བསྐལ་ཁུག་སྟོན་པ་རྗེས་སུ་དྲན་པའི་ཀ་རྩོམ།
བསྐལ་ཁུག་སྟོན་པ་རྗེས་སུ་དྲན་པའི་ཀ་རྩོམ་རང་གཞན་སེམས་མཚོ་སྐྱོམ་པའི་རླབས་ཕྲེང་།
རྩོམ་པ་པོ། རིན་སྤུངས་ཚུལ་བསྟན།
ཀ་དག་བོན་ཅན་མཚན་མ་རྣམ་གྲོལ་ཀུན་བཟང་ཆེན་པོའི་རྒྱལ་ས་ཟིན། །
ཁ་དོག་མཚན་དཔེའི་དཔལ་འབར་སྣང་སྲིད་ཡེ་མཁྱེན་དབང་གི་རྒྱལ་པོར་གསོལ། །
ག་སར་ངེས་མེད་འགྲོ་འདུལ་ཐབས་མཁས་རྣམ་བཞི་འཕྲིན་ལས་བདག་གིར་བཞེས། །
ང་ཅག་བསྐལ་ཁུག་སྟོན་པ་ཡོངས་འཛིན་ཆེན་མོ་སྐྱབས་ཀྱི་མཆོག །
ཅ་དག་བསླབ་གསུམ་འདུས་སྡེ་རྒྱ་མཚོ་ཟབ་གསལ་བཀའ་དྲིན་མྱུར་བས་བསྐྱངས། །
ཆ་ཤས་ལྷག་མེད་མདོ་འབུམ་རྒྱུད་མཛོད་སྡེ་བཞིའི་བརྒྱུད་པ་བར་མེད་འཛིན། །
ཇ་ཧོང་མདངས་འཛིན་རིས་མེད་སྐྱེས་ཆེན་ཡོད་དོ་ཅོག་གི་གཙུག་རྒྱན་མཛད། །
ཉ་གང་ཟླ་ལྟར་བསྟན་འགྲོར་ཕན་བདེའི་བསིལ་ཟེར་སྣང་བ་ཁྱབ་པར་མཛད། །
ཏ་ཀྱོ་ལུང་རིགས་ངར་སྐད་དང་བཅས་ལུང་རྟོགས་བསྟན་པ་དག་ཐེར་མཛད། །
ཐ་དད་བོན་སྒོ་ཅིས་ཀྱང་མ་ལུས་འཆད་ཉན་སྒོམ་སྒྲུབ་དར་སྤེལ་གནང་། །
ད་ཙམ་མ་ཡིན་མི་ལོ་བརྒྱའི་རིང་བསྟན་དང་འགྲོ་བའི་དོན་ཆེན་བསྒྲུབས། །
ན་མོའི་ཡུལ་གྱུར་སྙིགས་དུས་འདི་རུ་ཁྱེད་ལས་གཞན་ན་ཡོད་མ་ཡིན། །
པ་སངས་ལྟར་དཀར་འགྲན་བྲལ་ཐུགས་སྟོབས་གྱེར་བསྟན་འཛམ་གླིང་ཁྱོན་དུ་བསྒྲགས། །
ཕ་རོལ་ཕྱིན་བཅུའི་ཡང་དག་འཕྲིན་ལས་སློབ་ཚོགས་ཁྲི་མ་འབུམ་ཚོ་འཁོར། །
བ་གའི་གནས་ལུགས་བླ་མེད་ཡང་རྩེ་ཐེག་པའི་དགོངས་རྟོགས་ཉམས་སུ་ཤར། །
མ་ལུས་ཀུན་མཁྱེན་བསྟན་པའི་བདག་ཉིད་དུས་ཀྱི་སྟོན་པ་སྐྱབས་ཀྱི་མཆོག །
ཙ་ཏུར་སྡུག་བསྔལ་གྱིས་མནར་འགྲོ་ཀུན་མུན་སེལ་ཁྲི་གདུགས་འོད་ཀྱིས་གསོས། །
ཚ་གྲང་ཁྱད་གསད་གངས་རིའི་གཤེན་བསྟན་མཁྱེན་དང་བརྩེ་བས་ཕྱོགས་བཅུར་སྤེལ། །
ཛ་དྲག་དུས་སུ་སྟོན་པ་གང་གིས་འཕྲུལ་ངག་བོན་གྱི་མཛོད་ཆེན་འཛིན། །
ཝ་ལེར་བསམ་བཞིན་བསམས་ན་བཀའ་དྲིན་བསྐལ་བརྒྱར་གསོབ་པའི་མཐའ་དང་བྲལ། །
ཞྭ་དཀར་བོན་བསྟན་དར་ཆེན་བསླངས་ཆེད་མཛད་འཕྲིན་མི་ལོ་བརྒྱ་ལྷག་བསྲིངས། །
ཟ་མའི་འགྲོ་ལ་མི་རྟག་སྟོན་ཕྱིར་རེ་ཞིག་མྱ་ངན་འདས་ཚུལ་བསྟན། །
འ་ཧོ་དགོངས་པ་བོན་ཉིད་དབྱིངས་གཤེགས་རང་ཅག་བུ་སློབ་རྗེས་འཇུག་རྣམས། །
ཡ་ཀི་རྒྱལ་པོ་མེད་པའི་ང་ཚོ་སྐྱབས་མེད་མགོན་མེད་ལྟ་བུར་གྱུར། །
ར་བ་གངས་བསྐོར་ཞིང་ཁམས་ཆེན་པོའི་རིས་མེད་གྲུབ་མཐའི་གཞུང་ལུགས་ཀུན། །
ལ་ཉེ་བཟང་པོས་མཁྱེན་དཔྱོད་བདག་བཞེས་གངས་རིའི་མ་ནོར་ཚིག་མཛོད་མཆོག །
ཤ་ཁྲག་ལུས་རྟེན་མི་ཡི་གཟུགས་ཀྱིས་མཁའ་སྤྱོད་ཞིང་དུ་སྐུར་གཤེགས་པ། །
ས་ལམ་རྩེར་རྫོགས་སངས་རྒྱས་སྨན་རིའི་ཡོངས་འཛིན་བླ་མ་སྙིང་ནས་དྲན། །
ཧ་དན་བོན་ཉིད་དབྱིངས་གཤེགས་སྐྱབས་རྗེ་ལུགས་བཟང་རྒྱལ་བ་སྨན་རི་བའི། །
ཨ་ཏོག་སུམ་ལྡན་སྨྲ་དབང་ཡོངས་འཛིན་དུས་ཀུན་བདག་སྙིང་བཞུགས་གསོལ་ཀྱེ། །
ཞེས་གསང་གསུམ་བོན་གྱི་མཛོད་འཛིན་ཆེན་མོ་༧སྐྱབས་རྗེ་རྒྱལ་བ་སྨན་རིའི་ཡོངས་འཛིན་སློབ་དཔོན་བསྟན་འཛིན་རྣམ་དག་རིན་པོ་ཆེ་མཆོག་གིས་མི་ལོ་བརྒྱ་ལྷག་རིང་ལ་བསྟན་འགྲོའི་དོན་དུ་མཛད་པ་འཕྲིན་ལས་བསྐྱངས་ཏེ། སླར་ཡང་རྟག་འཛིན་ཅན་རྣམས་སུན་ཕྱུངས་ཕྱིར་མི་རྟག་དགོངས་པ་བོན་དབྱིངས་སུ་སྐུ་ཞི་བར་གཤེགས་པའི་ཚུལ་བསྟན་པའི་སྐབས་འདི་ཙམ་ལ་བཀའ་དྲིན་རྗེས་དྲན་གྱི་དོད་དུ་༧སྐྱབས་རྗེ་མཆོག་གི་སྐྱབས་འོག་པ་གཡུང་དྲུང་བོན་མཉམ་འབྲེལ་ལྷན་ཚོགས་ཀྱི་དྲུང་ཆེའི་མིང་ཙམ་འཛིན་པ་གུས་རིན་སྤུངས་ཚུལ་བསྟན་ནས་ཕུལ།
