མཁྱེན་གསོལ་རྣམ་དག
བསྐང་། ཚ་གྲང་སྡུག་བསྔལ་ཞི་བར་ཤོག། དེ་དག་མྱུར་དུ་ཞི་ནས་ཀྱང་། དལ་འབྱོར་ཕུན་ཚོགས་ཀུན་ལྡན་ནས། མཐོ་རིས་ཐར་པའི་ལམ་ཕྱེད་ཅིང་། བདེ་ཆེན་བྱང་ཆུབ་མྱུར་ཐོབ་ཤོག། བསྭོ་བསྐང་ངོ་ལྷ་ཚོགས་ཐུགས་དམ་བསྐང་། བསླབ་གསུམ་དག་པས་ཐུགས་དམ་བསྐང་། སྤྱི་ཡི་ཆག་ཉམས་བསྐང་གྱུར་ཅིག། ཐོས་བསམ་སྒོམ་པས་ཐུགས་དམ་བསྐང་། ལྷག་པའི་ཆག་ཉམས་བསྐང་གྱུར་ཅིག། འཆད་རྩོད་རྩོམ་པས་ཐུགས་དམ་བསྐང་། ཁྱད་པར་ཆག་ཉམས་བསྐང་གྱུར་ཅིག། བསྐྱེད་རྫོགས་ཟུང་འཇུག་ཐུགས་དམ་བསྐང་། རྩ་བའི་ཆག་ཉམས་བསྐང་གྱུར་ཅིག། བསྙེན་སྒྲུབ་ལས་སྦྱོར་ཐུགས་དམ་བསྐང་། ཡན་ལག་ཆག་ཉམས་བསྐང་གྱུར་ཅིག། རྣམ་བརྒྱད་འདོད་ཡོན་ཐུགས་དམ་བསྐང་། ཉིང་ལག་ཆག་ཉམས་བསྐང་གྱུར་ཅིག། འབན་བཤོས་གཏོར་མས་ཐུགས་དམ་བསྐང་། ལོ་མའི་ཆག་ཉམས་བསྐང་གྱུར་ཅིག། ཤ་ཁྲག་རུས་པས་ཐུགས་དམ་བསྐང་། གསང་བའི་ཆག་ཉམས་བསྐང་གྱུར་ཅིག། བདུད་རྩི་སྨན་གྱིས་ཐུགས་དམ་བསྐང་། བསྒྱུར་བའི་ཆག་ཉམས་བསྐང་གྱུར་ཅིག། འཕྲོ་འདུ་འཛབ་ཀྱིས་ཐུགས་དམ་བསྐང་། སྤྱོད་པའི་ཆག་ཉམས་བསྐང་གྱུར་ཅིག། ལོངས་སྤྱོད་ཚོགས་ཀྱིས་ཐུགས་དམ་བསྐང་། མི་འདའི་ཆག་ཉམས་བསྐང་གྱུར་ཅིག། སྦྱོར་སྒྲོལ་ཟབ་མོས་ཐུགས་དམ་བསྐང་། སྤངས་པའི་ཆག་ཉམས་བསྐང་གྱུར་ཅིག། ཕྱག་རྒྱ་བརྡའ་ཡིས་ཐུགས་དམ་བསྐང་། ལུས་ཀྱི་ཆག་ཉམས་བསྐང་གྱུར་ཅིག། སྙིང་པོ་དབྱངས་ཀྱིས་ཐུགས་དམ་བསྐང་། ངག་གི་ཆག་ཉམས་བསྐང་གྱུར་ཅིག། ཏིང་འཛིན་དགོངས་པས་ཐུགས་དམ་བསྐང་། ཡིད་ཀྱི་ཆག་ཉམས་བསྐང་གྱུར་ཅིག། ཉམས་པ་ཐམས་ཅད་གནོང་བས་མཐོལ། ཆག་པ་ཐམས་ཅད་འགྱོད་པས་བཤགས། འགལ་འཁྲུལ་ཐམས་ཅད་མཆོད་པས་བསྐངས། བྱང་དག་མཆོག་གི་དངོས་གྲུབ་སྩོལ། བསྭོ་བསྐང་ངོ་ལྷ་སྲུང་ཐུགས་དམ་བསྐང་། བཤགས་སོ་བདག་གི་སྡིག་སྒྲིབ་བཤགས། ལྟ་བ་ལོག་པ་བསྐང་ངོ་བཤགས། སྒོམ་པ་གོལ་བ་བསྐང་ངོ་བཤགས། སྤྱོད་པ་རྩིང་བ་བསྐང་ངོ་བཤགས། དམ་ཚིག་ཆག་ཉམས་བསྐང་ངོ་བཤགས། ཕྲིན་ལས་ནོར་འཁྲུལ་བསྐང་ངོ་བཤགས། གསང་སྒོམ་འཆལ་བ་བསྐང་ངོ་བཤགས། ཟབ་དོན་ཁྲོམ་བཤད་བསྐང་ངོ་བཤགས། བཏང་བཞག་ཚད་ནོར་བསྐང་ངོ་བཤགས། བཟླས་བརྗོད་དུས་ཆག་བསྐང་ངོ་བཤགས། བསྙེན་སྒྲུབ་དུས་ཡོལ་བསྐང་ངོ་བཤགས། མཆོད་པ་དུས་འདས་བསྐང་ངོ་བཤགས། ཉམས་དང་ཚོགས་འདྲེས་བསྐང་ངོ་བཤགས། ཉམས་ཀྱི་ཟས་ཟོས་བསྐང་ངོ་བཤགས། ཉམས་ཀྱི་ཆུ་འཐུང་བསྐང་ངོ་བཤགས། རྒྱུ་ཆུང་ཕུད་ཉམས་བསྐང་ངོ་བཤགས། ལེ་ལོའི་དབང་གྱུར་བསྐང་ངོ་བཤགས། དུག་ལྔའི་དབང་གྱུར་བསྐང་ངོ་བཤགས། ཐེ་ཚོམ་དབང་གྱུར་བསྐང་ངོ་བཤགས། གྲོགས་ངན་དབང་གྱུར་བསྐང་ངོ་བཤགས། ཟས་ངན་དབང་གྱུར་བསྐང་ངོ་བཤགས། གནས་ངན་དབང་གྱུར་བསྐང་ངོ་བཤགས། བསྐང་བས་བྱང་ལ་བཤགས་པས་དག། བྱང་དག་ཚངས་པའི་དངོས་གྲུབ་སྩོལ། མི་འགྱུར་སྐུ་དང་མི་འགག་གསུང་། མི་འཁྲུལ་ཐུགས་ཀྱི་དངོས་གྲུབ་སྩོལ། བཙན་ཕྱུག་འཕན་དར་ལོངས་སྤྱོད་ཚེ། མཐུ་རྩལ་དབང་གི་དངོས་གྲུབ་སྩོལ། བཀྲ་ཤིས་བདེ་སྐྱིད་ཕུན་ཚོགས་དང་། ཐེག་ཆེན་མཆོག་གི་དངོས་གྲུབ་སྩོལ། སྒྲུབ་གཤེན་བདག་ཅག་འཁོར་བཅས་ལ། བདུད་གཡོས་ཆུད་ལངས་བཙན་འདྲོལ་དང་། བོན་ཟོར་ཆོས་ཟོར་མུ་སྟེགས་བྱད། ལོ་ཀེག་ཟླ་ཀེག་ཞག་ཀེག་དང་། རྨི་ལམ་མཚན་སྡིག་པྲ་ལྟས་རྩུབ། ལྟས་ངན་དགྲ་ཐན་བཅས་པ་དང་། དགྲ་རྐུན་དར་དང་ནད་ཡམས་གཡོས། གཟའ་དང་རྒྱུ་སྐར་དལ་ཟེར་དང་། སྡེ་བརྒྱད་གདུག་པའི་ཟ་རེས་སོགས། མི་མཐུན་ལོག་པའི་བར་ཆད་རྣམས། མཁའ་ལ་བཟློག་ཅིང་དབྱིངས་སུ་བསྒྱུར། ཀློང་དུ་བསྟིམ་པའི་ཕྲིན་ལས་མཛོད། བོན་གྱི་བསྟན་པ་བཤིགས་པའི་དགྲ། གཤེན་རབ་དབུ་འཕང་སྨད་པའི་གཤེད། རྔ་ཐོགས་དཀོར་ལ་འབག་པའི་འདྲེ། ཟབ་མོའི་དམ་ལ་ལྡོག་པའི་སྲི། སྒྲུབ་གཤེན་བདག་ལ་སྡང་བ་དང་། ཚེ་ནོར་དཀོར་ལ་གནོད་པ་ཡི། སྡང་དགྲ་གནོད་བགེགས་ཐམས་ཅད་ལ། ཡེ་ཤེས་ལྷ་ཡིས་བཀའ་ཆད་ཕོབས། དམ་ཅན་སྲུང་མས་དབུ་གཡོག་ཐོངས། ལྷ་སྲིན་དྲེགས་པས་བྱོལ་ཟོར་ཕོབས། དབང་དུ་བསྡུས་ལ་རྡུལ་དུ་རློགས། རིངས་པར་ཁུག་ལ་མྱུར་དུ་སྒྲོལ། ཕྲིན་ལས་ཅི་ལྟར་བཅོལ་བ་བཞིན། རིག་འཛིན་ཐུགས་རྗེ་མ་ཆུང་ལ། རྒྱལ་བའི་བྱིན་རླབས་མ་ཞན་ཅིག། མ་སྲིང་མཐུ་རྩལ་མ་ཆུང་ཞིག། དམ་ཅན་དམ་ལ་མ་འདའ་བར། བཅོལ་པའི་ཕྲིན་ལས་གྲུབ་པར་མཛོད། དེ་ལྟར་ཉམས་ཆག་སྐོང་བའི་མཁྱེན་གསོལ་ནི། ལྷ་སྲུང་ཡོན་ཏན་དྲན་པའི་བློ་ཡིས་བསྐུལ། སྐྱོན་སྒྲིབ་འགལ་རྐྱེན་སེལ་ཕྱིར་མཉེས་པར་བྱ། འགལ་འཁྲུལ་མཆིས་ན་ལྷ་སྲུང་གཉན་ལ་བཤགས། དགེ་བས་འགྲོ་ཀུན་རིག་འཛིན་ས་ཐོབ་ཤོག། ཅེས་པ་འདི་ནི་ལྷ་སྲུང་མཉེས་ཤིང་བར་ཆད་ཞི་བའི་ཆེད་དུ་གཤེན་གྱི་དྲང་སྲོང་ཤེས་རབ་རྒྱལ་མཚན་གྱིས་བཀྲ་ཤིས་སྨན་རིའི་ཁྲོད་དུ་སྦྱར་བ་དགེའོ།།
༼ཁྱུང་ཁྲི་ལྡེ་ནས་མཐུན་སྦྱོར་ཞུས།༽