་འཁྲུལ་སྣང་གློ་བུར་བ། སྣང་བ་གློ་བུར་བ་རང་སར་གྲོལ་བས། སྣང་བ་འདི་ལ་སྙིང་པོ་མེད། སྣང་བ་རང་གྲོལ་ཆེན་པོ། འཁྲུལ་སྣང་མ་སྤངས་གདོད་ནས་བྲལ་བར་གནས་སོ། །ནང་འཛིན་བྱེད་ཀྱི་ཤེས་པ་སྣ་ཚོགས་སུ་སྣང་བ་ལ་ལྟོས་དང་། དྲན་རྟོག་འཛིན་བྱེད་ཀྱི་ཤེས་པ་གློ་བུར་བ། འཛིན་བྱེད་གློ་བུར་བ་རང་སར་གྲོལ་བས་འཛིན་པ་ལ་དངོས་པོ་མེད། འཛིན་པ་རང་གྲོལ་ཆེན་པོ། འཛིན་རྟོག་མ་སྤངས་གདོད་ནས་བྲལ་བར་རྒྱུན་དུ་གནས་ཞེས་སོ། །མེད་པ་གསུམ་ནི། སྐུ་ལས་འདས་པས་ཁ་དོག་དངོས་པོ་མེད། གསུང་ལས་འདས་པས་བརྗོད་བྱ་རྗོད་བྱེད་མེད། ཐུགས་ལས་འདས་པས་གཟུང་ཡུལ་མཚོན་བྱེད་མེད། ཅེས་གདམས་པས། ཅོ་ཟའི་རྒྱུད་ལ་སྙིགས་མ་རྟོག་པའི་བློ་ཡི་དྲི་མ་ཐམས་ཅད་འཛིན་མེད་རང་གྲོལ་ཆེན་པོའི་ངང་དུ་གྲོལ་ཏེ་རང་རིག་ཡེ་ཤེས་རྗེན་གཅེར་དུ་ཤར་བའོ། །དེ་ནས་ཧས་པོ་རི་ལ་སྒོམ་སྒྲུབ་མཛད་པས་མཆོག་དང་ཐུན་མོང་གི་དངོས་གྲུབ་རྒྱུད་ལ་བརྙེས་པས་རྫུ་འཕྲུལ་
