བོན་དྲིས་ལན་དྲ་བའི་འཚམས་འཕྲིན།
༧མཁྱེན་དཔྱོད་ཀྱི་བློ་གྲོས་མཆོག་ཏུ་མངའ་བའི་༼མེ་ལོང་ཡེ་ཤེས་༽དྲ་བའི་རྩོམ་སྒྲིག་པ་གཙོས་འབྲེལ་ཡོད་ལྷན་རྒྱས་རྣམ་པར་གུས་གསོལ།
དེ་ནས་རྣམ་པ་ཚོས་སྤྱིར་ཞང་བོད་ཁ་བ་རི་བའི་མེས་པོའི་ཤེས་རིག་དང་། སྒོས་སུ་བོད་གདོང་དམར་བའི་ཕ་ནོར་གཡུང་དྲུང་བོན་གྱི་གཞུང་ལུགས་དང་ལྟ་གྲུབ་རྣམས། རྒྱལ་སྤྱིའི་རིག་པའི་སྤྱི་སྟེགས་སུ་བརྗིད་པའི་མཁས་པའི་དབང་པོ་རྣམས་དང་། གཞུང་ལུགས་ཀྱི་མཚོ་མོར་འགྱིང་བའི་དམར་སེར་ངུར་སྨྲིག་གི་སྡེ་དང་། སློབ་གླིང་གི་ལྡུམ་རར་འཁྱུད་པའི་གསར་སྐྱེས་རིག་གསལ་གྱི་ཚོགས་རྣམས་ལ་དེང་རབས་ཆ་འཕྲིན་གྱི་དུས་རབས་དང་བསྟུན་ཏེ་ཁྱེད་རྣམ་པས་ངོ་སྤྲོད་གནང་སའི་དྲ་ཚིགས་ཆེན་མོ་༼མེ་ལོང་ཡེ་ཤེས་༽གསར་སྒྲུབ་གནང་བར་འདི་ག་༼བོན་གྱི་དྲིས་ལན་དྲ་མཛོད་༽ཀྱི་ཚོགས་མི་ཡོངས་ནས་དགའ་དད་སྤྲོ་གསུམ་གྱི་སྒོ་ནས་རྟེན་འབྲེལ་གྲངས་མེད་ཞུ་བཞིན་ཡོད།
དེ་དང་ཆབས་ཅིག་ཁྱེད་རྣམ་པའི་ཐོག་མའི་དམིགས་ཡུལ་བཞིན་དྲ་ཚིགས་ཆེན་མོ་འདིས་ཞང་བོད་ཀྱི་བྱུང་བ་བརྗོད་པ་རྣམས་མ་ཤེས་པ་ལ་ངོ་སྤྲོད་དང་། བརྗེད་ངན་དུ་སོང་བ་རྣམས་ལ་གསལ་གདབ་སོགས་ཀྱི་ཕན་པ་རླབས་ཆེན་འབྱུང་བར་གདོན་མི་ཟ་བས་དེ་ལུགས་དུས་དང་བསྟུན་ཏེ་འཛིན་སྐྱོང་གང་འགབ་ཡོང་བའི་སྨོན་འདུན་ཤུགས་དྲག་དང་བཅས།
བཀྲ་གསལ་ཞང་བོད་སླས་ཞིའི་ངོས་སུ་དེང་རབས་གསར་པའི་ཤེས་ཡོན་ལེགས། །
ཤིས་བརྗོད་སྨར་ཚིག་དགུང་དུ་སྨྲང་བས་ཚེ་ཡི་རིན་ཐང་ཀུན་ཏུ་བདེ། །
བདེ་འབྱིན་གྱེར་བསྟན་མཐའ་ནས་དར་བའི་ལྟས་བཟང་ནུབ་ཕྱོགས་དབུས་ན་ཤིས། །
ལེགས་ཚོགས་ཏིང་ཞིའི་མེ་ལོང་འོད་ཀྱིས་དུས་རབས་ཤིག་གི་སྒྲོན་མེར་བཀྲ། །
ཞེས་ཤིས་བརྗོད་བཀྲིས་པའི་གཡས་སྐོར་ཚིག་གིས་མཐའ་བརྒྱན་ཏེ་༼ བོན་གྱི་དྲིས་ལན་དྲ་མཛོད་ ༽ ཀྱི་རྩོམ་སྒྲིག་ཁང་ནས་ཕྱི་ལོ་ ༢༠༡༥ ཟླ་ ༩ ཚེས་ ༥ ཉིན་ཕུལ།