ལེགས་བཤད་ལམ་རིམ་ལས། ” ཀྱཻ་མ་སྙིགས་དུས་འདིར་སྐྱེས་པའི། །ཁྲི་གཙུག་བསྟན་ལ་གཤེ་བ་ཚོལ། །དེས་ནི་བུ་ཚས་ཕ་ཁུ་ཡི། །རིགས་རྒྱུད་ངན་པ་བཤད་དང་མཚུངས། ། ” ཞེས་གསུངས་སོ། །

གཤེན་རབ་མྱི་བོ་ཆེ།

རྩོམ་པ་པོ། འཕན་འོ་མཚོ།

བོན་སྐུ་ཡེ་མེད་སྟོང་ཆེན།།

རྫོགས་སྐུ་སྣང་རིག་ཁྱབ་ཆེན།།

སྤྲུལ་སྐུ་སྣང་སྟོང་རོལ་ཆེན།།

སྐུ་གསུམ་འཕྲོ་འདུ་སྒྱུར་ཆེན།།

སངས་ཁྲིའི་ཐུགས་ཀྱི་གཏེར་ཁྱིམ།།

གཏོ་སྒྲོམ་བཀའ་ཡི་ཕྱག་མཛོད།།

ཡིག་ཚང་སྲིད་པའི་ཆག་ཤིང་།།

གཤེན་རབ་མྱི་བོ་ཆེ་ལགས།།

གསས་མཁར་འབུམ་ཁྲིའི་ཀློག་ལྗགས།།

སྟོན་པ་རབས་དགུའི་བརྒྱད་བྱང་།།

བརྒྱ་བའི་རྣམ་པ་འདྲེན་མཛད།།

གསལ་བ་དམུ་རྒྱལ་སྲས་པོ།།

ལེགས་ཉེས་རྩིས་མཐོང་མེ་ལོང་།།

རྒྱུ་འབྲས་རྣམ་འབྱེད་ཐིག་ཤིང་།།

དམུ་རིགས་ཁྱུང་གི་གདུང་ཚ།།

སྟོན་པ་ཁྲི་གཙུག་རྒྱལ་བ།།

བྱམས་བརྩེའི་དྲོད་སྦྱིན་ཁྲི་གདུགས།།

རྟེན་འབྲེལ་ཙ་ཀྲའི་མུ་ཁྱུད།།

དཀའ་ཐུབ་ཀུན་བཟོད་མ་མ།།

མི་མཇེད་ཞིང་གི་འཁོར་སྒྱུར།།

མཚན་དཔེ་རབ་བཞད་ཁྱེའུ་ཆུང་།།

སྟོབས་བཅུ་མངའ་བའི་དབང་ཕྱུག །

དྲུང་མུ་གྱེར་ཙའི་སྒོ་འབྱེད།།

རྩོད་ལྡན་བརྒྱ་བའི་མགོན་པོ།།

གཏུམ་ཆེན་བདུད་རྗེ་ཁྱབ་པས།།

སྒྱུ་འཕྲུལ་ཟོལ་གྱིས་བརྔོད་པའི།།

གཏེར་སྒྲོམ་ཞུན་མའི་མདག་ནས།།

བསྐྱེད་པའི་དཔའ་བོ་འབྲུ་ལྔར།།

འབྱུང་ལྔ་དྭངས་མའི་བཅུད་དང་།།

ཐབས་ཤེས་ཟུང་འཇུག་རྩལ་ལས།།

བཏོད་པའི་འཕྲུལ་ཡིག་བཞི་བཅུ།།

བསྟན་པའི་མུན་སེལ་སྒྲོན་མ།།

སྣང་སྲིད་སྣོད་བཅུད་བཀོད་པ།།

འཕྲུལ་ཡིག་རིས་སུ་ཕབ་མཛད།།

ཤེས་རིག་དར་ལམ་རིང་མོ།།

ཕུག་གི་འོད་ཁྱིམ་དེར་ཐུག །

སྐྱེ་འགྲོའི་སྲོག་དབུགས་ཟ་བའི།།

བདུད་གདོན་བོན་པོ་ཆོམ་ཕབ།།

ཤ་དོད་གཏོར་མ་བསྔོ་བ།།

ཁྲག་ཚབ་གཡུ་ཏི་མཆོད་དོ།།

