ལེགས་བཤད་ལམ་རིམ་ལས། ” ཀྱཻ་མ་སྙིགས་དུས་འདིར་སྐྱེས་པའི། །ཁྲི་གཙུག་བསྟན་ལ་གཤེ་བ་ཚོལ། །དེས་ནི་བུ་ཚས་ཕ་ཁུ་ཡི། །རིགས་རྒྱུད་ངན་པ་བཤད་དང་མཚུངས། ། ” ཞེས་གསུངས་སོ། །

བརྒྱ་བཞིའི་ཡས་ལེན།

རྩོམ་པ་པོ། ཁྱུང་ཐོག་རྒོད་ཀྱིས་ཟུར་འདོན་བྱས།

ཀྱེའེ་སྣང་སྲིད་ལྷ་འདྲེ་ཚུར་གསོན་དང་།།
ཡས་བདུད་ཡས་ལེན་བྱོན་པ་ནི།།
ཉི་མ་ལ་ཁའི་གྲིབ་སོ་འདྲ།།
མ་བདུད་ཡས་ལེན་བྱོན་པ་ནི།།
བྱ་གཅན་གཟན་ལ་འཇུམ་པ་འདྲ།།
མ་མོའི་ཡས་ལེན་བྱོན་པ་ནི།།
མུན་པ་ནག་པོ་འཁྲིགས་པ་འདྲ།།
རྒྱལ་བློན་ཡས་ལེན་བྱོན་པ་ནི།།
ཉི་མ་ཤར་བའི་ཟེར་དང་འདྲ།།
སྲོག་བདག་ཡས་ལེན་བྱོན་པ་ནི།།
སེང་གི་གནམ་ལ་མཆོང་བ་འདྲ།།
བ་གར་ཡས་ལེན་བྱོན་པ་ནི།།
སེང་གེས་ཁྱི་གཟུགས་བྱེད་པ་འདྲ།།
གནམ་ཐེལ་ཡས་ལེན་བྱོན་པ་ནི།།
སྤྲེའུ་ཤིང་ཐོག་སྙབ་པ་འདྲ།།
ཀླུ་ཆེན་ཡས་ལེན་བྱོན་པ་ནི།།
མཚོ་མོ་རླབས་ཀྱིས་བསྐྱོད་པ་འདྲ།།
བཙན་གྱིས་ཡས་ལེན་བྱོན་པ་ནི།།
བྱ་ཁྲ་གཟན་ལ་འཇུམ་པ་འདྲ།།
གཟའ་ཡིས་ཡས་ལེན་བྱོན་པ་ནི།།
སྤྱང་ཀུ་ལུག་ལ་འཇབ་པ་འདྲ།།
སྐར་མ་ཡས་ལེན་བྱོན་པ་ནི།།
འཕར་བ་ར་ལ་འཇབ་པ་འདྲ།།
བསེན་མོའི་ཡས་ལེན་བྱོན་པ་ནི།།
བུ་མོས་རྩི་ཤིང་ཐུ་བ་འདྲ།།
སྨིན་གྱི་ཡས་ལེན་བྱོན་པ་ནི།།
ལྷ་ལྕམ་བག་ལ་འགྲོ་བ་འདྲ།།
དན་ཅན་ཡས་ལེན་བྱོན་པ་ནི།།
སྤྱང་ཀུས་མི་རོ་འདྲེད་པ་འདྲ།།
བདུད་ཀྱི་ཡས་ལེན་བྱོན་པ་ནི།།
གནོད་སྦྱིན་དམག་ལ་འགྲོ་བ་འདྲ།།
ལན་ཆག་བུན་ལོན་འཁེལ་བར་མཛོད།།

 དཔྱད་བརྗོད།

       མཚུངས་གསལ་གྱི་སྒྲ་སྦྱར་ཏེ་དཔེ་ཡིས་ལམ་ནས་བརྗོད་བྱའི་དོན་གྱི་ཉམས་ཐོན་པར་བྱས་ཡོད་པ་མ་ཟད། བསྡུས་བརྗོད་ལྟ་བུའི་ཚིག་གི་ཕག་ནས་དོན་གཞན་ཞིག་བཙལ་མི་དགོས་པ་དང་། མངོན་བརྗོད་ཀྱི་ཕྱི་སྐོགས་མ་སྦགས་པས་ཀློག་པ་པོ་སུ་ཞིག་ཡིན་རུང་བརྗོད་བྱའི་དོན་གསལ་ཝལ་ལེར་ཡིད་ལ་བཞེངས་ནུས། དཔེ་ལའང་འགའ་ཞིག་ནི་ཕལ་གྱི་བསམ་བློའི་འཆར་སྒོ་དང་འཚམས་པའི་ཁོར་ཡུག་ལས་སྦྱར་སྟེ། དཔེར་ན། ཉི་མ་ལ་ཁའི་གྲིབ་སོ། ཉི་མ་ཤར་བའི་ཟེར། མུན་པ་ནག་པོ་འཁྲིགས་པ། མཚོ་མོོ་རླབས་ཀྱིས་བསྐྱོད་པ་ལྟ་བུ་དང་། 

