མཁྱེན་གསོལ་རྣམ་དག
མཁྱེན་གསོལ་རྣམ་དག་ཆུ་རྒྱུན་ཞེས་བྱ་བ་བཞུགས།
རྩོམ་པ་པོ། རྗེ་རིན་པོ་ཆེ་མཉམ་མེད་ཤེས་རབ་རྒྱལ་མཚན།
༄༅། །བླ་མ་ཡི་དམ་མཁའ་འགྲོ་གསུམ་ལ་ཕྱག་འཚལ་ལོ།། ཉམས་ཆག་བསྐང་བའི་ཚུལ་ལ། ཕྱི་ནང་གསང་བའི་མཆོད་རྫས་ཅི་འབྱོར་བཤམས་ཤིང་། ཐ་ནའང་མེ་མཆོད་ལ་སོགས་ལ་བརྟེན་ནས། བླ་མ་ཡི་དམ་འཁོར་དང་བཅས་པ་རྣམས། དམིགས་མེད་གནས་སུ་གསལ་བར་བསྐྱེད་ཅིང་བསྟིམ་ལ། རང་ཉིད་ཡི་དམ་དུ་གསལ་བས་མཆོད་རྫས་བྱིན་གྱིས་རླབས་ཤིང་། རྔ་གཤང་གི་སྒྲ་ཕྱུང་། ཉམས་རྟོགས་ཀྱི་ངར་འདོན། དྭངས་བའི་སེམས་བསྐྱེད་ལ། གདུང་བའི་དབྱངས་ཀྱིས་འདི་སྐད་དོ།། བསྭོ་ཁྱབ་བདལ་བདེ་ཆེན་གཞལ་ཡས་ནས། དཔོན་གསས་རིག་འཛིན་དགོངས་སུ་གསོལ། མཁའ་དབྱིངས་ཡོངས་རྫོགས་གསས་མཁར་ནས། ཕྱི་ནང་ལྷ་ཚོགས་དགོངས་སུ་གསོལ། མཁའ་སྤྱོད་ཉམས་དགའི་ཕོ་བྲང་ནས། མ་སྲིང་མཁའ་འགྲོ་དགོངས་སུ་གསོལ། འདས་དང་མ་འདས་སོ་མཚམས་ནས། བོན་སྐྱོང་དཔལ་མགོན་དགོངས་སུ་གསོལ། མ་རུང་དྲེགས་པའི་གནས་མཆོག་ནས། སྡེ་བརྒྱད་ཡུལ་ས་དགོངས་སུ་གསོལ། ཁམས་གསུམ་འཁོར་བའི་ཞིང་ཁམས་ནས། རིགས་དྲུག་སེམས་ཅན་དགོངས་སུ་གསོལ། དགོངས་ཤིག་དམ་ལྡན་གཤེན་ལ་དགོངས། གཟིགས་ཤིག་ལོངས་སྤྱོད་རྒྱན་ལ་གཟིགས། གསོན་ཞིག་བདེན་པའི་ཚིག་ལ་གསོན། བཞེས་ཤིག་མཆོད་རྫས་ལོངས་སྤྱོད་བཞེས། སྐོངས་ཤིག་ཉམས་ཆག་འགལ་འཁྲུལ་སྐོངས། སྦྱོངས་ཤིག་ལས་ཉོན་སྡིག་སྒྲིབ་སྦྱོངས། སྲུངས་ཤིག་བསྟན་པ་གཉན་པོ་སྲུངས། ཟློག་ཅིག་མི་མཐུན་བར་ཆད་ཟློག། སྒྲོལ་ཞིག་ལོག་འདྲེན་དགྲ་བགེགས་སྒྲོལ། མཛོད་ཅིག་བཅོལ་པའི་ཕྲིན་ལས་མཛོད། བསྭོ་མཁའ་དབྱིངས་ཡོངས་རྫོགས་ཕོ་བྲང་ནས། དཔོན་གསས་རིག་འཛིན་བརྒྱུད་པའི་ཚོགས། ཕྱི་ནང་ལྷ་ཚོགས་གཙོ་འཁོར་བཅས། སྐྱེ་མེད་དབྱིངས་ནས་མི་གཡོ་ཡང་། འགག་མེད་རོལ་པའི་སྐུར་བཞེངས་ལ། སྒྲུབ་གནས་གསང་བའི་ཕོ་བྲང་འདིར། ཐུགས་དམ་བསྐང་ཕྱིར་སྤྱན་འདྲེན་གྱིས། སེམས་ཅན་དོན་ཕྱིར་གཤེགས་སུ་གསོལ། གཉིས་མེད་དོན་གྱིས་བརྟན་པར་བཞུགས། སྒོ་གསུམ་དྭངས་བས་གུས་ཕྱག་འཚལ། ལས་ཉོན་སྡིག་སྒྲིབ་སོ་སོར་བཤགས། བྱང་དག་ཚངས་པའི་དངོས་གྲུབ་སྩོལ། བསྭོ་བསྐང་ངོ་ལྷ་སྲུང་ཐུགས་དམ་བསྐང་། བསྐང་བའི་དམ་རྫས་སྣ་ཚོགས་འདིས། ཚུལ་ཁྲིམས་ས་གཞི་ཝངས་སེ་ཝང་། ཏིང་འཛིན་རི་བོ་ཟངས་སེ་ཟང་། ཤེས་རབ་དཔག་བསམ་ལྡེམས་སེ་ལྡེམ། ཐོས་པའི་རྒྱ་མཚོ་མེ་རེ་རེ། བསམ་པའི་རྦ་རླབས་ཀྱི་ལི་ལི། སྒོམ་རྟོགས་ནོར་བུ་སྤུངས་སེ་སྤུང་། འཆད་པའི་འབྲུག་སྒྲ་ལྡི་རི་རི། རྩོམ་པའི་གཡུ་བུན་ཐུ་ལུ་ལུ་། རྩོད་པའི་ཐོག་སྒྲ་ཆེམས་སེ་ཆེམས། བསྐྱེད་པའི་སྐར་ཚོགས་ཁྲ་ལ་ལ། རྫོགས་པའི་འཇའ་འོད་ལམས་སེ་ལམ། ཟུང་འཇུག་ཉི་ཟླ་ལྷགས་སེ་ལྷག། བསྙེན་པའི་སྤྲིན་དཔུང་འཐིབས་སེ་འཐིབ། བསྒྲུབ་པའི་ཆར་ཆེན་སིབས་སེ་སིབ། ལས་སྦྱོར་གློག་དམར་ཁྱུགས་སེ་ཁྱུག། ལྟ་བའི་ཞུགས་མར་ཡ་ལ་ལ། སྤྱོད་པའི་སྒྲ་སྙན་ཁྲོ་ལོ་ལོ། སྒོམ་པའི་དྲི་བསུང་ཆི་ལི་ལི། དམ་ཚིག་ཡོན་ཆབ་འཁྱིལ་དེ་འཁྱིལ། འཕྲིན་ལས་འཕན་དར་ལྷུབས་སེ་ལྷུབ། གསལ་བའི་མེ་ཏོག་ཝལ་ཏེ་ཝལ། བདེ་བའི་གར་སྟབས་ལོགས་སེ་ལོག། མི་རྟོག་གཏེར་ཆེན་ལྷུབས་སེ་ལྷུབ། དུག་ལྔའི་དབལ་གཏོར་ཟངས་སེ་ཟང་། གཏི་མུག་ཤ་རི་ལིངས་སེ་ལིང་། འདོད་ཆགས་ཁྲག་མཚོ་ཀྱི་ལི་ལི། ཞེ་སྡང་རུས་བྲག་ཧྲངས་སེ་ཧྲང་། གསལ་སྟོང་སྨན་མཆོད་མེ་རེ་རེ། གྲགས་སྟོང་འཛབ་དབྱངས་འུ་རུ་རུ། རིག་སྟོང་ཚོགས་ཆེན་སྤུངས་སེ་སྤུངས། བདེ་སྟོང་སྦྱོར་བ་ཕྱོད་དེ་ཕྱོད། སྣང་སྟོང་སྒྲོལ་བ་ཤིགས་སེ་ཤིག། སྐྱེ་མེད་ལྷ་མོ་དུན་ནེ་དུན། འགག་མེད་ལྷ་སྲས་ཁྲིགས་སེ་ཁྲིག། འདི་ལྟར་བླ་མེད་མཆོད་སྤྲིན་འདིས། དཔོན་གསས་རིག་འཛིན་ཐུགས་དམ་བསྐང་། ཕྱི་ནང་ལྷ་ཚོགས་ཐུགས་དམ་བསྐང་། བོན་སྐྱོང་དཔལ་མགོན་ཐུགས་དམ་བསྐང་། ལྷ་སྲིན་སྡེ་བརྒྱད་ཐུགས་དམ་བསྐང་། ཡུལ་ས་ལྕམ་དྲལ་ཐུགས་དམ་བསྐང་། འགྲོ་བ་རིགས་དྲུག་ཐུགས་དམ་བསྐང་། བསྐང་བའི་འབྲས་བུ་མཆིས་པར་མཛོད་། དམ་བསྐང་དངོས་གྲུབ་བདག་ལ་སྩོལ། བསྭོ་བསྐང་ངོ་ཐུགས་དམ་གཉེན་པོ་བསྐངས། སྐུ་གསུམ་སངས་རྒྱས་ངོ་བོ་ཉིད་། བརྒྱུད་ལྡན་བླ་མའི་ཐུགས་དམ་བསྐང་། བསྟན་པ་མི་ནུབ་སྲོག་ཤིང་འཛིན། འདུལ་བརྒྱུད་མཁན་སློབ་ཐུགས་དམ་བསྐང་། ཡོན་ཏན་ཀུན་བསྐྱེད་ལུང་རིག་སྟོན། ཕྱི་རྒྱུད་བླ་མའི་ཐུགས་དམ་བསྐང་། གསང་བའི་སྔགས་འཛིན་དབང་བཞིའི་བདག། ནང་རྒྱུད་བླ་མའི་ཐུགས་དམ་བསྐང་། ཟབ་མོའི་དོན་རྟོགས་གནས་ལུགས་སྟོན། གསང་རྒྱུད་བླ་མའི་ཐུགས་དམ་བསྐང་། ཟབ་དོན་སྟོན་པའི་བཀའ་དྲིན་ཅན། བཀའ་རྒྱུད་བླ་མའི་ཐུགས་དམ་བསྐང་། ཉམས་རྟོགས་བསྐྱེད་པའི་ཐུགས་རྗེ་ཅན། དགོངས་རྒྱུད་བླ་མའི་ཐུགས་དམ་བསྐང་། བར་ཆད་སེལ་མཛད་བྱིན་རླབས་ཅན། སྒྲུབ་རྒྱུད་བླ་མའི་ཐུགས་དམ་བསྐང་། རྒྱུད་ལུང་མན་ངག་སྟོན་པའི་དཔལ། དྲིན་ཅན་བླ་མའི་ཐུགས་དམ་བསྐང་། མན་ངག་བྱིན་རླབས་འབྱུང་བའི་གནས། རྩ་བའི་བླ་མའི་ཐུགས་དམ་བསྐང་། དཔོན་གསས་རིག་འཛིན་ཐུགས་རྗེ་ཅན། ཐུགས་རྗེའི་སྤྲིན་དཔུང་མཁའ་ལ་གཏིབས། བྱིན་རླབས་ཆར་ཆེན་བདག་ལ་ཕོབས། དོན་གཉིས་མཐར་ཕྱིན་དངོས་གྲུབ་སྩོལ། གཞན་ཡང་ཐུགས་དམ་བསྐང་བ་ནི། ཕྱི་ནང་ལྷ་ཚོགས་ཐུགས་དམ་བསྐང་། ས་ཏྲིག་ཨེར་སངས་ལ་སོགས་ཏེ། ཀློང་ཡངས་ལྷ་ཚོགས་ཐུགས་དམ་བསྐང་། བདེར་གཤེགས་གཙོ་བཞི་ལ་སོགས་ཏེ། ཀློང་རྒྱས་ལྷ་ཚོགས་ཐུགས་དམ་བསྐང་། སྐུ་གསུམ་མེ་ལྷ་ལ་སོགས་ཏེ། རྒྱུན་གྱི་ལྷ་ཚོགས་ཐུགས་དམ་བསྐང་། ཀུན་ཏུ་བཟང་པོ་ལ་སོགས་ཏེ། ཞི་བའི་ལྷ་ཚོགས་ཐུགས་དམ་བསྐང་། ཀུན་སྣང་ཁྱབ་པ་ལ་སོགས་ཏེ། རྒྱས་པའི་ལྷ་ཚོགས་ཐུགས་དམ་བསྐང་། གཙོ་མཆོག་