རི་ཀློང་དབེན་སའི་ཁྲོད་དུ།།

མི་དགེའི་རྩ་བ་མ་རིག །

བདག་འཛིན་གཏིང་གཅོད་གཉན་པོར།།

བྱ་སྤྲེལ་མི་ཡི་དཀའ་སྤྱད།།

འཕྱྭ་གཤེན་མོ་རྩིས་གཏོ་དཔྱད།།

སྣང་གཤེན་ཕྱ་གཡང་དཔལ་བསྐྱེད།།

འཕྲུལ་གཤེན་མདོས་ཡས་རྟེན་འཛུགས།།

སྲིད་གཤེན་འཆི་བསླུ་ཆུང་བཅོལ།།

དགེ་བསྙེན་ཚེས་ལམ་དུས་དག །

དྲང་སྲོང་སྤངས་ལམ་རྣམ་དག །

ཨ་དཀར་བསྒྱུར་ལམ་ཞིང་དག །

ཡེ་གཤེན་གྲོལ་ལམ་ཀ་དག །

པེའུ་ཙེ་བརྒྱད་ཁྲི་བཞི་སྟོང་།།

ཐོག་མ་ཐེག་པ་རིམ་དགུ།།

བར་མ་སྒོ་བཞི་མཛོད་ལྔ།།

མཐའ་མ་ཕྱི་ནང་གསང་གསུམ།།

ལྟ་བ་ཀུན་ཆུབ་རྫོགས་ཆེན།།

སྒོམ་པ་མཉམ་ཉིད་རོལ་ཆེན།།

སྤྱོད་པ་སྙོམས་འཇུག་མཛད་ཆེན།།

གཞི་དབྱིེངས་ཀུན་བཟང་ཀློང་ཆེན།།

ཕྱི་མཛོད་ཡིད་ཀྱི་ཁྱེའུ་ཆུང།།

ནང་མཛོད་རྨ་ལོ་གཡུ་ལོ།།

གསང་མཛོད་ཚངས་པ་ཨ་ཞ།།

དཀོར་མཛོད་ཀོང་ཙེ་འཕྲུལ་རྒྱལ།།

ལེའུ་གཏད་གཏོ་བུ་འབུམ་སངས།།

འཚོ་བྱེད་དཔྱད་བུ་ཁྲི་ཤེས།།

མཐོ་ཐོག་ལུང་འདྲེན་གསལ་བ།།

རྒྱལ་སོབ་མུ་ཆོ་ལྡེམ་དྲུག །

སྔགས་བསྡུ་རྒྱུད་འདྲེན་སྒྲོན་མ།།

ཕྱྭ་འབེབ་འོལ་དྲུག་ཐང་པོ།།

རྩིས་མཁན་ཀོང་ཚ་འཕྲུལ་ཆུང་།།

གདུང་འཛིན་གཡུང་དྲུང་དབང་ལྡན།།

ཕྱི་འཁོར་སེམས་དཔའ་ལྔ་སྟོང་།།

ནང་འཁོར་ཡི་དམ་བརྒྱ་རྩ།།

གསང་འཁོར་ཌཀྐི་སྡེ་ལྔ།།

ཡང་འཁོར་ཐིག་ལེ་ཉག་གཅིག །

མཛད་ཕྲན་སྟོང་ཕྲག་མཐའ་ཡས།།

མཛད་འབྲིང་ཡན་ལག་དྲུག་ཅུ།།

མཛད་ཆེན་ཕྲིན་ལས་བཅུ་གཉིས།།

མཛད་སྙིང་གཞན་ཕན་བྱང་སེམས།།

(སྤྱིའི་གཟིགས་གྲངས། 290 དེ་རིང་། 1)

གཤམ་གྱི་རྩོམ་ཡིག་རྣམས་ལ་སྐུ་ཉིད་ཐུགས་མཉེས་པོ་ཡོང་སྲིད།

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།

མཚམས་སྦྱོར། རྩོམ་ཡིག་གོང་མ།
གདན་ས་ཆེན་…
error: རྩོམ་འདི་བདག་དབང་ཅན་ཡིན།