ལེགས་བཤད་ལམ་རིམ་ལས། ” ཀྱཻ་མ་སྙིགས་དུས་འདིར་སྐྱེས་པའི། །ཁྲི་གཙུག་བསྟན་ལ་གཤེ་བ་ཚོལ། །དེས་ནི་བུ་ཚས་ཕ་ཁུ་ཡི། །རིགས་རྒྱུད་ངན་པ་བཤད་དང་མཚུངས། ། ” ཞེས་གསུངས་སོ། །

འདམ་སྟོན་རིན་པོ་ཆེའི་ཞལ་གདམས་བཞུགས།

རྩོམ་པ་པོ། འདམ་སྟོན་ཤེས་རབ་འོད་ཟེར།

༄༅། །མ་ངོ་བོ་ཀ་དག་བོན་གྱི་དབྱིངས། །བུ་རང་བཞིན་ལྷུན་གྲུབ་ལོངས་སྤྱོད་རྫོགས། །རྩལ་ངེས་མེད་རྒྱ་ཡན་ཅིར་ཡང་སྤྲུལ། །སེམས་ཡེ་ནས་སྐུ་གསུམ་རང་ཆས་ལ། །ཡིད་བདེན་ཞེན་མེད་པར་གསོལ་བ་འདེབས། །བློ་སྙེམས་བྱེད་མདུད་པ་བཀྲོལ་དུ་གསོལ། །གནས་པོམ་ར་གངས་ཀྱི་ཤེལ་ཕུག་ཏུ།། མི་མགོ་རླུང་ལངས་པའི་འདམ་སྟོན་ཁོང་། །དུས་སྔར་བྱས་ལས་ལ་འགྱོད་པ་མེད། །ད་ཕྱིར་འོངས་ལས་ལ་རེ་དོགས་མེད། །སེམས་རྩིས་གདབ་མེད་པའི་གླུ་ཅིག་ལེན། །ཡུལ་བཞི་ས་བྱ་སྤྱོད་མི་ཆེ་བ། །གྲྭ་ས་ཕ་ཡུལ་རྒྱབ་ཏུ་སྐྱུར། །ཕྱོགས་མེད་རྒྱལ་ཁམས་དང་དུ་བླངས། །གཉན་ས་རི་ཁྲོད་གང་བདེ་འགྲིམ།། ས་མཐའ་རུ་ཤི་ཡང་འགྱོད་རྒྱུ་མེད། །ལར་རྒྱལ་ཁམས་བསྐོར་བའི་སྣ་གཏད་ལ། །སྤྲང་ངོ་ཤེས་གཅིག་ལས་མི་གདའ་སྟེ། །རྐང་ཇེ་ཡང་སོང་བ་མ་གཏོགས་

པ། །གཞི་འདིར་བཅས་བསམ་པ་ང་ལ་མེད། །གནས་ངེས་མེད་བྱེད་པ་དེ་ཙུག་ལེགས། །ཉེ་འཁོར་སྐྱོང་དར་མི་མཁས་པས། །མང་པོའི་གསེབ་ནས་གཅིག་པུར་བུད། །ཕ་མ་གཉིས་དང་གསོན་བྲལ་བྱས། །ཆ་མེད་མི་དང་ཅི་བདེར་འགྲོགས། །འཁོར་མཁན་མེད་ཀྱང་འགྱོད་རྒྱུ་མེད། །ལར་རི་ལ་སྡོད་པའི་གྲོགས་པོ་ལ། །བློ་ཐག་ཆོད་གཅིག་ལས་མི་གདའ་སྟེ། །སོ་ཇི་གསོད་སོང་བ་མ་གཏོགས་པས། །གྲོགས་འདི་བཙལ་བསམ་པ་ང་ལ་མེད། །སྤྲང་གཅིག་སྡོམ་བྱེད་པ་དེ་ཙུག་ལགས། །ལོངས་སྤྱོད་བསགས་པ་མི་ཆེ་བས། །ཕྱི་རུ་ནོར་གྱི་ཚོལ་བསོགས་སྤངས། །ནང་དུ་འདོད་ཡོན་ཞེན་པ་བསྐྱུར། །ལྟོ་རྒྱབ་བུ་ལོན་སྤྲང་ལ་སྦྱར། །མུ་གེས་ཤི་ཡང་འགྱོད་རྒྱུ་མེད། །ཚེ་འདི་ལ་དགོས་པའི་ལོངས་སྤྱོད་ལ། །སྤྲང་བེར་རྒ་གཅིག་ལས་མི་གདའ་སྟེ། །ཆོག་ཇེ་ཤེས་སོང་བ་མ་གཏོགས་པས། །ནོར་འདི་བཙལ་བསམ་པ་ང་ལ་མེད། །ཚེ་སྤྲང་ལ་བསྐྱལ་བ་དེ་ཙུག་ལགས། །མི་ཆོས་ཆེ་ཐབས་མི་མཁས་པས། །ཚེ་འདི་མདུན་མ་རླུང་ལ་བསྐུར། །ཕུན་སུམ་ཚོགས་པའི་རེ་བ་བཏང་། །སྙན་གྲགས་ལོ་འདབ་ས་དང་བསྲེས། །མི་རྩིས་མེད་ཀྱང་འགྱོད་རྒྱུ་མེད། །ལར་མི་ཚེ་འཕྱིད་པའི་མདུན་མ་ལ། །བློ་ཐག་ཆོད་གཅིག་ལས་མི་གདའ་སྟེ། །སེམས་ཅི་བདེར་སོང་བ་མ་གཏོགས་པས། །ཐབས་ཇི་དྲག་བསམ་པ་ང་ལ་མེད། །གང་བྱུང་བྱེད་པ་དེ་ཙུག་ལགས། །སྙིང་རུས་བསྒོམ་བསྲན་མི་ཆེ་བས། །ཕུགས་སུ་སྡུག་བརྩིར་བཀག་འགོག་དང་། །རྟོག་པས་གདའ་དེད་བྱེད་མ་མྱོང་། །རིག་པ་གཅེར་བུར་ཅི་བདེར་སྐྱོངས། །ཉམས་ལེན་མེད་ཀྱང་འགྱོད་རྒྱུ་མེད། །ཚེ་ཕྱི་མར་དགོས་པའི་སྣ་གཏད་ལ། །སེམས་རྩ་བྲལ་གཅིག་ལས་མི་གདའ་སྟེ།། ཁམས་ཇེ་དྭངས་སོང་བ་མ་གཏོགས་པས། །ལར་འདི་བསྒོམ་བསམ་པ་ང་ལ་མེད། །བསྒོམ་བློ་ཟད་པ་དེ་ཙུག་ལགས། །ཚིག་ལྔ་ཚན་ལྔ་ཉིས་བཅུ་ཚན་གཅིག །སྤྲང་བྱེད་བློ་ཟད་པའི་ཉམས་མགུར་ཡིན། །སྤུན་དམ་ཚིག་གཅིག་པའི་གྲོགས་པོ་རྣམས། །ཟས་རམ་ཟན་ཞིམ་པའི་ཐིམ་ལེན་མཛོད། །དུས་གཏན་དུ་བདེ་བའི་སྨོན་ལམ་འདེབས། །

  ཕྱོགས་བཅུར་བཞུགས་པའི་དུས་གསུམ་རྒྱལ་བ་དང་། །བདེན་པའི་རྒྱ་མཚོ་ཟད་མེད་འཕྲུལ་ངག་བོན། །ས་ལམ་རྟོགས་པའི་དབང་ཕྱུག་རྒྱལ་སྲས་དང་། །ཐར་པའི་ལམ་མཆོག་སྟོན་པའི་བླ་མ་ལ། །སྒོ་གསུམ་གཏིང་ནས་གུས་པས་གསོལ་བ་འདེབས། །དུས་འབྲལ་མེད་རྒྱུན་དུ་ཐུགས་རྗེས་བཟུང་།། འབྲས་བུ་སྐུ་གསུམ་མངོན་དུ་གྱུར་པ་དང་། །ཁམས་གསུམ་རང་སར་གྲོལ་བར་བྱིན་གྱིས་རློབས། །ཁྱེད་སྐྱེ་ཤིའི་འཇིགས་པའི་གང་ཟག་རྣམས། །འཁོར་བའི་གྲོང་ཁྱེར་ཞིང་ས་གཤིན། །ངན་འགྲོའི་གཅོང་རོང་དུཿཁ་ཚ། །འཁྲུལ་པའི་ལས་སྣང་བསླུ་བ་མཁས། །རང་དབང་ཡོད་དུས་མནོ་བསམ་ཐོང་།། འཁྲུལ་སྣང་རྐྱེན་ཁར་མ་ཤོར་བར། །བྱང་ཆུབ་ལམ་སྣ་བཙལ་ན་ལེགས། །ད་རེས་བརྩོན་འགྲུས་རེམ་ཞིག་བུ། །སྣང་བ་རི་མོ་ལེགས་པ་འདི། །སྒྱུ་མ་མཁན་གྱི་ལྷ་ཁང་འདྲ། །ཚེ་འདི་འཁྲུལ་སྣང་དར་ཙམ་ཡིན། །བར་དོར་སྣང་བ་གཞན་ཞིག་འཆར། །སྙིང་པོ་མེད་པར་མནོ་བསམ་ཐོང་། །མི་ཚེ་ཆུད་ཟོས་མ་བྱེད་པར། །འཁྲུལ་སྣང་ད་ལྟ་བཅད་ན་ལེགས། །འདོད་ཡོན་ཞེན་ཆགས་སྤོངས་ཞིག་བུ། །ཆོག་ཤེས་མེད་པའི་ཟས་ནོར་འདི། །་མས་བསགས་པའི་སྦྲང་རྩི་འདྲ། །ཕུན་སུམ་ཚོགས་པ་དར་ཙམ་ཡིན། །སྡུག་བསོག་བྱས་ཀྱང་ཤུལ་དུ་ལུས། །དགོས་པ་མེད་པར་མནོ་བསམ་ཐོང་། །བསགས་པ་ཆུད་ཟོས་མ་བྱེད་པར། །མཆོད་སྦྱིན་ད་ལྟ་བྱས་ན་ལེགས། །ཚོལ་བསོག་གཏན་དུ་སྤོང་ཞིག་བུ། །འབྲལ་མི་ཕོད་པའི་ཉེ་དྲུང་འདི། །ཚོང་དུས་འཚོགས་པའི་གནས་མགྲོན་འདྲ། །ལན་ཆགས་འདེད་པའི་ཚོང་དུས་ཡིན། །སྔ་མའི་ཕ་མ་ཤི་ལགས་བསམ། །དགྲ་གཉེན་རེས་མོའི་མནོ་བསམ་ཐོང་། །མི་ལུས་ཆུད་ཟོས་མ་བྱེད་པར། །འཁོར་ངན་འབྲེལ་ཐག་བཅད་ན་ལེགས། །གཅིག་པུར་རི་ཁྲོད་འགྲིམ་ན་ལེགས། །ཤ་ཁྲག་རྒྱས་པའི་ལང་ཚོ་འདི། །ནམ་ཟླ་དབྱར་ཁའི་མེ་ཏོག་འདྲ། །ཁ་དོག་ལེགས་པ་དར་ཙམ་ཡིན། །ན་རྒ་འཆི་བ་དབང་མེད་འགྱུར། །ལོང་ཁོམ་མེད་པར་མནོ་བསམ་ཐོང་། །གཞོན་ནུ་ཆུད་ཟོས་མ་བྱེད་པར། དཀའ་བ་ད་ལྟ་བཅད་ན་ལེགས། །ལུས་ལ་རྟག་འཛིན་སྤོང་ཞིག་བུ། །དམ་ཚིག་མི་བསྲུང་ཕོ་བཟོ་མཐོ། །རབ་གནས་མེད་པའི་སྡེར་སོ་འདྲ། །སྐྱེ་མཆེད་ལེགས་ཀྱང་རྒྱལ་འགོང་རྟེན། །རང་གིས་གསང་ཡང་གཞན་གྱིས་ཁྲེལ། །ངན་སོང་འགྲོ་དོགས་མནོ་བསམ་ཐོང་། །དལ་འབྱོར་ཆུད་ཟོས་མ་བྱེད་པར།། སྡོམ་གསུམ་ད་ལྟ་བསྲུང་ན་ལེགས། །དམ་ཚིག་མིག་བཞིན་སྲུངས་ཞིག་བུ། །ཡོན་ཏན་མེད་པའི་སྙན་གྲགས་སྒྲུབ། །ཆར་བ་མེད་པའི་འབྲུག་དང་འདྲ།། རང་བདེ་གཞན་ལ་མི་ཕན་ན། །ལོང་བའི་ཚོང་དཔོན་བ་ལང་རྫི། །ལོང་བས་ལོང་ཁྲིད་མནོ་བསམ་ཐོང་། །སྤྱོད་ལམ་ཆུད་ཟོས་མ་བྱེད་པར། །ཆེ་བཅོས་ད་ལྟ་སྤང་ན་ལེགས། །དམན་པའི་སྤྲང་ཆས་ཟུང་ཞིག་བུ། །ཉམས་མྱོང་མེད་པའི་སྡོད་ཚུགས་བཟབ། །སྤང་ཕུག་ཉལ་བའི་ཕྱི་བ་འདྲ། །ལུས་བདེ་ཙམ་གྱི་སོ་སོད་པ། །སངས་རྒྱས་ལམ་དུ་བྱེད་པ་འཁྲུལ། །མལ་དུ་རུལ་བ་མནོ་བསམ་ཐོང་། །གདམས་ངག་ཆུད་ཟོས་མ་བྱེད་པར། །ཉེ་ལམ་ད་ལྟ་བཙལ་ན་ལེགས།། བླ་མ་བཅུད་ལྡན་བསྟེན་ཅིག་བུ། །རོ་སྙོམས་མི་ཐུབ་རྒྱལ་ཁམས་བསྐོར། །མེ་ནང་འཕྱོང་བའི་སྦྲང་མ་འདྲ། །སྡུག་བསྔལ་ལམ་དུ་མ་སློང་པར། །ཡུལ་དགུ་བསྐོར་བའི་ལྕིབ་པ་ཚོལ། །ས་མཐའི་རོ་འཁྱམས་མནོ་བསམ་ཐོང་། །རྩལ་སྦྱངས་ཆུད་ཟོས་མ་བྱེད་པར། །ཉམ་ང་ད་ལྟ་བཅད་ན་ལེགས། །སྐྱིད་སྡུག་རོ་སྙོམས་གྱིས་ཤིག་བུ། །ཐོས་པ་མེད་པའི་བསྒོམ་བློ་འདི། །རྐྱ་བ་མེད་པའི་གྲུ་དང་འདྲ། །གོལ་པའི་ཆུ་ཆེན་མ་བསྒྲལ་ན། །གྲོལ་བ་ཕ་རོལ་ཕྱིན་དུས་མེད།། སྤྲེའུ་ལྷ་བསྒོམ་མནོ་བསམ་ཐོང་། །ཤེས་རབ་ཆུད་ཟོས་མ་བྱེད་པར། །སྒྲོ་འདོགས་ད་ལྟ་བཅད་ན་ལེགས། །དང་པོ་ཐོས་བསམ་གྱིས་ཤིག་བུ། །སྒོམ་བྱུང་མེད་པའི་ཐོས་བསམ་འདི། །ཁ་བཤད་མཁས་པའི་ལོང་བ་འདྲ། །མིག་གིས་རི་འགོ་མི་མཐོང་བར། །ཁ་ཡིས་རྡུལ་ཕྲན་བགྲང་ལ་མཁས། །ཤེས་པ་དོན་མེད་མནོ་བསམ་ཐོང་། །སྒྲུབ་པ་ཆུད་ཟོས་མ་བྱེད་པར། །བདག་མེད་ད་ལྟ་བསྒོམ་ན་ལེགས། །བློ་ཕུགས་བསྒོམ་ལ་གཏོད་ཅིག་བུ། །ཐབས་ཤེས་ལེགས་པར་བཤད་པའི་ཚིག་སྡེབས་འདི། །གནས་པོམ་ར་གངས་ཀྱི་ཤེལ་ཕུག་ཏུ། །མི་འདམ་སྟོན་བཅོས་པའི་ཁ་འཆལ་ཡིན། །ཁྱེད་དགེ་སྦྱོར་བརྩོན་པའི་གྲོགས་པོ་རྣམས། །ལམ་ཐར་པ་བསྒྲོད་པའི་སྣ་ཁྲིད་མཛོད། །བྱུར་འཁོར་བ་ཟློག་པའི་དམག་དཔུང་མཛོད། །དགྲ་ཆགས་སྡང་གཅོད་པའི་དམག་དཔུང་མཛོད། །སེམས་འོད་གསལ་མཐོང་བའི་མེ་ལོང་མཛོད། །ཉམས་བྱིང་རྨུགས་སེལ་བའི་ཁྲུས་ཆབ་མཛོད། །བློ་འཐོར་ན་སྡུད་པའི་ཕྱག་མ་མཛོད། །ཡིད་རེང་ན་གནོན་པའི་གཉའ་ཤིང་མཛོད། །ཁམས་འཐིབ་ན་སེལ་བའི་སྒྲོན་མེ་མཛོད། །དོན་འཐད་ན་དགེ་སྦྱོར་གསལ་འདེབས་མཛོད། །ངག་འཆལ་ན་ཐུགས་རྗེས་བཟོད་པར་གསོལ། །ཟུར་ཕོག་ན་རང་སྐྱོན་གཏིང་ནས་ཐོན། །དུས་གཏན་དུ་བདེ་བའི་སྨོན་ལམ་ཞུ། །

(སྤྱིའི་གཟིགས་གྲངས། 53 དེ་རིང་། 1)

གཤམ་གྱི་རྩོམ་ཡིག་རྣམས་ལ་སྐུ་ཉིད་ཐུགས་མཉེས་པོ་ཡོང་སྲིད།

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།

མཚམས་སྦྱོར། རྩོམ་ཡིག་གོང་མ།
སྐྱབས་གནས་…
error: རྩོམ་འདི་བདག་དབང་ཅན་ཡིན།