ལེགས་བཤད་ལམ་རིམ་ལས། ” ཀྱཻ་མ་སྙིགས་དུས་འདིར་སྐྱེས་པའི། །ཁྲི་གཙུག་བསྟན་ལ་གཤེ་བ་ཚོལ། །དེས་ནི་བུ་ཚས་ཕ་ཁུ་ཡི། །རིགས་རྒྱུད་ངན་པ་བཤད་དང་མཚུངས། ། ” ཞེས་གསུངས་སོ། །

སེམས་ཀྱི་འཆར་སྒོར་ཕབ་པའི་གདུང་ཚིག

གངས་དཀར་ལྷུན་པོ་གནམ་གྱི་ཀ་བ་ཅན། །གནས་མཆོག་སྤུ་རྒྱལ་ལྷུན་པོའི་ལྟེ་འཚལ་ནས། །འོད་དང་ཟེར་བཅས་འཕོས་པའི་སྐར་ཆེན་ཞིག །གཞོན་ནུའི་ལང་ཚོ་དུས་ཀྱིས་མ་ཡོལ་བར། །ཉེ་ཆར་བདེ་བར་བཞུད་པའི་ཤུལ་ལམ་དུ། །སྐྱེལ་མའི་སྨོན་ཚིག་དང་པོ་སྒྲོན་མཁན་སུ། །ཁོ་བོ་ལས་ཀྱི་རླུང་བུས་ཤུགས་ཀྱིས་དེད། །བདག་སེམས་དྭངས་མས་བཏབ་པའི་སྨོན་ཚིག་རེར། །གཤིས་ཀྱི་ཡིན་ལུགས་སྦྲེལ་ནས་ཕུལ་དང་ལྷན། །གདུང་སེམས་ཚིག་གི་བསྟར་པ་རེ་གཉིས་ཤིག །ཁྱེད་ཉིད་ཕེབས་སྐྱེལ་ཞུ་མཚོན་རྟེན་དོད་དུ། །དྲང་པོའི་བསྟར་ལ་བརྒྱུས་ནས་འབུལ་ཚུལ་ཏེ། །གསོན་པོའི་འཇིག་རྟེན་ཁམས་ཀྱི་སྣང་བརྙན་འགའ། །དྲན་པའི་རྡོ་ལ་བསྐོས་པའི་རི་མོར་གསལ།། དེ་ཡང་གཅིག་དགུ་གོ་གཉིས་ལོ་ཟླ་ནས། །གདན་གཅིག་ལྷན་དུ་འཛོམས་པའི་སྐལ་བཟང་ཚེས། །མཁན་སློབ་ཉི་ཟླ་ཆ་གཅིག་གཙུག་ཏུ་བཀོད། །ལོ་ཟླའི་འགྲོས་ཀྱི་གོམ་སྒྲ་ཐོས་བསམ་དང་། །འཆད་རྩོད་རྩོམ་པའི་ལས་ཀྱིས་སྐྱོང་བའི་རིང་། །ཤེས་བྱའི་གཤིས་ལ་བཅར་བའི་ངག་རྟ་དང་། །འཁོར་བའི་ལས་ལ་སྡིགས་པའི་རྒྱུ་འབྲས་སོགས། །བདེན་པའི་དེ་ཉིད་གྱེར་བའི་དབྱངས་རྟ་ལས། །ངོས་དང་ལྐོག་གི་གཡའ་དྲི་མ་ཕོག་ཅིང་། །ཆགས་དང་སྡང་བའི་གཟུགས་ཅན་ག་ལ་སྟེ། །འཕྲག་དང་དོགས་པའི་མེ་ལྕེས་མ་ཚིག་པར། །དཔྱོད་ལྡན་རིག་པ་འབར་བའི་སྐུ་རུ་བཞེངས། །དེ་ཡང་སྔོན་ཚེའི་བསོད་ནམས་དཔུང་འཐུག་པས། །མདོ་སྔགས་སེམས་ཀྱི་བཀའ་གནད་མདུད་པའི་རྒྱ། །གནམ་དཔྱོད་རལ་གྲིས་བཀྲོལ་ལ་ལམ་ཡངས་ཤིང་། །སྒྲ་དག་སྙན་ངག་དཀར་ནག་རྩིས་རིག་དང་། །བཟོ་གནས་ཤེས་བྱ་སྤྱི་དང་ཐིག་རྡུལ་ཚོན། །མཆོད་རྟེན་གཟུངས་འབུལ་བཅའ་བཟོ་གྱེར་དབྱངས་དང་། །གསང་སྔགས་ཕྱག་ལེན་བྲིས་དང་སྒྱུ་རྩལ་སོགས། །ཐམས་ཅད་ཐབ་ཆགས་ཙམ་གྱིས་མ་ཚིམས་པར། །ཁུངས་ལྡན་ཞལ་རྒྱུན་ཚད་ཐུབ་འཛིན་ཐུབ་མཁན། །སྤུ་རྒྱལ་མིང་གིས་བརྒྱན་པའི་མཁས་དབང་ཁྱེད། །ང་ཚོའི་ཀླད་ནས་ཤར