བཀའ་རམས་པ་ཚུལ་ཁྲིམས་རབ་བརྟན་ལགས་ཀྱི་དེབ་གསར་དངོས་སུ་འགྲེམ་སྤེལ་ཞུས་པ།
བཀའ་རམས་པ་ཚུལ་ཁྲིམས་རབ་བརྟན་ལགས་ཀྱི་དེབ་གསར་<<ཐོས་བསམ་གྱི་གཤོག་ཟུང་>>ཞེས་པ་དངོས་སུ་འགྲེམ་སྤེལ་ཞུས།
པར་སྐྲུན་གསལ་བཤད།
བླ་མཚོ་མ་པང་གཡུ་མཚོ་ལས་གཏིང་ཟབ་ཅིང་། བླ་རི་གངས་དཀར་ཏི་སེ་ལས་དཔང་མཐོ་བའི་བོད་ཀྱི་ཤེས་རིག་ལོ་རྒྱུས་འཆད་རྒྱུ་ཡོད་པ་དེ་ནི་ཐུན་མིན་ཞང་བོད་ཀྱི་ཕ་ནོར་ཏེ་གྲུབ་མཐའི་རྒྱལ་པོ་སངས་རྒྱས་གཡུང་དྲུང་བོན་གྱི་བསྟན་པ་རིན་པོ་ཆེ་འདི་ཉིད་ཡིན་ལ། དེ་ནི་ཧི་མ་ཡའི་རི་རྒྱུད་དུ་ས་ཁྱབ་རྡོ་ཁྱབ་ཏུ་དར་བའི་གཞི་ལམ་འབྲས་གསུམ་དག་གི་གཏེར་མཛོད་དང་། རིག་པའི་གཞུང་ལུགས་ཀུན་གྱི་མ་མ་ལྟ་བུ་གྱུར། དེ་ཡང་གཙོ་བོ་བཀའ་དང་བཀའ་བརྟེན་གཉིས་ཀྱི་ཁྱབ་ཁོངས་སུ་འདུས་པའི་ལོ་རྒྱུས་དང། རིག་གཞུང། རྩོམ་རིག་དང་། སྐད་བརྡ། མཚན་ཉིད་དང། རྩིས་རིག གསོ་རིག་དང། བཟོ་རིག་སོགས་རིག་གནས་སྣ་མང་འདུས་པའི་རྣམ་པ་ཅན་ཞིག་ཏུ་ངོས་འཛིན་བྱེད་ཀྱི་ཡོད། དེ་ལྟར་ནའང་བོན་གྱི་རིག་གནས་ནི་ལོ་རྒྱུས་ཡུན་རིང་ཞིང་དུས་རབས་ཀྱི་འགག་འཕྲང་མང་པོ་བརྒྱུད་ནས་བྱུང་བ་ཞིག་ཡིན་སྟབས་བསྟན་པ་འདིར་ཚད་མེད་པའི་གོད་ཆགས་ཆེན་པོ་ཐེབས་པ་དེ་རྩམ་ཟན་ཀུན་གྱིས་མཁྱེན་དགོས་པར་སྨོས་སུ་མེད། དེས་ན་བསྟན་དང་འགྲོ་བའི་དོན་ཆེན་ཕྲག་ཏུ་བཞེས་པའི་༧སྐྱབས་རྗེ་རྒྱལ་བ་སྨན་རི་བའི་མཁན་སློབ་ཉི་ཟླ་ཟུང་འབྲེལ་གཙོས་པའི་གཡུང་དྲུང་བོན་གྱི་བླ་སྤྲུལ་སྐྱེས་ཆེན་དུ་མས་རྒྱལ་བའི་གསུང་རབ་ཁག་དཔར་དུ་བསྐྲུན་ཏེ། རྒྱལ་ཁབ་དུ་མའི་དཔེ་མཛོད་ཁང་རྣམས་སུ་འགྲེམས་སྤེལ་མཛད་པས། མཁས་དབང་མང་པོས་ཞིབ་འཇུག་དང་བདག་གཅེས་ཞུས་པ་མ་ཟད་བཤད་སྒྲུབ་ཀྱི་བསྟན་པ་སྤེལ་བ་ལ་མེད་དུ་མི་རུང་བའི་ཆ་རྐྱེན་ཞིག་ཏུ་གྱུར།