    འགའ་ཞིག་མཐོ་སྒང་གི་སྲོག་ཆགས་ཀྱི་བྱ་སྤྱོད་ལས་སྦྱར་སྟེ། སྤྲེལ་འུས་ཤིང་ཐོག་སྙབ་པ། བྱ་ཁྲ་གཟན་པ་འཇུམ་པ། སྤྱང་ཀུ་ལུག་ལ་འཇབ་པ། འཕར་བ་ར་ལ་འཇབ་པ། སྤྱང་ཀུས་མི་རོ་འདྲེད་པ་སོགས་མི་ཕལ་གྱིས་མྱོང་བ་དང་ཁ་ཐག་ཉེ་བའི་དངོས་པོ་འབའ་ཞིག་དཔེ་རུ་བཀོད་པས་དཔེ་ཡི་ལམ་ནས་དོན་གྱི་གོ་བ་རྙེད་པ་ཤིན་ཏུ་སླ། 

     འདིར་དཔེ་མཚོན་ཙམ་གྱིས་སྒོ་ནས་གོང་གི་ལུང་ཚིག་ཁ་ཤས་དྲངས་ཏེ་རྩོམ་འདིའི་ཉམས་ཀྱིས་ཀློག་པ་པོའི་དག་ལ་དགའ་སྐྱོའི་ཡིད་ཁམས་འདྲེན་ཚུལ་ཟུར་ཙམ་ཞིག་གླེང་བར་བྱ་སྟེ། དཔེར་ན། མ་མོའི་ཡས་ལེན་བྱོན་པ་ནི། མུན་པ་ནག་པོ་འཁྲིགས་པ་འདྲ། ལྟ་བུའི་ཚིག་དེའི་ཉམས་ཀྱིས་ཀློག་པ་པོའི་ཡིད་ལ་(མ་མོ་)ཟེར་བ་དེ་ནི་ཅི་འདྲའི་ངམ་ནག་པོ་ཞིག་གམ་འཇིགས་སུ་རུང་བ་ཞིག་ཡོད་པའི་ཚོར་བ་ཚ་བུང་ངེ་བ་ཞིག་འབྱིན་ནུས་པ་དང་། 

     གནམ་ཐེལ་ཡས་ལེན་བྱོན་པ་ནི། སྤྲེལ་འུས་ཤིང་ཐོག་སྙབ་པ་འདྲ། ཞེས་པའི་ཚིག་དེའི་ཉམས་ཀྱིས་བགད་འཆོར་དུ་འཇུག་སྟེ་(གནམ་ཐེལ་)ནི་ཅི་འདྲའི་པྲ་ཚག་ཞིག་དང་བསྟན་བཤིག་ཚ་བོ་ཞིག་རེད་ཨང་སྙམས་པའི་ཚོར་སྣང་གད་ཡལ་ལེ་བ་ཞིག་སྟེར་བར་འདུག 

     དམ་ཅན་ཡས་ལེན་བྱོན་པ་ནི། སྤྱད་ཁུའི་མི་རོ་འདྲེད་པ་འདྲ། ཞེས་(དམ་ཅན་)ནི་ཅི་འདྲའི་ཟས་དད་ཅན་ཞིག་མ་ཡིན་ནམ་སྙམས་པའམ་གལ་སྲིད་ཀློག་པ་པོ་དེ་ཧ་ཅང་ཟས་དད་ཅན་ཞིག་ཡིན་ན་ང་ཡང་དཔེ་དེ་དང་འདྲའོ་སྙམས་པའི་ངོ་གནོངས་དགོས་པ་ལྟ་བུའི་ཚོར་སྣང་འདྲེན་ནུས། 

    གནའ་རྩོམ་འདིའི་ནང་ང་ཚོ་ཕལ་གྱི་སྣང་ཡུལ་ལས་འགོང་པའི་མི་མ་ཡིན་དག་གི་བྱ་སྤྱོད་དང་སྣང་བརྙན་བཅས་དཔེ་ཡི་ལམ་ནས་གོ་བརྡ་འཕྲོད་པར་བྱས་ཡོད། 

15760cookie-checkབརྒྱ་བཞིའི་ཡས་ལེན།
(སྤྱིའི་གཟིགས་གྲངས། 5 དེ་རིང་། 1)

གཤམ་གྱི་རྩོམ་ཡིག་རྣམས་ལ་སྐུ་ཉིད་ཐུགས་མཉེས་པོ་ཡོང་སྲིད།

2 Responses

  1. གཤེན་ཚེ་ཚང་། ལགས་ཀྱིས:

    རྩོམ་དེ་ངོ་མ་རྩམ་དྲི་དང་མར་དྲི་ཐུལ་གྱིན་འདུག་བ།

  2. N.d.g. ལགས་ཀྱིས:

    ཧ་ཅང་གི་བཟང་གི ཁྱུང་ཐོད་རྒོད་ལགས། ཀླ་ཀློ་བས།

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།

མཚམས་སྦྱོར། རྩོམ་ཡིག་གོང་མ།
     རྩོམ་…