་བའི་ཉི་མར་གྱུར། །འོན་ཀྱང་བཅུ་ཕྲག་བཞི་ནང་སྐུ་ཚད་ལས། །ཞིང་འདིར་མ་བཞུགས་ཕོངས་སེམས་ཚད་མེད་ཀྱང་། །བསམ་ཞིང་བསམ་ན་ཐུགས་རིག་གསལ་བའི་རྗེས། །རིག་པའི་གནས་ལ་བྱས་པའི་དགེ་མཚན་ཏེ། །རྩོམ་རིག་བདུད་རྩི་བབ་པའི་ཉིང་བཅུད་དང་། །བགྲེས་པོའི་གཏམ་ལ་རེ་བའི་དམིགས་འདུན་སོགས། །གཅིག་ཆད་གཉིས་ལྷག་མེད་པའི་བྱ་བ་གང་། །རྗེས་འཇུག་བུ་སློབ་རྣམས་ལ་གཅེས་སུ་བཞག །དེས་ན་ཁྱེད་ཀྱི་སྐུ་ཚེ་མཐར་ཕྱིན་ཅེས། །མ་སྨྲས་ན་ཡང་དངོས་པོའི་གནས་ཚོད་ལགས། །འགའ་རེས་སྣ་རེའི་ཤེས་བྱ་ཡོན་ཏན་ཙམ། །མཆོག་གི་ནོར་དུ་རློམ་ནས་གནས་ས་འུར། །འདི་འདྲའི་ཉེར་གཅིག་དུས་ཀྱི་མཁས་རློམ་ཁྱུ། །ས་ཡི་རྡུལ་གྲངས་བརྩེགས་ཀྱང་ཅི་ལ་སྨོན། །ཁྱེད་ཀྱི་ཐུགས་དམ་གསལ་བའི་མེ་ལོང་ངོས། །ཤར་ཚད་རང་སྐྱ་ཕེར་དང་དོ་བསྡུར་ཚེ། །གཞན་རྣམས་དྲེགས་པས་ཚོས་པའི་བོང་ཟླ་ཙམ། །འགའ་རེས་ཟ་འཐུང་ཚད་དུ་འཛིན་ནས་སུ། །མི་ཡི་གཤིས་ལུགས་ཉུག་པའི་ལུགས་མང་ཡང་། །སྤྱི་སྒེར་གང་གི་མཛད་སྤྱོད་གནད་འཛིན་དུས། །ཤེས་ཡོན་གཙིགས་སུ་བྱེད་པའི་ཕུགས་བསམ་གཅིག །གཞན་གནོད་སེམས་པ་བོར་བའི་སྒམ་བརླིང་གཉིས། །ཆེ་དྲེགས་ང་བོ་བརླག་པའི་བཏང་སྙོམས་གསུམ། །གྲོགས་ལ་བརྩེ་འདང་ཟབ་པའི་ཕྱི་ཐག་བཞི། །གང་དང་གྲོས་ཁ་བསྡུར་ན་བསྟུན་མཁས་ལྔ། །ཤེས་ཚད་ཕྱག་ལེན་ཐུབ་པའི་མཁྱེན་ཡོན་དྲུག །བདེན་པ་ངོས་ལྐོག་ཐུབ་པའི་དྲང་ཚུགས་བདུན། །ཁོ་བོས་བཀུར་ས་ཆེ་ས་བསྟོད་ས་ཡིན། །དེ་ལྡན་ཁྱེད་ཀྱི་གཤིས་ལས་རྙེད་པའི་གྲངས། །སེམས་ཀྱི་འཆར་སྒོར་ཕབ་པའི་གདུང་ཚིག་འདི། །ཚེ་འདིར་གཅེས་དམ་མཐུན་པའི་ལེགས་སྐྱེས་སུ། །དེ་རིང་སྐུ་གསུམ་མེ་ལྷའི་ཐུགས་ཀ་རུ། །འོད་ཀྱི་གོང་བུར་བསྒྲིལ་ནས་ཕུལ་བ་ལགས། །ཁྱེད་ཉིད་ཀུན་བཟང་གདོད་མའི་རྒྱལ་ས་རུ། །བྱུང་ཕུགས་གྲོལ་མཐའ་ཐུག་པའི་རང་གཤིས་ལ། །འགྱུར་མེད་བརྟན་པར་བཞུགས་པའི་སྨོན་ལམ་ཞུ། །སླད་དུ་རྗེས་སུ་དྲན་པའི་རྡོ་རིང་ངོས། །བགྲེས་པོའི་འབེལ་གཏམ་བྲིས་པའི་ལེགས་བྱང་དུ། །དཀར་ཆག་ཐོ་རུ་བཀོད་པའི་སྡོམ་ཚིག་འདི། །ཁྱེད་ཀྱི་ཆེ་མཐོང་དྲན་པའི་འགྲིགས་རྟགས་ཡིན། །དགོངས་ལམ་དུ་མངའ་བ་མེ་ལོང་ཞེས་སུ་འབོད་པ་དེས་སོ། །

ཕྱི་ལོ་ ༢༠༠༡ ནས་བཟུང་བགྲང་བྱ་བཅུ་ཙམ་གྱི་རིང་༧དཔལ་ལྡན་ཁྲི་བརྟན་ནོར་བུ་རྩེའི་ལོ་དེབ་༼བགྲེས་པོའི་འབེལ་གཏམ་༽གྱི་རྩོམ་སྒྲིག་པ་དགེ་བའི་བཤེས་གཉེན་སྤུ་རྒྱལ་བ་ཉི་མ་རྒྱལ་མཚན་མཆོག་འཇིག་རྟེན་འདི་ནས་ཚེ་ཡི་དུས་བྱས་ཏེ་ཕུང་པོ་ཞུགས་འབུལ་གྱི་སྐབས་ཐོག་འདི་དང་བསྟུན་རྗེས་དྲན་གྱི་བྱང་བུ་ཞིག་གི་དོད་དུ་བགྲེས་གཏམ་ནང་འཁོད་ཁོང་གི་རྩོམ་གྱི་དཀར་ཆག

(2001)

གཅེས་འོས་ནོར་བུའི་ལང་ཚོ།

༡༽འབྱུང་ལྔའི་རིམ་གྲོའི་གནད་མིག་ཟུར་ཙམ་བརྗོད་པ།

(2002)

བགྲེས་པོའི་ཉམས་མྱོང་ཁ་ད།

༢༽གཤིན་པོར་དགེ་སྡོང་འདེབས་པའི་གཏམ་ཐུང་།

སྙན་རྩོམ་རྣ་བའི་བཅུད་ལེན།

༣༽ཀུན་དགའ་དོན་འགྲུབ། གཟེ་མ་ར་མགོ།

(2003)

དཔྱད་གཏམ་ལུང་རིག་ཐུར་མ།

༤༽གཏེར་སྟོན་བརྒྱ་རྩའི་སྐོར་གྱི་དཔྱད་གླེང་།

སྙན་རྩོམ་རྣ་བའི་བཅུད་ལེན།

༥༽ལས་དབང་ཁོ་ནའི་དབང་དུ་ཤོར། གཟེ་མ་ར་མགོ།

(2004)

བགྲེས་པོའི་གནས་ལྔའི་བང་མཛོད།

༦༽ཆགས་གནས་འཇིག་སྟོང་བཞིའི་སྐོར་གྱི་རྣམ་བཤད་རྟོག་གེའི་ཁ་རྒྱན།

སྙན་རྩོམ་རྣ་བའི་བཅུད་ལེན།

༧༽དབྱར་གྱི་མཛའ་བོས་བོར་བའི་འདོད་གདུང་།

(2005)

དགུང་སྟོན་སྤྲོ་དགའི་གླུ་དབྱངས།

༨༽རྟོགས་བརྗོད་མཆོད་ཚིག་ཉིང་ཁུ་ཐིགས་པ་བཞུར།

(2006)

