ཞང་ཞུང་ལུགས་ཀྱི་ཐེག་དགུའི་སྐོར་ལ་ཐོག་མར་དཔྱད་པའི་གཏམ།
དེའི་དང་པོ་ལྷ་རྩེ་ཐེག་པ་ནི། སྐབས་དང་པོའི་རྣམ་བཤད་དང་། བོན་སྒོ་གསལ་བྱེད། ཐེག་རིམ་གསལ་བའི་སྒྲོན་མ་སོགས་མཐུན་པར་གཏེར་འབུམ་གྱི་ལུང་ཚིག་དྲངས་པ་འདི་ལྟར། ལྷ་རྩེ་ཐེག་པའི་བོན་རྣམས་སུ། །བསྙེན་སྒྲུབ་ཞི་ཁྲོའི་ཕྱག་རྒྱ་ཡིས། །འཁོར་ལོ་ཤོད་ཁྲན་ས་ལ་ནི། །ཡེ་སངས་ཡེ་ལྕམ་འདུལ་གཤེན་གྲུབ། །ཅེས་པས་བོན་སྒྲ་འཇུག་པའི་གཞི་ནི་གོང་དང་མཐུན་ལ། བསྙེན་ཞེས་པའི་དོན་ནི་བསྙེན་པའི་གཞི་མ་སྒོ་དགུ་ཞེས་པའི་དོན་དང་མཐུན་པས། དེ་དགུ་ནི། ལུས་ཀྱི་བསྙེན་པ་གསུམ་དང་། ངག་གི་བསྙེན་པ་གསུམ། ཡིད་ཀྱི་བསྙེན་པ་གསུམ་མོ།། དང་པོ་གསུམ་ནི། ལུས་རང་བཞིན་གྱི་ཕྱག་རྒྱ་ཆ་ལུགས་ལྔ་ལྡན། དབང་སྒྱུར་འཁོར་ལོའི་ཕྱག་རྒྱ་གཡས་གཡོན་དུ་སྒྱུར་བ། བསྐྱེད་པ་སྐུ་བསྟོད་ཀྱི་ཕྱག་རྒྱ་རང་རང་གི་བརྡ་ལྟར་བཀྲོལ་ལོ།། གཉིས་པ་ངག་གི་བསྙེན་པ་གསུམ་ནི། རྒྱུ་མ་ནོར་བ་རྩ་བའི་སྔགས། ཐུགས་རིན་པོ་ཆེ་ཙི་ཏའི་དཀྱིལ་དུ་བཟླ་བ། བསྐྱེད་པ་རྐྱེན་གྱི་སྔགས། བརྗོད་མེད་རླུང་གི་རྟ་ལ་བསྐྱོན་ལ་བཟླས། བཟླས་པ་ལས་རིམ་གྱི་སྔགས། རུས་སྦལ་བྱེ་མའི་ནུར་འགྲོས་ལྟར་བཟློས། ཡིད་ཀྱི་བསྙེན་པ་གསུམ་ནི། དེ་བཞིན་ཉིད་ཀྱི་ཏིང་ངེ་འཛིན་ནི། སྟོང་པ་མཐའ་བྲལ་དུ་སྒོམ། ཀུན་ཏུ་སྣང་གི་ཏིང་ངེ་འཛིན་ནི། ཚད་མེད་བཞི་ལྡན་དུ་སྒོམ། རྒྱུའི་ཏིང་ངེ་འཛིན་ནི། ཡིག་འབྲུ་ལས་གཞལ་ཡས་གདན་དང་ལྷ་སྒོམ་པའོ།། ཞེས་གསུངས་པ་ལྟར་ཡིན། སྒྲུབ་ཅེས་པའི་དོན་ནི་སྒྲུབ་པའི་ཡན་ལག་བཅོ་བརྒྱད་ཅེས་པ་དང་མཐུན་པས། ཕྱི་སྐུའི་སྒྲུབ་པ་དྲུག་ནི། བཀོད་པ་མ་འདལ་«མཎྜལ་»ལ་སྒྲུབ་པའོ། །ནང་གསུང་གི་སྒྲུབ་པ་དྲུག་ནི། སྙིང་པོ་སྔགས་སུ་སྒྲུབ་པའོ། །གསང་བ་ཐུགས་ཀྱི་སྒྲུབ་པ་དྲུག་ནི། བྱང་ཆུབ་སེམས་སུ་སྒྲུབ་པའོ། །ཞེས་བོན་སྒོ་གསལ་བྱེད་ལྟར་བཀོད་པའོ།། ཡང་ན་དབལ་མོ་ལས་ཐིག་ལྟར། བསྙེན་པ་དང་ནི་ཉེ་བསྙེན་དང་། །སྒྲུབ་པ་དང་ནི་བསྒྲུབ་ཆེན་པོ། །རྣམ་པ་བཞི་རུ་ཤེས་པར་བྱ། །ཞེས་ལས་རིམ་ལ་ལྟོས་པའི་བསྙེན་སྒྲུབ་ཡན་ལག་བཞི་ཡི་ཆིངས་དང་། ལམ་རིམ་ལ་ལྟོས་པའི་བསྙེན་སྒྲུབ་ཡན་ལག་བཞིའི་ཆིངས་ཞེས་འཇོག་པ་ཡིན་ནོ།། ཞི་ཁྲོ་ཕྱག་རྒྱ་ཡིས་ཞེས་པས། འབྲས་བུ་གསང་སྔགས་ཀྱི་ལམ་རིམ་གྱི་རྨང་གཞི་ཏིང་ངེ་འཛིན་རྣམ་པ་གསུམ་ལ་བརྟེན་ནས་གྲུབ་པའི་རང་གི་བསྐྱེད་སྟོབས་ལ་བརྟེན་ནས་ཐོབ་པའི་ཡི་དམ་ལྷ་ཡི་སྐུ་དང་། བསྐྱེད་རིམ་གྱི་ལག་རྗེས་ལ་བརྟེན་ནས་གྲུབ་པའི་སྒྱུ་ལུས་སོགས་ལ་གོ་བ་ཡིན། འཁོར་ལོ་ཤོད་ཁྲན་ས་ལ་ནི། །ཞེས་པས་ཐེག་པ་འདིའི་ལུགས་ཀྱི་ས་ལམ་གྱི་རྣམ་བཞག་བསྟན་པ་ཡིན་ལ། ཡེ་སངས་ཡེ་ལྕམ་འདུལ་གཤེན་གྲུབ། །ཅེས་པས་ལམ་རིམ་དེ་ལ་བརྟེན་ནས་ཐོབ་པའི་ཡེ་སངས་རྒྱས་པའི་སྐུ་ཡི་བཀོད་པ་དང་། གཞན་དོན་འཕྲིན་ལས་མཛད་ཚུལ་བཅས་བསྟན་པ་ཡིན། ཐེག་པ་འདི་ནི་ལྷོ་གཏེར་ལྟར་ན་ཨ་དཀར་བ་དང་། དབུས་གཏེར་ལྟར་ན་དངོས་བསྐྱེད་ཐུགས་རྗེ་རོལ་པའི་ཐེག་པའི་ཁོངས་སུ་འདུས་པར་སེམས་སོ།། དེས་ན་ཐེག་པ་འདིའི་གྲུབ་མཐའི་རྣམ་བཞག་འབྱེད་ཚུལ་དང་། ཀུན་རྫོབ་དང་དོན་དམ། ལམ་ལྔ་ས་བཅུ་བགྲོད་ཚུལ། འབྲས་བུ་ལམ་དུ་ཁྱེར་ཚུལ་རྣམས་སྤྱིར་ཨ་དཀར་ཐེག་པའི་ལུགས་ལྟར་འཆད་དགོས་པར་སྣང་ངོ་།། སྤྱིར་ཨ་དཀར་བའི་ཐེག་པ་དང་། དངོས་བསྐྱེད་ཐུགས་རྗེ་རོལ་བའི་ཐེག་པ་གཉིས་ལ་ཁྱད་པ་ཡོད་པར་འདོད་པ་ཡིན།
དེ་གཉིས་པ་སྣང་རྩེ་ཐེག་པ་ནི། སྐབས་དང་པོའི་རྣམ་བཤད་དང་། བོན་སྒོ་གསལ་བྱེད། ཐེག་རིམ་གསལ་བའི་སྒྲོན་མ་སོགས་མཐུན་པར་གཏེར་འབུམ་གྱི་ལུང་དྲངས་པ་འདི་ལྟར། སྣང་རྩེ་ཐེག་པའི་བོན་རྣམས་སུ། །དབྱིངས་དང་ཡེ་ཤེས་གཉིས་མེད་ཀྱིས། །རིགས་ལྔ་དབྱིངས་ཀྱི་གནས་སུ་གྲུབ། །ཅེས་པས་བོན་སྒྲ་འཇུག་ཡུལ་གོང་དུ་སྣང་ལྡན་ཐེག་པའི་སྐབས་སུ་བཤད་པ་དང་མཐུན་པ་ཡིན་ལ། དབྱིངས་དང་ཡེ་ཤེས་གཉིས་མེད་ཀྱིས། །ཞེས་པས་ཐེག་པ་འདིའི་ལུགས་ཀྱི་གཙོ་བོ་རྟོགས་པའི་ལྟ་བ་དང་། ལྟ་བ་ཉམས་སུ་ལེན་ཚུལ་ནི་དབུས་གཏེར་ལྟར་ཤིན་ཏུ་དོན་ལྡན་ཀུན་རྫོགས་ཀྱི་ཐེག་པའི་སྐབས་ནས་ཡབ་སྣང་བ་ཆེན་པོ་དང་། ཡུམ་དབྱིངས་ཕྱུག་ཆེན་མོ། སྲས་གཉིས་མེད་བདེ་བ་ཆེན་པོ་ཞེས་པའི་དོན་དང་མཐུན་པ་ཡིན། རིགས་ལྔ་དབྱིངས་ཀྱི་གནས་སུ་གྲུབ། ཅེས་པས་དོན་ནི། ཐེག་པའི་རིམ་པ་མངོན་དུ་བཤད་པའི་མདོ་རྒྱུད་ལས་ཤིན་ཏུ་དོན་ལྡན་ཀུན་རྫོགས་ཀྱི་ཐེག་པའི་སྐབས་སུ། དཀྱིལ་འཁོར་ཕྱག་རྒྱ་མ་ལུས་ཀུན། །རྒྱུ་རྐྱེན་མ་ཡིན་རྫོགས་ཚུལ་བསྒོམ། །འབད་རྩོལ་དག་གིས་སྒྲུབ་མི་དགོས། །ཡིན་ལ་ཡིན་པར་ངོ་ཤེས་ན། །མཚོ་ལ་གཟིངས་འགྲོའི་ཚུལ་བཞིན་སྒྲུབ། ཅེས་པའི་དོན་ལ་གནས་པས། དེ་ནི་རིགས་ལྔ་ལས་སོགས་ལྷ་དབྱིངས་ཉི་ཟླ་ཤར་བ་ལྟར་རྫོགས་ཚུལ་གྱིས་སྒོམ་པ་བསྟན་པ་ཡིན། དེས་ན་ཐེག་པ་འདི་ནི་ལྷོ་གཏེར་ལྟར་ཐེག་པ་བརྒྱད་པ་ཡེ་གཤེན་པའི་ཐེག་པ་དང་། དབུས་གཏེར་ལྟར་ན་ཤིན་ཏུ་དོན་ལྡན་ཀུན་རྫོགས་ཀྱི་ཐེག་པ་དང་དོན་གཅིག་ཏུ་གནས་པས། ཐེག་པ་འདིའི་ལུགས་ཀྱི་རྟོགས་པའི་ལྟ་བ་དང་། ལམ་རིམ་པ་གཉིས་ཀྱི་ཉམས་ལེན། ལམ་ལྔ་ས་བཅུ་བགྲོད་ཚུལ། སྒྲིབ་གཉིས་སྦྱང་ཚུལ། ཟུང་འཇུག་སྒྱུ་ལུས་སྒྲུབ་ཚུལ་རྣམས་ཤིན་ཏུ་དོན་ལྡན་ཀུན་རྫོགས་ཀྱི་ཐེག་པ་བཞིན་འཆད་ན་གཞུང་དོན་དང་མཐུན་པར་སྣང་ངོ་།།
