ལེགས་བཤད་ལམ་རིམ་ལས། ” ཀྱཻ་མ་སྙིགས་དུས་འདིར་སྐྱེས་པའི། །ཁྲི་གཙུག་བསྟན་ལ་གཤེ་བ་ཚོལ། །དེས་ནི་བུ་ཚས་ཕ་ཁུ་ཡི། །རིགས་རྒྱུད་ངན་པ་བཤད་དང་མཚུངས། ། ” ཞེས་གསུངས་སོ། །

གདན་ས་ཁྲི་བརྟན་ནོར་བུའི་རྩེ་ནས་མཉམ་མེད་དུས་ཆེན་སྲུང་བརྩི་ཞུས་པ།

ཞྭ་དཀར་གཡུང་དྲུང་བོན་གྱི་བསྟན་པའི་གཙུག་རྒྱན་སྲིད་གསུམ་འགྲོ་བའི་མགོན་པོ་༸རྗེ་མཁས་གྲུབ་སྤྱན་གཅིག་པ་མཉམ་མེད་ཤེས་རབ་རྒྱལ་མཚན་མཆོག་མདོ་ཁམས་རྒྱལ་མོ་རོང་གི་ས་ཡི་ཆར་མཚན་དཔེའི་དཀྱིལ་འཁོར་མངོན་པར་བཞད་ནས་མི་ལོ་ ༦༦༣ འཁོར་བའི་དུས་ཆེན་དང་བསྟུན། འདི་ག་གཡུང་དྲུང་བོན་གྱི་གདན་ས་ཆེན་མོ་དཔལ་ལྡན་ཁྲི་བརྟན་ནོར་བུའི་རྩེ་ནས་དུས་ཆེན་ཁྱད་པར་ཅན་དེ་ཉིད་སྲུང་བརྩི་ཟབ་རྒྱས་ཞུས་པའི་མཛད་རིམ་ནི།

འདི་ལོའི་ཧོར་ཟླ་༡།ཚེས༣།ཉིན་གཙུག་ལག་ཁང་དུ་མཆོད་རྫས་བཤམ་བཀོད་ཀྱི་རིམ་པ་གྲུབ་པར་བྱས། ཚེས་༤ཉིན་སྐྱབས་རྗེ་མཁན་ཆེན་ལུང་རྟོགས་བསྟན་པ་གཡུང་དྲུང་རིན་པོ་ཆེ་མཆོག་དང་། སྐྱབས་རྗེ་དཔོན་སློབ་ཚངས་པ་བསྟན་འཛིན་རིན་པོ་ཆེ། སྐྱབས་རྗེ་སྒྲུབ་གྲྭའི་མཁན་རིན་པོ་ཆེ། བཤད་སྒྲུབ་མཁན་སློབ་རྣམ་གཉིས་བཅས་མཁན་སློབ་རྣམས་པ་དབུ་བཞུགས་ཐོག་བསླབ་གསུམ་འདུས་སྡེ་རྒྱ་མཚོས་མདོ་གཡུང་དྲུང་ཀློང་རྒྱས་ཀྱི་དཀྱིལ་འཁོར་ཞལ་ཕྱེས་ཏེ་གཞུང་བསྲངས། ཚེས་ ༥ ཉིན་གྱི་སྔ་དྲོའི་ཕྱག་ཚོད་ ༩ ཐོག་རྣམ་དག་འདུལ་བའི་གསོ་སྦྱོང་འཚོགས། བསང་གསོལ་ཀླུང་རྟ་བསྒྲོན་ཏེ་བཀྲ་ཤིས་ཕྱེ་མར་མཆོད། དེ་རྗེས་མཉམ་མེད་སྐུ་བརྙན་རིན་པོ་ཆེ་གདན་དྲངས་ནས་སེར་ཕྲེང་ཕེབས་པ་དང་། འཆད་རྩོད་ཀྱི་བོན་དབྱངས་བསྒྲགས་ནས་བསྟན་པ་རྒྱས་པའི་སྨོན་ལམ་དབྱངས་སུ་གྱེར།གསོལ་ཚིགས་ཀྱི་བར་གསེང་དུ་རྗེ་རིན་པོ་ཆེའི་རྣམ་ཐར་བཀླགས་ཏེ་ངོ་མཚར་གྱི་མཛད་པ་རྗེས་དྲན་ཞུས། ཕྱག་ཚོད་༣་པར་བྱིན་རླབས་གོང་མའི་ཕྱག་སྲོལ་ཐུགས་དམ་བཅའ་ཡིག་རིན་པོ་ཆེ་བསྒྲགས། ཨ་སྙན་རྫོགས་གསུམ་གྱི་སྔོན་འགྲོ་དབྱངས་ནས་བརྒྱུད་པའི་བླ་མའི་བྱིན་རླབས་སེམས་ལ་བསྟིམས། དགོང་མོར་མཆོད་རྔ་བརྡུངས་ཏེ་རྔ་གཤང་རོལ་མོའི་བྱེ་བྲག་ཕྱོགས་མཚམས་ཀུན་ཏུ་འུར། དྲི་ཞིམ་སྤོས་ཀྱི་དུད་པས་ཁོར་ཡུག་ཁྱབ་པར་བྱས། མཉམ་མེད་སྐུ་བརྙན་རིན་པོ་ཆེ་ལ་སྐྱ་སེར་ཡོངས་ཀྱིས་མཇལ་དར་ཕུལ་ནས་ལུས་ཀྱི་བསྐོར་ཕྱག་དང་། ངག་གི་བཟླས་བརྗོད། ཡིད་ཀྱི་དད་མོས་བསྐྱེད་དེ་སྒོ་གསུམ་གྱི་འཇུག་སྒོ་བོན་ལ་བསྲེས། སྣང་གསལ་འོད་ཀྱི་མཆོད་པས་གཙུག་ལག་ཁང་གི་ཕྱི་ནང་ཡོངས་སུ་བལྟམས་པར་བྱས་ཏེ་དུས་ཆེན་ཁྱད་པར་དེ་ཉིད་སྲུང་བརྩི་ཞུས་པའི་གནས་བསྡུས་སུ་ཁྱུང་ཐོག་རྒོད་ནས། ༢༠༡༩། ༢། ༠༩ཉིན་སྤེལ།

པར་པ་ཁྱུང་ཐོག་རྒོད།

91024cookie-checkགདན་ས་ཁྲི་བརྟན་ནོར་བུའི་རྩེ་ནས་མཉམ་མེད་དུས་ཆེན་སྲུང་བརྩི་ཞུས་པ།
(སྤྱིའི་གཟིགས་གྲངས། 612 དེ་རིང་། 1)

གཤམ་གྱི་རྩོམ་ཡིག་རྣམས་ལ་སྐུ་ཉིད་ཐུགས་མཉེས་པོ་ཡོང་སྲིད།

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།

མཚམས་སྦྱོར། རྩོམ་ཡིག་གོང་མ།
གདན་ས་ཁྲི་…
error: རྩོམ་འདི་བདག་དབང་ཅན་ཡིན།