གཅེས་འོས་ནོར་བུའི་ལང་ཚོ།

༩༽བོད་ཡིག་རེ་ཞིག་གི་འབྲི་སྟངས་དང་དེའི་སྒྲ་གདངས་སྐོར་གྱི་སྲོལ་རྒྱུན་ཅུང་ཙམ་སྨོས་པ།

སྙན་རྩོམ་རྣ་བའི་བཅུད་ལེན།

༡༠༽གཤེན་གྱི་དཀའ་ཐུབ་རྣམ་གསུམ་ཨེ་མ་ཧོ།

(2007)

བགྲོ་གླེང་གར་གྱི་སྟེགས་བུ།

༡༡༽ཕྱི་པ་དང་ནང་པའི་ཐ་སྙད་ནི་ལྟོས་གྲུབ་ཀྱི་མིང་ཡིན་པའི་སྐོར་ལས་འཕྲོས་པའི་བགྲོ་གླེང་།

(2008)

སྙན་རྩོམ་རྣ་བའི་བཅུད་ལེན།

༡༢༽དབྱར་རྩ་དགུན་འབུ་མེད་ན་མུ་གེས་འཆི། གཟེ་མ་ར་མགོ།

(2009)

ལོ་རྒྱུས་གཟི་ཡི་ཐང་མ།

༡༣༽དམུ་རིགས་གཤེན་གྱི་གདུང་འཛིན་ཁོ་ནའི་གདུང་རབས་མཚན་རིམ་ཟུར་དུ་བཀོད་པ་མུ་ཏིག་ཕྲེང་བ།

(2010)

བགྲེས་པོའི་ཉམས་མྱོང་ཁ་ཏ།

༡༤༽བླ་ཆེན་ཡབ་སྲས་ཀྱིས་གཤེན་སྲས་ལྷ་རྗེར་གདམས་པའི་དགེ་སྡིག་འབྲུ་ཐུས་ཀྱི་ཞལ་ཏ་ལས་ཟུར་དུ་བཏུས།

(2013)

ཉེར་ལྔའི་རྟེན་འབྲེལ་ཤིས་ཚིག

༡༥༽ཉེར་ལྔའི་དུས་སྟོན་ལ་ཕུལ་བའི་བསྟོད་ཚིག་མེ་ཏོག་ཚོམ་བུ།

(2017)

གཅེས་འོས་ནོར་བུའི་ལང་ཚོ།

༡༦༽དུས་རབས་བདུན་པའི་ཡར་སྔོན་དུ་བོད་ཀྱི་ཚད་མ་རིག་པའི་རྣམ་བཞག་ལ་དཔྱད་པ།

དེ་ལྟར་ཁྱོན་བསྡོམས་རྩོམ་ཡིག་ཁ་གྲངས་བཅུ་དྲུག་ཙམ་འདི་ནི་བགྲེས་གཏམ་ལོ་དེབ་ཁོ་ནའི་ནང་འཁོད་ཀྱི་དཀར་ཆག་ཙམ་ལས། ཁོང་གི་གསུང་རྩོམ་ཡོངས་ཀྱི་དཀར་ཆག་མིན་པས་གཟིགས་སྤྱན་ལྡན་པ་རྣམས་ལ་དྲན་གསོས་སུ་ཕུལ་བ་ལགས་སོ། །ཕྱི་ལོ་ ༢༠༡༨ ཟླ་ ༠༡ ཚེས་ ༡༩ ཉིན།

པར། ཁྱུང་གཤོག ཁྱུང༔སྨོན་ལམ། མེ་ལོང་དྲ་བ་བཅས་ནས་སོ། །

(སྤྱིའི་གཟིགས་གྲངས། 101 དེ་རིང་། 1)

གཤམ་གྱི་རྩོམ་ཡིག་རྣམས་ལ་སྐུ་ཉིད་ཐུགས་མཉེས་པོ་ཡོང་སྲིད།

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན། རྟགས * ཅན་ངེས་པར་དུ་བླུགས་དགོས།

མཚམས་སྦྱོར། རྩོམ་ཡིག་གོང་མ།
༧དཔལ་ལྡན་ཁ…
error: རྩོམ་འདི་བདག་དབང་ཅན་ཡིན།