མཁྱེན་གསོལ་རྣམ་དག
མཁའ་འགྱིང་ལ་སོགས་ཏེ། དབང་གི་ལྷ་ཚོགས་ཐུགས་དམ་བསྐང་། དབལ་གསས་རྔམ་པ་ལ་སོགས་ཏེ། དྲག་པོའི་ལྷ་ཚོགས་ཐུགས་དམ་བསྐང་། འབྲུག་གསས་ཆེམ་པ་ལ་སོགས་ཏེ། དབལ་ཕུར་ལྷ་ཚོགས་ཐུགས་དམ་བསྐང་། མགོན་པོ་རྣམ་གསུམ་ལ་སོགས་ཏེ། གེ་ཁོད་ལྷ་ཚོགས་ཐུགས་དམ་བསྐང་། གསང་མཆོག་མཐར་ཐུག་ལ་སོགས་ཏེ། མ་རྒྱུད་ལྷ་ཚོགས་ཐུགས་དམ་བསྐང་། ཆེ་མཆོག་མཁའ་འགྱིང་ལ་སོགས་ཏེ། རོལ་པའི་ལྷ་ཚོགས་ཐུགས་དམ་བསྐང་། གཡུ་འབྲང་ཕྱུག་མོ་ལ་སོགས་ཏེ། བདུད་རྩིའི་ལྷ་ཚོགས་ཐུགས་དམ་བསྐང་། རགྴ་དབུ་འབུམ་ལ་སོགས་ཏེ། སྤྱི་འདུལ་ལྷ་ཚོགས་ཐུགས་དམ་བསྐང་། སྟག་ལ་མེ་འབར་ལ་སོགས་ཏེ། སྤུ་གྲིའི་ལྷ་ཚོགས་ཐུགས་དམ་བསྐང་། ཁོད་སྤུངས་དྲན་པ་ལ་སོགས་ཏེ། དཔོན་གསས་རིག་འཛིན་ཐུགས་དམ་བསྐང་། བསྐལ་པ་བཟང་མོ་ལ་སོགས་ཏེ། མ་སྲིང་མཁའ་འགྲོའི་ཐུགས་དམ་བསྐང་། ཚེ་དབང་རིག་འཛིན་ལ་སོགས་ཏེ། དཔའ་བོ་གྲུབ་ཐོབ་ཐུགས་དམ་བསྐང་། ཐུགས་རྗེ་ཀུན་གྲོལ་ལ་སོགས་ཏེ། དཔའ་མོ་རྒོད་ལྕམ་ཐུགས་དམ་བསྐང་། ཕྱི་ནང་ལྷ་ཚོགས་བྱིན་རླབས་ཅན། མཆོག་ཐུན་དངོས་གྲུབ་ཆར་ལྟར་ཕོབས། ཕྱི་ནང་གསང་བའི་བར་ཆད་སོལ། ཞི་རྒྱས་དབང་དྲག་དངོས་གྲུབ་སྩོལ། གཞན་ཡང་ཐུགས་དམ་བསྐང་པ་ནི། བོན་སྐྱོང་སྲུང་མའི་ཐུགས་དམ་བསྐང་། སྲིད་པའི་རྒྱལ་མོ་ལ་སོགས་ཏེ། བསྟན་སྲུང་གཏེར་བདག་ཐུགས་དམ་བསྐང་། ལྷ་མོ་མདངས་ལྡན་ལ་སོགས་ཏེ། དུས་དྲུག་མ་མོའི་ཐུགས་དམ་བསྐང་། དཀར་མོ་སྲིད་རྒྱལ་ལ་སོགས་ཏེ། བྱ་རའི་མ་ཚོགས་ཐུགས་དམ་བསྐང་། གཉན་རྗེ་གོང་སྔོན་ལ་སོགས་ཏེ། ཆེ་བ་གཉན་ཁམས་ཐུགས་དམ་བསྐང་། འབྱམས་པ་ཁྲག་མགོ་ལ་སོགས་ཏེ། དྲག་རྩལ་བདུད་ཁམས་ཐུགས་དམ་བསྐང་། ཆེ་བཙན་དམག་དཔོན་ལ་སོགས་ཏེ། མགྱོགས་པ་བཙན་ཁམས་ཐུགས་དམ་བསྐང་། མ་བདུད་སྲིད་རྒྱལ་ལ་སོགས་ཏེ། ཡུམ་སྲས་སྡེ་ལྔའི་ཐུགས་དམ་བསྐང་། སྒྲ་བླའི་རྒྱལ་མོ་ལ་སོགས་ཏེ། སྦོད་སྟོང་