བྱམས་མ་ཆེན་མོ་རྩ་བའི་འབུམ།
དེ་ནས་ཡང་སྟོན་པ་གཤེན་རབ་ཀྱིས་ཡེ་གཤེན་ཆེན་པོ་རྩལ་སྟོབས་སེང་གེའི་ཤུགས་ཅན་ལ་བཀའ་སྩལ་པ། དུས་གསུམ་རྒྱལ་བ་ཐམས་ཅད་ཀྱི་ཡུམ་ཆེན་མོ་བདེ་བར་གཤེགས་པ་བླ་ན་མེད་པ་ཡང་དག་པར་རྫོགས་པའི་སངས་རྒྱས། བྱམས་མ་ཆེན་མོ་འདི་ནི་ཡེ་གཤེན་གཡུང་དྲུང་སེམས་དཔའ་ཆེན་པོ་རྣམས་ཀྱི་སྣང་བ་ལ། ཤེས་རབ་ཀྱི་ཕ་རོལ་དུ་ཕྱིན་པའི་ཡུམ་དུ་བསྟན་ནས། ཡེ་གཤེན་བཀོད་པ་དོན་གྱི་འབུམ་གཏན་ལ་ཕབ་ནས། ལྟ་བ་རྣམ་པར་དག་པས་ཐམས་ཅད་གཡུང་དྲུང་གི་ས་ལ་བཀོད་དོ། །ཡེ་གཤེན་བཀོད་པ་དོན་གྱི་འབུམ་ཆེན་མོ་དེ་ཡང༌། ཚིག་བཞི་ཚིགས་སུ་བཅད་པ་གཅིག་གིས་བསྡུས་ནས་བཤད་པ་ནི། སྤྱོད་པ་ཀློང་ནས་མས་འཛེག་ཅིང༌། ལྟ་བ་དབྱིངས་ནས་ཡས་ཕུབ་སྟེ། སྙིང་རྗེ་ཆེ་ལ་གཞི་བླངས་ནས། ཐབས་ནི་ཕ་རོལ་ཕྱིན་བཅུ་སྤྱོད། ཞེས་བྱ་བ་ཡེ་གཤེན་རྣམས་ཀྱིས་དགོངས་པ་དེ་ཡོངས་སུ་འདུས་པར་བཤད་ནས། དང་པོ་ཡེ་གཤེན་པའི་སྤྱོད་པ་ཟབ་མོ་ལ་བསླབ་པ་ལ། ཡེ་གཤེན་ཆེན་པོ་ཞེས་པའི་ངེས་ཚིག་ནི། ཡེ་ནས་སྣང་ཞིང་སྲིད་པ་ཐམས་ཅད་ཡེ་གཤེན་གྱི་དགོངས་པ་ཡིན་ཏེ། བརྟགས་ན་གཞན་གང་ཡང་མེད་པའི་ཕྱིར་རོ། །བརྟག་པའི་གནས་གཉིས་ཏེ། ཡུལ་དང་ཤེས་པའོ། །ཡུལ་ལ་བརྟགས་ན་འདི་ལྟ་སྟེ། ཀུན་རྫོབ་༼ངོ་བོ་བསྟན་ནས་འགོག༽སྣང་བ་ཧོམ་ཧོམ་པ། རྣམ་པར་དཔྱད་ན་བདེན་མེད་དེ། དངོས་རྣམས་རྟག་པའི་སྙིང་པོ་ཅན། དེ་སྔ་མ་སྲིད་ད་མི་འབྱུང༌། དཔེར་ན་མིག་ཡོར་ལྟ་བུ་ཡིན། རྣམ་དཔྱོད་ཤེས་རབ་མིག་ཡོད་ན། ཐམས་ཅད་སྟོང་པ་༼དེས་བརྟགས་ན་རང་གིས་སར་ཟློག༽མ་ལགས་པ། ཉི་ཚེའི་ཕྱོགས་ཉིད་བརྟག་པའི་གཞི། དངོས་པོ་ཞེས་བྱ་ངས་མ་མཐོང༌། དཔེར་ན་ནམ་མཁའ་ལྟ་བུ་ཡིན། ཡོངས་སུ་དག་པ་༼ཤེས་པ་མ་ཡིན་ཀྱང་དེ་ཉིད་འཁྲུལ་པ་བཅས་སོ།༽ངས་བལྟས་ན། མ་དག་འཁྲུལ་པའི་ཉིང་འཁྲུལ་བརྩེགས། མེད་པ་ཡོད་པར་འཁྲུལ་པའི་བློས། རང་ལ་རང་བཞིན་སྣང་བ་ཤར། དཔེར་ན་གཟུགས་བརྙན་ལྟ་བུ་ཡིན། དེ་ལྟར་འཁྲུལ་པ་ཀུན་བཅོམ་ཡང༌། དངོས་ཞེན་བསྙོན་པ་བཟློག་པའོ། །ཅི་སྙེད་བསྟན་ཀྱང་མི་གོ་ནས། གཟུགས་དང་བེམ་རིག་འཕྲ་རབ་རྡུལ། དངོས་རྣམས་བསྙོན་པར་མི་ནུས་ཕྱིར། རྟག་པའི་རང་བཞིན་ཡིན་ཞེ་ན། ཁྱོད་རང་འཁྲུལ་པའི་རྣམ་རྟོག་དེ། དཔེར་ན་༼དེ་ལྟར་འཁྲུལ་པ་བོར་རམ་དངོས་ཞེན་བསྙོན་པས་བཟློག་པའོ།༽སྒྲ་བརྙན་ལྟ་བུ་ཡིན། ཞེས་ཕྱི་རོལ་ཡུལ་ལ་བདེན་འཛིན་བཀག་ནས། གཤེན་གྱི་དགོངས་པ་བསྟན་པ་ལ་གཉིས་ཏེ། དངོས་སེམས་སམ་བློ་ཡིན་པར་བསྟན་པ་དང༌། དེའི་མཐའ་གཤེན་གྱི་དགོངས་པ་ལས་མེད་པར་བསྟན་པའོ། །སེམས་དང་སེམས་འབྱུང་སྣ་ཚོགས་ལ། རང་བཞིན་དུ་མ་ཅིར་སྣང་ཡང༌། ངོ་བོ་གཅིག་ལ་མ་མཆིས་པ། དངོས་པོ་མ་གྲུབ་ཐིག་ལེ་གཅིག མ་རྟོགས་འཁྲུལ་པའི་༼སེམས་འཁྲུལ་པ་གྱུར་ནས་བཀག༽བློ་ཅན་གྱིས། རྟོག་པ་རབ་རིབ་ཅི་མཐོང་ཡང༌། བརྟགས་ནས་སྙིང་པོ་གཞན་མེད་དེ། འཁྲུལ་བྲལ་དེ་ཉིད་དོན་དམ་ཡིན། ཡེ་ནས་གནས་པའི་སེམས་ཉིད་དོ། །ཤེས་པས་རྣམ་པར་༼འཁྲུལ་པ་བཟློག་ནས་བསྟན།༽བཅད་བྱས་ན། ཤེས་པ་ལ་ནི་གཞན་ཡོད་མིན། གཞན་མེད་ཕྱིར་ན་ཉག་གཅིག་སྟེ། དེ་ནི་རིག་པའི་ཡེ་ཤེས་སོ། །དེ་ནི་ཐམས་ཅད་སེམས་སུ་བསྟན་པའོ། །དེ་ནས་སེམས་ཡེ་གཤེན་ལས་འགྲོ་ས་མེད་པར་བསྟན་པ་ནི། མ་རྟོགས་༼ལོག་པའི་གྲུབ་མཐའི་སྐད་གསུམ་བཀག༽བདུད་ཀྱི་ལས་རྣམས་དང༌། ལོག་རྟོག་མུ་སྟེགས་ཕྱི་ཅི་ལོག ཐེ་ཚོམ་ཅན་གྱི་ལུང་མ་བསྟན། བྱ་བ་སྣ་ཚོགས་གང་བྱས་ཀྱང༌། མཐར་ཐུག་བཞག་ནས་བསྟན་པ་ཡི། དངོས་རྣམས་ཞེན་པ་གང་ཡང་མེད། ངན་སོང་གསུམ་དང་ལྷ་གནས་དང༌། སྐྱེ་འགྲོའི་བྱ་བ་ཀུན་༼རང་བཞིན་མེད་པར་བརྟགས་པ།༽ཚང་བ། ཀུན་སྤྱོད་ཀུན་གྱི་སྙིང་པོ་རུ། ཟོ་ཆུའི་རྒྱུན་བཞིན་འཁོར་བར་སྣང༌། དེས་ན་བཞག་ན་མཐར་ཐུག་གོ། བརྟན་ཞིང་བདེ་ཆེན་མི་འགྱུར་བ། འདོད་ན་གཤེན་རབས་དགོངས་པ་འདི། མཉམ་པར་ཞོགས་དང་མྱོང་བས་འགྲུབ། ཆེ་བརྟན་ནམ་མཁའི་དབྱིངས་བཞིན་གནས། འཁྲུལ་སྒྲིབ་བློ་བུར་སྤྲིན་ལྟར་དེངས། སེམས་ཅན་ཡོངས་ཀྱི་མཐའ་བསྟན་པ། འདི་ལས་འགྲོ་ས་མེད་པར་བཤད། ཅེས་བསྟན་པ་ནི། དང་པོ་ཡེ་གཤེན་དུ་སྣང་བ་ཐམས་ཅད་བསྒྲུབས་པའོ། །ཡེ་གཤེན་ཆེན་པོ་དེ་ལྟ་བུའི་སྤྱོད་པ་ཟབ་མོ་ལ་འཇུག་པ་ལ་གསུམ་སྟེ། དང་པོ་སེམས་བསྐྱེད་པ་དང༌། བར་དུ་ཚོགས་བསགས་པ་དང༌། ཐ་མར་སྤྱོད་པ་ཟབ་མོ་ལ་བསླབ་པར་བྱའོ། །སེམས་བསྐྱེད་པའི་གཡུང་དྲུང་གི་ཡན་ལག་དགུ་ནི། བསྐྱེད་པའི་རྒྱུ། བསྐྱེད་པའི་རྟེན། བསྐྱེད་བྱའི་ཡུལ། བསྐྱེད་པའི་ཐབས། བསྐྱེད་པའི་གནས། བསྐྱེད་པའི་ཚུལ། བསྐྱེད་པའི་དོན། བསྐྱེད་བྱེད་ཀྱི་སྟོབས། བསྐྱེད་པའི་འབྲས་བུའོ། །རྒྱུ་ནི་སེམས་དེ་ཡང་སེམས་སུ་གནས་པའི་དོན་གྱི་བསྐྱེད་ན། གོང་བཞིན་གཤེན་གྱི་དགོངས་པར་གྱུར་བ་ཚེགས་མེད་དེ། མུན་པ་ལོ་སྟོང་ལོན་ཀྱང༌། སྒྲོན་མའི་རྐྱེན་སྐད་ཅིག་གི་འགྱུར་བ་བཞིན་ཡིན་པས། སེམས་བསྐྱེད་པའི་རྟེན་ལྷ་དང་མིའི་འགྲོ་བ་རྣམས། བསྐྱེད་བྱའི་ཡུལ་རྫོགས་པའི་སངས་རྒྱས། བསྐྱེད་པའི་ཐབས་སྨོན་འཇུག་གི་སེམས། བསྐྱེད་པའི་གནས་འཁོར་བའི་རྒྱ་མཚོ། བསྐྱེད་པའི་ཚུལ་གཞན་དོན་ལྡན་པ། བསྐྱེད་པའི་དོན་དམན་པ་བླ་མེད་དུ་འགྱུར་བ། བསྐྱེད་བྱེད་ཀྱི་སྟོབས་སེམས་དཔའི་སྤྱོད་པ་ཟབ་མོ་ལ་བསླབས་པས། བསྐྱེད་པའི་འབྲས་བུ་རང་དོན་དང་ལྡན་མ་མྱོང་བ། འཁོར་བ་མ་སྟོངས་ཀྱི་བར་དུ་སེམས་ཅན་གྱི་དོན་བྱེད་པའོ། །དེའི་ཚིག་ནི། ཡེ་གཤེན་ཆེན་པོ་བདག་ལ་དགོངས་སུ་གསོལ། བདག་དང་མཐའ་ཡས་པའི་སེམས་ཅན་ཐམས་ཅད་ཀྱི། རྫོགས་པའི་སངས་རྒྱས་རྣམས་ཀྱིས་སྤྱད་པ་ཅི་བཞིན་དུ། གཡུང་དྲུང་སེམས་དཔའི་སྤྱོད་པ་ཟབ་མོ་ལ་སྤྱོད་པར་བྱའོ། འཁོར་བའི་༼གནས་སྡུག་བསྔལ་ལས་བཟློག་ནས་ཐར་པ་ཐོབ་པས།༽བོན་རྣམས་འཁོར་བ་ལ་གནས་པར་མི་བྱའོ། །འཁོར་བའི་བོན་༼ཚུལ་མ་རིག་པ་ལས་བཟློག་ནས་ཚུལ་ཡེ་ཤེས་བསྐྱེད་པ།༽རྣམས་ལ་འཁོར་བ་ལ་གནས་པར་མི་བྱའོ། །འཁོར་བའི་བོན་རྣམས་ཀྱི་༼ཐེག་དམན་ལས་བཟློག་ནས་ཐེག་ཆེན་སྙིང་རྗེ་བསྐྱེད་པ།༽འཁོར་བ་ལ་གནས་པར་མི་བྱའོ། །རྣམ་པར་བྱང་བ་༼སྟོབས་ཀྱི་འཁོར་བ་ཙམ་བཟློགས་ནས་སངས་རྒྱས་ས་ལ་བཀོད།༽མྱ་ངན་ལས་འདས་པ་ཡང་དག་པའི་དོན་ལ་སྤྱོད་ཅིང་སྤྱོད་པར་བྱའོ། །དེ་ན་སེམས་བསྐྱེད་ཅིང་གཡུང་དྲུང་སེམས་དཔའི་སྤྱོད་པ་ལ་འཇུག་པར་བྱའོ། །གཉིས་པ་ཚོགས་བསགས་པ་ནི། རྒྱུ་
