ཤིས་སྨོན་མེ་ལོང་མདངས་འབྱིན།
ཁྱུང་ཁྲི་ལྡེ།
གནའ་དེ་སྲིད་པ་དང་པོ་དུས།།
ལྷུན་པོ་གངས་ཀྱི་ཀློང་རུམ་ནས།།
རིག་པའི་གཤོག་དྲུག་རྒྱས་པ་ཡི།།
ལྷོ་ཕྱོགས་འཛམ་བུའི་ཁྱུང་ཆེན་ཞིག།
གངས་ཀྱི་ལྕགས་རི་དཀར་པོའི་ནང་།།
མཁའ་ལ་འཕུར་བའི་གཤོགས་རླབས་དང་།།
དོག་ལ་བསྐྱོད་པའི་སྤར་མོ་ཡིས།།
སྲིད་པའི་ས་ཆེན་བཟུང་དེ་མཚར།།
གནའ་དེང་རིག་པའི་དབལ་སོ་དེ།།
དུས་རབས་འགྲོས་ཀྱི་བརྡར་རྡོ་ཡིས།།
དབུ་འཕང་གྱེན་དུ་བསྒྱུར་བའི་དུས།།
འདི་རུ་གོང་གི་ངོ་མཚར་འབར།།
ཡ་ཐོག་གཤེན་གྱི་ཞབས་རྗེས་དེ།།
མེ་ལོང་བདུན་གྱི་འོད་གུར་ནང་།།
ཇི་ལྟར་བཀྲ་བའི་ངོ་མཚར་གཟུགས།།
ཆུ་བུར་མིག་གི་ལོངས་སྤྱོད་བལྟམས།།
ཁ་བའི་རྣམ་ཤེས་ཕྲ་མོ་དེ།།
སྲིད་འདིར་འགུག་པའི་ལྕགས་ཀྱུ་སྟེ།།
མིག་ལ་སྟོན་ཞིང་རྣ་ལ་བླུག།
ཡིད་ལ་བསྒོ་བའི་ཚུལ་འདི་རྨད།།
ལྟོ་རྒྱབ་དྲོས་པའི་སྐད་ཆ་དང་།།
བག་ཁྲི་ཐོག་གི་གྲོས་ཆོས་ལ།།
ཕན་ནུས་མེད་པ་ཤེས་ཐོག་ནས།།
མདུན་བསྐྱོད་སེན་གང་བྱས་པ་རྨད།།
ཕྲག་དོག་རླུང་མཁྲིས་འཁྲུག་རྐྱེན་གྱིས།།
ཚོགས་དྲུག་འཁྲུལ་པའི་སྐྱེ་བོ་དག།
བདེན་གཏམ་ཞི་བྱེད་དྲུག་པོ་འདི།།
བཞེས་དང་འབྱུང་བཞི་ཁོད་སྙོམ་ནུས།།
འདི་ལྟའི་མཛད་ཕྲིན་ཟླ་བའི་གཟུགས།།
དྭངས་བའི་མཁའ་ལ་རྒྱུ་བའི་ཚེ།།
གཤེན་བསྟན་ཀུན་ད་དཀར་པོའི་ཚལ།།
མངོན་པར་བཞད་པའི་རྒྱུ་གྱུར་ཅིག།