མ་མོའི་ཐུགས་དམ་བསྐང་། ཉི་པང་སད་ཝེར་ལ་སོགས་ཏེ། རྒྱལ་པོའི་སྡེ་ཚོགས་ཐུགས་དམ་བསྐང་། སྐྱེས་བུ་ཆེན་པོ་ལ་སོགས་ཏེ། ཕོ་ཉ་ཚོང་དཔོན་ཐུགས་དམ་བསྐང་། མ་ལྟར་བྱམས་པའི་ཐུགས་དམ་བསྐང་། སྲིང་ལྟར་གདུང་བའི་ཐུགས་དམ་བསྐང་། གྲོགས་ལྟར་བརྩེ་བའི་ཐུགས་དམ་བསྐང་། བོན་སྐྱོང་སྲུང་མ་མཐུ་རྩལ་ཅན། བསྟན་པ་བོན་གྱི་རྒྱལ་མཚན་ཕྱོར། སྡང་དགྲ་གནོད་བགེགས་བརླག་པར་མཛོད། ཚེ་དབང་མཐུ་རྩལ་དངོས་གྲུབ་སྩོལ། གཞན་ཡང་ཐུགས་དམ་བསྐང་བ་ནི། འཇིག་རྟེན་དཔལ་མགོན་ཐུགས་དམ་བསྐང་། ལྷ་དབང་བརྒྱ་བྱིན་ལ་སོགས་ཏེ། ལྷ་ཆེན་བརྒྱད་ཀྱི་ཐུགས་དམ་བསྐང་། གཙུག་ན་རིན་ཆེན་ལ་སོགས་ཏེ། ཀླུ་ཆེན་བརྒྱད་ཀྱི་ཐུགས་དམ་བསྐང་། ཁྱབ་འཇུག་ཆེན་པོ་ལ་སོགས་ཏེ། གཟའ་ཆེན་བརྒྱད་ཀྱི་ཐུགས་དམ་བསྐང་། ལྷ་སྲས་ཉི་ཟླ་ལ་སོགས་ཏེ། ཕྱོགས་སྐྱོང་བཅུ་ཡི་ཐུགས་དམ་བསྐང་། ཤེལ་དཀར་ཐོད་རྡིང་ལ་སོགས་ཏེ། རྒྱལ་ཆེན་བཞི་ཡི་ཐུགས་དམ་བསྐང་། ནོར་བཟང་གང་བཟང་ལ་སོགས་ཏེ། གནོད་སྦྱིན་ནོར་བདག་ཐུགས་དམ་བསྐང་། སྨིན་དྲུག་སྣར་མ་ལ་སོགས་ཏེ། གཟའ་དང་རྒྱུ་སྐར་ཐུགས་དམ་བསྐང་། འཇིག་རྟེན་དཔལ་མགོན་རྫུ་འཕྲུལ་ཅན། དཀར་པོ་དགེ་བའི་སྡོང་གྲོགས་མཛོད་། བསོད་ནམས་ལོངས་སྤྱོད་རྒྱས་པར་སྤེལ། བཀྲ་ཤིས་བདེ་སྐྱིད་དངོས་གྲུབ་སྩོལ། གཞན་ཡང་ཐུགས་དམ་བསྐང་བ་ནི། ལྷ་སྲིན་སྡེ་བརྒྱད་ཐུགས་དམ་བསྐང་། ཚངས་པ་ཆེན་པོ་ལ་སོགས་ཏེ། ལྷ་ཡི་སྡེ་ཚོགས་ཐུགས་དམ་བསྐང་། ཐང་བཟང་རིང་སྐྱེས་ལ་སོགས་ཏེ། ལྷ་མིན་སྡེ་ཚོགས་ཐུགས་དམ་བསྐང་། རི་སྟེ་མགོ་ཉག་ལ་སོགས་ཏེ། བདུད་ཀྱི་སྡེ་ཚོགས་ཐུགས་དམ་བསྐང་། གབ་པ་ལི་ཏོར་ལ་སོགས་ཏེ། དམུ་ཡི་སྡེ་ཚོགས་ཐུགས་དམ་བསྐང་། སྐྱ་ཏྲང་ཆེན་པོ་ལ་སོགས་ཏེ། རྒྱལ་པོའི་སྡེ་ཚོགས་ཐུགས་དམ་བསྐང་། མཁའ་ལྡིང་རྒྱལ་པོ་ལ་སོགས་ཏེ། དྲི་ཟའི་སྡེ་ཚོགས་ཐུགས་དམ་བསྐང་། ཏྲང་རུམ་རྗེ་བོ་ལ་སོགས་ཏེ། གནོད་