དེ་བཞིན་འདི་གའི་དཔེ་མཛོད་ཁང་གིས་ཕྱི་ལོ་ ༢༠༠༣ ནས་བཟུང་བོན་གྱི་གནའ་དཔེ་འཚོལ་སྡུད་དང་པར་སྐྲུན་བྱེད་པ་ནི་ཤིན་ཏུ་གལ་ཆེ་བར་བརྩིས་ཏེ་ཞང་བོད་དྲན་དབང་གསེར་རི་ཕྲེང་བའི་རྣམ་དཔྱོད་འོ་མཚོ་ལས་བཞུར་བའི་རྨད་བྱུང་ལེགས་བཤད་པོ་ཏི་དུ་མ་དེབ་གཟུགས་སུ་བསྒྱུར་ནས་རྒྱ་ཆེའི་གཟིགས་པ་པོ་རྣམས་ཀྱི་སྤྱན་ལམ་དུ་ཕུལ་དང་འབུལ་བཞིན་ཡོད་པ་ལས་སྐྱབས་རྗེ་མཁན་ཆེན་ལུང་རྟོགས་བསྟན་པ་གཡུང་དྲུང་རིན་པོ་ཆེས་དགོངས་བཞེད་ལྟར་མ་འོངས་ལས་འཆར་གྱི་ཁོངས་སུ། སློབ་ཐོན་པ་དང་སློབ་གཉེར་བ་རྣམས་ཀྱིས་གཞུང་འགྲེལ་གྱི་སྐོར་དང། དེ་མིན་རིག་གནས་སྐོར་དཔྱད་རྩོམ་བྲིས་པ་རྣམས་རིམ་པས་འདི་ནས་པར་སྐྲུན་ཞུ་རྒྱུའི་འཆར་གཞི་ཡོད་པ་གཞིར་བཟུང་ད་ལན་གདན་ས་དཔལ་ལྡན་ཁྲི་བརྟན་ནོར་བུའི་རྩེའི་བཀའ་རམས་པ་ཚུལ་ཁྲིམས་རབ་བརྟན་ལགས་ཀྱིས་བརྩམས་གནང་བའི་<<ཐོས་བསམ་གྱི་གཤོག་ཟུང་ >>ཞེས་པ་འདི་ཉིད་དཔེ་མཛོད་ཁང་ནས་པར་སྐྲུན་འགྲེམ་སྤེལ་ཞུས་ཡོད་པ་འདིས་བོད་ཀྱི་རིག་གནས་དང་ལོ་རྒྱུས་ཀྱི་སྟོང་ཆ་གང་འཚམས་ཤིག་ཁ་སྐོང་ཐུབ་རྒྱུའི་རེ་འདུན་དང་། རྣམ་དཀར་དགེ་བའི་ལེགས་ཚོགས་ཅི་མཆིས་སྐྱབས་རྗེ་མཁན་སློབ་རྣམ་པ་གཙོས་པའི་བསྟན་འཛིན་སྐྱེས་མཆོག་གང་ན་སུ་བཞུགས་པ་རྣམས་ཀྱི་སྐུ་ཚེའི་བར་ཆད་ཞི་ཞིང་མཛད་འཕྲིན་འཕེལ་བ་དང་། བཤད་སྒྲུབ་གྱི་བསྟན་པ་རིན་པོ་ཆེ་དར་ཞིང་རྒྱས་ལ་ཡུན་རིང་དུ་གནས་ཤིང་། ཡངས་པའི་འཇིག་རྟེན་གྱི་ཁམས་འདིར་ནད་མུག་འཁྲུགས་རྩོད་ཐམས་ཅད་མིང་མེད་དུ་ཞི་སྟེ་བདེ་སྐྱིད་དཔལ་ལ་རོལ་པའི་སྨོན་འདུན་དང་བཅས་དཔལ་ལྡན་ཁྲི་བརྟན་ནོར་བུའི་རྩེའི་དཔེ་མཛོད་ཁང་ནས་ཕྱི་ལོ་ ༢༠༢༤ ལོའི་ཟླ་ ༠༢ པའི་ཚེས་ ༢༤ ལ།
