སྨོན་ལམ་རྣམ་གསུམ།
༄༅། །རྫོགས་པའི་སངས་རྒྱས་འགྲོ་བའི་སྐྱོབ་གཅིག་པུ། །འདོད་པ་ཇི་བཞིན་འགྱུར་བའི་ཐུགས་རྗེས་དང༌། །ཡིད་བཞིན་ནོར་བུ་དམ་པའི་མཐུ་དཔལ་དང༌། །ཕྱོགས་བཅུའི་སངས་རྒྱས་རྣམས་ཀྱི་བྱིན་རླབས་ཀྱིས། །བདག་གིས་སྨོན་ལམ་བཏབ་པ་ཇི་ལྟ་བར། །ཀུན་ནས་ཡོངས་སུ་འགྲུབ་པར་མཛད་དུ་གསོལ། །འཇིག་རྟེན་དག་ན་བསམ་པ་རྩེ་གཅིག་ཏུ། །གཡུང་དྲུང་བོན་ལ་མོས་གྱུར་ཇི་སྙེད་རྣམས། །བསམ་པ་བར་ཆད་མེད་པར་འགྲུབ་པར་ཤོག །ཕྱོགས་བཅུའི་ཞིང་ཁམས་ཇི་སྙེད་རྒྱ་ཆེ་བར། །དེ་སྙེད་ཡོངས་སུ་དག་པའི་སངས་རྒྱས་བོན། །གཡུང་དྲུང་སེམས་པ་མང་པོས་གང་བར་ཤོག །རབ་འབྱམས་གནས་པའིསྐྱེ་འགྲོ་དུ་མ་རྣམས། །རྟག་ཏུ་ཚེ་རིང་ནད་མེད་བདེ་བ་དང༌། །བོན་དང་མཐུན་པའི་དོན་ཀུན་འགྲུབ་པར་ཤོག །གཡུང་དྲུང་ས་ལ་བདག་ནི་སྤྱོད་བྱེད་ཅིང༌། །ཚེ་རབས་རྟག་ཏུ་སྐྱེ་བ་དྲན་པ་དང༌། །གཞོན་ནུར་གྱུར་ལ་རབ་ཏུ་བྱུང་བར་ཤོག །རྣམ་པར་རྒྱལ་བའི་རྗེས་སུ་སློབ་བྱེད་ཅིང༌། །ལེགས་ལམ་བཟང་པོའི་སྤྱོད་པ་ཡོངས་སུ་ལེན། །འཆལ་མེད་དག་པའི་ཁྲིམས་ལ་གནས་པར་ཤོག །ལྷ་ཀླུ་མི་དང་སྐྱེ་འགྲོ་ཐམས་ཅད་ལ། །རང་སྒྲ་ཇི་འཚམས་པ་རུ་འཕྲུལ་ངག་སྒྲས། །གཡུང་དྲུང་བོན་འདི་ཡོངས་སུ་སྟོན་པར་ཤོག །སྡིག་སྒྲིབ་ལས་ཀྱི་རྣམ་སྨིན་ཀུན་བྱང་ནས། །གཡུང་དྲུང་སེམས་ལ་ཉམས་པ་མེད་པ་དང༌། །བླ་མེད་དོན་ལ་དུས་ཀུན་བརྩོན་པར་ཤོག །བདུད་དཔུང་ལས་དང་ཉོན་མོངས་རབ་ཞི་ནས། །རྣམ་གྲོལ་ཞི་བའི་མཆོག་ལ་རབ་གནས་ཤིང༌། །ཐོགས་མེད་དམ་པའི་དོན་ལ་སྤྱོད་པར་ཤོག །ཞིང་གི་རྡུལ་སྙེད་སེམས་ཅན་མ་ལུས་པ། །བདག་གི་གདུལ་བྱ་རྣམ་དག་ཉིད་གྱུར་ཏེ། །ངན་འགྲོའི་གནས་ངན་མ་ལུས་རྒྱུན་ཆད་ཤོག །འགྲོ་ལ་ཕན་པའི་སེམས་ནི་ཡོངས་འཕེལ་ཞིང༌། །བསྐལ་པ་ཀུན་ཏུ་བདུད་ལས་རྣམ་པར་རྒྱལ། །རབ་རྒྱལ་བོན་གྱི་འཁོར་ལོ་བསྐོར་བར་ཤོག །བདག་དང་མཚུངས་སྤྱོད་གཡུང་དྲུང་སེམས་དཔའ་རྣམས། །ཟབ་མོའི་སྤྱོད་དང་མི་འབྲལ་བདག་འཕྲད་ཅིང༌། །ནམ་ཡང་ཡིད་སུན་འདོད་སྐྱོ་མེད་པར་ཤོག །སངས་རྒྱས་གང་ཞིག་རྣམ་པར་རྒྱལ་བ་ཡིས། །མངོན་སུམ་ལྷང་ངེར་བལྟ་ཞིང་དེའི་གསུང་སྤྱོད། །རྒྱ་ཆེན་མཆོད་པའི་ཚོགས་ཆེན་བསགས་པར་ཤོག །བསྐལ་པ་མ་འོངས་གྲངས་འདས་ཐ་དག་ཏུ། །སྐྱོ་བའི་སེམས་མེད་རྣམ་པར་རྒྱལ་བ་འཛིན། །མི་ཕམ་མགོན་གྱུར་མཆོག་ཏུ་སྤྱོད་པར་ཤོག །སྲིད་པ་ཐམས་ཅད་སྲིད་པས་ཁྱབ་པ་ལྟར། །བོན་རྣམས་དེ་བཞིན་རྣམ་པར་རྒྱལ་བས་ཁྱབ། །སེམས་ཅན་ཤེས་བྱ་དེ་ཡང་དེ་འདྲར་ཤོག །བསོད་ནམས་ཡེ་ཤེས་མི་ཟད་རྒྱ་མཚོ་ལ། །ཐབས་དང་ཤེས་རབ་བསྟན་པའི་གྲུ་གཟིངས་ལམ། །ཡོན་ཏན་འབྲས་བུ་ཡིད་བཞིན་ནོར་རྙེད་ཤོག །སངས་རྒྱས་ཀུན་གྱི་གཙོ་བོ་དམ་པའི་མཆོག །རྣམ་པར་རྒྱལ་བའི་སྤྱོད་པ་སྤྱོད་བྱེད་ཅིང༌། །ཉེས་པའི་དགྲ་དཔུང་མ་ལུས་འཇོམས་པར་ཤོག །ཞིང་ཁམས་རྒྱ་མཚོ་མཐའ་ཡས་མ་ལུས་པར། །རྣམ་འཕྲུལ་རྒྱ་མཚོ་ཟད་མེད་ཡོངས་འགྱེད་ཅིང༌། །འཁོར་བའི་རྒྱ་མཚོ་ཡོངས་སུ་སྐེམ་པར་ཤོག །དུས་གསུམ་རྣམ་པར་རྒྱལ་བའི་གཟིངས་ཆེན་པོ། །སྙན་པའི་བ་དན་ནམ་མཁའི་མཐའ་མཉམ་ཞིང༌། །སྐུ་གསུམ་གཞལ་ཡས་ཁང་ལ་རབ་གནས་ཤིང༌། །འཇིག་རྟེན་ཁམས་ཀྱི་སྒྲོན་མེ་སངས་རྒྱས་རྣམས། །ཉི་མ་སྤྲིན་བྲལ་ལྷང་ངེར་གསལ་བ་ལྟར། །གདུལ་བྱ་ཀུན་ལ་དེ་སྙེད་རབ་འཆར་ཤོག །སྟོབས་ཆེན་ཕ་རོལ་གནོན་པའི་ཟིལ་དང་གཟི། །བརྗིད་ལྡན་རི་རྒྱལ་ལྷུན་པོའི་བསོད་ནམས་བརྟན། །བདུད་དཔུང་ལས་དང་ཉོན་མོངས་རབ་འཇོམས་ཤོག །གཡུང་དྲུང་བོན་འདི་རྒྱ་མཚོ་གཏིང་ཟབ་པས། །ངོམ་མེད་བློ་ཡི་དོན་ལ་མྱོང་བར་སྤྱོད། །འཆལ་བ་མེད་པར་བདག་ལ་རྫོགས་པར་ཤོག