སྦྱིན་སྡེ་ཚོགས་ཐུགས་དམ་བསྐང་། བྱིན་ན་ཡ་ག་ལ་སོགས་ཏེ། བགེགས་ཀྱི་སྡེ་ཚོགས་ཐུགས་དམ་བསྐང་། སྤར་བ་དུང་མགོ་ལ་སོགས་ཏེ། གཉན་གྱི་སྡེ་ཚོགས་ཐུགས་དམ་བསྐང་། རྒྱལ་བ་བྱིན་ཆགས་ལ་སོགས་ཏེ། ཀླུ་ཡི་སྡེ་ཚོགས་ཐུགས་དམ་བསྐང་། ཙང་ཙང་འཁོར་བ་ལ་སོགས་ཏེ། ས་བདག་སྡེ་ཚོགས་ཐུགས་དམ་བསྐང་། ལྷ་སྲིན་སྡེ་བརྒྱད་ཐ་ཚིག་ཅན། སྔོན་གྱི་ཐ་ཚིག་མ་འདའ་བར། གནོད་པའི་ཡིད་དང་བྲལ་ནས་ཀྱང་། སྐྱོབས་པའི་སེམས་དང་ལྡན་པར་མཛོད་། གཞན་ཡང་ཐུགས་དམ་བསྐང་བ་ནི་། ཡུལ་ས་གཞི་བདག་ཐུགས་དམ་བསྐང་། རྨ་གཉན་པོམ་ར་ལ་སོགས་ཏེ། ལྷ་འཁོར་འབུམ་གྱི་ཐུགས་དམ་བསྐང་། ཐང་ལྷ་ཡར་ཞུགས་ལ་སོགས་ཏེ། མགུར་ལྷ་བཅུ་གསུམ་ཐུགས་དམ་བསྐང་། ཤ་མེད་གངས་དཀར་ལ་སོགས་ཏེ། འཇིག་རྟེན་སྨན་བཙུན་ཐུགས་དམ་བསྐང་། ནམ་མཁའི་དབྱིངས་ན་གནས་པ་ཡི། ལྷ་ཡི་སྡེ་ཚོགས་ཐུགས་དམ་བསྐང་། བར་སྣང་ཁམས་ལ་གནས་པ་ཡི། གཉན་གྱི་སྡེ་ཚོགས་ཐུགས་དམ་བསྐང་། ས་གཞིའི་ཁམས་ལ་གནས་པ་ཡི། ས་བདག་སྡེ་ཚོགས་ཐུགས་དམ་བསྐང་། རྒྱ་མཚོའི་ཀློང་ལ་གནས་པ་ཡི། ཀླུ་ཡི་སྡེ་ཚོགས་ཐུགས་དམ་བསྐང་། ཡུལ་ཁམས་འདི་ལ་མངའ་མཛད་པའི། ཡུལ་ས་ལྕམ་དྲལ་ཐུགས་དམ་བསྐང་། ཡུལ་ས་གཞི་བདག་དྲག་རྩལ་ཅན། གནས་མགྲོན་ཐ་ཚིག་གཉན་པོ་སྲུངས། བསྙེན་སྒྲུབ་ལས་སྦྱོར་མྱུར་བར་མཛོད་། བསམ་དོན་འགྲུབ་པའི་དངོས་གྲུབ་སྩོལ། གཞན་ཡང་ཐུགས་དམ་བསྐང་བ་ནི། རིགས་དྲུག་སེམས་ཅན་ཐུགས་དམ་བསྐང་། ལྷ་ཡི་སྡེ་རིགས་ཐུགས་དམ་བསྐང་། ཕམ་ལྟུང་སྡུག་བསྔལ་ཞི་བར་ཤོག། ལྷ་མིན་སྡེ་ཚོགས་ཐུགས་དམ་བསྐང་། འཐབ་རྩོད་སྡུག་བསྔལ་ཞི་བར་ཤོག། མི་ཡི་སྡེ་རིགས་ཐུགས་དམ་བསྐང་། འཕོ་འགྱུར་སྡུག་བསྔལ་ཞི་བར་ཤོག། བྱོལ་སོང་སྡེ་རིགས་ཐུགས་དམ་བསྐང་། གླེན་ལྐུགས་སྡུག་བསྔལ་ཞི་བར་ཤོག། ཡི་དྭགས་སྡེ་རིགས་ཐུགས་དམ་བསྐང་། བཀྲེས་སྐོམ་སྡུག་བསྔལ་ཞི་བར་ཤོག། དམྱལ་བའི་སྡེ་རིགས་ཐུགས་དམ་
